لم تكن امي(لبوة الاسد)

البارت الواحد والاربعون

،،لم تكن أمي(لبوة الأسد)،،
_البارت الواحد والأربعون _
~~~~~~~
#كولوله
بخير واشتم #الهوه
وما احب بعد بس #روحي
مشكور لا تسأل #عَلي
داويت كل #جروحي
#كولوله_اليحبك گبل
#الچان يهوه #عيونك
#مرتاح هسه ومستقر
وعايش #ملك من دونك
~~~~~~~~
هدى _لحضات مرت علينه حسيتها بألف سنة كل شي وكف عدنة بهاي اللحضات موقف أصعب من الصعب مادري بنفسي اذا جنت بوعي لو اصلا فاقده واذا جنت كاعده ليش مداشوف كدامي اي شي غير السواد الي تارس المكان والمشكلة لساني ثكيل حته جسمي ماكدر احركة أيدي اريد ارفعها ماكدر غمضت عيوني ورجعت فتحتها على أثر مي بلل وجهي..
باوعت هذا مهيمن وهل مره مثل الي رجعت لعالم الواقع وكدرت اتحرك واحجي بسرعة شبكت مهيمن بخوف مداصدك انو احنه بخير ومابينه شي لانو للحضات حسيت نفسي ودعت هاي الدنيا وكل مابيها..مسح على راسي بهدوء
مهيمن _اهدي هدى اخذي نفس ماكو شي مصار شي لتخافين..
هدى _رفعت راسي انتبهت على كصته مجروحة تلمستها وصرت ابجي..
شوف راسك مهيمن..
مهيمن _مابيه شي مجرد جرح بسيط شوفي هاي كدامج..
هدى _خايفة هاي شصار مهيمن..
لزم وجهي بين كفوف ايدي
مهيمن _هدى عمري بس توازني فدوه اروحلج..
هدى _خلي نروح منا حباب المكان يخوف الأصوات بعدها بأذني.. ردت ادور وجهي اباوع على الشارع لزم وجهي ضمه لصدره..
مهيمن _اشش مو داكلج كل شي ماكو هدى شو باعيلي..
هدى _رفعت راسي بتعب..
مهيمن _شوفي اني لازم انزل د..
هدى _بسرعة حجيت..
ما ما متنزل وتعوفني حباب لتعوفني والله اخاف..
مهيمن _لج بس اسمعيني هدى اصبري هناا دقايق مو اكثر وداعتج بس اشوف وين صار هذا الانفجار وادبر النه طريق حته نطلع من هنا لانو منا لساعتين مستحيل نطلع من هاي الهوسه هاا حبيبي انتي قوية راح اقفل عليج الباب من بره وحسبي دقايق وتلكيني يمج لازم انزل حته نروح مناا انتي مو تردين نطلع من هذا المكان..
هدى _هزيت راسي بمعنى اي..
مهيمن _لعد خلي اروح بسرعة واجيج تمام كليبي..
هدى _متتأخر موو..؟
مهيمن _وداعت عيونج ما اتأخر.. هاا اروح هسه
هدى _روح
باس ايدي بقوه..
مهيمن _بقى عينج بالكاع فكري بشغلات حلوه بين ما اجيج..
هدى _اي اي..
عافني ونزل بسرعة قافل الباب وراه رفعت راسي بهدوء شفته راح من جهه الدخانة دمعت عيني وراه السيارة الي كدامنة الي ضربناها هم نازلين منها اصحابها صايره سياره مضروبة بسيارة والناس تتراكض منا ومنا وسيارات الاسعاف صارت تجي سابقتها الإطفاء..
منضر حيل بشع وحزين رجعت دنكت لازمة كلبي من خرعة الانفجار والصوت القوي كلبي احسة يريد يطلع من مكانة ويوجعني بشكل اخذت بطل المي غسلت بأيد ترجف وكمت اردد أية الكرسي بسبب الخوف الي تملك كلبي..
وبالفعل دقايق مو اكثر ورجع ركب مهيمن لازم ايدي بين ايدي..
مهيمن _هاي اجيت هدوش واسف لانو عفتج..
هدى _شصار..؟؟
مهيمن _جر نفس..
