لم تكن امي(لبوة الاسد)

البارت التاسع عشر

_البارت التاسع عشر _
........................
‏وشنهو ظني ؟
‏الچنت أتانيهن جِزني
‏لا لگيت شوية منها
ولا لگيت شوية مني
‏ضايع وكِل الوجوه أستغربتني .
.......................
همام _كل الخير لا تخاف نزلت من السيارة وصرت يم الزفة والهوسة منتبهت على بشر بقت عيني على باب البيت...
طلعوا سوية ولازم ايدها  والجماعة تهوس مشيت بنص الكل واني شايل سلاحي وكفت كدام مرتضى الي انخطف لونه من شافني يمكن عبالك راح اسوي مصيبة اله ههه..
تقربت أكثر منه وهمس يم اذنة..
مريم أمانة الله و رسولة عدك حطها بنص عيونك وعوضها عن كل القهر الي عاشتة من قبل صير الها سند وضهر لا تخلي بشر يأذيها صير رجال هل مره بس و..
باوعت على مريم الي كلمة ملاك قليلة بحقها من كد الحسن الي شايلته جانت رافعة راسها علينه يمكن حست اني هناا وراح اجي لعرسهم ابتسمت بصعوبة..
ونطقت أحرف موتي "اا..الف م..مبروك"
كلمتين بس والله تزرف الكلب من صعوبتها عدي  وخرت من كدامهم صعدوا بالسيارة وقبل ميحركون لزمت مسدسي وكمت ارمي بي بالسمة لحد ما فرغ المسدس كله..
زفيتج لعريسج يا محبوبتي راح ادعي ربي يكتبلج الخير وياه لا تخافين مراح اشيل بخاطري عليج كلبي بعمره ماعرف يشيل على احبابة يا خجولتي يا انقى انسانة اشوفها كدامي مودعت بالله و رسولة عسى حظج وبختج ويه صاحبي يكون حلوو..
غيث _شد حيلك همام مو هيج كافي  راحت الزفة وكفتنه هنا متسوه بعد ولا تخلي العالم تنتبهه عليك انوب يطلع حجي على الابنية وانته تعرف الناس بس تريدلها سالفة تسولف بيها..
همام _خره بالناس محد طيح حظنه غيرهم.. رجعت للسيارة بس جسد اي والله بقيت روحي وكلبي يم هذاك البيت مشه بينه غيث واني حسرتي شكبرها..
حجيت،، غيث لا ترجعني للبيت ماريد ارجع حالياً اخذني لأي مكان بس للبيت ماريد...
غيث _تدلل..
همام _بقينة نمشي واني صافن حته تفكير مدافكر شفت الساعة صارت يال٩ونص كلبي لزمني حييل وحسيت بخنكة وحده الله يعلم بيها..
غيث وكف السيارة شوية اختنكت اريد اشتم الهوى وكف السيارة على جهه راد ينزل وياي كتله،،
لا تجي وراي اريد ابقى وحدي شوية انتضرني هناا ماطول..
غيث _على راحتك خوية..
همام _نزلت اتمشى ببطئ..
_بيه حسره هذاك الرجال الي اتمنى يشوف محبوبتة وهية جوه التراب..
_بية صرخت وجع الام من تخسر اول فرحة الها..
_بية شوك المسجون للافراج عنه ويشوف الضوه..
ثواني وصرت اعيط بعلوو صووتي لا شنو اعيط جنت اصرخ لدرجه احس بلاعيمي تجرحت من الصرخه..
لييييييششش لكمممم ااه يااااااربي صعب صعب حموووت من وجع كلبي شنوووو هذا الوووجع الحقييير يااا الله اعفيني من هذا الوجع دخيلك..
كعدت على ركبي وصرت اضرب على الكاع بأيدي  اجرحت وصارت تنزف واني ولا وكفت اصلا محسيت بوجعها..!!
عيطت عيطت لحد محسيت على احد حضني من وره وقيد حركتي دفرت وضربته حييل بس أريده يعوفني بس ماكو ظل مجلب بيه..
