لم تكن امي(لبوة الاسد)

البارت الواحد والعشرون

,, رواية لم تكن أمي،،
_البارت الواحد والعشرون _
......................
‏"أين الطريق إليكَ
ياكُل الطُرق؟
إني انشطرتُ
على حوافِ المُفتَرق
فمضى إليكَ اثنانِ،
كلهما أنا."
.................
هدى _اجت ايام وراحت ايام أمي كامت اجهزلي أغراض العرس من ملابس، فرشات والشغلات الثانوية وكومة كوومة سوالف اني محضرت وياها كلش لانو ماعرف شنو الواحد يحتاج او شنو يشتري..
وخطية عمو السيد يمشي ويكلها لأمي اي شي تحتاجة اشتري و بأي سعر المهم متقصرين بشي..
واذا مرات ما اكل وياهم يجي بنفسة يصيحني على السفرة من غير بكل طلعة اله يرجع وبيده علاكة مال تعلولة بيها كل شي حلوه ومالح وحده الي واكيد مينسة وحده لزوجته حتوتة هههه..
يعني صدك حسيته يعتبرني وحده من بناتة هلكد ممهتم بيه وبكل احتياجاتي..
اليوم كاعده اسوي كيكة مشتهيتها صار فتره وأمي جانت تخيط فرشات اندكت الباب طلعت صحت منوو اجاني صوت بابا رحت ركض فتحتها وجان جاي وياه أخوية سليم سلمت على بابا وبوست سليم..
كعدوا يم أمي واني سويت جاي على السريع وطلعت الكيك طبعاً قبل ما أقدمها الهم ضكتها جانت طيبه خوش نجحت عدي ههه اصلا مستحيل اوديها اذا ماضوك طعمها اخاف تطلع مو طيبه واتفاشل..
ضياء_هاي شنو بنيتي متعلمة تسوي كيك صايره ام بيت معدلة..
هدى _أعجبك يابة ههه..
حياة _الف عافية خوية جان جبت البنات وياك خطية اكيد ضايجين من كعدت البيت..
ضياء_كلتلهم تعاجزوا يطلعون والله.. اكول حياة، بابا هدى ااكو شغلة اريد اكولها الكم..
حياة _خير ان شاء الله شنو..
ضياء _احم احلام حامل..
هدى _شنو..
حياة_هاا الف مبروك الله يكومها بالسلامة يارب..
ضياء_الله يسلمج.. بابا هدى شو سكتي ضجتي مو..
حياة_لا بابا علويش اضوج بس كون متشمر الطفل الجاي وتربى هيه هل مره..
ضياء_ هيه اصلا كلش فرحانة بي ورايدته اني مجنت رايد الخلفة كافيني انتوا بس صارت بعد..
عوفونه هسه من هذا الموضوع هدى بابا شوكت ترجعين للبيت على الاقل من تطلعين عروس طلعي من بيت ابوج مو من بيت عمتج ورجلها غريب..
هدى _لا ماريد ارجع يم مرتك واختك
ضياء_بنيتي اذا صدك تحبيني ترجعين وياي حتلو بس بيوم الحنة رجعي وثاني يوم تصير زفتج..
وبعدين هذني امج وعمتج
هدى _هيه لو صدك أمي مجان عافتني و ذبتني على عمتي حياة موو مجان بأصعب ايام عشتها واحتاجيتها دارت وجها عني..
ضياء _دنك راسة،،
بابا خلي تولي شبيج كالبة خلقتج الحلوه علمودها هيه الخسرانة... هاا اشوفج راح تبجين ولج
هدى _كله من وراك..
ضياء_ ليش بابا؟
هدى _مهيمن مالتك حرمني من التصميم صار كم شهر عفت الشغل يم عمو ابو عبد الله من وراه..
ضياء_ اه معقولة انتي هدى صار مهيمن مسيطر عليج بعد ما جنتي انتي الي مسيطره عليه مع الأسف شلون زمن ههه..
هدى _لا تضحك عليه شنو هاي
ضياء_لا تضوجين باباتي اني اخلي يرجعج شحده بعد يضوج هدوشتي..
حياة _هاا شتردين بعد راح ياخذ رزالة مهيمن من خالة لانو زعلج..
هدى _واني امسح دموعي،،
دتحسسني طفلة اني وكاعد تقنعها متبجي..
ضياء_ هوه انتي اصلا طفلة كلج على بعضج ١٤سنه..
هدى _زين اذا تعرف صغيره ليش زوجتني..