ليكدام اكو سيطره وهناك طاكة عبوه وسيارة ماخذه على سيارة تدرين الله لطف بحالنة لو طالعين اوكت جان اخذنة الانفجار بس خطية هواي عالم راحت ضحية الله ياخذهم للحثالة منخلص منهم..
هدى _الله يرحمهم..
مهيمن _بعدج ترجفين عمري..
هدى _خلي انروح..
مهيمن _اي هسه حاجيت الضابط يفتحلي الطريق داطلع منا همزين سيارتنة متضررت والي كدامنة  ضربناها خطية الرجال فقير نطيته رقمي حته اصلحها الها على حسابي..
شو تعاي
هدى _اخذ راسي وخلاني على رجلة..
مهيمن _بس نطلع ونعبر المكان عود كومي..
هدى _غمضت عيني وهوه مشة بينه ماعرف شكد مر من الوقت بس الي اعرفة وكت مو قليل ظليت على رجلي هادئة حيل اخير شي حسيت على مهيمن باس راس..
مهيمن _كومي حبيبي عبرنه المكان..
هدى _رفعت راسي صدك جنه بطريق يختلف جذرياً عن الخرابة والدخانة الظاهر ماشين هواي رجعت راسي على الكشن بتعب..
مهيمن _كل شي خلص هاهيه لتخافين حبيبي..
هدى _بس الناس خطية..
مهيمن _الله يرحمهم هذا حال شباب العراق تروح بشربة مي بسبب هذولاك الزبايل بلد فاشل وحكومتة بس ادور مصالحها عايفة شعبها كاتلهم الجوع والذلة..
هدى _زين مهيمن انته شبيك كلبت الدنيا هذيج الساع هاا تره والله وكعت كلبي ومنا صار الانفجار والله شوية واتخبل شبيك شصار وياك منو حاجاك هاا..
مهيمن _تحسر
فاطمة...
٠٠٠
فاطمة_حياتي بعد مخسرت اول طفل اليه ومو اي طفل هذا الطفل الي نطيت هواي وتعبت هواي حته احصلة وجازفت بصحتي ودراستي حته احافظ عليه بس للاسف خسرتة بين ليلة وضحاها ولسبب غير مرضي انو الطفل ميت ابطني فجأه بعدين استغفرت ربي لانو هيج اني صرت اعارض أمر ربي..
من بعد هاي الفترة صرت كلش كئيبة ومالي واهس بشي هملت نفسي والاكل آنسة احطة بحلكي اصفن هواي وبالليل ابقى سهرانة ماعرف ليش يمكن صار عدي إرق مجان الي واهس بشي مجرد اكضي شغلي الي عليه واطبخ لفارس راجعة لغرفتي وهذاك البيت بعد لا فتت عليه ولا رحت عدهم وبالمقابل همه هم محد اجاني او زعجني بشي..
اخير فترة فارس ضاج من وضعي وصار بس يريد يرجعني فاطمة القديمة لو بطلعة لو بمشتراية لو سالفة بس للاسف منجح لانو المشكلة بيه اني بعدني تعبانه بعدني محتاجة استرجع نفسي واقوي روحي..
بعدين بيوم اقترحوا عليه غدير وهمام اجي وياهم لاربيل حته اغير جو واطلع من القوقعة الي عايشة بيها طبعا اني بالبداية رفضت رفض قطعي هاي السفرة لانو اولاً ادري هاي اول سفرة لو طلعة لاخوية وغدير بعد ما تصلحت علاقتهم وجودي اني بنصهم حيل واكف وثانياً ابد ابد مابالي اطلع واسافر لانو مرتاحة ابيتي ساده بابي وكاعده احس روحي ثكيلة على الطلعة..
بس طبعا الكل عارضني وأولهم فارس الي جان مأيد فكره اطلع واتونس حته اصير احسن وأهلي كذلك جان الهم نفس الرأي وبعد مده من الكلام المطول وبعضها رزايل بسبب عنادي وافقت مو علمود نفسي لا والله علمود اهلي وفارس لانو شفتهم حيل تعبوا علمودي وبس يردون راحتي لهذا لخاطرهم رضيت ولا اني خطوه بره غرفتي مالي واهسها..
باليلتها وقبل يوم من سفرتي كضيت الليل كله بحضن فارس شي نتسامر وشي يوصيني اهتم بنفسي واتونس وشي يكلي راح اشتاقلج خابريني كلساع جنت فرحانة بكلماتة لانو مبين من هسه بده يشتاق ومو من كلبة يريدني اروح بس سوه هيج لخاطر ارتاح واني لخاطره هم راح احاول ارجع طبيعيه..
