لم تكن امي(لبوة الاسد)

البارت السابع

،،رواية لم تكن أمي(لبوة الأسد) ،،
_البارت السابع _
.......................
عايش المن ؟
لا حضن يتلگه تعبي ،
ولا اذن تسمع غناي ..
البايع الدنيا لاجلهم بايعيني !
.....................
ضياء_امشي روحي لغرفتج كاافي خبالات تره بزززعت رووحي  الله ياخذني واخلص من مشاكلكم..
اباع على مازن مبتسم ورافع حاجبه مكيف بأنتصاره وعمتي تكول لبابا ياخذني للسيد يقره عليه..
عفتهم وركضت لغرفتي ابجي والله والله يجي يوم وافضحك بي يا مازن وانتقم منك على كل دمعه وكل اذيه جبتها اليه ماطلع هدى اذا سكتت عنك بعد..
حسيت على احد واكف اباب الغرفه رفعت راسي هذا مازن..
حجيت بحده،، شترريد جااي كبالي هاا  تروح من خلقتي لو شلون!!
مازن_رد الباب وحجه،، على كيفج عيني مو زينه العصبية الزايده على الواحد تسوي امراض تره..
هدى _اااطلع برره برره
مازن _اشش اهدي اني حذرتج لو لا كتلج بس تحجين اكلب عليج الايه لو لا وانتي ركبتي راس وعاندتي لو مطاوعتني مجان صار عليج شي زين هسه من طلعوج بيج جن..
هدى _غمضت عيني اطلب الصبر ادري شنو من مله هذا عينك عينك جاي كبالي شنو محد يكله وين طاب شسوي..
حجيت،، انته مو جنت بالحمام شوصلك للشارع؟
مازن _ههه لا تخافين عليه مو صعبه عليه اول مبده صوتج يرتفع عفتج وطلعت ركض من البيت رحت اسوكت كم شغله واجيت تره ماكو أسهل منها حاسب حساب كل شي اني قبل ماجيج..
هدى _صكيت على سنوني وحجيت،،
والله اذا هسه متولي من خلقتي يا مازن اراويك الي بيها جن شسوي..
ااااطلع برررره برررره..
بس شافني صرت أعصاب عافني وطلع مشايفه بنذاله هذا الإنسان والله كون توكع بشر أعمالك يا حقير..
همام _لازم استكان الجاي وصافن على الناس الرايحه والراده وخبصه السوك والشغل باوعت على مرتضى..
عوف اللعب بالتلفون لا اكوملك هسه يلا فضنه رتب هذني الاحذيه حطهن بالمقدمة حته من نكمل نسوي جرد للمحل
مرتضى _يمعود مطاير الشغل تره خبصتنه
همام_ادكوم لو شلون
مرتضى _كمت يابه كمت ها اها صاير عصبي ولك
همام _هوه الي يكابل خلقتك الحلوه شلون يصير مزاجه بعد
مرتضى _ههه اني اروح من يمك احسلي لا تجيني كتله طايره
همام _اي والله كوم لانو وضعك ضوجني كاضيها تسخت واني اشتغل بمكانك..
طلعت جكاره من جيبي شغلتها وصرت اعزل بصناديك الاحذيه واسويلهم جرد اني والجكاره بحلكي وناطي ضهري للباب دخلت مره
ام مريم_السلام عليكم يمه
درت وجهي عليها ورديت السلام،، وعليكم السلام تفضلي خاله
ام مريم_زاد فضلك يمه بس شحاطات طبيه عدكم؟
همام_اي هذني على هذا الرف كلهن طبيه والاسبوع الجاي راح تجي وجبه جديده..
ام مريم _تعاي يمه شوفيلي فد وحده مابيه ادور اني وقياس ٣٦
همام _باوعت جان اكو وياها بنيه بس مجانت مبينه لانو واكفه وره امها مبينه كلش خجوله بحيث ابد مرفعت راسها..ومن تحجي صوتها يادوب ينسمع صار عدي فضول اشوف وجهه بس فشله شنو واكفه واباع بوجهه..
