لم تكن امي(لبوة الاسد)

البارت الثاني والاربعون

،،لم تكن أمي(لبوة الأسد)،،
_البارت الثاني والاربعون_
~~~~~~
أوهمتك برحيلي  وراقبتك من بعيد
رأيتك بخير  ولم تشتكي الفقد
فقررت الرحيل   لتبقى بخير أكثر ... !
~~~~~~~
فاطمة _من أصعب الأمور إلى ممكن اي شخص يمر بيها وتحطمة إلى الف قطعة وقطعة هي الخيانة ومو اي خيانة اكو خيانة ممكن تنسى لو متنبت بالكلب واكو خيانة تنزرع بنص الروح..
فارس جان حبيب، زوج، اخ، اب وسند اليه طول فترة زواجنة وهوه يقدملي فقط الحب والاحترام والدلال بحيث مرات احسد روحي عليه اكول معقولة اكو هيج رجال محب لمرتة عركاتنة تنعد على الأصابع ولا يوم رحت لبيت اهلي زعلانة..
يعني هيج راحة وسعادة هم تتوقع بيوم تشوف هيج منظر لو هيج خيانة لدرجة كل حياتي جانت مبنية على جذبة هوه عايش حياته ويه هذيج ومكون اسره واني واصلة لدرجة متفوقة من الغباء ممستوعبة ولا بيوم راح استوعب هيج شي..
معقولة هذا نفسة فارس الي فتحت عيني عليه اول مبديت اراهق معقولة هوه نفسة الي ذبح روحة علية وغركني بكلام الحب والوعود واني واني مستحيل شهل خداع شهل نفاق..
طلعت من عدهم بطرك روحي بس اريد اخلص من صورتة وهوه يضربني مكاعد تطلع من عقلي نهائياً وحش جان شفت التكسي الي كلتلي عليه أمة لفارس ترددت اصعد بي أي هاي الانسانة كل شي صار من جوه راسها منو يكول متطلع متفقة ويه هذا الرجال ومن شكلة جان مو راحة لحيتة شطولها ونضراته تخوف..
عفتة وكمت امشي بسرعة اخاف لا يلحكني الشارع فاارغ يصوصي مابي اي بشر وظلمة رعب مو طبيعي امشي واتعثر بسبب ألم جسمي والضرب الي اخذته وراسي لهسة يفتر من ركعني بالحايط وصلت لراس الشارع صارت مجموعة شباب كبالي يتمضحكون ويباعون..
متت خوف يا الله هسه لو ماخذه فد تلفون لو موكفة احد يساعدني ولا هل رعب دنكت راسي ومشيت بطريقي احاول أبين روحي مخايفة واني بداخلي العكس اسمعهم واحد يهمس للخ بحجي ممفهوم انوب عبالك صاروا يمشون وراية صار المشي مالتي اشبهه بالركض..
خلصت الشارع واخيراً صار اكو ناس كدامي ومحلات هيج اطمن على الاقل ميسولي شي كدام العالم تعبت وصرت بس اريد اوصل لبيت اهلي بأي طريقة ممكنة قبل ما يرجع فارس ويعرف اني طلعت من البيت..
التكسيات تروح وتجي واني اخاف اوكف احد ويطلع مو خوش ويسويلي شي مو زين كل شوية داكلي هورن واحد والله ردت ابجي على حالتي واني على وكفتي محسيت غير على صوت شخص يحجي وياي..
فزيت مخترعة اباوع عليه بقلق رجال جبير بسيط..
_خيرج عمو ولو تدخلا مني بس انتبهت عليج صار اكثر من ١٠ دقايق وانتي هاي وكفتج مضيعة طريقج..؟؟
فاطمة_اني هوه
_لا تخافين احجيلي بلكي اساعدج تره الوكت مو زين وطلعتج وحدج بهل ساعة اجيبلج مصايب..
فاطمة _نزلت دمعتي..
عمو اريد تكسي حته ارجع للبيت بس اخاف من..
_فهمت قصدج لا تكملين تحبين اصعد وياج اوصلج لبيتكم..؟
فاطمة _اذا مابيها عليك ازعاج لو زحمة اي..