غيث _الله يخليك بداعت حبك الها كاافي لك لااا تضربك جلطه منو يفيدك بعدين..
همام _غيث صعبه والله صعبه لك غدر بيه وطعني بضهري النذل لو غير واحد مجان هيج احتركت هم محبوبتي وهم صاااحبي ااااه..
غيث _همام تبجي ولك همام صدك عود انته هيج يصير بيك لا ياخوي متفقنة هيج كتلك مالها داعي روحتك شستفاديت هسه غير الكسره مدكلي..
همام _استفاديت وهواي هم سلمتها اله و وصيته عليها زفيتهم وهم حركت كلبي من بعد روحتها..
غيث _امشي نرجع انته كمت تخربط بالحجي يلا شد حيلك..
همام _صعدني للسيارة واني حيلي انهد كمت الحرف صعب عليه انطقه كل شي بيه تعب واستنزفت كل طاقتي وبقيت همام بس بالاسم مسلوب الاراده...
_تذكرين النجمة ؟
ايي..
_هاي انتي كلها تشوفج بس محد يگدر يوصلج دعيت الله تصيرين إلي بس موتيني ..
٠٠٠٠٠٠٠٠
فاطمة _جو الحزن خيم على بيتنة مانكر حيل حيل فرحت من اهلي قبلوا بفارس واتحدد موعد الخطبة بالرغم مهيمن لهسه مامقتنع وضايج حيل مني ويمكن شك بيه من قبلت ونطيت موافقتي عليه..
بس شسوي ماكدر اخذل فارس الي قدم هواي تضحيات علمودي وسوه الهواي حته نصير سوية واني احبة لدرجة ماكدر اتخيل روحي اصير لغيره لهذا وافقت حته من دون تفكير..
همام حزنه وكسرته جان الها سبب بموافقتهم بالخطبة مدري هوه خسر واني كسبت هوه انطفئ واني ضويت نتشابةة تاره وتاره لخ نتعاكس..
أمي الندم اكلها من شافت وضع همام وجانت مستعده تروح بنفس اللحضه حته تخطبها اله ولا تشوفه هيج متأذي ماعرف شكول علييها هيه بالاصل جانت ناويه تأخر بالسالفة حته تبرد وهوه يبطل من يمه...
دائما اسأل نفسي ليش سوكت هيج ليش فضلت اختيارها وسعادتها على اختيار كلبة.. بس شنو فايده هذا الكلام بعد وكع الفأس بالرأس وجان ندمها كلش متأخر..
همام بعد زواج الابنية اسبوع كامل مرجع للبيت بس عرفنه هوه باقي يم صاحبة غيث كلنه احسن ولد ويه ولد واحد يكدر يفهم الخ عفناه على راحتة لانو الا ما يجي يوم وينسى..
امي معرفت فارس نفسه الولد الي جان يحجي وياي الصراحة هاي هم اجت من صالحي حته متصير مشاكل جديده..
بهذا الاسبوع اجو يمنه ام فارس واخته  المزوجة حته نتفاهم علمود الخطبة وهل سوالف اهلي حيل تساهلوا علمود المصاريف ومادققوا كلش على الأمور المادية...
اني لبست فستان طويل مخصر على الجسم وشعري ضفرته ونزلت خصل من الجوانب..
خليت بس كحل وحمره خفيفة  أصواتهم بالصالة يسولفون ويه امي واني حيل متوتره وشلون حطب اسلم..
سمعت أمي صاحتني حته اجي شلت الصينية طبيت يمهم سلمت وقدمت الهم الضيافه شوية سكتوا بعدين حجت أمة لفارس..
ام فارس _اي حبيبة مثل مكتلج خلي بهل يومين يعقدون وان شاء الله بعد عرس ابنج يعرسون همه لانو ابني يريد تكمل سادس وهيه عدنة..
جنان _ان شاء الله احنه ماعدنه بهاي اشكال اهم شي تكمل..
