لم تكن امي(لبوة الاسد)

البارت الثالث والاربعون

،،لم تكن أمي(لبوة الأسد)،،
_البارت الثالث والأربعون _
~~~~~
ناسيّني، بس هم أچي ابالكَ
واترس عيّونك حزن وأتلاعب بُحالك؟
~~~~~~
هدى _راح مهيمن واني اخذتلي ملابس من الكنتور طبيت سبحت على السريع وفحصت روحي الحمد لله مابية شي جففت شعري ونزلت جوه جان الجو بعده متوتر عمة شادة راسة وتنوح حايره بمستقبل بنتها وعمو اصلا طب للغرفة وبعد مطلع منها غدير بالمطبخ تسوي الغده والولد كلهم طلعوا رحت يم غدير اساعدها..
_محتاجة مساعدة بشي..
غدير _لا شعدي قابل هوه تمن ودجاج..
هدى _دكعدي خل اكمل اني عنج مو حامل ليش تعبين روحج بالشغل..
غدير _يمعوده شمسوية قابل..
هدى _لا ميخالف اني ضايجة خلي التهي بالشغل ولا اظل افكر واحسب..
غدير _جريت نفس..
اي والله المشكلة همام خبلني نار عبالك ولا يكعد اذا ميسوي بالاخير فد شغلة ميرتاح ولا يسمع مني ولا من احد..
هدى _التفتت الها..
لا تخافين تره همام عاقل ماتوقع يتهور بشي غلط..
غدير _لج يا عاقل انتي مشفتي من البارحة لليوم شلون يتعارك وحارك الدنيا..
هدى _اي بس هم اكلج ماتوقع يغلط بشي..
غدير _ان شاء الله شريد قابل اني غير هذا الشي..
هدى _كملت الطبخة وطبعا الاكل مثل ما حطيناها شلناه والولد محد بيهم بين واحنه كل شوية نصعد لفاطمة نطمن عليها لو نسولف وياها نحاول نخفف عنها ولو بشي بسيط بس هيه بالمقابل جانت كلش هادئة ومكتفية بالسكوت وهذا الشي قلقنة الصراحة..
لاخير الليل يلا بينوا همام ومهيمن وطبعا محسن لهسه أبيت جده باقي ومحمد ما اجه بعد دخلوا سلموا وكعدوا ويانه بالاستقبال..شوية وحجة عمو..
ابو محمد _شصار وياكم..
مهيمن _كل شي مصار لحد هسه ننتضر والله كريم..
ابو محمد _استغفر الله احجي مهيمن شسويت ويه الولد دنفتهم دربنة..
مهيمن _يابه استقبلتة عدنة وسولفنه شوية يعني تصفية حساب يسموها ودانتضر يقرر حته يروح بطريقة ويخلصنة..
جنان _شيقرر..؟؟
مهيمن _كتلة يطلك فاطمة وهوه مقبل لهذا بقيته عدنة..
جنان _صخام بوجهي مهيمن يمة كول غيرها طلاك شنو تعرف انته شنو يعني بنية بعدها بأول عمرها وتطلك شنو يصير بيها تدمر ويدمر وياها كل مستقبلها وينحط عليها علامة..
همام _بده الحجي الماصخ شلون بيكم يمه شتردين انتي بالضبط ترجع اله مو دنكلج مزوج وعده طفل ومكون حياته كلها وياهم وهيه موقعها شنو بهل حالة هاا..؟
جنان_يمه فدوه لعينك بالتفاهم والتراضي ليش تكسرون بختها والله اموت بقهري عليها هيج..ابو محمد ليش ساكت احجيلك كلمة
ابو محمد _تنهد..
شحجي وشكول ان بقت متخلص وان عافتة هم متخلص خلي القرار لبنيتج تكدر تتقبل زوجها بعد مشافته ويه غيرها ومستغلها من سنة كاملة دوري راحتها قبل راحة غيرها هاي وحيدتنة ادفع دم كلبي الها ولا اشوفها هيج امدده وحالها الظيم..
