لم تكن امي(لبوة الاسد)

البارت الثالث

،، رواية لم تكن أمي(لبوة الأسد)،،
_البارت الثالث _
.............................
تظاهر انك بخير..
مهما عصفت بك الحياة..
فالكتمان اجمل ‏بكثير ...
من شفقۃ الآخرين عليك..!!!
...........................
هدى_مادري شلون وصلت لباب الشارع فتحتها اركض بالشارع بله حجاب وحافيه وملابسي مشككه اسمعهم ورايه يصيحوني بس اني مصدكت اشرد منهم مستحيل ارجع الى يشوف شكلي يكول مخبله بقيت اركض ماعرف وين لحد مطلعت سياره بوجهي كلت هاهيه هاي نهايتي..
بس لسوء حظي حسيت بأحد سحبني من ايدي عليه وصرت على طرف الرصيف...
انجرحت رجلي وكلش كامت تأذيني لحضات وحسيت روحي فصلت عن الدنيا لحد مسمعت صوت مألوف عليه رفعت راسي هاي ماما حياة وهمام..!!
حياة_لج يمه جاوبيني بيج شي صار عليج شي؟؟
همام بصياح _متحجين عااد صار ساعه نحجي وياج شبيج تخبلتي شامره روحج كدام السياره وشنو هذا الشكل الي طالعه بي استغفر الله..
.. الناس كامت تلتم علينه واني حرف ماكدر انطق احس لساني انعكد شفت همام نزع قميصه وبقه بالفانيله الداخليه وحطه قميصه على اجتافي..
همام _خالتي مشيها احجي وياها مو صرنه فرجه كدام اليسوه والمايسوه..
راح اروح اجيب السياره واجي مو مال مشي وهيه بهاي الوضعيه..
حياة_ اي خاله روح الله يرضه عليك..
هااي اكيد امج المسمومه هيه سوت بيج هيج موو الله لا يوفقها وتنكسر ايدها ان شاء الله..
.. بهاي اللحضه شكد كرهت روحي واني اشوف نضرات العطف والشفقه بعيونهم اسمع نسوان تكول خطيه وشبيها منو وياها..
كرهت امي وحقدت عليها هيه وعمتي حته ابويه كرهته لانو مفد يوم كدر يحميني منها.. ماما حياة دخلتني جوه عبايتها وشبكتني تقره على راسي بين ما اجه علينه همام..
صاير نار ميتحجه و وجهه مكلوب صعدت للسياره ليوره وماما حياة كعدت يمي تفرك برجلي الي انجرحت
همام _يييعني لومااا مارين بالصدفه مناك جااان سلمتي للنجف كبل موو.. ااادري عقلج وووين
حياة_كافي يمه اني اتصرف اسكت انته هسه مو خلك فضايح اكثر..
هدى _دموعي تنزل على خدي بقهر رجعنه للبيت وبالطريق حجيت كل شي الهم بس فشلانه وميته قهر من وضعي وحالتي خصوصا كدام همام الي ظل يسب بأمي وعمتي..
امي تخبلت من سمعت كلامي وطبت تتعارك ويه احلام وصبيحة شلون هيج اذتني وشككت ملابسي..
احلام بس شافتني اجت عليه متحلفه وتريد تكفشني..
احلام_وييين جنتتي حقييره تشردين من البيت تردين ترحين يم صاحبج اذا ماربيج مره لخ ما اسمه احلام..
همام_هي انتي شويه احجي عدل..
حياة_والله عاشت ايدج يا احلام هاي فوك شينج كوات عينج لج طفله هاي طفله شبيج حاده سنونج عليها لج حرام عليج ابوهم يعوفهم عدج حته تسويهم مكفخة عدج..
احلام_معليج انتي لا تدخلين بنتي واني اسوي بيها الي يعجبني..
همام_مو هيه تايهه وكاعدين بغابة احنه ومندري الظاهر موو
احلام_انته شكوو بعد مبقت غير الجهال عليه..
.. تخبل همام وكام يصيح ويعيط عليها وراها اجت صبيحة..
صبيحة_فضحتونه بالمنطقه كافي شبيكم شدكول علينه الجوارين..
حياة _لا خلفله عليج كل همج الناس والجوارين  ومن جانت تنضرب الطفله كدامج عادي عدج..
