لم تكن امي(لبوة الاسد)

البارت السابع والعشرون

,, رواية لم تكن أمي،،
_البارت السابع والعشرون _
~~~~
وشذنبي تغفون وآضل
ليليه انآم مبلل ..
هـو آنه لو بيدي عفت
بس تآيبين شمآ گلت
لـ اعزآز شو تتحول !!
~~~~~~
ابو محمد _لا اله الا الله..
سده بوية سده.. استغفر الله
جنان _خيير شصاير وكعت كلوبنة تره..
محمد _ها يابة اشوفك ساكت منو توفة..؟؟
هدى _كلبي رجف خوف خفت من الي راح يحجي عموو ياربي كله ولا الي أبالي يطلع صح.. تقدم عمو حط ايده على جتف عمتي جنان وحجة بأسى..
ابو محمد _البقاء بحياتج جنان الحجية الوالدة نطتج عمرها..
جنان_ لطمت صدرها... شنوووو شكاعد تحجي انته اوويلي عليييج يمه..
ابو محمد _شدي حيلج جنان راحت يم رب كريم..
هدى _مكاعد اكدر اصدك الكلام الي داسمعه عمتي ملخت روحها دكت ولطمت شكت ثوبها وكامت تنعي والكل يبجي على بجيها.. يعني شنو بيبي توفت؟
معقولة هاي الحنينة الطيبة عافتنه وراحت بيبي هيه وجدو جانولي اب وام جانولي اهلي وسند يدافعولي ويحبوني اكثر من بقية احفادهم رحت يم عمة وصرت ابجي وياها..
لييش يربي لييش والله مجان بيها شي ليش اخذتها يمك ملخنة روحنه لحد ما انتهكت كل طاقتنة رحنة لبيت جدو جانوا اغلب أعمامي وعماتي هناك والصريخ والعياط واصل للشارع..
اباوع على جدو ضام وجهه بأيدي ويبجي على بيبي أمي حياة روحها مفرفحة وكلساع متخربطة محد جان بحال احد كلمن حايره بوجعه وكسرته..
ليش دوم الي نحبهم يرحون عنه.. ليش الناس الزينة تفاركنة وتبقة الناس السيئة.. شجاها هاي الدنيا شكد غداره اخذت عزيزتنة وهيه بعدها بصحتها..
بيبي يا ام الكلب الطيب وينج وكتها هسه روحتج شعدج بالكبور وين عفتي جدو وحده مو تعرفي ميكدر على فراكج اااه شكد الدنيا قاسية هسه لو مريضة بيها شي نكول متوقعين موتتها بس مو هيج..
ثلاث ايام الفاتحة محد يدري بأحد وكلساع متخربطة وحده من عماتي خو أمي حياة حطولها مغذي اخير شي لانو كلش تعبت والسيد ظل حاير بيها يخاف لا يشكل عدها الضغط..
من تقره الملة احسها كاعد تسحب روحي من داخلي بيبي ام الحجاية الحلوه راحت هيج صدك يعني معقولة بعد مالها رجعة..؟؟
خامس ايام الفاتحة واحنه كلنة باقين يم جدو واحد يبجي على جتف الخ الا اني جنت ابجي واحزن وحدي..
فاطمة مقبل فارس يبقيها لو تبات لانو كلش تعبت وهيه منا بنية جسمها ضعيفة متتحمل صار يجيبها الصبح وياخذها بالليل..
جنت كاعده بزاوية الغرفة وابجي بصمت ماعدي غير دموعي اعبر بيها عن حزني وياريت لو الدمع يرجع احبابنة جان بجينة طول العمر..
حطيت راسي بين ركبي وغمضت عيني فترة مدري شكد حسيت على احد حضني عرفته من عطره او حسيته بي ماعرف رفعت راسي والدموع تلالي بعيوني..
حجيت بغصة.. مهيمن بيبي
مهيمن _اشش كافي يروح مهيمن لا توجعين كلبي اكثر..
