لم تكن امي(لبوة الاسد)

البارت الثالث عشر

،، رواية لم تكن أمي،،
_البارت الثالث عشر _
......................
‏"ما كان حُبًا من النظرة الأولى
بقدر ما كانت طمأنينة من الدرجة الأولى،
مثل أن ينظر المرء إلى شيء ويستريح بهِ."
همام...
.........................
همام _خلص الدوام تقريبا وبده المعهد يفرغ اني متعود كل مره وره مترجع للبيت هيه اني ارجع وراها..
بهل أثناء واني افكر بكلام غيث الي فر راسي وخوفني من المستقبل صار فوك راسي خيال..
باوعت وابتسمت بعمق
خجولتي..
بدون اي مقدمات حجت ومبينه عصبية..
مريم _بس العفو يعني حتظل هيج كل يوم جاي للمعهد وكاعد كبالي مو راح اتجيب الحجي اليه بحياتك هاي..
همام _ما صار ولا استوه الي يجيب اسمج بحرف شحدهم والله اطيح حظهه الي يحجي..
مريم_هسه شنو مناسبة هذا الكلام لو سمحت لا تعترضلي بعد وتجي للمعهد لأنو هذا التصرف ابد محلو
همام _اني اسف اذا ازعجتج بس جنت انتضر منج الجواب واذا متحجين ماكدر اروح..
مريم _فدوه لا تسوي هيج يعني تعرف اني هسه داحجي وياك واخاف احد يحجي عليه..
همام _تحسر،،
مقصدي اسببلج احراج..
شفتها بقت واكفه مدنكه عرفت او فهمت انو هيه مرافضه رفض قطعي ابتسمت..
مريم راح اخطى الخطوه الي بعدها واطلبج من اهلج وهسه اكدر افهم من سكوتج هل مره قبول..
مريم _باوعت بعيونه لأول مره وكتله،،
انته تعرف اني أرملة راح تكدر تخطب وحده ارملة؟؟
همام _فتحت عيوني متفاجئ،،
صدك تحجين لو تشتاقين مريم؟
مريم _لا صدك..
همام _لعد اشو من سألت عنج محد كلي ارملة يعني لا تأخذين كلامي بغير نضره بس صدك متفاجئ لانو شكلج صغيره مو مال وحده مزوجة مسبقاً
مريم _صح اني عمري حاليا ٢٢ سنة جنت تاركة الدراسة..
وازوجت بعمر ال١٨ سنه توفه زوجي بأنفجار صار قريب من شغلة ومحد يدري بية ارملة لانو احنه من سنتين انتقلنه لهاي المنطقه الي كاعدين بيها هسه..
واني جنت نادراً اطلع فمحد يعرف.. المهم اني كتلك وضعي حته متتورط بعدين وتفشل روحك..
همام _وليش افشل روحي عود؟
مريم _ شنو يعني قابل وماعدك مانع تتقدم لوحده ارملة وتتزوجها ومجتمعنة ممخلي كلمة محاجيها عليها؟؟
همام _ابتسم،،
ليش شبيها الأرملة مو من حقها تزوج وتعيش حالها حال البشر..
عسى ما مطلقه ٥ مرات هم اريدج ميهمني لا مجتمع لا ناس ولا كلام احد اني رايدج لذاتج رايد سترج، اخلاقج، تربيتج والأهم محافظتج على نفسج..
وخلي بعلمج بعد كلامج هذا زاد تعلقي بيج اكثر من قبل..
هسه شكلتي أتقدم لو هم عدج أشكال بشي؟
مريم_ صفنت عليه متفاجئه من رده فعلة الي جنت جازمة انو راح يسحب روحه بس يعرف بيه ارملة بس بعد كلامة هذا عرفت مو كل اصابيعنة سوه..
ابتسم بوجهه هزيت راسي بعلامه القبول ومشيت من يمه ميته خجل سمعته ورايه يضحك بصوت عالي ويكول
همام _ياا ياابه وااخيررا نطتني الضوه الأخضر شكرراااا ررربي..
بهذا اليوم حسيت روحي ملكت سعاده الدنيا كلها تعبت حيل واني انتضر كلمتها ومهمني ابد انو جانت مزوجة مسبقاً وارملة حالياً..
الماضي راح وخلص مستحيل يرجع ولا توكف الدنيا عد نقطه محدده..
اخ رجعت للبيت فرحان كلت الموضوع مو مال تأجيل بعد انتضرت يلتمون كل اهلي وافاتحهم بالموضوع حتلو بس أعقد عليها هسه وبعد مهيمن ازوج المهم اضمنها اليه..