صبيحة _كافي حياة احترمي الأكبر منج وثانيا تره احلام  امها مو انتي صدكتي روحج وانو هيه بتج وهوه كلج سبوعين ورايحه انتي منا لهذا لا تعلمينها عليج كلش احسن ما تنكسر بالزايد..
انتفضت مصدومه من كلام عمتي وحجيت،،
شنوو ماما وين رايحه بعد سبوعين انتي..؟؟
حياة_ عضت شفتها يمج يمه مرايحه..
صبيحة_ لاجذبين على الابنيه كوليها راح يزوجوج وفضيها
التفتت عليها بسرعه،، صدك هذا الحجي ماما..!!!
ردت بحنان،، بعدين اسولفلج كل شي يمه..
وباوعت على احلام...
شوفي اني هذا الوضع ميعجبني يرجع اخويه و اشوفه يرضى على سواياتج هاي يا ظالمه ممبقيه شي سليم بجسمها ولوما متلاحكين عليها  جان راحت الابنيه من عدنه..
احلام_مو بكيفج تاخذينها ولا تدخلين اني وبنتي نتصافه..
همام_ندخل ونص هسه صارت بتج موو..
امشي خالتي هسه لو مدري شتحجين مابقيها يمج..
ظلت احلام تعيط وتصيح محد اهتملها لبستني ماما حياة عبايه وحجاب وطلعنه اني حرف محجيت كل تفكيري بزواج امي وبوجع جسمي الي ديزيد عليه مينقص
وصلنه لبيت جدي من الباب وراح همام يمكن حس عليه فشلانه ومستحيه منه كلش من الموقف الي صرت بي كدامه..
اول مطبينه صار كبالنه جدو فتح عيونه على وسعهم بس شافني..
الحجي_ شنو هاي بويه شصاير بيج خيرج؟؟
حياة _ يابه لازم اشوف صوره حل لمرت ابنك ادري إلى متى تظل تتعامل ويه هدى هيج راح تتخبل الابنيه على فد يوم والله..
وحجت الهم كل شي صار شهكت بيبيتي من الكلام الي سمعته..
الحجية _شنوو هذا الحجي كاعد تسمع يا رجال لوما ستر الله جان راحت بيها الابنيه اليوم..
الحجي _هينه هينه يجي ضياء واشوفلي صوره حل مو وضع هذا اني من زمان ادري بيها تأذيكم بس جنت اسكت عين اكول امهم وتخاف عليهم بس لا هذا مو خوف هذا إجرام صار
حجيت بتردد،،فدوه جدو لا تحجي ويه بابا خطيه الي بي مكفيه مو حمل مشاكل اكثر
الحجية_ لا تخافين بيبي مراح يصير شي ادري بيج خايفه على ابوج من المشاكل بس لازم نخلي ابوج بالصوره مو حاله هاي يا بنيتي..
الحجي _روحي بابا ارتاحي انتي تظلين يمنه معززه مكرمة منا لحد متزوج عمتج حياة واني من احجي اريد مصلحتج و من محبتي الج ميهون عليه اشوف احد يأذيج..
رديت بخوف،، شنو جدو زواج شنو ليش راح ازوج امي حياة..
حياه _تعالي ماماتي اغسلج واعقملج جرحج وراها اسولفلج كل شي يلا عمري امشي وياي..
هزيت راسي بحزن.. اخذتني للحمام مقبلت تبقه وياي بس اصرت عليه من نزعت ملابسي حسيت بيها تبجي هيه وسبحني رغم جانت على كيفها بس هاجت عليه جروحي..
بالف يا علي يلا خلصت دهنتلي جسمي ولبستني ملابس نظيفه من عدها واخذت المشط تسرح شعري..
حجيت،، ماما صدك راح تزوجين احجي فدوه تره كاعده على اعصابي؟؟
جرت نفس،، اي يا ماما صدك..
رديت بقهر ،، لعد واني تعوفيني وحدي هوه منو الي غيرج تاليها حته انتي تعوفيني!!
حجيت اخير كلمه وكمت ابجي..
حجت،، شو باعيلي هدى منو كلج راح اعوفج بالعكس راح اظل كل فتره اتفقدج مثل هسه وكل احتياجاتج اني راح اجيبها الج مستحيل اعوفج انتي بنتي وقطعه من قلبي الام مو بس الي تحبل بالطفل لااا الام الي تربى وتتعب وتسهر على طفلها واني جنتلج كل هذني..