ظلوا الام وبنتها يتناقشون شنو ياخذن واني ناطيهم ضهري اكمل شغلي لحد ماسمعت صوت ناعم وهادئ حييل..
مريم_بله زحمه خويه هذا الموديل مابي قياس ٣٦؟
همام _رفعت راسي اشوفه القطعه صارت عيوني بوجهه الابنيه انصدمت او بالاصح تفاجأت بشكلها هلكد محلوه بحيث استحيت من نفسي واني الي ماباع هيج على بنات الناس اكول عدي اخت يطلع بعرضي بس هاي سطرتني اريد اوخر عيني منها ماكدر..
حسيت عليها تضايقت من نضراتي ويمكن حستني زاحف حقج بويه هوه اني كمت احس نفسي زاحف..
نزلت عيني على القطعه وتقصدت بعد مارفعها حته ماسبب احراج الي والها..
دورت على القياس الي طلبته ماكو خلصان كتلها..
خلصان والله اذا يعجبج شرفينه على المحل الاسبوع الجاي راح نجيب وجبه ثانيه من هذا الموديل..
ام مريم _هاا زين يمه فدوه حطلي عود قياس ٣٦ على جهه لانو كلش ارتاحيت عليها باللبس اكثر من البقيه وان شاء الله الاسبوع الجاي اجيك
همام_من عيوني حجيه تنورين المحل..طلعوا
باوعت على الابنيه رجعت نزلت راسها وحته مباوعت على شكولي اكيد ضاجت مني بس شسويلها هوه اني مدري شبيه فوكاها عيونها جوزيات فاتح كبار وجهها صافي عبالك مثل بشره الأطفال ما شاء الله ربي مبدع بخلقتها
مرتضى _هاا ابو الشباب وين رحت بعدك بالمحل لو طلعت ويه الحجيه وغمزله
همام _ممكن تبطل سخافه جنت افكر بحسبه ببالي شتعرفني قابل
مرتضى _ههه هوه لانو اعرفك انصدمت كلت هذا الزلمه خاف يروح زايد خلي اصحي
همام _حبيبي تسكت لو اجيك بالحزام لانو الظاهر اليوم جلدك كلش مشتاق للضرب
ظل مرتضى يمسلت بالحجي واني ناطي الأذن الطرشه بالي ابد مو يمه مدري شبيه كملنه شغلنه لليل طلعت للكهوه اني ومرتضى صح مرتضى يشتغل عدي بس هوه صاحبي وعضيدي احجي عليه بس بالشقه..
نزلت اركيله واجو الشباب كل واحد يحجي بسالفه واني ساعه وياهم وساعه اصفن انتبهت على طفل صغير عمره بحدود ال٣ سنوات كاعد بحض ابو بس لفتني اله عيونه نفس عيون الابنيه الي اجتني للمحل اليوم..
خاف عايز اني عود كلت ماريد افكر بيها هنوب طلع هذا الصغيرون كبالي.. شويه وحسيت على الشباب يحجون وياي واني مو يمهم خرب واهسي كلش سلمت ورجعت للبيت
ادري شبيه هيج انثولت اليوم اشو شايف أشكال البنات وكل يوم تجي وحده شكل مجنت اهتم كلش لانو ماحب هاي السوالف مال مراهقين بس خرب هاي الخجوله ظلت بعقلي يمكن لانو ابنيه محترمه وحلوه وبهل وكت نادره هيج بنيات..
وصدك ثاني يوم نسيت السالفه ورجعت عادي اطب واطلع اروح واجي ناسيها... مرت ايام واجتنه بضاعه جديده للمحل ومن ضمنها الاحذيه الطبيه شفت الموديل الي رادته الحجيه طلعت قياسها الي وصتني عليه خطيه خاف ترجع تجي وهم متلكاه..