مهيمن _يابة اني حاجيتها قبل ماطلع وكلتلي متريده بعد واذا نجي للواقع بعيد عن العصبية والعراك تره فارس طلع مو كفو وهاي كدامكم شفتوا ضربها وحبسها وماعده شخصية ياخذ قراره لنفسة انسان ضعيف حيل والاضرب ميشوف روحة غلطان بالعكس يطب بعين الواحد ويكلك شمسوي قابل حقي والشرع هذا حجي رجال بله..؟؟
همام _العفو منك هذا ذكر مو رجال والله اسب نفسي بهذاك اليوم من كلت انطوها اله..
ابو محمد _كل شي صار جان مقدر ومقسوم لا يفيد الندم ولا يفيد الحجي بالماضي لو حتلو جنه كلنه مراضين ومقابلين بي بس هم راح ياخذها وتعيش وياه ويصير الي صار..
الراح لو نسولف بي منا لباجر مراح يفيدنه بشي خلي نفكر بالحاضر والمستقبل لانو هوه الأساس بالوكت الحالي..
جنان _ياعيني الكوا اي حل بس غير الطلاك تره ادري بيها لفاطمة تحب رجلها وهواي ضحت علموده ومن تنفصل عنه راح تتأزم حالتها..
مهيمن _غلطانة يمه بقائها وياه راح يأزم حالتها خليها هسه تتأذه ولا تبقه طول العمر عايشة  ويه هيج انسان لاذمة ولا ضمير..
جنان _الله لا ينطيك يا فارس ولا يشوفك راحة بعمرك عساك بمرض خبيث ويدمر مستقبلك مثل مدمر مستقبل بنيتي وخليتها مكسوره هيج...
ابو محمد _اشش كافي عوفي سالفة الدعاوي تره نص الدعوه ترجع لصاحبها وبعدين الله موجود ومينسة عبده..
جنان _ونعم بالله مكلت شي بس غير من حركة كلبي..
همام _الوكت تأخر واني تعبان من رخصتكم..
ابو محمد _لحضة انته وين جنت طول النهار بره البيت..
همام _شنو السالفة يابة تحاسبني على الطلعة والطبة من يا وكت..
ابو محمد _من هذا الوكت يلا سولف..
همام _ضحك..
والله مو مثل الي ابالك لا تعاركت ولا تضاربت ويه احد بقيت عد غيث وافتريت شوية على كولتك ارتاح حته ماسوي مصايب..
ابو محمد_عود يصنف روح نام ولو ممقتنع كلش بكلامك..
همام _تصبحون على خير..
_وانته من اهل الخير..
غدير _شوية وكلمن طش لغرفتة واني هم غسلت ورحت للغرفة بدلت ملابسي بشي مريح للنوم وتمددت بصف همام اباع عليه نايم وحاط ايده على عيونة بله هوه نام لو بعده بقيت احوص اتحرك ساعة يمنه ساعة يسره..
همام _شبيج غدير مو نايمين اركدي شوية..
غدير _باوعت عليه بطرف عيني..
اي استاذ اسفين ازعجناك كمل نومتك عادي اعتبرني ممجودة..
همام _صدك عود شو تحجين وياي مدري شلون شكو مضوجج بشي..؟؟
غدير _اي مو بس ضايجة وزعلانة هم..
همام _هاا وشنو سبب الزعلة ست غدير..
غدير _يعني متعرف قابل..
همام _وداعتج ماعرف احجيلي انتي خل اعرف..
غدير _اليوم كله لا سألت عليه ولا حاجيتني وادك عليك مجاوب وكاضيها كلها بره واني بالبيت ميته خوف وقلق عليك وانته ضاربني بعرض الحايط..
همام _اوف كل هذني شايلتهن بكلبج عليه مو خوش سالفة تره..
غدير _اي اضحك عليه بعد شكو عليك قابل..