_هاهية امشينة ومسحي دموعج ولو ماعرف شنو سبب طلعتج وحدج بهيج شكل بس ماكول غير الله يستر عليج انتضري هنا حوكف سيارة..
فاطمة _هزيت راسي اله مأكده كلامة..
مطول دقايق وصدك اجه هوه وابو التكسي صعد بالصدر واني وراه خاتلة يم الباب ماجذب واكول مخفت منه لا يكون مو زين ويستغلني الموقف الي عشتة خلاني حته بخيالي ما اثق التف عليه من جهه الباب وحجة بصوت ناصي..
_بوية انتي وين بيتكم داكله للرجال..
فاطمة _نطيتة العنوان بعدين تذكرت اني مشايلة ولا فلس بجيبي تقربت وهمست للرجال.. عموو
_هاا عمي كولي..
فاطمة _هوه يعني مشايلة وياي فلوس عادي تنطي ومن اوصل اخلي اهلي..
_اشش سكتي عمي معليج بهاي السوالف رجعي لمكانج..
فاطمة _عمو شلون مايصير..
_اعتبريني ابوج..
فاطمة _غرغرت عيوني بالدموع شنو هاي الحالة الي وصلت الها اني بحيث صارت الناس تعطف عليه حسبي الله عليكم كلكم اخ ياربي بس رجعني لبيت اهلي سالمة ماريد شي بعد مشوار من الطريق واني طول الوكت كاعده وارقب اخاف ديمشي بغير منطقة الوهواس والأفكار اكلت عقلي لحد موصلت لباب بيتنة نزلت ونزل الرجال وياي..
_ها عمي هذا بيتكم اكيد..
فاطمة _اي عمو ماعرف شلون اشكرك لانو لما انته جان الله وحده يعرف شنو راح يصير بيه..
_الشكر لله عمو يلا طبي لبيتكم حته اتوكل..
فاطمة _رحت بسرعة دكيت الباب اكثر من مره بس انفتحت هوه حرك وراك..
همام _فااطمة مو كلتلي ما أجي!!!
فاطمة _كانوا بتعجبة وسؤالة رجع فتح عليه جروحي وذكرني بكل شي شمرت روحي بحضنه ابجي واشهك من كل كلبي وهوه اخترع عليه ميعرف شلون يسكتني..
همام _رحت جبت الأشياء الي وصتني عليها غدير ومن دارجع على فاطمة رمشت الها دزتلي رسالة (راح ابات هنا اليوم عود بعدين اخابرك)
توقعت زوجها باجر هوه يجيبها لو احنه نمر عليها يعني عادي ماكو شي غريب رجعت للبيت قريب ال١٠ ونص اندكت الباب بشكل قوي فتحتها جانت فاطمة بس شكلها نهائياً مو طبيعي سحبتها دخلتها للبيت واني اسألها..
شبيج شصاير ليش هذا حالج وبعدين شلون اجيتي لهنا وين فارس..؟؟
جنان _هااي شكو فاطمة يمه مزاعلة ويه رجلج..
غدير _ماكو جواب بس تبجي التفتت على همام عاكد حاجبة ممرتاح للي ديصير..
ابو محمد _بابا فاطمة شبيج متحجين والله خوفتني عليج بيج شي زوجج بي شي..
همام _متحجييييين شبيييج عاااد ااانطقييي...
غدير _لزمت ايده احاول اهدي..
شبيك همام هيه هيج متشوفها تعبانه هسه شوية بس تهدء هيه تسولف من وحدها..
همام _وترديني انتضر لما تحجي راح اخابر فارس اشوف شبيهم بنص الليل لجج دشووووفيها مضروبة ماعرف شنو شبيها..
غدير _توه رفع التلفون يدك عليه مانسمع غير صرخة هززت كل أنحاء البيت طالعة من فاطمة صرخة على لطم على رجيف مو طبيعي ركضنة عليها نريد بس نلزمها منكدر همام يريد يسيطر عليها ماكو وصلت بي ضربها راجدي يريدها بس توعى على روحها هم ماكو..