ام فارس _اي خوش  ابو فارس الله يرحمه اول مخذنه بيتنه بنى مشتمل صغير بصف البيت حته يزوج بي فارس خطيه جانت بنفسه يشوفه عريس  ويفرح بي بس ربنه مقسملة هل شي ..
جنان _الله يرحمه مثواه الجنة ان شاء الله..
ام فارس _الله يسلمج اي فالقصد بهل فتره راح يكمل ترتيب المشتمل منا للعرس وباقي النواقص بيناتنه نسدها...
الذهب اني مشتريته من فتره واتمنى متضوجون بس صار عدي جم فلس جوه ايده وكلت اشتري بي ذهب لمرة فارس احسن متروح الفلوس منا ومنا واني ادري بأبني وراه زواج وهل سوالف واذا تحب تغيره بعدين على ذوقها ..
جنان _هاا لا علويش نضوج مثل مكلتي عود بعدين اذا يعجبهم يغيروا بكيفهم احنه اهم شي عدنه اشترينه الولد..
ام فارس _فدوه لعيونج ام محمد وبقت اخير سالفة كون المهر بيناتنة تعرفين ابونة بعدها مطلعت السنة مالته ومنكدر نسوي حفلة جبيره فشلة من اهلنه..
جنان_حقكم عيوني عادي مو مشكله..
ام فارس _خوش لعد هسه اني اترخص منكم نبقه على نواصل بالتلفون هذا رقمي تشرفنه بيكم..
جنان _الله وياكم مع السلامة..
فاطمة _طلعوا وأمي طلعت وراهم توصلهم للباب شوية ورجعت..
جنان _اكلكم اني مامقتنعه  شو بخيلين هذوله كل شي بالقطاره ينطوا وفوكاها امه ولا باوعت على فاطمة ولا حته كالت حلوه محلوه ما شاء الله اي شي..
شو احسها جايه من وره خشمها لا لا احتمال تسرعنه احنه من قبلنه بيهم خلي اشوف ابوج وينه..
فاطمة _ماعرف شحجي مابين احس كلام امي صح ومابين احسه مو شي ضروري حته نحكم عليهم والمره محجت شي يضوج حيل سكتت شوية وسمعت نقاش أمي وابوية..
ابو محمد _جنان تره صايره سوالفج حيل تنرفز احنه دنلعب لو شنو نطيت حجاية الشيخ و للزلم هسه تردين أتراجع عنها على يابو احسكم ناس بخيلة تره عيب بحقج تحجين هيج والله...
جنان _هيه بنتي وحيدتي هاي غير أتمنالها الأحسن والأفضل..
ابو محمد _تره انتي جنتي من اول القابلين وهسه كلبتي من وره ذهب وحفلة مداعرف شكلج والله بس خليها ابالج مال اسوي الي تكولين عليه كطنه وشيليها من اذنج خوش الولد ادمي وزلمه ينشد بي الضهر..
جنان _والله محد راح يفهمني غير مهيمن لانو مجان مقتنع واكيد لنفس السبب الي اني هسه مامقتنعه من وراه..
ابو محمد _لا اله الا الله كاافي يامره كاافي تردين  تهيجين ابنج الي بالكوه سكتناه ادري متجوزين انتي تسوين مشاكل من ولا شي كعدي وسكتي احسلج وشنو اتفقتوا عليه سوي وخلصت السالفة..
فاطمة _بعد نقاش بين بابا وماما انتصر بابا وكدر يسد السالفة الي فتحتها أمي طبعا امي لهسه مرجعت جهازي ماعرف الظاهر تريد تضمن اخطب يلا ترجعه اليه..
مرت هذني اليومين بين تجهيزات العقد وبين الخوف الي بديت احس بي والتوتر والله الحجي ماكو أسهل منه بس من نجي للتطبيق يمااي والله تخوف..
الي يسألني فرحانة؟
اكلة ماتوقع كلمة الفرح تكفى حته توصف احساسي وشعوري بهاي اللحضات..