درت وجهي ناطيتة ضهري حسيت بي لف ايده على خصري وتقرب نام على جهتي..
همام _لا تزعلين مني غديري تدرين بيه بالي مو وياي هل فتره
غدير _واني شعليه بله..
حط راسة بركبتي يبوسها ويحجي..
همام _يابة حقج عليه كوليلي شنو تردين اسويلج حته ترضين واني حاضر لعيون مريتي..
غدير _هوه يعني اكو شي ببالي هسه خطر سوي اليه وارضى..
همام _اي كولي..
غدير _درت وجهه عليه وحجيت واني العب بياخت تراكة..
بدل هذا تراكك والبس مال بارحة لانو هذا بي ريحة صابون الغسيل ماريده اريد هذاك بي ريحتك..
اشو هذا صفن بوجهي وبعدين طكها بضحكة قوية
همام _ههههه تشاقين لو تدللين عليه..
غدير _غندبت عليه..
شنو تضحك عليه روح والله مو صوجك صوج ابنك الي يشتاق لابو ولعطره امداية بعد اذا اطلب منك طلب...
همام_اوكفي يابه لترجعين تنطيني ضهرج هاهيه من عيني تدللين وهاي نزعناه ولبسنة القديم رضيتي لو بعدج..
غدير _تقريباً..
همام _ههه نعمة يابة احسن من ماكو صدك غديري لتضوجين لانو تأجلت سفرتنة ان شاء الله اعوضج بشي احلى واكبر بس تكضي هل ايام..
غدير _عادي عمري اصلا ولا ضايجة شكو قابل طارت الدنيا وبعدين اكيد ميهون عليه أشوف فطومة بهيج وضع واني اطلع اتونس..
همام _هوه كلمن ازوج وحصل هيج مرية يلا نامي حبيبي قبل ميصير الحجي غير شي ههه..
غدير _بس..!!
همام _شنوو..
غدير _احضني..
همام _ابتسم..
لج شنو انتي والله مرات يجي على بالي اكلج على هذا لسانج العسل وتنسواتج العسل اكثر..
غدير _شبكته وخليت راسي قريب ركبتة احب عطره مو بيدي شخص احبة واموت بي وادمنته خصوصا من صرت حامل صرت كلش..
جاوبت،،هاي سوالف ابنك شعليه اني
همام _ههه وانتي كل شي وذابته برأس هذا المسكين كال ابنك وراد ابنك ليش مدكولين اني مشتاقتلك توفرين علينه جهد..
غدير _رفعت راسي بنعس اله صفنت بوجهه خليت ايدي على لحيتة وبستة من شفتة وهوه رأسا بادلني ابتعدت عنه..
ومن التعب نمت بسرعة بين أحضان و ريحة حبيبي..
٠٠٠
هدى _مرت يومين أوضاع البيت لا جديد نفس الكلام ونفس الحجي يتكرر فاطمة معتكفة بغرفتها مهيمن وهمام بشغلهم والبقية ماخذين دور المتفرج منتضرين الحل او الخلاص..
باليوم الثالث وكت الضهرية بس احنه البنات بالبيت اندكت الباب كلش قوي بحيث كمنه كلنه مفزوعين حته فاطمة ولأول مره تنزل جوه بسبب الصوت طلعت عمه فتحتها وماشوفلج غير طبت علينه ام فارس هداده..
ام فارس _الله لا يوفقكم حبستوا ابني واخذتوا مني ابو بيتي شرايدين من عدنه هاا شسوالكم ابني حته تحبسوا قابل مزوج على الاميره بتكم اشو هيه كلها على بعضها خلك وحده زركة جان استحيتوا على روحكم حابسين رجال علمود  ازوج من وجع الكم همج..
جنان _امشي طلعي بره فوك شينكم كوات عينكم والله وكت يمشي الظالم ويصيح اني المظلوم طزز بي لابنج العار يستاهل كل شي من ايده ابو النسوان..