رديت بأسى،، اله تزوجين يعني!!
ردت،، والله يا ماما مو بيدي اني رفضت وحجيت هواي بس جدج الله يسلمه قافل يكلي منو الج واحنه مدايمين اليوم موجودين باجر لاا
لازم الج سند تستندين عليه بكبرتج كل واحد من اخوتج  وخواتج حاير بحياته وعائلته محد يظل يم احد طول العمر لابد يجي يوم يمل منج لهذا ومادام خوش رجال روحي بقسمتج..
رديت،، زين ماما منو هذا الي خطبج؟؟
ردت،، صديق جدج شيخ عشيره وسيد بالبصره بس اجه سكن هنا صار فتره وطالبني منه..
رديت،، يعني جبير؟؟
ردت،، اذكر كلي عمره ٥٩ سنه
رديت،، ياا وانتي ٤٠ سنه جبير عليج..
ردت،، شسوي هاهيه كلمن وقسمته بس تره ممبين عليه جبير راوني صورته ههه
رديت،، ولو يعز عليه تعوفيني بس فرحت الج بلكت يصير عدج أطفال..
ردت،، الرزق من الله وانتي بتي ومكتفيه بيج الحمد لله من عوضني بيج..
تقدمت عليها ونمت بحضنها وهيه صارت تلعب بشعري شويه وحجيت..
اكلج ماما انتي وهمام شجابكم عليه وشلون شفتوني..؟؟
ردت،،احنه بالاصل جنه جايين عليكم وشفناج بالطريق.. يلا كافي اخذتيني بالسوالف كومي نحضر العشه واذا مابيج حيل نامي بس أفضل متبقين نايمه حته جسمج ميتكسر بالزايد..
تمام داكوم تذكرت قميص همام شفته صاير كله دم انعدم غسلته وحاولت اوخر الدم منه هنوب انعدم بالزايد عفته شسويله حته فشله ارجعه وهوه خرب ولونه ابيض فوكاها..
ساعدت امي وبقت تحجي وياي انو مانقهر وطلعت قماش وكعدت تخيطلي الشغلات الي شكتها احلام واني كاعده يمها اتعلم شلون تصمم وارسم بالورقه على الاقل التهي وانسه واقع حياتي المر..
شويه وسمعت صوت بابا بالصاله يم جدو تنهدت بضيق مين يتلكاها بابا من شغله الي واكف وديونه الي ازيد متقل لو من مشاكلي شو اني حياتي وحد عن بقيه الناس..
شويه وصاحني جدو يمهم رحته جان بابا كاعد مقابيل جدو ومنزل راسه
محجه بابا شي بس كلي
ضياء_بابا ظلي هل فتره هنا بيت جدج بين ماشوف سالفه امج وين توصل.. مادري شحجي ضاع الحجي من عدي ماعرف شمسوي والله نطاني هيج مره
الحجي _ تفاهم وياها عقلها عيب عليها شكبرها صارت وسوالفها مال مزعطهه لو صاير شي بالبت وين ننطي وجهنه احنه
ضياء_ يصير خير يابه  اني رايح هسه دير بالك على هدى واذا احتاجت شي خابرني رأسا..
الحجي_لا توصيني على بنيتي ضياء روح وانته مطمن
الحجيه _والله فرحانه راح يصير اكو بالبيت نفس ههه
هدى _فدووه بيبيتي الحلوه ههه
ضياء_ بابا اكو شي يوجعج اخذج للطبيب
رديت،، لا بابا مابيه شي لا تفكر هواي..
بالرغم اني جنت متوجعه من الضرب ومكسوره من داخلي بس منطاني كلبي اقهر بابا لو اراوي احد كسرتي نضرات العطف موتتني اليوم..
بقيت كل هذني الأسبوعين بيت جدي مرتاحه وفرحانه اجهز غراض عرس ماما حياة وتعلمت اكثر بالرسم والتصميم والاحلى من توديها أمي لابو المحل ياخذها وتعجبه صح ماخذ عليه اجر بس افرح لانو كاعد أنجح بهل شغله..
والخياطه جربتها بس مضبطتها كلش لهذا اعتمدت على ابو المحل يخيط القطعه لو على ماما..