شفت امي وحدها وفاطمة بغرفتها سألت على ابوية طلع رايح لبغداد يشوف صديقة مسوي عملية..
ومهيمن بعده لهسه منزل من الواجب شلون حظ عليه المشكلة اريد مهيمن وياي وهم وجود كل اهلي ضروري حته الموضوع ميبقة يجرجر..
لازم انتضر رجعتهم بهيج حالة يعني هم ارجع انتضر واني مصدكت قبلت مريم..
يلا ميخالف ماكو شي يجي بالسهل خلي اصبر والله كريم.. العصر طلعت للمحل لزمته لليل عزلت وطلعت اتمشه بالشوارع..
أبتسم واني اذكر كلامها، خجلها، عفتها، ومن وافقت اووف ربي تمنيتها حلالي اله اضمها بنص كلبي..
صار كبالي محل اكسسوارات مال بنات شبهه ديعزل لانو تأخر الوكت وكفت اتفرج وعيوني على الاسوارات شفت شي يشبهه الاسوار بس ملبسي بالرجل..
مدري شنو هذا بس اتوقع يلبسوا بالرجل لزمته ناعم وبي فراشات نازله و زنجيل ثاني ساده لونه ذهبي حيل عجبني تخيلت مريم تلبسه برجلها البيضة..
اخ واصل مرحلة اني بس هم أريده سألت الرجال شنو اسمه هذا كلي حجل يلبسونه البنات برجلهن دفعت فلوسه واشتريته ظليت اباع عليه كلش عجبني شوو..
تنهدت مدري شبية كلش اشتاقيت لمريم ومتمني احجي وياها بهل دقيقة واسمع صوتها الناعم ولمعة عيونها العسليات شوكت تصيرين حلالي..
رجعت للبيت جانوا الكل نايم تقريبا او كاعدين بس بغرفهم طبيت سبحت وتمددت انام بس بقه بأيدي الحجل احس شي يخص مريم عدي..
ثاني يوم طلعت بالاول للمحل كملت الشغل القوي بقيت الخفايف على العامل..
عفته ورحت للمعهد واني ممصدك شوكت اوصل احس اليوم الطريق طولان..
وصلت للمعهد وهم رحت بوجهي للمكان المعتاد بس اليوم تأخرت هسه بال١٢ احتمال لو الكاها لو راجعه..
عاد والله بس وصلت لكيتها كاعد تلم أغراضها حته تطلع وهم المعهد بي بس كم واحد اكدر اخذ راحتي ومحد يحجي عليها..
وصلت يمها وحجيت مبتسم،، السلام عليكم
باوعت عليه متفاجأه يمكن عبالها مراح اجي اليوم
مريم _وعليكم السلام..
حجيت _شلونج مريم..
مريم _دنكت راسها،، زينه الحمد لله
حجيت،، اني هم زين والله
شفتها ابتسمت بخجل..
رجعت حجيت،، مريم احم شوفي ابوية ممجود بالبيت مسافر كم يوم ويرجع لهذا مكدرنه نجيكم للبيت..
خرب والله احس صعب عليه اجمع الكلمات من تصيرين كبالي..
هزت راسها مبتسمه بله متحجي..
صدك مريم انتي تلبسين عباية بس بالعهد لانو من جيتي للمحل مالتي مجنتي لابسه عباية..
مريم _حجت بهدوء،، أخوية صلاح مقبل اداوم بالمعهد اله البس عباية..
همام _هاا يصير خير يلا روحي هسه ماريد أأخرج اكثر بس اخذي هاي وياج قبل مترحين..
مريم _باوعت على ايده بشك،،
شنو هاي ماكدر اخذ شي منك اسفه
همام _رجاءا وتره هيه شي كلش بسيط والله لا تكسرين بخاطري جايبها الج وبأسمج..
مريم _سكتت ثواني وحجت،،
بس اول واخر مره لا تحرجني هيج مره ثانية..
همام _تمام تدللين..
اخذته مني الحجل وطلعت للخط وأني عيوني وراها وادعي من ربي يحفظها من كل شر..
٠٠٠٠٠٠٠٠
هدى _نايمه وبعد فتره مدري شكد بالضبط حسيت بشي يتحرك على وجهي وبالتحديد شفايفي..
فتحت عيوني بهدوء كل ضني داحلم اني بس الي صدمني!!