ام فارس _والله يا حنان لو بنتج جانت تارسة عينة مجان دور حضن غيرها مو بله لو الحجي يزعل هنا..
جنان _حقيررره نسيتي ابنج مزوج هذيج الگ... قبل ميزوج بنتي هااا ومو كل شي صار ابنتي من وره راسج كون ينهجم بيتج مثل مهجمتي بيت بنتي..
ام فارس _لججج هي لا دوخين راسي وانتي حاجي اخوج كوليله يطلع فارس من السجن لا ميصير خير بعد والله بله كرامة لازكة بأبني وهوه مرتاح ويه غيرها..
غدير _كاافي سكتي عاد شسوين سوي احنه مالنه دخل خوش جاية علينه هداده دولي من خلقتي مبقت علينه بس انتي يلا بره..
ام فارس _عساكم بالموت ان شاء الله واوكف اتشمت بيكم..
غدير _دطلعي عااد شلحيتي فاركينه عاد..
طردتها بره البيت وهيه منزل من لسانها المسبه والدعاوي علينه الله لا يوفقها شنو من بشر باوعت فاطمة ماكو الظاهر صعدت فوك داروح اشوفها بس صارت كبالي عمتي لازمتها هدى تهفي الها الظاهر داخت..
جنان _وين انطي وجهي اني وين اروح انفضحنه بالمنطقة من وراهم وين جانتلنه هاي المصيبة يا الله ليش هيج شذنبها هاي المكروده تنكسر من صغرها الله ياخذك يا فارس ويخلصنة منك انته وامك..
غدير _عمة فدوه لعينج كافي دعاوي والله حيصير بينه شي من وراهن..
جنان _كلبي محروك على وحيدتي شتردوني اسوي ابقة صافنه لو افرح على كسرتها يمه جيبيلي هذيج الحبابه خلي أخذها قبل ما اوكع من طولي واموت من قهري..
هدى _خليج اني حجيبها..
ركضت للطبخ دورت بالادوية وطلعتلها علاج الضغط نطيته الها وياه كلاص المي أخذته بس ظلت تون وشاده راسها همزين ربي الولد مو هناا جان انكلبت الدنيا عدنة اليوم..
غدير _حصعد اطمن على هذيج المسكينة اكيد هم اخذتلها هبطة معدلة اووف على حظج فاطمة..
دخلت يمها وتصنمت بمكاني من الشي الي داشوفة وبنفس الوكت كلبي انعصر عليها ودموعي خانتني بالنزول بسرعة جانت واكفة كدام المراية ولازمة قلم الحمره تخلي على شفايفها بشكل مخربط وتبتسم ويه روحها..
حجيت بحزن.. هاي شدسوين حبيبي فطومة ليش تأذين روحج هيج..
فاطمة _بأبتسامة حزن..
شوفي حلو هذا اللون عليه موو وباعي راح اخلي اساس اصير بيضة مثلكم وهم ارسم عيوني واني اصلا رشيقة والله دائما من اشتري ملابس اخذ قياس صغير بس عدي بطن صغيره بالرياضة اوخرها..
غدير _حبيبتي والله انتي متحتاجين هذني السوالف شوفي شحلاتج...
فاطمة _ههه لا أدري بيج تجامليني مثلهم اني اني شكلي محلو والكل جان يكلي هيج بس اني اغلس بس والله حبابه اني يعني مفد يوم تعاركت لو ضوجت احد ليش همه يكرهوني علمود محلوه بس هسه شوفي صار شكلي احسن مو..
غدير _ماتحملت اكثر ركضت عليها شبكتها وابجي..
الله عليج لاتحجين هيج لج والله انتي تخبلين ليش تسمعين لحجيهم طزز بالي يحجي
فاطمة _غدير داحس اكو بيه نقص كلش جبير يعني ماعرف احسني مالي قيمة واخجل حته اطلع بعد كدام احد تدرين يعني اذا رجلي مزوج عليه هسه حته صديقاتي يتشمتن بيه
غدير _يرحولج فدوه فد شغلة هسه همه ليش تهتمين لحجي هاي وذيج هاا..