احساسي يشبهه الطير الطاير بقيت ادعي من كل كلبي تمشي الأمور على خير ونصير من نصيب بعض..
بيوم العقد اغلب التجهيزات صارت علينه أمي سوتلي صينية مهر على الأصول واني رحت لصالون قريب علينه حفتلي حواجبي وسوتلي تنظيف بشره..
بعدين خلتلي مكياج يولم لون بشرتي وركزت اكثر شي على رسمة عيوني اما فستاني جان ربع أدران طويل وعلى كل طوله شذر وفتحته مو حيل جبيره حبيت شكلي الجديد وعجبني حيل..
جان عدي كلاده ذهب بأسمي لبستها واكتفيت بهذني الشغلات بقيت بغرفتي وبره اسمع صوت البنات والنسوان كل ميتقترب الوكت اخاف أكثر..
عجبني حيل اشوف فارس لمن يجون لانو اكيد مراح اشوفه عدل بالهوسه وكدام النسوان وكفت قريب الشباك انتضرهم صارت بال٥ العصر جان تجي ٣ سيارات جانت وحده بيها نسوان و٢ للشباب..
بدوا ينزلون واني عيني تنتضر هذاك الولد الي ماخذ عقلي وكلبي وياه واخيرا شفته نزل بطلته الحلوه جان لابس قاط رصاصي وقميص اسود كاعد على جسمة والله سرحت بشكله..
صارلي كومه مشايفته دمعت عيوني مداصدك ياربي والله مداصدك معقولة الي ديصير شوية وسمعت أمي تصيحني جريت نفس بقوه باوعت على روحي بالمرآية ابتسمت بفرح..
نزلت وسط هلاهل اهلنة بسرعة اخذتني أمي من ايدي يم باب الصالة حته يعقدلنه الشيخ لانو الظاهر مستعجل ١٠ دقايق كلام مدري شنو وراها سألني الشيخ وطلب مني انطي موافقتي...
غمضت عيوني اطلب من دكات كلبي ترحمني وبصعوبة نطقت الكلمات..
"قبلت انت وكيلي"
بس انتهاء العقد اقاربنة طكوها بالهلاهل بس اهل فارس ضاجوا لانو بعدهم حزانا على ابوهم..
عاد امي تداركت الموقف وحاولت تلطف الجو وسكتت اقاربنة بس بقت نص الوجوه مكلوبة والنص الخ عادي اني كمت سلمت على ام فارس وخواته ٣ وجايه عمته وخالته بس رجعت كعدت بمكاني..
باوعت على هدى ياا هاي وين جانت مختفية والله عبالي مجاية أشرت الها من بعيد اجتني بوستني..
هدى _الف مبروك حبيبتي  تصدكين ستوني انتبهت على لبسج..
فاطمة _يعني حلوو؟؟
هدى _اي والله حلوو وحيل هم عاشت ايدها لام الصالون طلعتج بنية اليوم هههه..
فاطمة _طاح حظج اي والله تدرين لوما هذولة الجماعة جان كفختج وسحلتج بنص الهول..
هدى _هاا حقي والله من اكول طلعتج بنية وانتي جونسينا ميلحكج بالمصارعة..
فاطمة _لج هدى انجبي شوية وبعدين وينج عني كلكم عايفيني وحدي..
هدى _هوه انتي خطبتي واحنه ابتلينة غير كضيناها بالمطبخ يا عصير يا كيك يا مي ولانو اني جنتكم الثانية من بعد الست لبنى الي كاعده ويه أهلها تسولف ومحركت اصبعها ويانه فوكعت كلها براسي خية..
فاطمة _باوعت منا منا صدك انتبهت على لبنى كاعده يم أهلها كاشخة ومتأنقة اكثر مني..
يلا حبي ميخالف اردها الج بعرسكم انتي وابو الأسود..
هدى _تحسرت ولج فاطمة تدرين حددوا العرس بعد اسبوع والله مستعجل اخوج كلش..