واني اشوف ماازن صاير فوكاي ويبوس بشفايفي خفيف ومن شافني فتحت عيوني كمت ادفعة عني ثبتني بأيده بكل قوه شكد حاولت اوخره مني بس عبس احسه لازك بيه..
لعبت نفسي منه ومن شكلة جان مقزز ايد مثبتني بيها وايده الخ كام يحركها على جسمي مثل الماشايف ويحجي بهمس يم اذني
مازن _لج عبالج تنخطبين وتخلصين مني لا يا حلوه عسى ما تزوجين ويصير عدج أطفال اظل وراج وما اعوفج لحد ما اخذ الي اريده..
ولج اخ صايره اسودنين كل مره اروح وارجع الكاج احلى مداتحمل خر×× بيج ليش مرفضتي مهيمن وقبلتي بيه والله اونسج اكثر منه غبيه انتي ما خذه واحد همجي مثل أسد..
هدى _من قرفي منه صرت ارافس جواه وادفر بي بكل قوتي بس تحررت منه تفلت بوجها..
لك حقييرر مهيمن يسواك ويسوه عشيرتك يا نثية هم محسوب على الزلم انته عاار وانكس خلق الله انته .. صرت احجي عليه بصوت عالي
هوه بس شافني هيج طلع من الغرفة و نزل يركض..
احس جسمي كله يرجف صرت اختض مثل السعفه..
اريد اعيط الطم ماكدر احس روحي متشنجه ومصدومه من الي جان ديسوي بيه الحقير..
لعبانه نفسي حييل اجر النفس بالكوه لحد مكلبت معدتي وصرت اتقيئ بالكاع شنو اكو ابطني ذبيته عبالك روحي كاعد تطلع..
كرهت روحي وضعفي كدامه مستغلني الحقير كمت ابجي بعلو صوووتي اضرب على رجلي وجسمي صار ناار احسه ..
مدري على صوتي صعدت أمي حياة وعلى راسها المنشفة الظاهر جانت دتسبح..
حياة _لج يمه هاي شبيج شنو حلمانه وليش هلكد عركانه جاوبيني يمه شنو متقيئه هم..
هدى _اه بس كوليلي كل البنات حظهم مثل حظي لو بس اني فهميني ابووس ايدج شبيه اني حياتي هيج عووجه حموت من..
محسيت غير رجعت اتقيئ احس امعائي كاعد تتكطع..
حياة _عززه العزاج حياة الابنية راح تروح من ايدي لازم أخذها للطبيب خلي اكوم اخابر يوسف
هدى _لزمت ايدها،،
محلمانة ماما بس النذل مازن جان بغرفتي قبل شويه.. و سكتت ابجي بغصه مستحيه من نفسي احجي الي سواه بيه شلون هنوب اسولفه الها..
حياة _هاي شكاعد تحجين هدى؟
هدى _باوعت عليها وحجيت برجفة،،
ماما مازن جان هناا ويتحارش بيه الحقير و يسوي.....مكدرت اكمل كلامي اختنكت حييل..
حياة _ضربت خدها،،
شنو هذا الحجي ولج يا مازن يا صخام وينه نعال هذا وشوكت اجه؟
هدى _باوعت عليها بتردد.. مادري
هاجر_شنوو هاي هدى كلامج يخوف والله محد موجود هنا بس اني وعمه مازن شوكت اجاج اخاف تتخيلين لو حلمانة بي..
هدى _انتبهت هاجر موجوده؟
انتي شوكت اجيتي هنانه
هاجر _بابا جابني قبل ساعه اريد عمه تخيطلي فستان وانتي جنتي نايمه من جيت..
هدى _يعني شنووو معقولة مشفتوا مازن والله جان هنا قبل شويه قابل افتري على نفسي لو شنو..
باوعت على هاجر انتي جذابه تعرفين بي هوه هناا موو ويمكن انتي الي دخلتي للبيت لج اني اختج شلون تقبلين يأذيني هيج انتي مخبلة لو شنو
هاجر _هااي شبيج صدك من كالوا صار بيج جني تخبلتي رسمي شعليه بيج اني روحي تعالجي هلكد متفكرين بمازن صايره تتخيلي بكل مكان..
هدى _باوعت على ماما حياة،،
انتي مصدكه كلامي موو كولي اي الله يخليج تره مداجذب اكيد هاجر تعرف شي وضامته علينه..
هاجر_ اني وليش اضم قابل شعدي هاا كلمن يرى الناس بعين طبعه
حياة _كاافي اسكتن شبيجن..