فاطمة _باعي هوه صح رغد حلوه احلى مني وبيضة وعيونها ملونات وطويلة اي واحد راح ينعجب بيها بس والله اني جنت بيه مابيه احاول ماقصر وياه دائما جنت قبل ميرجع من المحل فارس اكمل كل شغل بيتي واطبخ وراها اسبح واتعطر اله حته ميكول بيه ريحة طبخ وحته هوه جنت اهتم بنظافته وكل غراضة دائما جاهزه زين وين الخلل جان علمود الطفل اكيد بس والله كله من أمة جانن تتقصد اتعبني بالشغل حته اتأذه ليش تكرهني هاي هيج والله مفد يوم ضوجتها اشو كاعده وساكته بعيد عنهم..
غدير _اشش ولج كافي فدوه لعينج كافي كلبج راح يوكف الله لا يوفق كلمن اذاج لج انتي والله مثل النسمة وين الج أذية بس هيه من البداية محابتج بعد لو تعلكيلها العشر اصابع هم ميعجبها واصلا لا يعجبها بالناقص من هيج بشر..
فاطمة _غدير اكو هنا بصدري نار نار كاعد تحركني كل يوم أكثر من الي قبله شي عبالك كابس على انفاسي ويخنكني بكل مكان اباوع اله تصير صورتهم كدامي والله تعبت كافي خلي يعوفني بحالي شيريد مني بعد مو دمرني ودمر كل شي بية كسر بنية جانت اكبر أحلامها بيت وحبيب وطفل صغير يملي حياتهم والله مفد يوم تمنيت الاكثر لا ردت طلعه ولا سفره ولا ملابس ولا ذهب ولا فلوس  بس ردت سعاده وعائلة صغيره بس هيج والله..
غدير _حسبي الله ونعم الوكيل.. الله يبرد كلبج حبيبتي شبيدي عليج احس روحي لو احجيلج كل كلمات الدنيا مراح اكدر اخفف عنج لوعة كلبج..
فاطمة _اني اصلا متت من هذاك اليوم وهذاك الشي الي شفته متت وبقت بس روح فاقد الحياة..
غدير _امسح بدموعها بأيدي واني دموعي الي تجري عليها بيومها صدك أيقنت فاطمة منتهيه بطريقة محد يحس بيها منعزلة عنه ومتألمة وحدها..
حسيت على احد كعد بصفي بالكاع شفتها هدى وحالها ميقل حزن عن حالها..
هدى _اخذت الكلينس المبلل من على الميز وكعدت امسح بي وجهه فاطمة الملطخ بالمكياج والدموع..
فاطمة تكومين للحمام تغسلين شوية وبعدين نطلع نكعد بالحديقة شوية شدكولين..
فاطمة _لاا اريد انام مالي اي قوه اوكف على رجلي مو أنوب انزل جوه فدوه حاجوا اهلي خلي يطلكني فارس بأسرع وكت حته اخلص من امه لفارس ويطلعون من حياتي للأبد ماريد اشوفهم بعد..
هدى _ان شاء الله همه هم هيج ديسون..
مددناها وبقينة يمها لحد مدخلت بعالم الأحلام العالم الي مابي اي حزن خالي من شوائب هاي الدنيا عالم بسيط وحلو ينسيك كل شي ويطلعك من واقعك المر..
غدير _اكلج هدى من يجون الولد فدوه لا تكوليلهم على جيه ام لفارس وهم على وضعها الحالي تره والله اعرفهم هذوله يتخبلون وبعد محد يوكف بعينهم وتكبر المشاكل منا تره عمو خطية كلش مقهوره والتعب واضح على وجهه وهذوله والله ناس بايعة المستحة فوك صخام وجهم جايين هداده
هدى _لا شكول هوه العندي بس يريد سالفة حته ينفجر يخوفون هذولة الاخوه..