بده الدوام واروح وارجع من بيت جدي للمدرسه اشوف جميلة تحجي وياي عادي علاقتي بيها مو كلش قويه لانو احسها مو راحه..
اجه نهايه الأسبوع وصار لازم أودع امي من بين دموعي وشهكاتي حسيت روحي هل مره صدك صرت يتيمة لانو راحت وعافتني ماما حياة جانت دوم ادافعلي، تعلمني، تنصحني تشوف احتياجاتي بس هسه راح اظل وحيده..
اجو اخذوها اهل العريس مسوينه لا هوسه ولا خبصه لانو ثنينهم كبار وهوه مزوج كل جهاله ولانو بقه وحده راد مره وياه بالبيت جان شكله صدك أصغر من عمره عيونه لونهم رصاصي وشعره ابيض وبي كم شعره سوده ههه فدوه
وهيه لبست فستان كريمي بسيط من خياطها ومكياج قليل طلعت تخبل.. سلمها جدو اله و وصاها عليه..
شفت من بعيد ابن عمتي جنان مهيمن واكف يم الولد مبتسم وعينه على خطيبته جواهر وراها من تحركت السيارات رفع سلاحه وكام يرمي بالسمه كلش اخاف من صوت الطلق ماعرف شكو يضربون
شفت جدو رفع ايده لمهيمن وكله..
.. كفوو منك يا أسد
مهيمن الاغلبيه يصيحوا أسد لانو متعين بالقوات ومن قسوته بالشغل هناك صاروا يسمو أسد ومشه هذا الاسم حته هناا..
بالرغم ماما حياة أصير خالته بس كعد يرمي بعرسها بدال اخوتها..
خلصت الخبصه وكلمن اخذ اهله ورجع لبيته واني هم صار لازم ارجع للبيت لميت غراضي وطلعت ويه بابا.. طول هل فتره مشفت احد بيهم الله يستر من الجاي..
وصلنه للبيت دخلت صار بوجهي مازن وعمتي صبيحة كاعدين بالهول وراها طلعت احلام من الغرفه و اجت عليه وبوستني من وره خشمها على ساس اني الكاتله روحي على بوستها..
خواتي من النوع مو قريبات عليه كلش مثل ميكولون ماكو محنه بيناتهن عدا سليم حبيبي اجه يركض شبكني ويبوس بيه رغم احلام شكد تقره براسه عليه بس مجان يتأثر..
مشت الايام تفاجأت لا احلام ولا عمتي تقربوا مني لو يضربوني بله عمتي من مازن موجود بالبيت اصير ماكو احن منها بس احلام شعجب شنو الله هداها..
بس بعدين عرفت من ماما حياة جدو مرزلها ومهددها يزوج بابا إذا تبقه تتعامل هيج وياي وبابا حاطها وكاتلها وهم مهددها.. وظاهر هيه خايفه لا صدك يزوج بابا وحده ثانيه..
رحت للغرفه اعدل ملابسي واحضر الجنطه مالتي لانو باجر عدي دوام حسيت احد دخل وسد الباب وراه التفتت شفت هذا مازن..!!
حجيت بحده ،، خيير مازن محتاج شي؟؟
رد،، لا ما محتاج شي بس جيت اسلم عليج صار فتره طويله بيت جدو اشتاقينالج
رديت بملل،، تشتاقلك العافية مازن اذا ماعدك شي ممكن تطلع هسه..
رد،، اي عدي شي تدرين اسمي حلو بلسانج..
رديت،، عادي هوه اسم..
حسيت بي صار ورايه.. التفتت شفت واكف قريب مني ويباع بشكل محلو على تفاصيل جسمي بحيث خجلت حيل من نضراته..
حجيت،، ش.. شبيك مازن ليش تباوع عليه هيج.. ممكن تطلع عااد من غرفتي تره تصرفاتك كاعد ازيد عن حدها..
رد بمكر،، جسمج متغير يولي..
باوعت على نفسي وبعدين باوعت عليه،، شلون يعني شبيك انته تحجي مدري شلون؟؟
رد،، لج سمنانه وكبرانه ال....
فكيت عيوني على وسعهن من نضراته المقرفة وكلامه الاقرف يحجي ألفاظ مال شوارع رأسا وكفت على حيلي وانتر بي،،
ااامشي اطلع بررره اخلاق زبالة والله اذا متطلع اعيط والم البيت عليك..