روحي هاجر نزلي جوه وانتي هدى كومي اغسلج حته ترتاحين وانطيج علاج مال معده
هدى _ماما انتي مصدكتني لو لا؟
حياة _تحسرت،،
عيون امج والله ماكو احد بس احنه راح اتخبل وانتي مو تدرين بمازن يم اعمامه شيجيبه وفوكاها يصعدلج للغرفة اخاف حلمانة يا أمي..
هدى _لاااا لااا محلمانة انتي لييش مصدكيني اكيد من جنتي بالحمام استغل الوضع وهاجر دخلته وو..
حياة _كاافي يا أمي تره والله كلبي ديدكطع عليج وبعدين هاي اختج شلون تسوي هيج حييل واكفه وفوكاها مازن شيجيبه مدكوليلي تره مراهم كلامج فكري بيها زين وهسه تعرفين كلامي هوه الصح..
هدى _بقيت صافنه ليش محد يصدك بيه زين معقوله داتخيل مثل مدكول اخ ياربي مستحيل اتخيل لانو لحد هاي الدقيقة اني نفسي حيل لعبانه من الي صار..
غسلت وكعدت بالهول وكبالي هاجر..
شفت ماما راحت للمطبخ تسوي كهوه كبل طفرت على هاجر لزمتها من ايدها حيل..
احجي حقيره شمسويه وشعدج ويه مازن اني متأكده الج ايد بهل شغلة..
هاجر _اهووو عوفي ايدي تره مطلعت سالفه لحيتي خوما لحيتي داكلج مالي دخل..
هدى _مشيها على غيري هاي المالج دخل..
تره ادري بيج عيونج وراه خصوصا من يسولف وياج اله شوية واطيرين من الفرحه اكيد قشمرج بكم حاجيه وخلاج تنفذين كلامه يا حقيره وله شعدج جايتنه منج من الشيطان..
هاجر _دفعتها عني،،
معليج بيه احبه ما حبه وبعدين الف مره كتلج مالي دخل بالافلام الي عقلج كاعد يصورها لوما انتي مسويه أشكال السوالف والكل يدري بيج وهسه صرتي معصومة موو
هدى _ابتسمت الها،،
صدك طلعتي بت صبيحة انتي ما لومج ولا اعتب عليج تدرين ليش لانو انتي تربيتها شتوقع منج قابل كفو منج يا اختي..
اصلا هسه تأكدت من كلامي بس خلي اكلج شغله وحده ديري بالج على روحج من مازن تره هذا انذل خلق الله يسوي الي يريده وبعدين يطلع منه بكل سهوله سأليني اني..
هاجر _شكد حقوده لعد طلعتي..
هدى _اي خوش اني حقوده وانتي عار على الخوات تمام..
هاجر _مراح اجاوبج خليج بأحلامج من شفتي الكل يحبج ويسويلج الي تردي انغريتي بروحج
هدى _هزيت أيدي،،
مبين انتي الغيره ماكله كلبج حيل بت صبيحة بعد..
كاعد تحجي طبت ماما حياة عفتهم وصعدت بغرفتي نضفت الكاع وطبيت للحمام غلست كل جسمي لانو احس نفسي قذره حييل بس والله اله انتقم منكم كلكم وبالاخص انته يا مازن كل اذيتي من وراك كل شي صار بيه من ايدك الوصخة..
مددت على الجربابة واني احس معدتي صايره نار وجسمي شوية وحسيته صار حار وكمت اون بألم واحجي كلام ممفهوم..
ماعرف شنو وشوكت غفيت كعدت وره فتره ماما دسويلي كمادات مي بارد وتخلي على جسمي..
السيد يوسف _هاا حياة بشري منزلت حرارتها..
حياة _لا شوية احسن الحمد لله..
السيد يوسف _أخذها للطبيب مو أفضل اخاف ترجع تتعب وترتفع حرارتها..
حياة _لا فدوه لعينك متقصر بس صدك ميحتاج..
تعبتك ودوختك بمشاكلنه يوسف
السيد يوسف _ابتسم،،
تمونين عليه حياة ومادام هدى تعتبريها بنتج فهيه بنتي اني هم..
حياة _الله يحفظك النه يابو الكلب الطيب
السيد يوسف _ههه احسج كاعد تمدحيني زياده هل ايام..
حياة _انصبغ وجهي احمر رغم زوجي هوه ويحترمني حيل وميقصر بشي وياي بس لهسه أخجل منه..