ودعتة الصبح تحت نظرات حب وشوق مسبق اجو عليه وتوجهنة للمطار ومن بعد عده إجراءات روتينية فجأه تأجلت سفرتنة بسبب الأنواء الجوية لهذا رجعنة للبيت شي ضايجين وشي اوك ننتضر على باجر..
اني رجعت وياهم لبيت اهلي دابلغ فارس انو احنه بعدنة هناا بس جان جهازي خلصان شحنة دورت على شاحنة جهازي ملكيتها الظاهر ناسيتها مو خوش سالفة وره كم ساعة شفت همام نازل من فوك يريد يطلع وجان الوكت بداية الليل..
حجيت،، اكلك همام
همام _كولي..
فاطمة _راح تطلع موو..؟
همام _اي محتاجة شي اجيبلج وياي..
فاطمة _لا لا ممحتاجة شي بس اريد اجي وياك ذبني بطريقك لبيتي لانو ناسية الشاحن مال جهازي وأريد اجيب كم شغلة هم..
همام _بس هيج سهلة اذبج بطريقي وبين ماخلص شغلي ارجع عليج..
فاطمة _اي خوش دقيقتين البس شالي والحكك..
همام _مو تتأخرين..
فاطمة _لا ما اتأخر..
بسرعة حطيت شال على راسي وصاية فوك ملابسي وطلعت لهمام تحركنة وسط سوالف َو ضحكات همام فرحت بشوفتة بهل شكل واخيرا رجع مثل مانعرفة همام المرح ابو الابتسامة الحلوه وصلني كدام البيت وحجة..
همام _بس ارمشلج طلعلي عود...
فاطمة _تمام باي..
همام _هلوو
فاطمة _نزلت اني شايلة مفاتيحي وياي فتحت باب الشارع وسديتها وراي جان البيت هدوء رحت لبيتي جان مقفول الظاهر فارس مو بالبيت فتحت بابة وطبيت جان على طبيعتة مثل معفتة محد طب مبين اخذت الي احتاجهن من أغراض بهل أثناء شفت عمتي فاتت عليه..
ام فارس _هااا فاطمة انتي هنا شجابج مو على ساس سافرتي اليوم شرجعج..؟
فاطمة _عكدت حاجبي معجبني كلامها..
اي عمة صح بس تأجلت سفرتنة واجيت اخذ كم غرض ناقصني..
ام فارس _وفارس يدري بيج جيتي؟؟
فاطمة _لاا مكتلة وهوه اصلا بالمحل مو..
ام فارس _ابتسمت..
لا مو بالمحل موجود بالبيت تره عدنة نايم بغرفتة..
فاطمة _صدك والله شعجب مو كل مره هيج وكت بالمحل هوه..
ام فارس _مادري تعالي بنفسج وسألي..
فاطمة _حجت كلامها وراحت بقيت اباع وراها ليش احس اكو شي مو طبيعي شبيها هاي..
خلي اشوف فارس قبل ماروح مادام موجود طلعت من بيتي تمشيت بخطوات هادئة لهذاك البيت الي متوسد بي حبيبي وزوجي..
دخلت من باب المطبخ داطب للهول صار كبالي طفل صغير يمكن يجي عمره اقل السنة كاعد بالكاع يم الدرج  جان حلوو وناعم بحيث معرفت اذا جان بنية او ولد..
بالرغم ما اعرفة بس رف كلبي عليه على ترافتة بس ابن منو هذا وشجابة هناا شنو السالفة باوعت على جهة اليمنة كاعده عمتي على القنفة مبتسمة شبيها تخبلت هاي تضحك وية روحها..!!
سألت بقلق،، عمة هذا الطفل ابن منوو..؟؟
سكتت مجاوبتني ولا نطقت بحرف رجعت باوعت على الطفل كام يتنحس يخلي ايديناتة على الدرج يريد يصعد فوك ويكول كلمات ممفهومة كلش بس جنة كال..
بباااا بباااا...
عكدت حاجبي اكو شي مو طبيعي راد يوكع ركضت عليه شلتة اباع عليه يأشر على الفوك خبص الدنيا يريد يصعد كلبي لعب وشي بداخلي يكلي معقولة هذا ابن.... لا لا شنو السالفة شبيج فاطمة تخبلتي الظاهر..