هدى _بادلتة الحضن.. وينك انته هاا تدري شصار بيبي ماتت مهيمن ماتت عافتنة وراحت..
مهيمن _مقبلوا ينطوني اجازة ماعرف شلون صبرت نفسي بهل ايام واجيتكم..
هدى _مهيمن أريد بيبي رجعها النه..
مهيمن _لعد اني شكول لا حضرت جنازتها ولا دفنتها احس كلبي مشتعل نار..
هدى _محتاجتك..
مهيمن _والله مو بكدري تعاي..
هدى _وين؟
مهيمن _تعبان والله اريد اتمدد قريب منج حته انام..
هدى _جان اكو فراشات على جهه فرشت مندر اله وحطيت مخاديد شفته قفل الباب ونزع قميصة تمدد وجرني نيمني على ايده ضم وجهه بركبتي شوية وحسيت على رطوبة صارت على ركبتي..
واجتافه تهتز عرفت بي كاعد يبجي واني هم صرت ابجي أصعب لحضات مرت علينه مهيمن اول مره اشوفة بهل ضعف حقة مالومة لانو بيبي جانت روحها بأحفادها ومتعلقين بيها احنه كلنة..
فتره وحسيت بي نفسة ثكل وخرت عنه شفت ملامح وجهه مبين عليه التعب كلبي وجعني عليه مكدرت انام بقيت صافنة عليه.. مجرد ما سمعت عمو كال لا اله الا الله
كلبي لزمني وخفت عليه عبالي صاير عليه شي شسوي بروحي لو يعوفني بيوم اكثر شخص حبني وخاف عليه هوه رجعت يمه وشبكته الخوف بهذا اليوم بقة بكلبي..
رجعنه للبيت بس بقينه كل يوم نروح يم جدو لانو بقة وحده بعدين قررت عمة تأخذه عدنة بالبيت لانو تعبت صحتة واحنة هم حيل تعبنة على فراك بيبي..
اجه أربعين بيبي ورجع الجرح اجدد رحنه للنجف ندور كبرها بهذا اليوم حسيتها عبالك توفت هسه الكل يبجي ويلطم لحد مخلصت طاقتنة..
بعد طريق طويل رجع كل واحد لبيته صعدت لغرفتي عيوني ماكدر افتحها من وره البجي وجسمي هل فتره حيل نحلان واكثر من مره ادوخ بس مو لدرجة افقد وعي مهتميت كلش كلت اكيد من وره التعب..
حطيت راسي على المخده اني وبعدني بملابسي مال طلعة طب مهيمن للغرفة وشكله مدري شلونة كلساع يباوع عليه..
كمت من مكاني حسيت اكو بحلكة حجي سألته بخوف لانو نضراته متوحيي على خير.. شكوو؟؟
مهيمن _هدى امج..
هدى _طفرت من مكاني شبيها؟؟
مهيمن _اقصد امج احلام طرحت الطفل..
هدى _هاا.. دنكت راسي وحجيت ليش شصار؟
مهيمن _مزحلكة بالحمام ومن رايحة للطبيب طلعت مسقطة الجنين ومن درت الي ابطنها ولد تسودنت ومتخبلة على اهلج..
هدى _استغفر الله ربي..
مهيمن _هدى ترحين لبيت اهلج..
هدى _باوعت بعيونة.. بكيفك
مهيمن _اخذج باجر اليوم تعبانين واكيد اهلج هم تعبانين..
هدى _هزيت راسي بمعنى اي..
نمت بس بالأصح حاولت انام صاير عدي أرق لو شكد ماكون تعبانة عيني متاخذ نوم يطلع الفجر بحيث اتعب يلا انام..
ثاني يوم رحت من الصبح لبيت اهلي وطب مهيمن وياي سلمت على بابا وبعدين صارت كبالي احلام بعدني مكايلة الها الحمد لله على السلامة اشو هاي طفرت ضربتني راجدي وكعتني على اثره بالكاع..
ركضت عليه مهيمن كومني وصرخ عليها..
مهيمن _ااانتي شبيج مخبلة شكوو تضربيها تايهتلج هيه..