اخير شي خلصت كل طاقتها و وكعت من طولها مثل الجثة لا نفس ولا حركة..
جنان _يمممممه صخااام بنيتي يا الله شبيهاا  همام الحك على اختك فدوه اروحلك لا تروح منه..
غدير _شالها همام بين ايدي حطها بالسيارة وكلنه رحنه وياها الطريق كله متوتر وكلساع يكلنه مكعدت واحنه نجاوبة ب لاا وهوه يتخبل بالزايد عمة وكعتها دك ولطم على وضع بنتها المجهول واني مخليت آية قرءانية من الي حافظتهم مردتتها حته تكوم بالسلامة..
مسافة الطريق وصلنه وبسرعة اخذوها للطوارئ لصعوبة حالتها واحنه مو اقل منها من الخوف والقلق صرنة نضرب خماس بسداس مبقت فكرة سودة ما اجت على بالنه بساعتها..
همام _شبييي هذااا ميجاااوب يعني عجيب مرتة هيج حالتها وهوه ويينة عنها حتخبل وحق هوه الحق..
ابو محمد _يابة بس اكعد تره حنجلط على ساعة خلي تطلع اختك منها سلامات وبعدين كل شي يتوضح احتمال احنه مكبرين كل شي وهوه شي بسيط..
غدير _حطيت ايدي على جتف همام..
حبيبي شبيك بس سيطر على عصبيتك ما يصير هيج اخذ نفس وكول يا الله ليش نستبق الأمور..
همام _ليش هوه بيدي مشفتي شكلها الله عليج غدير وجهه مضروب شكلها موو طبيعي ملابسها استغفر الله..
غدير _لا لا يمعود وين رحت اكيد مو من الي ابالك..
همام _ان شاء الله.. يارب
غدير _بقيت لازمة ايده افرك بيها احاول انطي شي ولو بسيط من الاطمئنان شو هذا شوية وخزرني.. شبيك؟
همام _شنو هذا المنظر الي جاية بي للمستشفى ولج مالكيتي اكبر من هاي الجبة لانو داشوف بطنج هذيج وياها تكول هلوو..
غدير _يااا شنو السالفة وكتة هذا الحجي..
همام _لعد شوكت وكت بله الرايح والجاي ياخذلة كشف عليج شلون شغلة هاي شلون منتبهت اني عليج ديلا هسه وين اضمج لو اتعارك ويه هذا وذاك جانت ناقصة وكملت..
غدير _بالكوه كتمت ضحكتي عنه..
خلص حبيبي بس نطمن على فاطمة وعود ارجع بسرعة للبيت اغير ملابسي ولا يهمك..
همام _دخلي تطلع واشوف منو يبقيج هناا كاعده..
غدير _داجاوبة بهل أثناء جان تطلع الدكتورة من الغرفة طفرنة عليها كلنه نسألها بقلق..
ابو محمد _شصاير دكتوره شبيها بنيتي..؟
الدكتورة _لا تخافون ان شاء الله ماكو شي خطير صار عدها انهيار عصبي بسبب ضغط عليها وتعب قوي بالإضافة مبين الابنية متعرضة لتعنيف بسبب بعض الضربات الي لاحظناها بجسمها حاليا وضعها احسن نطيناها علاجات ارجوا انو تلتزم بيهن وهسه هيه رجعلها وعيها تكدرون تدخلون يمها..
ابو محمد _رحمة الله امج وابوج دكتورة ماقصرتي..
الدكتورة _بالخدمة احنة..
غدير _دخلنة كلنة عليها بلهفة جانت كاعده ومفتحة عيونها بس نضرها متوجهه للسكف تحديداً صافنة عبالك فاصلة عن الدنيا كعدت يمها عمة جنان تمسد على رأسها وتحاجيها بحنان..
جنان _يمه حبيبتي شصار بيج منو وياج سولفيلنة متنة خوف والله بس احجي وطمنيني عليج..
همام _فاطمة جاوبينة ليش ساكتة شصاير..
غدير _خطية عوفها شوية ترتاح احتمال متكدر تحجي تعبانة..