فاطمة _شنو السالفة يولي تبقين طول عمرج مخطوبة مثلا بالعكس هذا احسن شي حيصير بحياتج صدكيني..
شوية وسمعت صوت ام فارس تحجي..
ام فارس _يا بنات ستروا أرواحكم راح يطب العريس..
هدى _غمزت الها وهاي راح يطب حبيب الكلب بربج فاطمة شنو احساسج من اخذتي الي تحبي
فاطمة _ولج ولي من كدامي وكتة هذا سؤالج مو حيطب  وانتي واكفه تسولفين..
بهل أثناء طبوا بابا و اخوتي الكبار محمد، مهيمن، همام واخير شي فارس يابة اني من الخجل ادوروني متلكوني اول مره احط هيج مكياج واكون بهيج لبس كدامهم والله..
تقدم علينه بابا باسني من راسي حجه وهوه مبتسم..
ابو محمد _والله وكبرتي يا مدللة ابوج صرتي مره وبأسم زلمة  الله يوفقج بحياتج الجاية ومتشوفين حزن بيها..
فاطمة _نزلت بست ايده..
بعدين باركلي اخوية محمد وراها همام الي والله كسر خاطري واني اشوفة يمثل انو هوه تمام بس عيونة تحجي غير شي تمنيت الله ياخذ من فرحتي وينطيها اله ولا اشوفة هيج..
وأخير واحد مهيمن الصراحة جنت ومازلت لحد هل لحضة خايفة من ردت فعلة وانو بعده شاك بيه او ممقتنع بس الي صار باركلي وتمنالي السعادة وابد محسيته ضايج هنا صدك تنفست براحة..
بسبب انشغالي بأهلي نسيت هذاك الشخص الي ماخذه الواهس بالنظر الية والتمعن بتفاصيل بشكلي  سلموا وطلعوا بس اجه صار بصفي تذكرت فارس حسيت بي لزم ايدي..
فارس _الف مبروك يا زوجة فارس واخيرا صرتي الي..
فاطمة _دنكت راسي بخجل..
أمة نطته الحلقة لبسها اليه بسرعة اباع عليه كام يعرك ويمسح بكصته ونفسة ارتفع معرفت شبي وليش على ساعة صار بي هيج..
فارس _يمه انتي كملي الباقي اني ماعرف..
ام فارس _ياا لعد والذهب والكيك والعصير والصور منو يسويهن ابوية..
فارس _يمه دبريها من يمج شلون مجان وهسه سويلي طريق داطلع..
ام فارس _أمري لله..
فاطمة _خله وطلع حته من دون ميباع بوجهي لو يكلي على الاقل رايح مع السلامة عود صدك شبي هذا ضجت..
الحجية _اكلكم يمه اشو الزلمة شرد شنو هاي معجبتة بتنه..
هدى _طنن بيبي مو هيج بس خلي اشرحلج هههه..
ام فارس _لا حجية بس الولد استحه من النسوان ما شاء الله كومة جماعتكم..
الحجية _جاا شني حرمة هو ويخجل حته مباع على مريتة..
ام فارس _مو هيج عاد حجيت وياه مقبل..
الحجية _خوش عوفيها عليه
هدى _هاا بيبي شناوية..
الحجية _انجبي انتي الخ عبالج مادري بسوالفج تشردين من وليدي أسد الا ما يلزمج بيوم دخلتكم واشوف بعد وين تشردين..
هدى _والله خفت شنو هاي عمي اسحب كلامي اني ومعلية بيج شسوين سوي..
الحجية _جنانو وينج يمه تعالي هينه..
هدى _هاي بيبي والله طلعت مو راحة مدري على شنو تخطط.. شوية وراحت عمتي جنان للمطبخ وبعدين رجعت على فاطمة كومتها..
هاا عمه وين رايحين؟؟
الحجية _انجبي انتي ما عليج خلي البت تتعرف على زلمتها وهوه هم  قابل كل يوم عاقدين..