احلام_الحقيرة هيه دعت عليه اكيد مات ابني من وراج ارتاحيتي موو..
هدى _لزمت خدي وحجيت.. شعليه بيج أني
احلام_لج انتي عاله على كلبنة فكررر بس تزوجتي ماتت عمتي ومات ابني من شالج الله واخذج..
مهيمن _كافي الصمي ساكتلج احتراماً لعمرج ومقدر حزنج بس لادوسين بالحجي احسن ما سوي شي ما يسر عدوا ولا صديق..
احلام _مخايفة منك انحرمت من ابني كله بسبب حسدج وكرهج يا منافقة..
هدى _ظلت تخرط وتخربط بالحجي.. بابا كمشها سحلها للغرفة وقفلها عليها هيه مستمره بالفشار حته كفر كامت تكفر..
ضياء_مادري شكول بس هاي صاير وياها صدمة مدري شنو وبس تتصارخ اضربها ميفيد احجي ميفيد شسويلها بس كولولي مو حموت اني من وراها والله..
هدى _اسم الله عليك بابا فدوه لا تحجي هيج..
مهيمن _عمرك طويل عمي عوفها بعد هاي من زمان جايزه من نفسها احنه هم مجان المفروض نجي..
ضياء_هز راسة.. بابا هدى وجهج اصفر ليش هيجي والله كلبي خلص ديري بالج على نفسج..
هدى _ان شاء الله
مهيمن _يلا هدى اذا ماعدج شي خلي نرجع..
هدى _لا ماعدي..سلمت على بابا صبيحة مشفتها معتكفة بغرفتها وخواتي كالعاده مالهن دخل بأحد عسى ما يحترك البيت ماكو بيناتهم اي حنية..
صعدت قبل مهيمن ظل شوية بعدين اجه باوع عليه بتفحص حط ايده على خدي الي ضربتني عليه احلام..
مهيمن _لبوتي اذتج..
هدى _هذا الوجع ميجي نقطة يم وجع كلبي فعادي..
مهيمن _خلي تولي هم محسوبة على الأمهات هاي زين شبيج انتي تره منتبه عليج مصوفره صار فتره بس والله دايخ كل ماريد اسألج التهي..
هدى _كل شي مبيه بس تعب..
مهيمن _ماتوقع..
هدى _سكتنة شفته مشه بغير طريق حجيت..شنو وين رايحين احنه؟
مهيمن _نفحصج..
هدى _ماريد اروح فدوه مابية شي..
مهيمن _ماريد نقاش بعد جم يوم التحق بلكت صرتي اسوء منو بحالج..
هدى _سكتت ابد مابية حيل اناقشة نزلنة يم مختبر سولي كذا تحليل اخذنة النتيجة ورحني على دكتور مهيمن يعرفة نطاة تحاليلي قراهن وحجه..
الدكتور_ليش هيج بابا هامله صحتج نسبة دمج سبعة وعدج تكسر بكريات الدم احمي نفسج تره مناعتج حيل ضعيفة والي داشوفة كبالي منتهيه انتي شنو مرايده روحج..
هدى _دنكت راسي جنت احس بنفسي مو زينة بس ماعرف لهل درجة متأذية..باوعت على مهيمن يفرك براسة ويباولي بتعب..
مهيمن _هل فترة جانت عدنه حالة وفاة.. زين دكتور والحل شنوو..
الدكتور _هسه ضروري اشدلها مغذي وراح اكتبلها على مجموعة فيتامينات لازم تلتزم بيهن بالإضافة للأكل الصحي..
بس عدي سؤال يعني الي داشوفة حالتها الصحية ما اجت من فتره بسيطة مبين عدها من زمان وهسه تأزمت..
مهيمن _شلون يعني..
الدكتور _سوء تغذية منذ الصغر نقص فيتامين بنية ضعيفة هذني كلهن بحالات مطوره.. على العموم زين منكم اجيتوا حته نتلاحك للوضع..