ضياء _دنك راسة وتحسر،،
احسن الج بابا انو تزوجين مهيمن.. هدوشة انتي روحي واول فرحة اليه وبنتي الجبيره نضر عيني تتوقعين اختار الج الشر لو اذبج بالنار طبعا لاا..
هدى _ممم خوش هوه انتوا اصلا خصمتوها السالفة من يمكم
ضياء _ بيها مصلحتج صدكيني غير احبج وشفتلج الأحسن الج وين..
هدى _فديتك ضيوو اني هم احبك ههه..
ضياء_ ههه ولج اني ابوج مو مهيمن حته تحجين هيج وياي تذكرين شلون من جنتي صغيره تنصبين عليه بهذني الكلمتين حته يسويلج الي تردي..
هدى _نزلت راسي خجلانة،،
بابا انته تسوه مهيمن وعشيرته كلها
ضياء_باوع على جهه الباب،،
هلا يابه أسد تفضل طب ليش واكف بالباب..
هدى _كمزت من مكاني بسرعة ودرت وجهي جاي اشوف سليم واكف بالباب مو مهيمن..
ضياء_هههه هاا ولج طلعتي بس وياي مسوية روحج قوية ومن أسد تخافين..
هدى _هاا لا بس استحي منه،،
كلت بكلبي هوه غير اذا سمع يجي يعاقبني وشلون عقاب اقوة من عقاب مرتك واختك..
شوية وراح بابا بعد ما اتفق وياي ارجع للبيت بيوم الحنة لليل اجه مهيمن كعد يسولف ويه امي علمود تحضيرات العرس وشنو بقه من النواقص اني عفتهم وصعدت نمت مالي خلك هاي السوالف ولا أفهم بيها اصلا اخذتني النومة للصبح..
كعدتني أمي حياة حته ابدل اليوم نطلع للسوك نشتري البدلات غسلت لبست سويتر ابيض و بي وردي وبنطرون ثلجي طبعا اني لحد هسه ما خلي مكياج ومو كلش اعرفلة نزلت جان أمي تصلي على النبي كتلها
"شنو هاي تره شكلي نفس كل يوم هوه هوه شو هسه كمتي تشوفيني حلوه لانو حزوج هههه"
حياة _ههه والله مو وجهه نعمة انتي امشي نطلع يلا..
هدى _طلعنة جان مهيمن واكف بالباب مجنت ادري هوه الي راح ياخذنة اليوم صعدنة..
مهيمن _هاا خالتي وين تردون اخذكم..
حياة _لمجمع ال.... حته نشتري منه الفساتين..
مهيمن _خوش ادللي..
اكول هدى البارحة وينج اختفيتي صعدتي فوك وبعد منزلتي مو جاي علمودج اني..
هدى _مادري جنت نعسانة وصعدت نمت واصلا مافهم بسالفة الجهاز اني خليتها عليكم..
سكت محجه شي بعد كملنة الطريق للمجمع طبعا هوه جبير وبي هواي فساتين وكلها واحد احلى من الخ..
عجبني فستان بيجي بلون البشرة مصرز من جهه الصدر والباقي ساده الضهر كله تور وهم بلون البشره وفستان قصير فستقي مطرز بالاسود مخصر على الجسم وبي جاكه من وره اشتريته..
وبعدين اخذت حذاء كعب بس مو كلش عالي لونه اوف وايت وراها رحنه لمحل المكياج وطبعا لانو اني ماعدي اي خبره مسبقة بهذني الشغلات..
خليت ام الكوزمتك تختار كل شي على ذوقها من مكياج وعطورات ومقشرات جسم و وجهه ومجموعة عناية بالبشره هذني كلها عدهم بالمحل يسموها تجهيزات العروسة..
اني اشتري ومهيمن يدفع ورانه خطية هههه خلصنه من المجمع صعدنه الطابق الثاني بي البدلات اجرت بدله العرس نفش الايدينات كلها تور جانت اختيار ماما ومهيمن وحذاء ابيض بس شنو أخذته رياضي بي كعب دفن لانو اني بالاصل طويلة طولي ١٦٠ اذا البس كعب عالي يمكن اصير بطول مهيمن هههه ..
ابو المحل صديق مهيمن شافه اجه كله شتسوي هناا جاوبه مهيمن..
،، جايب خطيبتي تأجر بدلة والله،،
رد،، الف مبروك حبيبي غير تكلي انته هنا لوما اشوفك بالصدفة صدك جذب تزوج واني مادري..