وصدك والله بعد كم يوم اجتني الحجيه للمحل عاد اني مدري شبيه كيفت حييل وكعدت اعدل بشعري بس الظاهر انضربت بوري من شفت الحجيه جايه وحدها اليوم لعد الخجوله وينها؟؟
ام مريم _هلا يمه شلونكم..
رديت،، بخير حجيه تفضلي كعدي خاف مابيج حيل للوكفه
ردت،، لا يمه ماعدي وكت اكعد بس مريت أسألك على الشحاطه الي كتلك عليها هذاك الاسبوع كتلي حتجي وجبه جديده جبتوا؟
رديت،، اي حجيه ثواني نطيتها ضهري أطلع الي حطيتها على جهه بس صفنت لحضات ومادري ليش اجه على بالي اسوي هيج كمت وكتلها..
والله حجيه جايبين بس غير نوعيه تصير شويه قويه تردين تشوفيها
ردت،، لا يمه اني ويني وين القوي
رديت،، إذا تكدرين مري عليه بعد يومين اني باجر راح اطلع اسوك بضاعه جديده واجيب من الي انتي طالبتها لانو مشت بسرعه عدي بالمحل
ردت،، اي والله ياريت يمه بس كون اكيد اجيبها ماكدر اجيك كل يوم ركبي متعيني
رديت،، لا اكيد حجيه واذا يعجبج جيبي البنات وياج لانو خوش وجبه احذيه بناتيه نزلنه شوفيهم يعني اذا تحبين
ردت،، متقصر يمه ان شاء الله يلا اني اترخص هسه
رديت،، الله وياج..
مرتضى _اكلك انته مخربط بالحسابات لو شنو لعد هذاك اليوم مو جبنه مثل الي طالبته الحجيه
همام _اي خلصت
مرتضى _لا لعد وهذني هناا شنو!!
همام _هاا مشفتهن تصدك عبالي خلصت
مرتضى _والله سالفتك مو خاليه ابدد
همام _توكل على شغلك عزيزي الشغله مو يمك..
راح مرتضى واني صار فكري يم الخجوله عود ليش ما اجت اليوم ويه امها معقوله ضاجت مني وليش اضوج مني قابل شمسوي هيه نضره وصارت بالهفوه..
زين اني شستفاديت هسه من رجعت المره هيج واني عدي شغلتها بلا اجت مره لخ وهم الخجوله مو وياها شنو حصلت من كل هاي الدوخه الي جبتها لروحي؟؟
هدى _جيات خالي يمنه كثرت بخصوص يرجع احلام يمهم وكل مره ينختم حديثهم بصياح وعياط بدون نتيجه ترضى الطرفين بابا تعب من الحجي والضغوطات الي صارت عليه اخير شي خالي كله باجر نجي اني وابويه ونفضها السالفه مايصير هيج..
بابا علامات الحيره صارت على وجهه المشكله شنو يحجي وشنو يكلهم يجاوبوا غلطت علمها ربيها انته مو شامرها والخاطر اطفالك رجعها..
سليم أخير فتره كلش تنحس يريد احلام لانو حنانها كله صابته لسليم لهذا الطفل يبقه يحن لحضن امه..
اذكر خواتي جانن من يضوجوها صح تضربهم بس مو مثلي قوي مع ذالك شويه ويرجعون لحضنها الام شكد متصير قاسيه وتضرب بس تنطي شويه محبه لو هديه للطفل يرجع ركض لحضنها
اني مكدرت ارجع لحضنها مكدرت اروح واكلها لميني لحضنج محتاجتج يوم لانو الحواجز الي انبنت بينه كلش هواي ومستحيل تنكسر بيوم..
ثاني يوم من الصبح اجو جدو ابو احلام وخوالي ٢ وصاروا يحجون بنفس الموضوع بس الاختلاف هل مره جدو جاي بنفسه الظاهر ضاج من وجود احلام ابيته.. شويه واجه هم جدو ابو بابا ومهيمن هم مدري شعجب جاي هوه وياه..