بين نداء هذا الطفل حته يصعد فوك وبين الشك والقلق الي دب بداخلي مالكيت نفسي غير صاعده فوك بخطوات متثاقلة قاطعة الشك من اليقين هنه كم درجة بس حسيتهم شطولهن شسالفة ليش هذا الدرج مديقبل يخلص وصلت لغرفة فارس القديمة..
زين هسه اني اريد اطب يمه بس هذا الطفل شنو وين أودي انوب فرح من شافني صعدت بي فوك صراع اخذ كل عقلي وكلبي وخوف من المجهول او بالاصح خوف من الشي االي وره هاي الغرفة وشنو ممكن اشوف وارجع واكول شبيج فاطمة كل عقلج..؟؟
اباع على الطفل الي بأيدي خبصني يريد بس يفوت حطيت ايدي على يده الباب وفتحتها بهدوء تام واني اهمس للطفل بكلمة اشش هاي طبينة لا تبجي..
انفتحت الباب باوعت بقلق هيه غرفة فارس القديمة بيها كنتور صغير وسرير ابو النفر وميز مابيها هواي اثاث جانت ظلمة بس يطب بيها ضوه من الشباك انتبهت محد اكو بالغرفة غير فارس نايم على السرير فقط بالملابس الداخلية جريت نفس براحة ناسية امر هذاك الطفل الي طفر من ايدي على السرير فرحانة وينادي بأسى ببااا ببااا..
فتحت فارس عيوني بنعاس مامستوعب شنو الموضوع اني وهذا الطفل ثننينة بهل غرفة ثواني مو اكثر وكمزز مخترع وعلامات الدهشة والخوف انرسمت على وجهه..
فارس _فااااطمة هااي شجابج هناااا انتي مو سافرتي..!!!
فاطمة _شغلت الضوه مال غرفة من يمي وحجيت،، تأجلت السفره على باجر..
نزلت عيني لهذا الطفل الي شامر روحة بحضن فارس رجعت باوعت بقلق اطلب التفسير عن هذا الي ديصير مكذبة كل فكرة احتلت عقلي
فارس _ولييش مخابرتي كتيلي شوووون تصرفين من يمج وراجعة للبيت هيججج..
فاطمة _عكت حاجبي وارتفعت انفاسي..
شبيك فارس ليش تحجي وياي هيج وبعدين هاي شديصير منوو هذا الطفل ابن صديقك موو..
فارس _امشي امشي فاطمة نرجع لبيتة نسولف يلا بسرعة..
فاطمة _شفته ذب الطفل من حضنة وهذاك صار يبجي واخذ ايدي بقوة ماخذني وياه التوتر جان واضح عليه وكصته تعرك كل شوية مأكده انو اكو شي مو تمام..
سحبت ايدي من ايده بقوه وحجيت.. شنوو السالفة فهمني ماريد اروح لمكان هيج صعب جواب سؤالي هاا..
فارس _موو داكلج هناك...
فاطمة _قاطع حديثة دخول هذيج البنت اااخ اي بنية واخر وحده ممكن تخطر على بالي طبت وهيه لابسة دشداشة قصيره صلوخ لافة شعرها بالمنشفة شايلة بيدها ممه ترج بيها
رغد _شبيك يا أمي خبصت الدنيا فارس مت....
فاطمة _سكتت و وكعت الممه الكزيز من ايدها متكسره إلى الف قطعة وقطعة مثل كلبي اختنكت من منضرها الشبهه عاري وبين شكلة وهوه بس بالملابس الداخلية
طلعت مني شهكاتي الحزينة،،
هاااي ش.. شنوو لااا انتي شدسوين هنا بهذا شكلج.. و.. وانته واكف هيج كدامها شبيك
رغد كامت تبجي بخوف
فارس_فاطمة والله مو..
فاطمة _صرخت بكل مابيه من صوت..
لككككك شديصيررر هنااااا احجي احجي انطيني تفسيررر واحد اااااحجي دافهم..
درت على رغد جريتها من ايدها بقوه..
شبيييج تبجين لج متستحين شهل منظر الي انتي بي كومي ستري روحج حطي شي عليج صخام بوجهج حرام تعرفين شنو يعني حرام..