هدى _حجيت بكلبي خطية على ساس هوه ممتعرف عليها،،
عاد صدك كامت فاطمة ويه امها وراحوا للصالة اظن فرغوها الهم..
رحنه قدمنه الكيك والعصير للنسوان وعادي كعدوا ناس تسولف ويه ناس وطبعا معلكنة اغاني احتراماً الهم لانو حزانه..
اني جنت لابسه فستان تحت الركبة وبي اردان طويله مبطنه بتور اسود والفستان وردي من تصميمي وخياط أمي لانو اضبط مني هيه بالخياط وحاطه الشال على راسي هيج..
باوعت هاجر اختي كاعده وحدها ولازمة بيدها تلفون والله زمن اني جنت اتحسر على التلفون وهيه أصغر مني وعدها واحد بس اكيد مو بابا جابة الها احتمال صبيحة العمة الحنونة..
الصراحه الفار لعب بعبي اشوفها توزع ابتسامات للتلفون شنو السالفة هيج التلفون يسودن.. لو مهما يكون تبقه هاجر اختي و اي شغلة سوتها ضدي اكيد من قرايتهم بعقلها..
ماكدر اشوفها تغلط وابقى ساكتة اني اختها الجبيره اذا مانصحها منو لعد ينصحها ويعلمها تقربت صرت وراها  حاولت اركز بالتلفون اقره الاسم مكدرت بس شفت الصورة عرفتة..
هذا مازن النذل الحقير اكيد كاعد يلعب بعقلها وفوكاها هيه مصدكة بي.. رحت كعدت بصفها.
هيه تفاجأة من شافتني اجيب يمها وبسرعة سدت الجهاز..
هاجر _هاا...؟
هدى _هاجر الي دسوي غلط واكبر غلط هم
هاجر _شنو قصدج عود
هدى _مازن اكبر كذاب بهل دنيا ليش تخلي يلعب بعقلج لج والله هذا..
هاجر _ليش تحجين عليه اشو انتي الوحيده الي تجيبين طاري بالسوء..
هدى _لانو كبالكم يسوي روحه ماكو منه وكدامي يصير شيطان..
هاجر _شلج بيها هاي..
هدى _هجوره عمري والله اني احبج ومن خوفي عليج داحجي هيج عوفي مازن والسوالف التعبانة وركزي بدراستج هيه سلاح الابنية مو غير شي شوفيني اني هسه ميته قهر لانو بطلوني
هاجر _هاي انتي مو اني وبعدين هوه وعدني بس اخلص ثالث يزوجني..
هدى _وانتي صدكتي بي لج جذاب..
هاجر _يجي يوم وتشوفين بعينج هوه مو جذاب..
هدى _والله الحجي وياج ضايع كمت من يمها ضايجة هاي شلون سالفة المشكلة ماعدي دليل ضده حته يصدكوني هوه حقير..
حسيت بالجوع اليوم مماكلة من الصبح  التهيت بالشغل رحت للمطبخ حطيتلي كيكة وطلعت عصير الهول هوسة كلها سوالف النسوان عبالك سوك مو خطبة..
كعدت اكل انفتحت باب المطبخ باوعت هذا محسن اخوهم راس البصل مهتميت اله بقيت اكل مستمتعة بالطعم حسيته صار فوك راسي رفعت راسي اله وحجيت بحده،،
خييرر ان شاء الله؟؟
محسن _انتي الخير شبيج ضايجة ومتتحجين شدعوه هلكد مغرورة..
هدى _اني مغرورة بالعكس اعتبرها ثقة بالنفس مو غرور ولو ماعرف شلون شفتي مغرورة..
محسن _طبعاً مغرورة وهم سطحية من اختاريتي أخوية عليه بس علمود المنصب مالته والفلوس مكدرتي تتحملين اكبر شوية حته اخطبج اني..
هدى_ لا عليك الله صدك تحجي تره كوه لازمه لساني على سخافة كلامك هوه انته كلك على بعضك ١٨ سنه وجاي تحجي حجي اكبر منك متولي من خلقتي..