همام _ماكدر ماكدر ماعدي بعد اي صبر اريد اعرف شبيها اختي تره عقلي حيطير فاطمة أخيتي بس احجي واني اخذلج حقج من حلك السبع لا تخافين محد يجرء يدنالج  فارس  السبب لو اهلة هاا..
فاطمة _ف...فارس م.. مزوج و... عده طفل...
همام_ شكاعد تحجي هاي..؟؟
فاطمة _شف.. شفتهم بعيني بال.. بالغرفة مزوجها قبل ميزوجني و.. عدهم ولد ومن عرفت كتلني واني شردت منهم..
همام _شنووووو فاااطمة وااعية اانتي على روحج شكاعد تسولفين..
غدير _غطت وجهه بأديها وصارت تبجي بصوت عالي..
فاطمة _خاااني ماما خااني سنة كاملة وهوه مزوج وعده طفل عايش حياتنة طبيعي واني شنوو حاطني احطياط يمه لجج يمه كتلني وضربني علمود مرتة وابنة شفتهم بعيوني شفتهم هيه لابسة لبس نوم وهوه همم..
همام _ايااا كواد ابن الكلب اذا مازوعك العافية على دكتك الناقصة هاي ما اتسمى بأسمي..
غدير _همام اووكف وين رايح الله يخليج استر علينه بهل ليل همااام لك همااام....
ولا سمع مني طلع يركض شايط متأكده راح تصير مصيبة انوب وكع عمو دايخ ركضت عليه نطيتة مي حته يجر النفس وعمة صارت تخرمش بوجها متخبلة عبالك صار عدنه عززه..
حسيت على عمو لزم ايدي باوعت عليه بقلق
ابو محمد _عمو لحكي على همام لا يكتل الولد مابية بعد حيل اني..
غدير _اي اي عمو ركضت على تلفوني دكيت خمس مرات على همام ميجاوب ياربي الوكت صار قريب ال١٢ على منو ادك واني ماعرف همام اصلا وين راح بس اكيد لبيت فارس اخابر على اخوتي اخاف تصير فضيحة جبيره لو تكبر المشكلة هذولة كلهم دمهم حار..
يا الله وين انطي وجهي هسه اني وين أولى فجأه وكأنوا اجه الأفراج عليه تذكرت صديق همام القريب كلش ماكو غيره هذا جان بكل شي يصير يتنخاه حته اكثر من اخوتة رحت بسرعة اخذت تلفون عمو طلعت رقمة لانو عده رقمة هوه بتردد وخوف دكيت عليه واني ادعي بداخلي انو يريد حته يساعدنه قبل متخلص الدكة شالة..
غيث _هلا عمي ابو محمد شلو...
غدير _فدوه الله يخليك ساعدنة اسفة لانو دكيت عليك بهيج وقت بس يمكن حتصير مصيبة ويه همام واني ماعرف بمنو استنجد الله يخليك ساعدني..
غيث_لحضة لحضة خوية بس انطيني مجال افهم شبي همام شصاير وياه..؟؟
غدير _يعني ماعرف شكلك بس صارت مشكلة جبيره بينه وبين نسيبنة وهمام راح يتعارك وياه واتوقع يسوي الاكثر ماعرف فدوه ساعدني..
غيث_هاهية وصلت سدي خيتي لتخافين الموضوع يمي صار..
غدير _سده بسرعة لزمت راسي ابجي ماعرف صح لو غلط الي سويتة بس ماعدي غيره هوه الوحيد الي حضر ذاكرتي الدكتوره كالت تكدر تطلع بس تلتزم بالعلاجات ضروري..
بقيت حايره هسه نطلع لو ننتضر همام بهل أثناء دخل علينة محمد مصدوم ماعرف منو خابره يمكن عمة اخذنه ورجعنه للبيت بسرعة نيمنة فاطمة بغرفتها جانت غافية على أثر المهدء نزلت جوه شفتهم كل واحد وضعة يقهر اكثر من الخ منا عمو الي لهسه لازم راسة ومنا عمة الي تنوح وتبجي على حظ بنتها ومحمد الي حرك التلفون بالمخابره على همام توه يريد يطلع يدور علية طب من بره همام لازمة صديقة بالكوه مسيطر عليه
همام _عووفني كاافي فهمت مراح اااطير..