السيد يوسف _حياة اني رايح للغرفة تعبت وباجر وراية كعده الصبح من تكملين تعالي وراي واذا مكدرتي تعوفيها ابقى يمها الليلة..
حياة _ابتسمت،،
ان شاء الله.. درت وجهي على هدى لكيتها كاعده..
اسم الله الستار خير شو نضراتج مو راحه
هدى _ضحكت،،
تره عمو يوسف يحبج مبين هذيج وياها وانتي هم مبين حابته واكثر هم
حياة _ادبسزز هل حجي ولج متستحين كل واحد بينة شكبره مال حب هيه بهل عمر بس كتلج الشغله شغله احترام ومودة وهوه والنعم منه ابن أصول..
هدى _اي طبعا طبعا هههه..
تدرين ماما ماحسج مرته عبالك بنته هلكد ميعلمج ويكلج ديري بالج واهتمي بنفسج..
ههه والله يا امي اشوفج شباب اكثر مني ودائما مبدلة ومرتبه وعطرج مبين هذاك وياه حقه عمو ينغرم بيج يابه
حياة _حكوم اكفخج اخذتي عين زيادة تره..
هيه النظافة والترتيب مو بس للرجال حطيها ابالج قبل متسوين شي لغيرج لازم تسوي علمود نفسج..
هدى _اي والله بهاي صدقتي..
هههه لا تكلبين وجهج ماما هوه غير انتي وعمو تخبلون سويه فديتكم..
حياة _باوعت عليها صفح..
تره مهيمن نفس يوسف.. وزواجج منه تقريبا يشبهه زواجي من يوسف بس انتي مكاعد تشوفين عدل ولا تفهمين صح..
حاولي تغيرين تفكيرج وتصرفاتج شنو معناها اكثر من شهر متحجين وياه ومن يريدج تتحججين تره هيج كاعد تعقدين الموضوع مو تحلي...
هاا اشوفج سكتي؟
هدى _اي لانو ماعرف شجاوبج اني اصلا مدافكر بهل موضوع عايفته..
اكلج ماما مهيمن مو كال شهرين ونزوج اشو حنعبر الشهرين وهوه اصلا ماكو ولا فتح الموضوع تتوقعين غير رأيه وميريد يزوجني؟
حياة _كفختها على رأسها،،
عابت الج ولهذا تفكريج المخربط عفتي كل الاحتمالات وفكرتي انو ميريد يزوجج..
مكدر يجي منطيهم إنذار وكاضيها بالبصره صارلها فتره طويله بس اتوقع الأسبوع الجاي راح ينزل..
واذا على زواجكم اني حاجيته انو ماكو داعي الاستعجال قابل منو ديركض وراكم خليها على راحتنه في التأني السلامة وفي العجلة الندامة
هدى _مممم صح حجيج..
صدك ماما ملابسي اغلبهم صغرانات عليه شوكت نطلع للسوك داضايق من الي البسهن..
حياة _على بالي مناسية هل يومين ان شاء الله نطلع وهم مناك نمر لابو عمار نودي الخياط والتصاميم..
هدى _ايي خوش
٠٠٠٠٠٠٠٠
فاطمة_متمدده على فراشي واسولف ويه فارس طبعا بعد مكملت دراسة لانو ممنوع اسولف وياه اله بعد ماكمل واجباتي..
حجه هوه..
فارس _اليوم قدمت على سلفة حبيبي ان شاء الله بس استلمها وانتي تنجحين من الخامس اجيب أعمامي واجي اتقدملج..
فاطمة _صدك والله..
فارس _وداعتج اي والله..
فاطمة _زين فارس اخاف تضايق من وره السلفة واني والله مو على بالي لا فلوس ولا غير شي..
فارس _ميخالف حبيبي هذا حقج وغصب عليه أقدمه الج لا تخافين حبيبج كدها..
فاطمة _مممم يلا نعست
اني حروح
فارس _ههه هسه شحجبت وخجلتي ولج..
فاطمة _لا والله بس صدك نعست وباجر عدي دوام تعرف بعد..
فارس _تمام عمري تصبحين على خير..
فاطمه _وانته بالف خير حبيبي..
نمت فرحانه من اسولف وياه لو مزاجي زفت بسرعه يتعدل كلامه وصوته راحه نفسيه بالنسبه الي..
ثاني يوم كعدت الصبح بس مادري شبية حيل حيل ضايجه ومختنكه وحته الجو جان خنكه وعجاجه احس بخمول يمكن بداية فلاونزه بيه لو مزاج مادري..