محسن _تره انتي الي ذبيتي روحج عليه من امج خابرت وكالت هدى لمحسن غلطان اني لو لا؟
هدى _طبعاً غلطان لانو الي حجت وياكم مو امي اني أمي حياة عود من خالتك حياة تكلك هيج حجي عود تعال عاتب..
محسن _ انتي على شنو شايفة روحج لوما ماضيج يشهدلج بالعلاقات مال الشباب  وحته مازن ماخلص منج من اجيتي وتهمتي يتحرش بيج..
هدى _باوعت عليه،،
هسه فهمت فلمك الظاهر صاحبك مازن الحباب حاش بعقلك كم جذبة وانته مثل المطي تصدك يي..
محسن _احترمي نقسج والله لوما بنت خالي  جان طيحت حظج على كلامج هذا..
هدى _استغفر الله،،
محسن الخاطر الله شتريد مني تره كلامك هذا حاله حال الماكو شتحجي انته تره اني مرة اخوك حجيك هذا روح احجي لاخوك اذا بيك حظ..
محسن _ابتسم،،
على سيره أخوية تدرين بي هوه وين حالياً و ويامن بالضبط؟
هدى _شنو تقصد؟
محسن _روحي للحديقة الخلفية وشوفي بنفسج رجلج ويامن ههه خطية انتي والله..
هدى _بلعت ريكي مدري ليش خفت شفته تقرب عليه أكثر وحجه بصوت ناصي
محسن _تدرين دكتج الناقصة هاي مراح انساها الج من سويتوني مضحكة كدام اهلي..
هدى _دفعته من كدامي،،
شوو دوخر راس البصل صاير رجال على اخر وكت..
كلامة  وتهديده ابد مخوفني اصلا  متفاجئت اذا صاحبة مازن العار شنو يطلع هوه قابل نبي؟
بس الي خوفني كلامة شنو يقصد بس احتمال ديجذب ويألف حجي هذا بس هم جان واثق حيل من كلامة   مترددت لحضه انو اطلع واشوف صحة كلامة..
فتحت باب المطبخ باوعت مجان اكو رياجيل رايحين الظاهر بس همام و ولد عمي يعني بس الشباب واكفين بالشارع يسولفون اتوقع الكبار كلهم رجعوا..
تمشيت بخطوات بطيئه وحذره حته اذا اكو احد هنا من صدك مينتبهه لوجودي ضليت اتلفت من كل الجهات المشكلة الحديقة هناا ظلمة حيل صعب اشوف بوضوح..
حسيت روحي حيل غبية لانو صدكت كلام راس البصل انداريت حته ارجع جان اسمع همس على صوت بكاء شخص بسرعة التفتت على مصدر الصوت..
تقربت أكثر شفت بنية وشخص ثاني ناطيني ضهره مكدرت اعرف منو هوه او جان اكو شك بكلبي بس اجذب روحي ماريد اصدك الأفكار الي كامت تجيني..
بس!!
للأسف صار الخيال واقع وانقطع الشك باليقين واني اسمع صوت مهيمن وجواهر يتناقشون بأنفعال..
مهيمن _رحمة للكائنات شرايده انتي من الاخير..
جواهر _ أسد سامحني والله أمي هيه الي جبرتني افسخ الخطوبة اني مجنت قابلة وماريدك تشيل بكلبك عليه..
مهيمن _يعني لاحكتني مناك لهنا لخاطر تحجين هذني الكلمات..
جواهر _شبيك وياي مهيمن معقولة هذا انته نفسك وينه حبك اليه وين راح هاا..
كلبي انقبض من الشي الي شفته والي سمعتة ماعرف ليش بهذيج اللحضه اختنكت درت وجهي ومشيت عنهم بس من صدمتني صرت امشي بغضب وخطواتي طلعت صوت بحيث رأسا مهيمن حجه..
مهيمن _منوو هنااا؟؟
هدى _درت وجهي عنه،،
ااني يا أسد..
مهيمن _هدى انتي...
يتبع