غيث_ليش انته قصرت بي الا شوية وتسوي مصيبة شكبرها..
همام _شتريد لعد هاا اصفك اله على طياح حظة هذا..
محمد _دكعد عاد بس تكمز تره الوكت صار نص ليل راح تلم العالم علينه بصياحك هذا..
همام _عجيب شلون اعصابكم بارده هيج..
َابو محمد _عمي غيث رحمة لابوك احجيلنة انته شصار..
غيث_عمي همام رايح لبيتهم ومتعارك ويه امة لنسيبكم وبهل أثناء هذاك راجع وصاروا يتعاركون ومتضاربين هذاك بالكوه جريته منه لانو انتهه من الضرب..
همام _اااخ لو مخليني اكمل شغلي وياه واطلع حركة كلبي بي لكم يكلي شمسوي قابل ناهب، زاني، بايك حالي حالم الزلم مزوج حالي حال خلق الله وانوب يتوعد يكلي الا اندم اختك على طلعتها هاي والله تمنيت يمي مسدس الا افرغة كله براسة..
محمد _حلوو والله فوك طياح حظة هوه ابو الراهي يابة هوه هذا نسيبكم الي نطيته بتك دشوف يلا شطلع من وصاخة..
ابو محمد _لييش مو انته اول واحد جنت راضي عليه ودزيتك تسأل عليه وكتلي ماكو منه ثنين هاا..
محمد _واني شمدريني بي مزوج قابل الظاهر مزوج بالسر وقبل فترة صغيره من زواجة من فاطمة..
غيث _احم اني اترخص تأخر الوكت حيل من رخصتكم..
ابو محمد _اخذ راحتك ابني تعبناك ويانة اليوم وأعذرنة عن الشي الي صار كدامك..
همام _الله وياك حبيبي مشكور على وكفتك هاي..
غيث _مسويت شي يمعودين في امان الله..
همام _يابة هسه شنو تره مكاعد اكدر ابقى كاعد هيج كلبي موجر ناار..
ابو محمد _انطي صبر رحمة لله خلي يطلع الصبح ونتفاهم
غدير _ليلة اشبهه بالكابوس علينه البيت جان عبارة عن كتلة من النار ياهوه الي تحاجي ينفجر عليك كل شوية اروح اطمن على وضع فاطمة جانت تكعد وترجع تنام سوده عليه جانت لو هادئة مثل النسمة لو تكعد وتبجي بصراخ الله لا ينطي شسوه بالابنية منو جان متوقع فارس الي زحف زحوف حته يحصلها يطلع خاين خرب شلون دنيا غبره..
صار الصبح واني على يقين محد جافاه النوم لو ضاكة اندكت بابنة جانوا فارس وعمة بكل عين صلفة جاي فتحها محمد لانو همام مليون بالميه مراح يكدر يلزم روحة راحوا للصالة وراحوا وراهم همام وعمو شوية شوية وبدت الأصوات تتعالا اكثر من ساعة واصواتهم كل ماهيه زيد متنقص لحد ما اخير شي صار هدوء وراحوا هذولاك..
طب همام يشيل ويركع بروحة اول مره اعرف بهمام هيج عصبي..
همام _هذا حجي يابه هاا بس كلي هذا حجي شنو من يا مزبلة جايبين هذا الرجال عمري مشايف واحد هيج بصلافة فارس
جنان _فهموني شصار شيكول..
محمد _يريد مرتة ويكول جان ضرفي حاكمني من تزوجتها بس هسه طلكتها ومستعد يطلع بيد وحدهم هوه وفاطمة يكول شنو تردون مني اني حاضر بس رجعولي فاطمة..
جنان _ابو محمد شراح تسوي قررت شي خوما تبقى هيج..
همام _شنو يابه ان شاء الله تردون ترجعوها لهذا الخاين ابن الخاينة والله اكلب البيت عليكم اذا رجعتوها..