مهيمن _والله نسيت..
رد،، خوش لعد مادام طابلي وانته عريس حسابك واصل..
مهيمن _لا يمعود شنو هل حجي والله ماكو
رد،، زين لعد اخذ فستان هدية زواجكم واذا ادكول لا اشمرك بره المحل هااا..
مهيمن _ههه هاهيه براحتك..
رد،، خوش شوف هذا الفستان البارحة وصل للمحل كلش مرغوب بالسوك هسه..
هدى _اني شفته لو عقلي طار من جمالة وفخامتة يعني كل الي اخذتهم ميجن نقطة يمه جان طويل وبي نقشة بسيطة والتعاليك مالتة موديلها نازله على الجتف والضهر مبين جزء منه بس شوية فتحت الصدر جبيره وبي كرستال ابيض على الخصر خربت عليه هههه...
حجه الولد،، اخذلها اللون الماروني يطلع حلوو عليها..
مهيمن _بضوجة،، لا خلي البصلي احسن..
حجه الولد _شوف الماروني يبرز بياضها اما البصلي حيسوي العكس لهذا اخذ الماروني افضل..
مهيمن _يابه عدها ماروني ماريده
هدى _حجيت بسرعة،،
وين عدي ماعدي تره ماروني... اشو هذا خزرني بس يمه شلون خزره والله خفت منه حسيته حينفجر عاد سكتت لضمان سلامتي..
اخذنه البصلي تاليها ورجعته للسيارة أمي همستلي..
حياة _ خطية مهيمن فلستي اليوم..
هدى _ياا اني لو انتي وكفتيلي على البدلات وانتي مشترية كومة شغلات قبلها..
حياة _ولج ليش سعر البدلات يجي يم النواعم الي اشتريها..
هدى _يلا ميخالف فدوه اليه هههه..
حياة_امشي صعدي تره كامت تتطافر خزرات الولد انوب احس حته اليه كام يخزني..
هدى _ههه صعدنه وعلى كوله أمي الخزرات تتطافر منه بله هسه شمسويه اني..
طبعا اني كاعده وره أمي وهوه كلساع مباوع عليه من المراية الوسطية وشامرلي خزره هههه ادري شكو..
شغل اغنية نعم انته لمحمد السالم مهيمن يحب الاغاني ودائما جان يكلي اي اغنية اسمعها لازم الها فد معنى عدي صار يغني بصوت ناصي..
نعم انته كاطع بيه..
هم كول هذا خطية..
هواي غيبتك طالت..
ما الك يا حبيبي جيه..
هواي غيبتك طالت..
شلون اعلمك الحنية..
خوما بالكوه هيه..
شوكت ناوي ترد اليه..
هواي غيبتك طالت..
ظل يغني واني دايره وجهه على الجامة اشو ماحس غير وكف السيارة على ساعة وطخ راسي بالجامة..
حياة _ياا شجاك مهيمن شصار..
مهيمن _ماكو شي خالة بس طسة منتبهت عليها..
حياة _اي انتبه لعد على الطريق اكثر يمه..
هدى _خرب بعرضك كال طسة كال شكد خبيث..خصلت الأغنية راد يشغل غيرها كتله..
،، دخت لا تشغل بعد،،
مهيمن _رفع حاجبة،،
صاار..
هدى _انوب انكلبت خلقته عفتة وظليت اسولف ويه أمي لحد موصلنة للبيت اني نزلت قبلهم وكبل صعدت فوك تعبانة وميتة حر ستوني نزعت الشال والكب طبت ماما للغرفة..
حياة _هدى ماما تعالي جوه مهيمن يريد يحجي وياج..
هدى _ليش هوه بعده مراح كوليلة بدلت و نامت مابيه انزل..
حياة _شتنامين وانتي ستوج جنتي كبالة كاعده..
هدى _اي مابيها شي دبريها من يمج،،
عافتني ونزلت والله مابيه حيل ادري بي حيكعد يرزل بيه وهاي ليش هيج حجيتي وليش هيج سويتي..
رحت غسلت وبدلت ملابسي شوية وانفتحت باب الغرفة باوعت هذا مهيمن..
مهيمن _هاا ست هدى صايرين منعجبج حته تجينه انتي لازم احنه نجيج..
هدى _احم لا مو هيج بس جنت نعسانة..
مهيمن _على العموم جيت احجي وياج على الغرفة لانو باجر اجيبها..
هدى _اي شي جيب عادي ميفرق عدي..
مهيمن _تعاي كعدي..