رد ببرود،، ههه هسه شحجيت قابل اني مجذب لج طلعتي حلوه ومادري بيج  وخلي اذكرج البيت بيتي وين ماطب بكيفي خليها ابالج..
على عموم الايام جايه والوكت طويل تصبحين على خير هدوش..
هدى _كمت ارجف حيل من كلامه مستحيل هذا مو مازن الي اعرفه والي عايشه وياه طفولتي مجان هيج ولا يتلفظ بهيج ألفاظ شجراله وصاير مستهتر هيج..
كمت احس بخوف مو طبيعي وقفلت باب الغرفه لا يرجع واني نايمه يمه والله اموت غير.. يعني اكو واحد كاعد ابيته وعايش بخوف ليش ياربي اني هيج وين ماروح مسدوده بوجهي..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
فاطمة_ بعد مزفينه خالتي حياة وكل واحد رجع لبيته احنه هم رجعنه اجه علينه مهيمن بسيارته وباقي الولد رجعوا بسياره محمد..
الطريق جان ازدحامات صرت اباع من الجامه جان انتبهه على نفس الولد الي من اروح للدوام يطلع كبالي..
هسه هذا شجابه هنوب هناا شنو لزكه خوما لزكه صرت اتلفت منا ومنا لا مهيمن ينتبهه عليه لانو عينه عليه ومتفوته سالفه..
جان صاعد دراجة وصاير قريب على السياره مالتنه من جهتي وعيونه تجدح نار مبين عليه العصبيه شبي هذا مصر يسويلي سالفه يلا يرتاح..!!
درت وجهي عنه وغلست خفت لا تصير مشكلة من ولا شي واخوتي كلهم وياي..
وصلنه للبيت يلا رفعت راسي بس الي صدمني لاحكنه للبيت بطني مغصتني هسه اني لا أعرفه ولا شي شبية هيج خايفه نزلت كبل للبيت حته من دون ماباع عليه..
طبيت بغرفتي اتنفس سريع هاي شبيه اني هسه يطلع زاحف حاله حال غيره وهسه اني من حوري خلي يولي..
سبحت وحضرت جنطه المدرسه صف خامس اعدادي هل سنه اني..
رحت على تلفوني العب بي جنت حاطته صامت تفاجأت ب٢٠ مكالمه ورسائل هوايه على الرصيد كاتب بيها ردي، جاوبي، وينج، الوو؟؟
شنو الفلم منو هذا بعد بهل أثناء رجع دك نفس الرقم ضليت اباع عليه كلت افتحه اشوف منو هلكد مخابر عليه..
اول مكلت الوو..!!
اجاني صوت ولد خشن وبي بحه.. بقيت ساكته شنو هذا بعد..
رجع حجه،،كاعد احجي وياج جاوبي؟؟
سكتت،، اريد افرزن صوت منو هذا..
حجه،، فاطمه وياي؟؟
حجيت بدون وعي،، وانته مين تعرف اسمي واصلا منو حضرتك؟؟
رد،، واخيراً نطقتي
حجيت،، مجاوبتني على سؤالي؟ مين تعرفني انته وشتريد هلكد داك عليه ؟؟
رد،، اعرفج كلش زين واعرف كل شي يخلصج..
اما بخصوص منو اني راح اكلج اني فارس الي جنتي كل يوم تشوفيني بالطريق بطريق مدرستج واليوم هم شفتيني على الدراجة..
سكتت متفاجئه،، هذا نفس الولد عزه شرايد مني داسده سمعته كال..
فارس،، شوو سكتي هواي تسكتين انتي مو داحجي وياج؟؟
حجيت بحده،، هسه شرايد مني مدكلي عفيه شبيك انته وشكو تلحكني من مكان لمكان..
سمعته جر نفس وحجه بهدوء،،
اريدج الج صار فتره طويله و عيني منج مكاعد اكدر اوخرج واطلعج من عقلي و..
مخليته يكمل حجي كبل سديته بوجهه وحظرت رقمه قليل الادب عفيه ولد ربهم دينهم الزحف واني الثوله شكو استمع اله..
صفنت ويه روحي جانت المرايه كبالي وكفت كدامها اباوع على روحي..