محمد _لعد خوما تطلك يابه احنه وين عدنة مره تطلك وعلى سبب مثل هذا  مزوج غيرها وهوه قبلها جان شايله على كفوف الراحة شوية شغل عقلك همام شدكول لاعمامك وخوالك بعدين نطيناها للغريب بس مصانها
همام_واانته هذااا همك الوحيد حقك مشفت حالت اختك البارحة من اجتنة..
ابو محمد _بس كاافي سكتوا محد اله دخل بهذا الموضوع اني ابوها مو انتوا كل واحد يفتي من يمه برأي شايلين من بالكم وجودي الظاهر خلي تصحة حته افهم منها..
همام _حشاك يابة مقصدي بس اعصابي تلفت هاي اختي وعزيزه عليه مكاعد اكدر اتحمل اذيتها هيج..
ابو محمد _ادري بيك محروك كلبك عليها بس هم انطيني صبر افكر عدل مو هينة الشغله
غدير _بهل أثناء ومنشوف غير فاتوا من بره مهيمن وهدى تحت أنظار الدهشة والصدمة لعدم توقعنه جيتهم اليوم..
مهيمن _السلام عليكم..
ابو محمد_وعليكم السلام هاي شرجعكم انتوا مو على ساس ظالين اسبوع اكثر..
همام _اني خابرت على مهيمن وبلغته بالتفاهةة الي دتصير هناا خلي يجي احسن ما يظل نايم ورجلي بالشمس..
ابن محمد _لك بوية شبيك انته حارك الدنيا وبعدين شبيها كصتك مهيمن اكيد انته هم تهورت حالك من حال اخوك موو..
مهيمن _عوفوا هذا الحجي كله سؤال واحد وأريد جوابة فارس وين؟
محمد _شلك بي انته لتدخل اخوها الجبير وابوها موجودين يتفاهمون بينهم..
مهيمن _داكوول فاارس ووين...!!!
همام _قبل شوية جان هنا هوه وعمة كعدوا يخرطون شوية وبعدين راحوا..
مهيمن _وانتوا استقبلتوهم هيج ابيتنة بعد كل شي سواه بعد مستغبانة وسوانة مضحكة والله حلو..
جنان _يمه ابوس ايدك اكعد واتفاهموا بالهداوه انته وابوك متنحل بالعناد تره..
مهيمن _لحضة صبري..
الوو هلا ثائر رايد منك طلب بين ما اجي تكضيلي شغلة ماتقصر حبيب حدزلك عنوان واحد واسمة برسالة اريد تضيفة عدنة بالمركز وهم تره محسوبك ضيف عزيز عليه داري بين ما اجيكم هاهية مشكور اغاتي..
هدى _لزمت ايده بقلق..
مهيمن الله عليك كلي شراح تسوي فدوه عوف المشاكل على جهه..
مهيمن _هسه شمسوي اني تره بعدني مكايل بسم الله وبس تتلاطمون بوجهي..
همام _اخذني وياك من تروح..
مهيمن _اكعد واسكت خليني اشوف شغلي بس وينها فاطمة اريد احاجيها..
غدير _فوك بغرفتها نايمة..
مهيمن _خوش صاعد الها اني...
ابو محمد _مهيمن بالهداوه ويه اختك ولا تضغط عليها بشي خليها على راحتها تره صحتها على كدها ماشي بوية..
مهيمن _لا توصي حريص يابة هاي اختي ورايد مصلحتها..
محمد _شنو يابة يعني راح تخلي الموضوع بيد مهيمن ليش منو الجبير هنا اني لو هوه تره مصايره هاي..
ابو محمد _تبريت منك اني من اليوم الي كسرت كلمتي وتزوجت من دون رضاي..
هدى _عم الهدوء بالمكان شوية وطلع محمد من البيت ينافخ التفتت على غدير سألتها بتردد.. شلونهااا.. ؟
غدير _مو زينة والله حالتها تبجي الكافر خو من اجتنة البارحة بنص الليل وشكلها يخوف وانوب وكعت من طولها تصرخ وتبجي اوف هدى والله خطية..