رغد _والله مو ذنبي فاطمة اسفة جنت مجبورة..
فاطمة _شكاعد تحجين ولكم شبيكم مستحيل مو فارس حبيبي كلي جذب الي دافكر بي موو اكو سوء فهم انته مالك دخل بشي هاي هاي صوج رغد اكيد..
امشي لج طلعي بره حقيره متستحين طابة بغرفة رجال مزوج بهذا شكلج هيج ماعدج خجل امشي بره بره الا اكلها لامج تربيج..
وهذا هذا ابن منو مين اجه هاا..
فارس _فاطمة لاسوين هيج بروحج هسه افهمج كل شي عوفيها..
فاطمة _حطيت ايدي على راسي..
لك شعوفها هذا منتظرها عاجبك هاا شوو أعصابك بارده فارس شبييييك..
جريت اديها ادفعها بره صارت كبالي ام فارس تباوعلي بحقد..
ام فارس _شبيك تصرخين مثل المخابيل تسودنتي خوفتي حفيدي..
فاطمة _ح.. حفيدج؟
باوعت عليهم ثلاثتهم.. فارس شنو قصدها جذب موو تشاقون وياي اكيد انته تحبني بس الي ومستحيل تنطي بيه مو حبيبي انته بس الي
ام فارس _لا عيني لا الج ولا هم يحزنون اصلا هوه جان لرغد قبل ميصير الج يعني بالمختصر انتي نازلة على ضره وهذا ابن فارس ورغد حفيدي العود..
فاطمة _وكعدت من طولي صافنة بالكلام الي نزل عليه مثل الإعصار..ماحسيت غير على عياط فارس
فارس _ارررتاحيتييي هسه هاااا فااخ كلبج من كشفتي كل شييي كل همججج روحجج وبس والله ثم والله اذا اخسرها لفاطمة بعد لا اني ابنج ولا انتي أمي كله بسببج خليتيني اصخم حياتي..
ام فارس _وشكوو هسه ضايج لا اول ولا اخر واحد يزوج اكثر من مره..
فاطمة _لزمته من بنطرونة حته يحس بيه انتبهه عليه حاجيتة.. يعني صدك كلامها..
دنك لمستواية يمسح بدموعي
فارس _حبيبتي مو هيج صدكي راح اوضحلج كل شي بس انطيني صبر..
فاطمة _داكلك هذا الكلام صدك لو لا جاوبني..
فارس _دنك.. صدك بس مو مثل..
فاطمة _لك لييييييش ليييش ياا خاااين نذذذذل الله ياخذك ان شاء الله انته وهاي الكلبة لككك ليش هااا شسويتلك بشنو قصرت وياك سويتيني مضحكة كدام الكل وانته مزوج وشبعان وعايش حياتك وهيه هاي الحقيره علويش جيت عليه بعد هاا علوويش..
فارس _لج سكتي خلي افهمج..
فاطمة _ضربته على صدره مرات متتابعة..
شتفهمني هاا شتفهمني تكلي والله فاطمة اني مزوج قبلج وعايش حياتي وبعدين اجيت تزوجتج لك شنو انتوا شنو هذا البيت الي كله قذاره ونذالة اني وين جنت عايشة بيا قرف..
فارس_كاافي كاافي كتلج كافي..
فاطمة _هجم عليه لزمني من حجابي يضربني راجدي لا واحد ولا ثنين اصلا مستمر يطبع آثار ايده القوية على وجهي..
صرخت.. ايي اضرب بعد اضرب هوه انته بس بهاي فالح بيك حظ اعرف شلون تصرف بحياتك ياا جبان..
فارس _منو الجبان هاا اني الجبان..
فاطمة_ااي ايي انته..
محسيت غير انركع راسي بكل قوة بالحايط بحيث انسطرت ذبني بالكاع وصار يكسر اي شي يصير بالغرفة كدامة يعيط ويصيح بكلمات مكدرت افرزنهن بسبب ضربتة الي كسر الدنيا كلها ورجع بعدين عليه لزمني من شعري بعد ما وكع شالي من راسي..
فارس _هاا بعدني بعينج جبان ومقهورة عليه هاا بعدج..
فاطمة _واكثر هم روح تعلم شلون تصير الشهامة مو بالضرب..