هدى _رحت كعدت بصفة طلعت تلفونة و راواني موديلات غرف نوم تركية اجنن وحده احلى من الخ..
مهيمن _شوفي راح اجيب تركي..
هدى _بكيفك.. بعدين اجتني فكره خباثة كتلة،،
وله اكلك اني اريد خشب مو تركي
مهيمن _لج الخشب موديل قديم صار..
هدى _لا اني عاجبني الخشب ليش متجيبة الي شنو تخاف على فلوسك..
مهيمن _ابتسم،،
اني وفلوسي نروحلج فدوه هاهية خشب خشب.. بس خليها ابالج جلسه تصوير ماكوو..
هدى _شنوو وليش عود هيه وحده وحده هاا..
مهيمن _اي بالضبط وحده بوحده..
هدى _كلبت وجهي،،
ديلا على ساس اني الي كاتلة روحي حته اخذ صور وياك..
مهيمن _خوش..
هدى اريد تسمعيني هسه ماريد علاقتنه تبدي على كره لانو أساسها مخربط اني راح احجي وانتي كوليلي كلامي صح لو غلط..
هدى _هزيت راسي بمعنى اي..
مهيمن _تذكرين من انتي وصغيره وشلون متعلقة بيه واذا اغيب عنج فتره تجين تسألين عني ومن جنتي تبقين عدنه وإداريج بماي عيوني...
تعلقت و اهتميت بيج حيل وهذا الاهتمام يوم بعد يوم تحول إلى حب بس للاسف جان حب من طرف واحد..
هدى _ردت احجي سكتني..
مهيمن _خلي اكمل،،
وحتلو جنتي تحبيني هسه تحول هذا الحب إلى كره جنت حيل اضوج واتخبل من امج وخالتي يأذوج ودائما اتعارك ويه خالي من وره هذا الموضوع وبوكتها زعل مني اذا تذكرين بالفتره الي كطعت عنكم جانت سببها هذا الخلاف..
تدرين ليش احبج وافضلج على كل البنات لانو من صغرج متنطين بيه، لانو لو شكد متكونين ضايجة الواحد بس يسولف وياج تضحكين وتنسين همج..
معتمده على نفسج ومبدعة بالتصميم والأهم عايشة حياة اكبر من عمرج بس جنتي كدها عدج عزه نفس دورتها بغير بنات بس ملكيتها..
تدرين من بديتي تكبرين صرت أكلها لخالتي تشتري الج ملابس عريضه وتحجبج بعد حته محد يطمع بيج، هدى اني تره نفسي مهيمن الي تعرفي ماكو شي تغير بيه..
تدرين شنو أكثر شي قهرني منج من حاولتي تنتحرين بس في سبيل متصيرين زوجتي زين بربج اكو عاقل يسوي هيج ومن منعتج من التصميم بسبب غيرتي عليج ادري وين صايره هاي شافج بس مره واجه خطبج ادري حب من النضره الأولى..
هدى _دنكت راسي و كمت ابجي كل كلامة صحيح تقرب عليه لزم وجهي بثنين ايدي وحجه..
مهيمن _ليش تبجين اني محجيتلج كل هذا الحجي حته انزل دموعج اني ردت أصلح الي خرب بين مهيمن وهدى بين الأسد واللبوة..
وثقي بالله اني مراح اخذج واتمم زوجي منج الا وانتي راضية وقانعة بهل شي من دون ضغط من احد لانو اني اريدج من تصيرين بأسمي كون انتي الي تردين هل شي مو بس اني..
هدى _حط ايدي على جهه كلبي واني متت خجل لانو لمسني هيج..
مهيمن _راح يظل زواجنة على الورق حنتضرج لحد ما هذا يجي يوم يحن وينبض الي ينبض بأسم أسده.. وطول هل فتره احنه أصدقاء تمام..؟
هدى _هزيت راسي،، تمام
مهيمن _وهاا صدك عدج غرفة شنو تردين تسوين بيها سوي بس بره الغرفة اعذريني احاسبج على لبسج البيت بي ولد مو وحدنه بي والأهم كدام اهلي والكل علاقتنه طبيعية زوج و زوجته وكل شي طبيعي..
هدى _اممم وبعد شتريد..
مهيمن _والله اريد شي بس انتي متقبلين بي..
هدى _شنو هوه؟
جرني عليه وحط شفتة على خدي باسني من خدودي وبعدين صار يبوسني بين خدي وشفايفي والأكثر على شفايفي..