وبدت حديثهم واصواتهم تتعالا..
ابو احلام_ تره ميصير هذا الحجي اخذ مرتك وحلها بالتفاهم بيناتكم إلى متى تظل يمنه حته الناس كامت تحجي
ضياء _يعني سالفه بتك تريد امشيها عادي وارجعها بكل سهوله
الخال_هوه شنو بكل سهوله مو صارلها فتره طويله تتعاقب على غلطها وهيه بعيده عنكم كل يوم تتوسل بينه نرجعها تريد جهالها..
ابو احلام _فوكاها الابنيه كاعد يتخربط وضعها تره لا تأكل ولا تشرب حابسها روحها بالغرفه وكل ماطب عليها الكاها بالزاويه كاعده وتصفن على الحايط راح تتخبل علينه تره مو وضعيه هاي
ضياء_اادري اني هم بزعت روحي من مشاكلها و اذيتها لاطفالها مادري شنو من حقد شايله عليهم يعني ياريت بس اني الي ضرتني لا حته اولادي لاحتهم اذيتها اذا انته معقد بتك اني ابتلى
الخال_ماكو هيج حجي واذا على الضرب الي انضربته تره ماكو طفل مينضرب من أهله هاي احنه كبالك شلون صرنه رياجيل وعظمنه خشن من قسوه ابونه وأمنه علينه بس انتوا مادري عدكم شي عجيب
مهيمن _العفو منك اخويه اقاطعك بالخير اني وياك كلنه انضربنه بصغرنه ويمكن حته بكبرنه بس اكيد اكو سبب والي هوه نتعلم الصح من الغلط من نسوي شي مو صحيح يجي والدي او والدتي يأدبوني
بس مو من دون سبب لو علمود شي تافهه اني اجي اسكط أطفالي واضرب بله رحمه واجي اسوي سحر لاهل بيتي على يابو ميزوج عليها هذا مو حجي تره..
ابو احلام _اني ماعرف انطيها الكم من الاخير بعد ماكدر ابقى احلام ابيتي عدي كومه واجبات ومصاريف متحملهن من غير ٢ نسواني وبيتي ضيك علينه وطلاك اني ماعدي بقاموسي هيج شي لهذا يا ابو سليم اكسر الشر ورجعها وشنو تسوي بيها احنه مالنه دخل
ضياء_ استغفر الله ربي واتوب اليك..
الخال_هاا هسه شنوو؟؟
الحجي _حط أيده على كتف ابنه..
ضياء تره اولها وآخرها لازم ترجعها لانو مومال طلاك وشهيره بين الوادم  وبينكم ٤ أطفال وانته هسه من عفتها كل هذيج الايام عد أهلها صارت الها كرصت اذن..لهذا خلي ترجع بس اخذ جلمه من ابوها سالفه السحر اذا تكررت مالنه جار بيها بعد
ضياء_هوه هم هيج يابه مشوف ماعدي حل ثاني ورطه وكعت على راسي واني كلش تعب من هاي السالفه الي مكاعد تقبل تخلص عاد وعافيتي صايره على كدي والجهال يردون امهم كلها التمت..
مهيمن _هاهيه خالي حلها هيج احسن ما تكبر وتصير السالفه على لسان اليسوه والمايسوه
ضياء _خلي ترجع ميخالف بس عدي شرط هاي كدامك يابو احلام شسوي ابتك محد اله دخل عسى ما اكتلها خاف تحجون بعدين..
ابو احلام _هاهيه لعد احنه هسه رادين لبيتنه واخلي اخوها يجيبها لعدكم في امان الله
الله وياكم..
هدى _مضجت ولا تفاجأت لانو هوه هذا الي راح يصير بكل الاحوال اذا مو هسه بعدين صار الضهر وراح يبقون جدي ومهيمن ويانه على الغده رحت للمطبخ اسوي الي اعرفله وصبيحة تطبخ الشغلات الثكليه..