هدى _امداه الحقير عود جان يحبها وسوه هيج لو ميحبها شجان راح يسوي..
غدير _خليها سكتة يمعوده انتوا خوما بيكم شي..
هدى _لا لا زينين..
انتبهت على عمو صافن عليه وضهره منحني شوية وكام مشة وبعدين وكف يمي حط ايده على راسي وحجة بحنية..
ابو محمد _اذا الله راد يعاقب انسان ويطلع حوبة بشر راح يعاقب بأحب الناس اله طعنوا بيج وشوهوا سمعتج واذوج واني كلتلهم خوفكم لا تطلع حوبه هاي اليتيمه بيكم وصدق ربنه طلع حوبتج بوحيدتنة وبنتنة شفناها بهذا الشكل..
هاا يا جنان شجنت اكلج جوزي من الابنية لا طعنين بيها لا تذليها وتعيريها بشي مالها دخل بي ربج بالمرصاد بس عبس محد بيكم سمعني شوفوا هسه شلون طلعت حوبتها بأعز شي على كلبج بنيتج و وحيدتج الحوبة تسحك وتلحك وتأخذ ثلثين من الحك وتكسر الضهر يا بوية..
هدى _غرغرت عيوني بالدموع دنك باس راسي متوجهه لغرفتة..
جنان _يمه اذا اكلج اذيتج و ذبيت عليج حجي ماصار ولا دار بسبب محبتي لاطفالي راح تعذريني يمه سامحيني خربت حياتج واذيتج بأيدي تمنيت الخير لاطفالي على حساب سعادتكم انتي وغدير اذيتكم هواية والله كلبي ماكلة الندم بنتي راحت من ايدي كله مني ظلمتكم حته هذيج المسكينه مريم ظليت احجي عليها ارملة وارملة وتاليها بنتي  يمكن راح تصير مطلقة الله راواني كل شي سويته بيكم ابتي فاطمة...
غدير _كافي عمة ماله داعي هذا الحجي والله..
جنان _شلون ماله داعي كلبي محترك على بنتي ضاعت مني راحت منها حياتها بسبب هذا النذل اخذ منها دراستها، وصحتها وسلب منها رونق حياتها والله داشوف الي سويته بيكم هوه سواه ابنتي حسبي الله عليه..
هدى _عمة اهم شي هسه سلامة وصحة فاطمة لا تفكرين هيج ان شاء الله ترجعلج فاطمة بصحتها وعافيتها عن قريب
جنان _سامحوني عمة والله اني احبكم انتوا بنات اخوتي مستحيل اكرهكم بس ماعرف شجاني وصرت هيج الله يلعن الشيطان ..
غدير _الله يسامح الجميع خلص لا تبجين عمة  فاطمة محتاجتج محتاجة حضن وحب امها مو دموعها
جنان _سامحتوني يعني..
غدير _اذا الله بسابع سماه يسامح منو احنه حته منسامح الله يبرد كلبج..
هدى _بقت غدير تهدي بعمة ظلت تردد كلمة الاعتذار اكثر من مره هلكد مكلبها مجلوم على ضناها ماعرف ليش احنه البشر نأذي نأذي وبالاخير من الله يبلينة يلا نحس على نفسنة ليش مو دائما نلزم نفسنه عن الاذية اشو الدنيا خلصانة اليوم موجودين باجر لاا..
ماجذب واكول حاقده عليهم لا والله بالعكس كلش مقهوره عليها وعلى عمو وفاطمة واتمنى من كل كلبي تنحل المشكلة بأقل الخسائر..
تسحبت صعدت فوك اريد اشوف فاطمة اطمن عليها وصلت لغرفتها سمعت حديثها ويه مهيمن بالصدفة..
مهيمن _خوية صار ساعة احاجيج ليش مجاوبيني لتخوفيني عليج نطقي او انطيني اشاره وحده حته اعرف قرارج واخذلج حقج يلا يا عيني كومي وحاجيني بلالج هاي النومة..
ردت بهدوء..