غمضت عيوني ماعرف شنو هل شعور الي كل مره يسيطر عليه بحيث ماكدر حته امنعة عني ابتعد عني سحبني لحضنه وشد عليه..
مهيمن _ربي لا يحرمني منج يا لبوة مهيمن ولا يحرمج مني..
هدى _ههه امين.. صفن بوجهي وحجه بضوجة..
مهيمن _صار لازم اروح طولت هنا واني لو بيدي ما روح بس يلا نصبر شورانة ديري بالج على نفسج تمام..
هدى _ان شاء الله وانته هم..
باسني من راسي وراح بعد مازرع اول بذره حب بكلبي وخلاني انبض اله..
٠٠٠٠٠٠
فاطمة _اليوم الحنة مال مهيمن سويناها بالبيت وقبل بيوم من حنة النسوان وما شاء الله احنه بس اقاربنة جيش كامل بحيث الخبصة واصلة للستار بره الولد ديحضرون الحديقة للحنة واحنه البنات جوه نطبخ نسوي عشة للزلم..
طبعا لانو وحدنه احنه اني وماما ولبنى مو كلش تساعد اجو يمنه بنات اخوالي وعماتي يباتون عدنه وهم يساعدونة بالي يكدرون عليه وبيبي وجدو هم اجو وكلساع بيبي تريد تطلع تهز يم الشباب واحنه نلزمها كوه ههه..
واكفه اشتغل اني بالمطبخ اسوي بالزلاطة اجتي يمي غدير بنت خالي حازم خطية هاي اكثر وحده انشتلت بالشغل وياي لانو تستحي تكول لا لو تكعد وتعوف الشغل..
غدير _فطومة خلصت غسل المواعين شنو عدج بعد..
فاطمة _لا حبي كافي روحي ارتاحي اليوم تعبناج ويانة..
غدير _ماكو تعب قابل شسويت حروح اصب التشريب ويه عمة اذا متحتاجيني..
فاطمة _تمام كلبي..
غدير _كعدنة بالكاع وخلينه جدر التشريب يمنه شكبره وحار وصرنه نصب بالطوس يمكن ساعة كاملة احنه بس نحضر بالأكل ونصبة لحد ما هلكنة يلا خلص..
وبعدين صبينة للنسوان بالهول كعدنه ناكل اني جنت تقريباً شبعانة لانو اني واصب ظليت انقش لهذا شبعت فكملت قبلهم حطيت قوي الجاي الجبير على النار حسيت روحي محتره رحت للحمام رديت الباب فتحت شالي وصرت اغسل بوجهي و ركبتي واني على وكفتي هاي جفلت ع باب الحمام انفتحت بسرعة..
همام _بسرعة درت وجهي ،، خررب هااي انتي هناا..
غدير _حجه هذني الكلمتين وطلع واني حيل توترت شنو هل فشلة عززه عاد بسرعة لفيت شالي شلون مجان واني اسمع صوتة بره..
همام _هي ثولة فاطمة مو اكلج اكو احد بالحمام تكولين لاا ويطلع اي.. انوب اصعد فوك الكه بي نص الفيلق ادري وين انطي وجهي ..
غدير _اباوع على وجهي صار احمر خرب يعني اله ويه همام تطلع الفضايح... فتحت الباب وطلعت بهدوء
همام _ادري نمتي يا غدير مو غديت ماي وانتي جوه بعد قفلي الباب من اطبين للحمام..
غدير _هوه يحجي ومامهتم لكلامة بس اني كلش يعنيلي الحرف من اي واحد وكلش أخجل ..
هزيت راسي اله ورحت ركض للمطبخ شفت فاطمة صارت كدامي رزلتها،، غير تتأكدين ماكو احد بالحمام يلا تخلين اخوج يطب مو تدرين البيت متروس عالم..
فاطمة _يمعوده عادي هسه قابل بهاي الثانيتين حفظ شكلج بله حجاب لو حفظ لون شعرج اصلا تلكي ولا انتبهه
غدير _اعرف ما انتبهه بس فشلة والله..
فاطمة _لا تبقين توهسين مثل اخوج تكبرين وتنسيها..
غدير _عابت عود دصنف شو وخري خلي نصب الجاي بعد شوية يصير هجوم علينه من وره الجاي..
فاطمة _ههه اي والله..
صرنه نصب صواني وترجع النه صواني لخ انجددها ادري مهيمن عازم الامة العربية كلها ولو هوه ممقصر جماعتة هواي بالشغل فوكاها كل واحد جاي وسلاحة بخصره مدري شعدنة..