اجه مازن يحوم داير مدايري اني ولا اهتميت اله لانو انتقامي من اذيته اليه مستحيل انساه الي بسببه ابويه ضربني وميحجي وياي ويشوفني وحده كذابه..
فرشنه السفره بالهول والكل كعد كملنه ورحت صبيت الجاي الهم وصلت يم مهيمن حجه بصوت ناصي
مهيمن _لا دنكين كدام احد هدى
هدى _هزيت راسي اله رجعت للمطبخ انظف المواعين شويه وحسيت احد دخل كبل فزيت كل ظني مازن كبل عطت..
وووخررر منييي..
مهيمن _هاي شبيج؟؟
هدى _هاا هذا انته مهيمن
رفع حاجبه وحجه،، اي اني ليش منو عبالج
حجيت بتردد،، لا هيج بس اخترعت لانو فتت بدون صوت واني جنت صافنه
حجه،، الواحد يحجي الصدك كلامج مخش بعقلي بس عايفج على راحتج ولو قبل مجنتي هيج تضمين عليه هدى..
نسيتي من جنتي صغيره واني وين ماروح تجين وراي ومتعوفيني نسيتي كلامج من تكولين كل شي احتاجه اطلبه من عدك ليش متغيره وياي وانتي كلج هسه ١٣ صار عمرج ويمكن حدخلين بال١٤ يعني ماتوقع هذاك الاختلاف الي صار صح صرت  التحق اغيب عنكم فتره طويله بس مو معناها اذا نخيتيني اردج
حجيت،، شبيك همام انته ل..
حجه،، همام!!
هدى انتي بالج وين بالضبط؟
حجيت،، مقصدي  مهيمن لا تأخذ بخاطرك بس غير أسمائكم متشابه شسوي ههه
ابتسم،، تدرين شي بعدج متعرفين تجذبين عليه يلا على عموم ديري بالج على نفسج ولاتبقين بمكان واحد يم الولد ابقى يم خواتج ماوصيج بعد ولبسج اهتمي بي من مازن يجي للبيت..
رديت،، تمام تدلل...
ديطلع ورجع حجه،، هدى شبي خالي جنه وجهه ثكيل عليج؟
رديت،، ماكو شي انته صاير توهس كلش هواي تره بهل أثناء دخلت عمتي صبيحة للمطبخ وتباع علينه بنضرات شك..
صبيحة _اكول أسد شدسوي هناا صارلك اكثر من نص ساعة..
رفع حاجيه،، وانتي شنو كاعد تحسبين اليه لو تراقبين شسوي اتوقع شي مو يمج لا تفكرين بي..
يلا اني رايح في امان الله.. طلع مهيمن وعمتي ظلت تخوزر بيه مدري شكو هوه مهيمن من زمان وعلاقته هيج بيه والكل يعرف بيه يعاملني مثل فاطمة اخته
صبيحة_عود لا وصيج حته على أسد لوفي واتهمي يتحرش بيج
هزيت ايدي وعفتها ادري بيها تريد بس الزله عليه واني من بعد الي شفته منها ومن احلام فضلت طريق السكوت لانو من حجيت حته ابويه مصدكني..
شويه واندكت الباب طلع هذا خالي وجايب احلام وياه سلمت على عمتي صبيحة وشبكتها خوش رجعت الشله وراها فاتت يم بابا وكعدت تعتذر منه وحته بجي بجت جان شكلها اصلا تعبان الظاهر مجانت تاكل عدهم..
ضياء _كافي ماكو داعي بعد لهذا الحجي لانو مابيه نفع رجعتج اني بس لخاطر جهالنه بس قسماً بالله بس اسمع بيج راجعه لدروب السحر ثاني يوم تلكين روحج بالشارع..