هدى _اكيد صاير هيج بية بسبب تعامل أحلام وياي ومنعها الاكل عني اوف لعنة طفولتي لحد هسه ملاحكتني والله تمددت على سدية واجت ممرضة شدتلي مغذي..
بقة مهيمن ساكت واني هم ساكتة خلصنة اشترينة العلاج ورجعنه للبيت بقيت اباوع عليه ليش ميحجي وياي انتضرتة على الاقل يسألني شلون صرت ماكو عفته ونزلت للبيت اول مفتت شفت عمة وجدو كاعدين بالهول هيه انتبهت على أثر الكانونة بأيدي..
جنان _خيرج هدى جنج جنتي بالمستشفى؟
هدى _اي صح سويت كم تحليل لانو جنت ادوخ هواي اخير فتره..
جنان _اي شطلع حامل لو لا؟
هدى _لا مو حامل نقص بكريات الدم وضعف.. مجاوبتني
عفتها جنت تعبانة حيل وهذا العلاج احسه يدوخني لفيت راسي ونمت تعبانة نفسياً وجسدياً كل شي بية تعب..
كعدت ويه اذان المغرب صليت ونزلت سويت عشة الهم سألت عمة.. مهيمن وينة؟؟
جنان _هزت ايدها شلون نسوان اخر وكت ميدرن وين رجلهن مادري مرجع لهسه..
هدى _كلامها يضوج بس عذرتها..
عفتهم وكعدت بالمطبخ انتضر يخلصون حته اغسل المواعين مشتهيت اكل كملت كل شي وبقيت لل١١انتضره ماكو ضجت يعني وينة هذا مو والله حتخبل من وراه فد يوم..
صعدت لغرفتي ضايجة حيل هسه قابل اني مرضت روحي اووف بدلت بدشداشة نوم خفيفة كعدت امشك بشعري بهل أثناء شفته دخل وبأيده علاكة..
مهيمن _السلام عليكم..
هدى _وعليكم السلام..
مهيمن _هدى تعاي يمي شوية..
هدى _باوعت عليه هاا شكو..
مهيمن _هاي الج..
هدى _اخذتها منها فتحتها شفته تلفون حديث ..
مهيمن _شوفوا حطيتلج  خط بي رقم خالتي حياة ورقمي  اي شي يصير وياج لو اتعبين دكي علينه واياني واياج تنزلين اي برنامج بي والصور ممنوعة..
اي شي تردين تصفحي هذا تلفوني سوي بي الي يعجبج بس هذا لاا على كد المخابره وبس حته اي وكت اتطمن عليج ياريت هدى تسمعين الكلام..
هدى _الصراحة كلش فرحت يي حتلو ماخلي بي برامج المهم صار عدي تلفون حته اخابره براحتي
رحت يمه شبكتة وبست خده.. شكرا كلش هواي مهيمن..
مهيمن _عجبج..؟
هدى _اي حلوو..
مهيمن _ابتسم،، على فكره لو ادري هيج التلفون يخليج تشبكيني جان من زمان جبته..
هدى _اي غير داشكرك..
مهيمن _اشاقة وياج نازل اشوف الحجي اني..
هدى _طلع واني لزمت التلفون استكشف بي واخيرا جابلي جهاز شوية ونعست عفته وطبيت بالفراش نمت وره فتره حسيت على ايد تكعد بيه..
مهيمن _هدى، هدوشة..
هدى _مممم..
مهيمن _لج لبوة لا تسوين اممم وما اممم كومي داحجي وياج..
هدى _هاا مهيمن..
مهيمن _نزلي سويلي اكل..
هدى _شنو مو اكو اكل ليش ما اكلتة..
مهيمن _معجبني اريد غير شي..
هدى _صرت افرك بعيوني،، صدك تحجي عود..
مهيمن _يلا يمعوده متت جوع تره سويلي شي انتي تحبي خوش..
هدى _هاي كمت.. هلكد منعسانة ردت انزل بدشداشتي نفسها صاح عليه..
مهيمن _وووين غيري الي عليج شايفة روحج شلابسة..