جرني عليه محاول ينتهك حرمة جسمي مفهمت شيسوي ساعة يضربني ساعة يفشر عليه اخير شي وبعد فترة من الزمن مو قليلة تعب وبعد ما فقدت القدره على الحركة اخذي بحضنه شبكني بقوه وكام يبجي مثل الي خايف أمة تروح منه..
فارس _اني والله احبج فاطمة والله ردتج بس انتي بحياتي لج همه كله من وراهم محد عافني بحالي محد سألني عن راحتي كلها رادت مصلحتها على حساب سعادتي..
انتي روحي شكد جنت احبج وانتضرج حته نزوج اسف لانو رفعت ايدي عليج حبيبي مراح تزعلين مني موو انتي تحبيني ومراح تعوفيني وحدي اني ماعدي احد غيرج حته هذيج ماريدها ولوما الطفل الي ربطني بيها جان ولا بقيتها على ذمتي اني جنت حاط بالي بس نزوج اطلكها واخلص منهم بس ماعرف شلون صارت حامل يعني اني جنت تعبان بوكتها وهيه جانت تجيني وحتلو اطردها متروح والله مجنت حاس بروحي..
فاطمة _باوعت عليه بخيبة امل جبيره..
انته جذبة فارس وحته حبك جذبة
فارس _لا والله مو جذبة لج اموت عليج نسيتي شلون جنت متمسك بيج لحد محصلتج كل شي نسيتي بهل سرعة هاا..
فاطمة _حطيت ايدي على شفتة..
فارس بستها موو جم مره بستها
فارس _اشش عوفي هذا الحجي
فاطمة _جاوبني
فارس _دنك..هيه مو اني ولا مره بادرت اني وداعتج
فاطمة _غمضت عيني بقهرر..
زين هاي ايدك لزمتها موو وتلمست شعرها وشميتها فارس..
فارس _كافي..
فاطمة _شلون كدرت تلزمها وانته عود تحبني جان كملت حياتك وياها مو احسن..
فارس _ماريدها ماحبها شبيج..
فاطمة _هاي عيونك شافت مفاتن جسمها مو وتمعنت بيها حلوه جانت احلى مني..
فارس _مستحيل اكو بنية تحلى بعيوني غيرج والله..
فاطمة _شالك الله..
نبت اصابيعة بخصري.. ااااخ
فارس _لزمي لسانج..
فاطمة _ههه  هم كتلها احبج مثل مجنت تكلي بأعتبارها هيه مرتك الأولى واني الثانية..
فارس _طبعاا لاا هاي الكلمة بس الج كلتها وانتي مرتي الوحيده..
فاطمة _يعني تعرف اني حاليا اريد فد كلمة اعبر بيها عنك ماكو انته شنوو معقولة انته نفسك فارس الي حبيته وين وعودك وين كلامك المعسول وين هذاك الرجال الي كلي تحرم عليه مره غيرج بس كلي شلون كل هاي الفترة وانته اجذب عليه عينك عينك حته الممثل ميجي يمك الظاهر جنت شيطان بهيئة ملاك..
فارس _ادري بيج كلامج مو من كلبج لانو زعلانة عليه بس وعد مني راح أصلح كل شي وداعتج بس لاتعوفيني شوفي اعتبري كل شي من الي صار ماكو اني هسه اي هسه حروح اطلك رغد واذبها يم أهلها وارجعلج واصير بس الج..
فاطمة _الي باعني مره يرجع يبيعني بعد مره  لو شسوي ماكو شي يصلح..
فارس _ميخالف بعدين نرجع نحجي هسه انتي ارتاحي ونامي بين ماروح وارجعلج بسرعة..
فاطمة _تره اخوية راح يجي عليه خاف عبالك وهيج كل مسرحيتك راح تنتهي..
فارس _لا ميجي حاجيته محد راح يجي ومحد راح يعرف شي..
فاطمة _غمضت عيني بألم تقرب باسني من راسي دفعته بسرعة كام مدري شنو اخذ من الغرفة وطلع من البيت بعد مقفل البيبان عليه تمددت بالكاع اواسي روحي الماتت اليوم استرجع الي صار بعقلي احس الزمن والوكت وكف
شوية وسمعت الباب قفلها دينفتح شنو معقولة رجع بس الي اجه مو هوه اجت أمة..