اني اصب وغدير تحضر صينية الاستكانات وحدنة بالمطبخ لانو المسعدات مكملن ثرد مدري كملن وسون دائره مال سوالف.. بهل أثناء دك تلفوني شفته هذا فارس ابتسمت
اكلج غدوره حروح اجاوب على المكالمة واجي..
غدير _اي عيني روحي بس مو تنسين روحج وترجعين وره نص الليل هاا..
فاطمة _ههه لا والله بس اشوفة شيريد واجي..
غدير _اشاقة وياج روحي حبي.. راحت واني ظليت وحدي صبيت اخير صينية وطب همام بس شفته ضميت وجهي عنه فشلانة..
همام _ادري وين صار الجاي مو صمطوني اليوم شكد بطيئات انتوا النسوان وهذولة الزلم يشربون الجاي بثانيتين حتلو فاير ستوه خرب بيهم وخرب بيك مهيمن طيحت صبغي بعرسك هذا..
غدير _شفتة يحجي وممنتبهه انو اني واكفة هنا لو عبالة فاطمة وعاد يدردم وياها..
همام _انطيني من يمج الصينية فاطمة..
غدير _شلت الصينية بهدوء درت وجهي وقدمتها اله..
همام_اي... هاي عبالي فاطمة شو مالج حس منتبهت عليج يلا مو مشكله انطيني هاي الصينية برد الجاي
غدير _قدمتها الها من دياخذها ايده لامست ايدي حسيت
عبالك سرت كهرباء بجسمي بس طخني.. نطيته الصينية بسرعة واني مدنكة وهوه ولا يمة لا أهتم لا حجه شي أخذها وراح..
فاطمة _وهاي اجيت حته مدكولين عليه نمت على وجهي بالتلفون ههه..
غدير _ابتسمت،،
مراح يجي زوجج للحنة..؟
فاطمة_ جان ناوي يجي بس امة مدري شبيها مريضة واخذها للدكتور ومن خابرني ستوه راجع من الدكتور خطية تعبان مابي بعد حيل يجي..
غدير _خطية الله يساعده وماعدها غير العافية والدتة..
فاطمة _تسلمين حبيبتي الجاي خلص تقريباً موو..
غدير _اي خلصن بس بقت المواعين نغسلهن..
فاطمة_والله ولا اغسل نص ماعون انكسر ضهري من الشغل ذابي كله براسي وهذني بالصالة جايات للسوالف عبالك صبريلي الا ما خليهن من وحدهن يكومن..
غدير _شراح تسوين يمعوده عوفيهم متسوه اني اغسلهم..
فاطمة_كل عقلج كل هذني تردين تغسلين وحدهم هم شكد فاهيه شو وخري خلي اشوف شغلي..
غدير _بكفيج بعد..
راحت للهول يمهم شوية واجوا البنات للمطبخ واستلمن المطبخ تعجبت الله هداهم لو شنو..
فاطمة _هاا حبي اشوفج صافنة..
غدير _هاي شلون كامن هيج شسويتي ولج..
فاطمة _والله ياعمري شكيتهم يم بيبي هيه ثواني وخلتهم طشار للمطبخ هههههه..
غدير _طلعتي داهية والله..
فاطمة _اي اعجبج حبي أمشي نصعد فوك نباوع للحنه مال شباب من غرفتي نستغل اللحضات الاخيره كل شي مفهمنه من الحنة..
غدير _يلا صعدت فوك طفينة اضوية الغرفة وفتحنة شوية من البرده.. الولد كلها تركص وتضحك الا همام واكف على جهه ومكتفي بالنضر حته ابتسامتة كوه يطلعها..
هذا شبي شعجب صاير هيج معقولة مفرحان لعرس اخو لو خاف بي شي باوعت على فاطمة والله استحي اسألها وادخل احتمال ضايج من شغلة شكو ادخل روحي وبعدين احصلي حجاية مو حلوه..
شوية وجان تطلع بيبي على عكازتها وكفت يم مهيمن حنته وهوه باسها من راسها منضرهم كلش حلوو جان الله يسعده..
وره ساعه تقريبا خلصت الهوسة والناس راحت والأقارب هم راحت اني وامي بقينه عدهم مرجعنه للبيت علمود نساعدهم وطبعا رجعنة عزلنه المطبخ مره ثانيه لحد ما وكعنة من التعب بحيث بسرعة فرشنة النه بغرفة فاطمة ونمنه..
يتبع....