احلام_لااا الله عليك ضياء عوف هذا الحجي والله ماعدي احد ابويه ميريدني وانته تذبني وين اروح اني
ضياء_لو صدك خايفه على نفسج مجان مشيتي بهذا الدرب
احلام _غلطت وسبحان الي ميغلط هاهيه اني حكعد على جهالي واسكت بس لا اذبني بعد يم اهلي
ضياء_ يلا  روحي من يمي تعبت من الحجي وصحتي بفضلج صايره عال العال
جنت واكفه يم الباب وسمعت كل حجيهم مشه اليوم هدوء وكل واحد ملتهي بروحه عمتي صبيحة ثاني يوم سوت حلاوه وزعت على روح زوجها ومازن اضطر يرجع اليوم لانو غاب عن دوامه هواي وسمعت على ساس مهيمن كايله روح بعد عاد اني سويت عرس من خلصت منه هههه
اجت ماما حياة تاخذ الحلاوه تلكيتها من الباب اباع عليها حليانه وشكلها مرتاح الظاهر السيد زين وياها الحمد لله
عاش من شافج ماما شنو صرتي متنشافين هاا..
حياة _مو ماما هذيج الفتره السيد جان مريض خطيه فلاونزه بالعظم واسبوع كامل اني وياها على شوربات وسوائل دافيه يلا فكت منه والله على بالي انتي وهوه خطيه يكلي معليج بيه روحي شوفيها بس منطاني كلبي أعوفه
هدى _ههه فديت كلبج الي يحب السيد
حياة_عيب ولج شنو تحجين ويه امج هيج..
هدى _هسه قابل جذب هاا..
حياة _مو شرط حب بس الرجال ممقصر وياي واني هم من واجبي ماقصر عليه بشي..
سكتت شويه وبعدين حجت،،اكول هدى خوما صارت لغوه بينج وبين احلام من رجعت اليوم
باوعت عليها وحجيت،، لا كل شي ماكو اصلا معليه بيها اني مامعترفه بيها ولو بيدي اشيل اسمها من جنسيتي واخلي بداله اسمج انتي..
ردت،، لا ماما لا تحقدين هيج وتخلين كلبج يصير اسود لو شميصير تبقه احلام الام الي جابتج..
رديت،، ليش تحجين هيج احس اكو كلام  تردين تحجي موو؟
ردت،، شوفي ماماتي مادري كلامي اذا راح يشفع لاحلام ومعاملتها الغير معقوله الج بس انتي كبرتي وأريد احجيلج هذني الشغلات صح مو مهمات حيل بس ماريد الحقد يترس كلبج بيوم..
جانوا  ناس ايام قبل كل همها تجيب المره الهم الولد واذا اجت بنيه تنكلب الوجوه ويذبون عليها أشكال الحجي شي فكر شي حظها نحس شي عوره ووو هوايه حجي..
طبعا مو الكل جان  الي ماكو بعقلة هيج مزعبلات واكو لاا بحيث اذا الرجال مصار عده ولد صارت الشغله عيب وفشله بحيث يمشي منزل راسه..
المهم امج احلام جانت عايشه بهيج بيئه للأسف ابوها الله يسلمه ربه دينه الولد بحيث ازوج ٥ مرات وطلك ٣ بس في سبيل يجي الولد بس ربج جان ينطي البنات وهوه يتخبل يكون يضرب بزوجته لو من يسمع حجايه يعذبها عذاب نفسي وجسدي لمرته..
حته بس يطفي نار القهر بكلبه وبعدين من قهرها الام هنوب تملخ بناتها وشنو يسوي بيها زوجها اطلع حركتها بأطفالها لهذا احلام من عاشت وشافت هيج بيئه اطبعت كل هاي العادات بيها..
هلكد مجانت تتعاير وتلوحها كتلات من أهلها صارت بيها مثل العقده.. الجهل والتفكير المحدود يأذي صاحبه اكثر من غيره وهذا الي صار وياهم..