ام فارس _امشي طلعي بسرعة قبل ما يرجع فارس انتي مو تردين تخلصين منه لحكي على روحج احسن ما تبقين طول عمرج مذلولة عدنة ولا عبالج اخلي يطلك ام ابنة فبكل الاحوال محد خسران غيرج تره..
فاطمة _منطقت ولا حرف فقدت القدره على العتاب ماعرف الي دسوي خير الي لو خير الها بس الي اعرفة بأي طريقة لازم اخلص منه كمت بتعب اخذت من غرفتي الصاية ذبيتها على ملابسي وحطيت الشال على راسي امشي بصعوبة وكأنوا هموم الدنيا كلها التمت عليه قبل ما اوصل لباب الشارع حجت..
ام فارس _اجرتلج تكسي بالباب تلكيها روحي واذا عدج كرامة بعد لا ترجعين لهذا البيت..
فاطمة _باوعت عليه بأسى..
حسبي الله ونعم الوكيل بيج وبأبنج يجي يوم وتدمر حياتج مثل ما دمرتي حياتي..طلعت وطلعت روحي من هذا البيت الي دمر كل ذره بية..
دفعته عني وطلعت من الغرفة نزلت اركض من الدرج بس اريد اطلع منا احس بالقرف من حياتي الي جنت اعيشها هنانه واني مثل الثولة كل شي مادري وصلت لباب الشارع ماحس غير انجريت من شالي لدرجة حسيت حته شعري انجر وتكطع من هاي الجره.. صرخت بقوه بسرعة انسد حلكي انحطت ايد على خصري رفعتي عن الكاع عرفته فارس..
كمت ارفس بين ايدي حته يعوفني شفته مشه بيه لبيتنه بسرعة طب وقفل الباب وراه..
لكك عوفني حقير ماريد اظل هناا افتح الباب افتحها هسه يلااا
.. حط ايده على حلكي بقوه
فارس _كاافي انجبي شوية دالغي شبيج تخبلتي خلي افهمج
فاطمة _شتفهمني اكثر من الي فهمتة وشفته بعيني هاا كلي كلي كرفصت روحي بالكاع ابجي بتعب بهل أثناء شفت تلفوني يضوي دا أخذه بس هوه بحركة سريعة سحبة مدري شسوه بي شوية وقفلة..
انطيني تلفوني وخلي اروح بعد ماكو شي يجمعني بيك روح لمرتك وابنك..
شهكت ابجي بحركة.. روح الهم اني شنو قابل اني مجرد حيوانة اخذتها تكضي بيها وكت موو
فارس _اسمعيني فاطمة والله مو هيج اني مستحيل اريد وحده بحياتي غيرج وتعرفين بيه شلون جنت متمسك بيه كل شي صار جان خارج عن ارادتي أني صرت بين نارين نار حبي الج وانو اكمل حياتي ويه الانسانة الي احبها وبين شرط أمي الي كسرت بي ركبتي جان لازم اضحي حته احصلج..
أمي من زمان رايده رغد اليه واني مجنت ارضى وباليوم الي حاجيتها.
عليج شرطت عليه ازوج رغد يلا تقبل تخطبج الي  اني والله مقبلت وكلبت الدنيا بس خبلتني كم شهر واحاول أقنعها بس عبس شسوي كوليلي احبج الج و رايدج محد وكف وياي حته اخذج خفت لا اخسرج بيوم اذا اظل هيج بس متفرج..
فاطمة _ضحكت..
وبالاخير قبلت بشرط أمك وتزوجت رغد بالسر مجبور حته تاخذني موو..
فارس _والله مداجذب عليج صح قبلت بس شرطتت عليهم محد يدري بهل زواج وجنت خال أبالي فترة واعوفها..
فاطمة _وابنك  مين اجه هذا هم بالجبر..
فارس _دنك..صار بالغلط
فاطمة _اي صح من هاي من مات ابنة اهلك متأثروا اثاريهم عدهم البديل واوو شكد ثولة لعد أني رجلي مزوج من زمان واني مثل الأطرش بالزفة والله استاهل الي صار لانو اني غبية ههه فاطمة البسيطة التافهه الي زوجها ناصب عليها..
فارس _لا تحجين هيج اني الصوج مني بس جنت مجبور خلي روحج بمكاني من تنحصرين بين امج وحب حياتج شتختارين..