طول عمري اشوف نفسي محلوه واستنقص من روحي لانو بشرتي سمره على حمره وعيوني سود شعري اسود فحمي يوصل لنص ضهري كيرلي يعني مو سرح معالم شكلي ناعمه
اني الوحيد من بين اخواني بشرتي سمره هيج
طالعه عبالك طفره بينهم ومحد يصدك اني اختهم صح اهلي يحبوني وممقصرين بشي وياي بس دائما احس بالنقص من اشوف بقيه البنات
جمالهم بياض بشرتهم عيونهم الملونه لو شعرهم السرح اكول اني اذا اوكف بصفهم اطلع اخوهم جنت هيج افكر ودائما اكول لأمي ليش جبتيني وشكلي هيج..
هيه جانت تضحك وياي وتكلي اصلا جمالج مختلف عراقيه اصليه وين اكو بحلاوتج ليش تضوجين من خلقه الله الج..
بس اني مجنت اقتنع بحجيها احسها تسايرني هواي اتمنى بيوم نايم واكعد الصبح الكه شكلي متغير مجنت مقتنعه بشكلي ولا بنفسي يمكن قله ثقه بروحي ماعرف..
عفت التفكير ورحت نمت كعدت ثاني يوم لبست صدريتي وقميصي الأبيض لفيت شالي اكلت لكمه وطلعت للمدرسه احنه مدارسنه انروح مشي الها لانو قريبه على بيوتنه..
وصلت لراس الشارع داكمل طريقي جان انتبهه على فارس يمشي من السايد الثاني وعينه مني توترت مدري ليش يمكن لانو حجيت وياه البارحه خرب اكيد من جاوبته اخذ عليه نضره  اني من هذولاك البنات الي يحجون ويه الولد ويسون علاقات..
نزلت راسي وكملت مشي للمدرسه باوعت عليه من دخلت غير طريقه وراح بغير جهه..
داومت عادي دراسه، سوالف، ضحك ويه البنات خلص الدوام دنرجع للبيت اني بالرجعه اطلع ويه مجموعه من البنات وحده صديقتي رادت تشتري دفاتر من المكتبه وبقيه البنات على واهسها هم طبن اني هم رحت وياهم..
جانت المكتبه صايره على مسافة قليله من المدرسه واغلب الطالبات من يلخص الدوام نلكاهن هنا يشترن شفت أقلام حبر ملونه عجبني اخذت منها طلعت الفلوس حته ادفع داحجي وياه..
جان انصعق واني اشوف الي كبالي فارس مبتسم ويباع عليه واكف يبيع للبنات ضليت صافنه عليه هاي شنو شديصير هنا بقيت اباع عليه بحيره لحد محجه وكال..
فارس _شبيج صفنتي عليه راح تشترين هسه مني لو لا يحجي ومبتسم..
رديت بتلعثم،، هاا اي اي اشتري.. عين عليه وعين على البنات لا ينتبهون على نضراته الفضيحه جانت الفلوس بأيدي بس اني من خبصتي صرت ادور بالجنطه على الفلوس..
حسيت بي ضحك وسحب الفلوس الي جانت بالأساس بأيدي
حجه،، هاهيه وصل حسابج بس على كيفج ويه روحج
.. مهتميت اله بقيت ساكته انتضر يخلصن دانطلع واخيرا دفهن حسابهن وطلعنه..
اول ممشيت حسيت بروحي جريت النفس عزه عبالك جنت مختنكه وهسه تنفست بقه أبالي فارس وليش كل شويه يطلع كدامي..
صرنه نتمشى وكل شويه وحد من البنات تروح بجهت بيتها لحد مبقينه بس ثنين وصلنه لبيتهم سلمت عليها وراحت ..
بس درت وجهي شفت فارس يمشي ورايه عززه هذا شبي والله حموت خوف من وراها بالرغم هوه جان لا يسمعني حجايه ولا يتقرب مني مجرد يمشي ورايه لحد ما اوصل للبيت ويروح..
وهاي صار فتره هيج بحيث بس وصلت للبيت كبل صعدت فوك  حته بدون ماسلم على امي..
باوعت عليه من الشباك هذا صدك رجع من نفس الطريق إلى اجينه منه يعني طلع يوصلني ويرجع سالفته هذا الولد تحير..
يتبع....