ولعلمج احلام حته خواتج قمر وهاجر صارت تكتلهم من جنتوا بهذاك البيت بس مره لكفتها صبيحة وتخبلت عليها لانو صبيحة هيه مربيه قمر وهاجر وتحبهن ومقبلت تاذيهن..
حجيت،، لعد اني بت البطه السوده حلال عليه وحرام عليهن ههه والله ماعرف شكلج ماما بس الي اعرفه الام صح تضرب حته تريي او تعلم بس مو هيج وحته كلامج مينطي العذر الها تسوي هيج حتلو جان اسمي على اسم الانسانه الي جان يحبها بابا شعليه اني قابل..
ردت،، الله كريم بنيتي ماتضيق الا ما تفرج محد يبقه على حاله
لهيتيني بالحجي شوفي جبتلج غراض للمدرسه وخيطت الج قمصان جديده لانو اذكر مالاتج صغرن وهم هاج هذني الفلوس من ابو عمار كال بعد ميقبل ياخذ تصاميمج ابلاش لانو كاعد تمشي عده
هدى _ياا وشسوي بيهن اني ماما
حياة _حجيت وياه كتله هيه بس دتتعلم بس مقبل والله
هدى _ خليهن عدج ما احتاجهن وخاف احد ياخذهم وصدك شوفي هذني اخير شي رسمتهن وديهن اله
حياة_خوش عاشت ايدج كاعد تتطورين ماماتي طالعه عليه ههه
هدى _اي والله احلى شي صار بحياتي هوه طلعت عليج
ظلت قريب الساعتين وراها اجه عليها السيد وراحت ثاني يوم جان خميس داومت عادي بس الشي الغريب اشوف البنات يباعن عليه مدري شلون لو اشوفهم يتشاورن من يشوفوني ضجت حيل من نضراتهم شكو؟؟
سألت بنيه يابه شكو شبيكم هيج تباعون مجاوبت عاد اني هم غلست رجعت للبيت شفت احلام كاعده على القنفه وصافنه صايره هواي تصفن من اليوم الي رجعت بي يمنه رحت امسح الطبلات الي صايرات كبالها رفعت رداني..
سمعتها حجت..
احلام _هاي اني ضاربتج هيح على ايدج وصايره زركه؟
هدى _باوعت على اتجاه نضرها جانت على أيدي صايره زركه من ضربتني اخير مره..
جريت نفس وحجيت،،ليش متدرين بنفسج من ضربتيني وكاعد تسألين
صفنت فتره وحجت،، تدرين ماذكر شلون ضربتج هيج لدرجه صارت ايدج زركه.. من اضربكم افقد وماحس على نفسي لانو اصير كلش عصبيه ومن عصبيتي ماعرف شسوي
ابتسمت وحجيت بعتب،، خوش تسوين لانو اذا تذكرين ماتوقع ضميرج يرتاح على قساوتج هاي..
ياريت مره ثانيه من تضربيني بيها يكون عدج سبب قوي
هزت راسها وكامت لغرفتها..باوعت على أيدي وفكرت بكلامها معقوله متعرف بروحها من تضرب؟
للعصر كاعده ادرس اندكت الباب طلعوا جدو ومهيمن وابو مهيمن تفاجأت جيتهم لانو قبل يومين اجو شعجب سويت صينيه فواكه بعدني مطابه الصاله سمعت ابو مهيمن يحجي..
ابو محمد _والله يا ضياء اليوم جايك بشغله راح تفاجئك بس حالي من حالك اني هم تفاجأت
ضياء_ شنو كول؟
ابو محمد _والله جاي اليوم وطالب منكم القرب اكثر واناسبك رايد منك هدى ل..
هدى _بس سمعت كلامه كبل وكعت صينيه الفواكه من ايدي والصدمه احتلت كل معالم وجهي زواج واني بهذا عمري الصغير؟؟؟
يتبع....

تصويت وتعليق للاستمرار🥺