فاطمة _انته لو تحبني من صدك مجان لعبت عليه جان كتلي يابه الموضوع هيج وهيج بس لااا هاي بس الرجال يسويها وانته مو رجال انته عار يا..
ماحسيت غير على راجدي فر راسي لزمت خدي
فارس _دير بالج تتجاوزين مره لخ ساكتلج صار ساعة لانو مقدر موقفج بس لسانج حفظي لا يصير شي ميعجبج بعدين..
فاطمة _تضربني فارس اني اني تضربني لهل درجة شايف روحك صح ومغلطان انته محاس على نفسك لو اصلا انعدم عدك الاحساس..
فارس _ حبيبتي انتي جبرتيني ارفع ايدي عليج مكاعد تحسين بيه  لاتكبرين الموضوع اكثر تره مسويت شي حرام وهسه اطلكها مادام انكشف كل شي اني ممستغني عنج تره وكلتلج الي صار جنت مجبور عليه..
فاطمة _انته مو طبيعي والله مو طبيعي عبالك بعد كل شي صار ابقه على ذمتك لا والله نجوم الضهر أقربلك..
فارس _عود اذا طلعتي منا وراها الله كريم..
فاطمة _بله شضام عليه بعد اكيد اكو شغلات اني جنت غبية ومادري بيهم صدك اتصالاتك بأخير الليل وتكلي هذا صديقي معرف شنو طلع جذب موو لو من كتلي مديون هم جذب اصلا كلك على بعضك جذب طلعت اني عايشة بأكبر جذبة بحياتي ...
فارس _تحسر..
لا هاي الاتصالات مجانت من رغد من ابوها وللعلم الله شاهد الابنية مجانت قابلة بهذا الزواج بس ابوها جبرها ولانو طول هل فتره بقت عايشة عد أهلها جان يبقه يخابرني يريد فلوس لو يتحجج بأي شي حته انطي فلوس ويسكت..
فاطمة _حلوو انته مجبور وهيه مجبوره يابه طلعت اني الغلطانة مو انتوا زين وانته بدورك بعت الذهب مالتي ونطيته لابوها موو..
فارس _هم لاا سالفة الذهب صدك جنت مضايق كلش لانو ديوني صارت هواي وخصوصا ابو المحل صار يضغط عليه كلش بس والله فلس من ذهبج مصرفته عليهم..
فاطمة _كمت اصفك ايد بأيد..
الله عليك يا رجال كفوو منك شنو هيه بقت على هاي جان هم نطيتها الهم حبيبي اول تالي هوه مالتك تدري شنو فارس اني هسه كلش مقهوره عليك مو على نفسي اي والله لا تباع عليه هيج صدك مقهورة عليك واعطف على وضعك الي وصلت روحك بي..
فارس _انتبهي على كلامج فاطمة..
فاطمة _شكد خطية انته وصاير مكفخة لهذا وذاك ساعة لأمك وساعة لابو مرتك هيج لهاي الدرجة ماعدك شخصية وضعيف انته هاا سوده عليه..
فارس _سددي حلكج كااافي..
فاطمة _انته حته بعيد كل البعد عن كلمة رجال انته شنو مجرد انسان ماعده القدره يمشي حياته اذا ميرجع لماما ههه لاا والاحلى يكلي علمودج مجبور وووين اكووو رجال ينجبررر هااا ووين..
المؤلم في أمري معك أنك أنتهزتها فرصة كأنك تنتظرها...
كان أملي معك أن أشعر أنني أصلح للحب ولو لآخر مرة، كان حلمي بسيطاً للغاية، أن أُجبر ولو أياماً قلائل عوضاً عما ذقت، عما فاتني، عما خسرت..
أنا لا ألوم غير نفسي، فالذنب ذنبي وجلد الذات قصاصي، لقد أفسدَت طيبة قلبي و حياتي، و أودى بي عشمي الأخير فيك إلى التهلُكة..
كان رجائي أن أراك متمسكا بي كغيري،
أن تقول لي: أنا باقٍ وتبقى، لكنك انتهزت أول خلافٍ بيننا ورحلت.
أذاك آخر صبري معك؟! أذاك جزاء إيماني بك؟! أذاك مُقابل رؤيتي لك؟! يا لسوء حظي في قلبي! ويا لخسارة ظني بمَن حسبته سند.
💔💔💔💔💔
يتبع