غدير _مممم..
هدى _هاا شبيج اشو نضراتج بيها انه..
غدير _هوه اي اكو شغلة عرفتها قبل المشكلة وتوني اذكرتها على سيره الاخوه..
هدى _اي شنو..
غدير _محمد راح يزوج الثالثة..
هدى _جذذب صدك تحجين..!!!
غدير _ههه اي والله صدك وانوب عمة من سمعته استلمته رزايل وحجي تكلة ونسوانك الباقيات مكفنك يكلها مليت
هدى _عززه هذا شنو ديلا خلي تأكلها مدام جواهر مو هذا الي اخذته بالختلة وهسه حيزوج عليها..
غدير _والله يا اختي أني اكول كلمن ياكل نصيبة على كد نيتة ومادام نيتها جانت مشاكل وخراب فأكيد ترجع عليها..
هدى _بس شعجب ساكتة وهذيج لبنى هم شعجب كاعدات سوية ومالهن حس عجيب والله..
غدير_شوفي بيا طريقة مسكتهن الله اعلم بعد محمد صار خبره بالنسوان وهاي الثالث الي يريد ياخذها مطلقة بس عدها مكانة وسيط واصل لقبها ام صكر لج والله يلكط نسوان مدري مين ههه وطبعا هم محد قابل بزواجة محمد..
هدى _هوه صح محمد احلى اخوانة بس سوالفة متنبلع وشايف روحة كلش كاعد ويكول النسوان تركض وراية عابت اي والله..
غدير _هوه الي عده فلوس بهل وكت كل شي يشتري خلي يلعب بحياتة الله اعلم بعدين شيصفة بي الدهر..
هدى _الله كريم..
رجعوا الولد للبيت ومثل ما اتفقنة محد بينة جابت سيرة هذيج المره انو اجت للبيت والموضوع بقة سكتة مصار اي شي جديد بس بقوا الكل مهتم بفاطمة ونفسيتها مخلوا شي يعتب عليهم حته يقوها ومتبقة هيج مكسوره بس للاسف الشغلة طلعت مو بالشي الهين لانو كل جرح بهل دنيا ممكن بعد فترة يتعالج الا جرح الكلب ومن الحبيب هذا بحد ذاته موت بطيء بس مع ذلك محد بطل من المحاولة حبهم لاختهم جان شي كلش حلوو
طبعاً اني صرت انام بالليل يم فاطمة الصراحة بعد اخير موقف كمنه نخاف نبقيها وحدها لا تأذي روحها او الوحده تأكلها غدير خطية لانو حامل مقبلت تجي تنام بالكاع وتتأذئ لهذا صرت أني كل نومتي يمها  وطبعا مهيمن مجان عاجبة الوضع كلش بس شيسوي ساكت لخاطر اختة..
مر اسبوع هادئ بنهاية هذا الأسبوع رجع مهيمن من الدوام كالب الخلقة وينافخ بسبب العصبية من سألة عمو عن السبب جاوب..
مهيمن _فارس الكلب اليوم طلعوا من عدنة البخت بعمة ما شاء الله سواله جم واسطة وطلعة الظاهر خوش عم عده..
ابو محمد _قصدك ابو مرتة الجديده..
مهيمن _الجديده القديمة المهم اي هوه نفسة بس اخ والله لو موجود بوكتها ولا اخلي يطلع العار..
ابو محمد _وشنو قابل تبقة حابسة عدك تره اول تالي يطلع الرجال وبعدين احنه شلنه بالحبسة مالته خلي يعوف اختك وبعد مالنه جاره بي كافي عداوات ومشاكل..
مهيمن _اي يابة بس هوه ميقبل يطلك شسويلة اكثر حبستة وعذبتة وحاجيته بس راسة بي حجار عبالك الي يشوفة شلون متمسك بيها يكول خطية من الوفاء مالتك..