فاطمة _اذاني مهيمن
مهيمن _انعل ابوه للكلب مو كتلج من البداية ممرتاح اله كلبي ممطمن ليش رضيتي بي اخ منج..
فاطمة _حبيتة..
مهيمن _شتحبين منه مدكوليلي اكبر كواد يلعب علينه عباله هينة اختنة مالها ضهر وسند..
فاطمة _بجت.. شفتهم بعيني..
مهيمن _اشش كافي لا تبجين بالناقص منه والله الا اندمة على الساعة الي فكر ينزل دمعة من عيونج الحلوات..
فاطمة _خايفة احس كل شي انطفى واسود..
مهيمن _مجرد اوهام هاي شلون تخافين وانتي عدج اخوه حزام ضهرج هاا مامقبولة منج خيتي..
فاطمة _أسفة مهيمن..
مهيمن _على شنو تعتذرين بعد..
فاطمة _اني استاهل الي صار بيه والله لانو جذبت عليكم اي جذبت وخنت ثقتكم من..
هدى _صخام بوجهي هاي اكيد راح تكلة لمهيمن جنت اعرف فارس قبل الزواج وعدي علاقة بي بسرعة دخلت عليهم جفت هاا مهيمن مكملت..
مهيمن _هوه هيج اليدخل شبيج..
هدى _أسفة بس اريد اطمن على فاطمة من لهفتي شسوي..
مهيمن _مصار شي..
شكلتي فاطمة كملي اسمعج
فاطمة _مهيمن اني وفارس جنه..
هدى _يااا شبيك مهيمن صدك تحجي شوفها بالكوه تحجي والتعب ماخذها وكت هل سوالف..
مهيمن _صح مو وكته على عموم اني طالح اصفي الحساب بس اريد كلمة منج فاطمة حته ماظلم احد تردين هذا الي ميتسمه لو لا..
فاطمة _الي بدلني بوحده مستحيل افكر ارجع اله بيوم..
مهيمن _هاهيه خيتي هوه هذا الصح هدى تعاي وراي..
هدى _اي جاية..
راح وبسرعة باوعت على فاطمة.. انتي تخبلتي اكيد تردين تصخمين روحج مكافي الي انتي بي..
فاطمة _مادري ميهمني شي بس اريد اريح ضميري..
هدى _كافي يا عيني قابل شمسوية انتي
هسه تعبانه ارتاحي وعوفي الباقي على اخوتج..
مجاوبتني بس اكتفت بالايماء گ علامة الموافقة..
مهيمن _هددى ويييين صررتي..
هدى _اي جيت جيت..
هياني شبيك تعيط داطمن على فاطمة جنت هاي شبساع سبحت..
مهيمن _مستعجل شسوي طلعيلي ملابسي مال دوام على السريع بين مانشف شعري..
هدى _صار..
نطيته البدله يلبسها ورحت مسحت اله الحذاء كمل لبس لانو مستعجل بسرعة طلع من الغرفة ثواني ورجع طب باوعت عليه بأستفهام..
مهيمن _نسيتج والله تعالي يمي..
هدى _تقربت يمه جرني لحضنه قوي ودنك بوس خدودي وعصرني بحضنه..
مهيمن _ارتاحي عود وتفقدي جسمج اخاف متأذيه بمكان ومتدرين ونزلي اكلي شي ماوصيج بعد..
هدى _صار..
ابتسم ماخذ شفافي ببوسة سريعة..
مهيمن _الطاقة الايجابية الوحيده بحياتي هيه انتي احبج هدوشتي..
هدى _ضحكت ديلا روح عاد..
ابستم وطلع على السريع ادري بي مستعجل حيل الله يصلح الأمور عن قريب ويساعد كلب فاطمة على الجاي..
‏الإهتمام وقت الحب هذا شيء وارد..!!
ولكن الإهتمام وقت الزعل
وقت التعب..؟؟
وقت الاحتياج لمن يفهمك بدون كلام.!
لا يفعلها إلا المُحبٍ الصادق
يتبع
https://www.youtube.com/watch?v=rFRfq2DoDpQ