بدلت حته اطلع للدوام نزلت جوه جانوا محمد ومرته لبنى كاعد يتريكون أمي يمكن باقية نايمة..
صبحت عليهم رحت صبيتلي استكان جاي شربته على الواكف بهل أثناء دخل من بره مهيمن راجع من الدوام ابتسمت من شفته..
رحت شبكته وسلمت عليه،،
هلوو اسودي شلونك الحمد لله على السلامة..
مهيمن _الله يسلمج أخيتي..
محمد _بالسلامة أسد طولت هل مره بالدوام شوو؟
مهيمن _الله يسلمك خوية..
اي والله طيحوا حظ حظي بهذا الانذار ولعبت نفسي من المكان الي خلونة بي هل مره وحته الاكل اهناك مينجرع..
فاطمة _اووي عمري الله يساعدك مادام رجعت اشبع اكل طيب من طبخ ماما وارتاح زين بغرفتكم بأعتبار معدك شي..
مهيمن _ام الاوي لا تتنعوصين هيج..
فاطمة _هاا واذا غيري تنعوص عليك عادي موو..
مهيمن _ مالي واهسج ولج ام السان ابوية مرجع من بغداد لهسه..
بهل أثناء نزل همام من فوك..
همام _يمعود الظاهر ابوك لكالة مره اهناك وازوجها حلتله الكعده أريده يرجع ماكو..
فاطمة _ههه يمعود لا تسمع امك وتصدك
مهيمن _هسه انته شمضوجك خلي يغير جو احسن من كعده البيت لو اخاف عدك سالفة وياه هاا..
همام _عدي سوالف مو سالفة وحده ومليت واني اجمع بيكم ساعه انته وساعه ابوي وبعدين وياكم
محمد _شنو شعدك همام اخاف واكع بمصيبة لو متعارك ويه احد..؟
همام _خرب انته ماكو بحلكك غير الأفكار الموزينه شبية طفل كدامك..
محمد_خوش لعد اني طالع للشغل..
فاطمة _ياااا تأخرت على مدرستي يبوو شكول عليكم هسه لهيتوني بالسوالف..
مهيمن _ههه محد كلج ضربيلج ركن وسولفي خلي همام يوصلج بالسيارة اني صاعد اسبح وانام..
همام _يلا امشي كدامي خلي اوصلج
فاطمة _يمه فديتك أخوية الحلو ساحل قلوب البنات..
همام_ اذا حتبدين تتلوكين انزلج من السيارة والله..
فاطمة _لا يمه صدك جذب هاي حسكت هم..
همام _عفية..
عدج فلوس لو لا؟
فاطمة_لا عدي شايلة فلوس..
اكولك همامو شخبار الخبز الحار اذا تريد تشتري ومستحي اني حاضره ماكول لاا..
همام _ابتسم،،
ماكو داعي اشكرج متقصرين..
فاطمة_اممم اكدر أجزم هاي الابتسامة من علامات النصر وراح يزيد عددنه بالبيت..
همام _طكها بضحكه،،
سوادين على راسج شنو انتي هههه يابه والله ضحكتيني وبعدين هاا لتضلين تمسلتين بالحجي خليج بدوامج وبس
فاطمة _الله يديم هاي الابتسامة على وجهك الحلو يا حلو
همام _يلا كافي سوالف هاي وصلنه ديري بالج على نفسج..
فاطمة_تمام مع السلامة همامو...
نزلت ركضت للمدرسة جانوا ستوهم ديطبون للصفوف همزين لحكت عليهم..
بده الدوام عادي مثل كل يوم بس اني جنت بعدني ضايجه والخنكه لازمتني.. لحد مخلص الدوام واني كأبه فول..
رجعت للبيت اتمشه فارس مو كل يوم يكدر يجيني يوصلني علمود شغله بالمكتبة بنهاية الدوام الكل تروح للمكتبة لهذا ميكدر يعوفها..
وصلت للبيت واني ادردم..
يمه متت حرر شنو هاي السنة الصيف متحلف النه وجاينة من وكت..
شنوو سويتوا غده تره جوعانه كلش..
طبيت للصاله صارت كبالي أمي ولبنى بس الوجوه مكلوبة..
سألت،، خير شبيكم صاير شي؟؟
رفعت أمي تلفوني بوجهي وحجت،،
جنان_ فتحي التلفون..
فاطمة_شنو شبيج ي..
جنان _بسررررعة !!!
يتبع.....