ابو محمد _همزين همام ماكو جان صرتوا خوش حزب مال مكافش.. واذا عليه اني ارجع احاجي بالسياسة والتفاهم ونفضها بس اطلعوا منها منريد فضايح وخبالات اكثر..
مهيمن _لاا يابة والله متروح يمه شنو هوه حته دتروح اله عادي عوفة يوم يومين شهر شهرين بس بالاخير يجي بذات نفسة ويعوفها..
جنان _عاد معقولة انته عدك خلك تبقة تننضره بلكي جلب بيها ومطلك..
مهيمن _لا أخذيها مني فترة وهوه بنفسة يجي ويطلك واذا على خلكي شسولفلج عليه عدي خلك كلش طوويل انتظر ومامل سألي مجرب يوم خلكي طويل بكل شي..
هدى _يحجي ويباع عليه خرب ولا يستحي صاير..
عفتهم وكمت صعدت فوك مريت على فاطمة اطمنت عليها طبعا هيه فضلت تبقى بغرفتها ولا تنزل يمنه واحنه عايفيها على راحتها ويه الوكت اكيد راح تتحسن..
طبيت لغرفتي الي بس بوكت الضهرية صرت ادخللها همه الاغلبية ينامون الضهر بس اني ميجيني نوم لهذا ابقى كاعده إلهي روحي بأي شي اخذت اقلامي وبديت اصمم اي شي يجي ببالي..
عشر دقايق هيج شي وطب مهيمن للغرفة..
مهيمن _يابه عاش من شافج صايرين منشوفج هناا
هدى _ليش اجذب مو كل يوم الضهرية اجي ..
مهيمن _واني شسوي بالضهرية عليه بالليل..
هدى _احم حتنام لو تطلع..
مهيمن _لا حتمدد شوية تعبان من الدوام اشتريت بدلة جديده كصفيها على حجم القديمة لانو جبيره هاي..
هدى _ميخالف تدلل..
مهيمن _والله كبرانه صايره تعرفين تحجين ولو الصدك اكثر حياتنه الجديده احلى من هذيج..
هدى _شنو قصدك مجنت اعرف احجي قبل..
مهيمن _لا حشاج بس جنتي طفلة زيادة عن اللزوم..
هدى _انته الي اخذتني وتعرفني هيج قابل جبرتك عليه..
مهيمن _عادي شحلاتها الطفلة من تدلل على ابوها ابقى طفلة بوية شعدي غيرج..
هدى _ابتسمت..
طبعا انته ساعة تمدح ساعة تذم..
مهيمن _بله عوفج من هاي السالفة تدرين شغلة كل ماشوفج اذكر حجية صبرية سبحان الله نفس الشي..
هدى _منووو هااي بعدد..
مهيمن _وحده خوش مره كل سبوع تمر عليه بالمركز..
هدى _انتفضت من مكاني..
لا والله وشسوي تجيك وانته مكيف الظاهر..
مهيمن _شبيج غرتي تره المره بكد أمي رأسا عقلج شطح..
هدى _زفرت نفس بملل..
دشوف انته شلون تحجي بعدين عاتبني هسه مكتلي شسوي يمك وليش تذكرك بية..
مهيمن _تجي تنظف الغرف مالتنه وتذكرني بيج لانو سبحان الله انتي وياها نفس اللبس هلكد ممحتشم لبسج تصدكين داحسج محرمة عليه ادري الملابس الي ترستها الج بالكنتور المن للكو... فارس
هدى _ايي غير الدنيا بارده شتريد مني البس كيمونة..
مهيمن _الي يسمعج يكول بالصيف كاضيتها بالداخليات تفترين
هدى _عزززه شبيك استحي شوية..
مهيمن _ومن منوو استحي بله استغفر الله من اكولج جنج محرمة عليه هم احد يعتب عليه..
هدى _اي شلونك..؟
مهيمن _ههههههه زين بشوفتج كليبي..
هدى _اكلك مهيمن أريد اشوف امي اشتاقيت الها والله
مهيمن _ياهية منهم بله..
هدى _باوعت عليه بطرف عين..
صاير فكاهي كلش تدري..سحبني من ايدي نيمني ونام على صدري..
مهيمن _ان شاء الله اخذج ونروح لحيوتة نشوفها واني اراضيها لانو سمعت زعلانة مني..
هدى _كيفك بس اهم شي تاخذني مو تغلس..
كفخني على راسي
مهيمن _يايوم مغلس عليج اني شوية عرفي شتحجين..
هدى _اخ راسي على كيفك..
مجاوبني باوعت عليه مغمض وره مده صغيره ثكلت انفاسة يعني نام سحبت روحي من حضنة كملت تصميمي..
مر اكثر من شهر والوضع لا جديد جنت كاعده اني يم فاطمة اسولف وياها بهل أثناء دخل مهيمن علينه وبيده علاكتين كبار ابتسم النه وحجة..
مهيمن _شلونكم يابة..
هدى _زينين..
مهيمن _جبتلكم شغلة وياي انتن الزوج هاكم شوفوا..
هدى _اني اخذت علاكة وفاطمة علاكة فتحناها جانت كتب مال مدرسة ابتسم بمرح.. هاي شنوو مهيمن
مهيمن _مبينة شنو كتب السنة الجاية ثنينكم ترجعون للدوام تره وهاا تشدن حيلجن اريد وتنجحن من اول دور هدى حقدملج على الثالث خارجي وفاطمة سادس وياويلها الي ترسب
هدى _يعني راح ارجع للمدرسة واخيرا..
والله لوما استحي من فاطمة وفشلة جان ركضت ذبيت روحي بحضن مهيمن من الفرحة
فاطمة _بس مهيمن اني ابد مالي واهس لشي وحاليا ماريد لا مدرسة ولا شي شكرا على تعبك وياي بس جد ماريد شي..
مهيمن _فاطمة خيتي عوفي هذا الحجي السلبي عنج كافي تفكرين بالشغلات القديمة صار الوكت تفكرين بمستقبلج تفكرين بروحج وتعوضين الي فاتح يلا أخيتي لا تفشليني جيتج فرحان واكول راح افرحها و انتي هيج تحجين..
فاطمة _مو والله مو بيدي بس نفسيتي ممتقبلة شي..
مهيمن _عدج بعد وكت كلش هواية تره واني جبتهن الكم من هسه حته تعودين روحج من هسه وتلتهين بشي يلا تره ماقبل ترفضين وباجر طلعوا للسوك ويه امي اشتروا أقلام ودفاتر هذني سوالف الدراسة كلت تاخذون على ذوقكم احسن..
هدى _اي والله زين مسوي..
مهيمن _خو انتي حطيرين من الفرحة..
هدى _هههه اي والله..
مهيمن _الله يديمها..
هدى _ابتسمت بحب اله معبره عن امتناني..
ثاني يوم ذبنة همام بالسوك اني وفاطمة وعمة احنه دخلنه للمكتبة وعمة راحت تسوك غراض للمطبخ..
طبعا جانت عدنه رخصة نشتري كل شي يعجبنة واحنه مقصرنة ههه ولو فاطمة مجانت تاخذ شي بس اني كل شي اخذ لنفسي اخذ الها المكتبة جانت جبيرة..
فاطمة _شوفي هذولاك الدفاتر شكد حلوات..
هدى _عجبوج..؟
فاطمة _اي يعني..
هدى _راح اخذ منهم لعد ابقى هنا يم الأغراض اجيبهم واجي رحت اختاريت الدفاتر وزيدت شوية لانو حبتهم هيه اخذتهم دارجع يم فاطمة شفتها ماكو باوعت الغراض بنفس المكان بس هيه ماكو باوعت بكل الجهات دورت عليها بعيوني بس اختفت مموجوده بالمكتبة اصلا..
يا الله هاي وين راحتتت فااطمة!!!!
يتبع