هدى _باوعت عليه بملل لبست روب ونزلت جوه فتحت الثلاجة صفنت بيها شسويلة هسه..
بعدين سويت طماطة وبصل وفلفل أخضر وحطيت وياهم زيتون واخير شي طكيت عليها بيضتين كملت صعدتها اله فوك وصحته تعال اكل كملت..
مهيمن _اكلي انتي ماريد اني..
هدى _عليك الله وخليتني انزل اسوي..
مهيمن _أمي كلتلي مماكلة شي من الصبح واتوقع الدكتور وصاج على صحتج..
هدى _مجنت اشتهي زين تعال اكل وياي حته يصيرلي واهس..
مهيمن _هاي جيت يلا..
هدى _اكلنه سوية بهدوء وثنينة انفتحت شهيتنة على الاكل يمكن مجان النه واهس ناكل كملنة شلت الاكل ورجعت للغرفة..
مهيمن _اخذتي علاجج؟
هدى _اي..
مهيمن _خوش هدى تره باجر راجع للدوام..
هدى _طفرت من فراشي.. شنو ليش عفية اهوو شكد كرهت دوامك
مهيمن _ضحك.. تره زين منهم خلوني أطول صارلي من وفاه الحجية مرايح للواجب..
هدى _هاا خلي احضرلك الجنطه لعد..
مهيمن _عوفيها على باجر خلي انام هسه تعبت وقفلت كلش..
هدى _مجنت رايدته يروح لانو اظل كاعده وحدي بس مو من حقي امنعة عن دوامة..
ثاني يوم كعدت قبله حضرت كل شي يحتاجة وسويتلة ريوك نزل اكل وصاني على نفسي راح واني اردد بداخلي ايأت قرءانية للحفظ..
٠٠٠
فاطمة_مرت ايامي بعد الزواج هادئة حلوه ومبنية على البساطة والراحة.. فارس جان مدللني دلال مو طبيعي بحيث من يرجع للبيت اتلكاه من الباب ويقابلني بكل حب وشوق لهفته عليه مرات تأذيني بعد كل علاقة بس يرجع يداوي اذيتي بطريقتة..
يوكلني بأيدية ودائما مكعدني بحضنه من اريد اوخر ميقبل يكلي اشتاقلج خليج قريبه مني.. من بلش دوام المدارس وبديت اداوم هوه يوصلني ويرجعني بنفسة بالتكسي ومرات يعجبني نتمشى هوه بيتنة مو كلش بعيد فعادي
هل سنة سادس اني وناطية دراستي نص وكتي وفارس بالليل يلزم الكتب يدرسني وحته يسويلي اختبارات هوه شاطر واني مستفيده منه...
من يشوفني تعبانة ومابية اشتغل يلملم البيت بمكاني واني اطبخ ومرات من مالحك هوه يغسل المواعين يعني شكد ماجنت متوقعة فارس يحبني بس بالأفعال فاق كل توقعاتي..
بيت عيالي ابد معفتهم من فارس بالمحل كل يوم  ابقة يمهم انظف وياهم اطبخ الي والهم حسب فراغي ماما دائما توصيني بيهم وتكلي لا تختلين بغرفتج تره يحجون..
واني هيج سويت بالرغم عمتي ابد مكالت شي لو انتقدتني دائما تكلي على راحتج شعدنه قابل هوه بيت صغير و هند تنظف نهاية الأسبوع..
بنتها هند جنت حابة نصير اني وياها صديقات شي حاولت اقوي علاقتي بيها كم مره شفتها متريد عفتها..
خبر وفاه بيبي حيل اذاني وكلساع تجيني نوبة بكاء قوية تخليني اكطع النفس فارس من شافني هيج كام ميقبل ابات يمهم يرجعني بالليل لبيتنه ويخليني بحضنه يواسيني..لحد مبديت اتعود وترجعي عافيتي
اخير فتره صرت اسمع كلام من عمتي
شوكت تحبلين،
شو لهسه محبلتي
صار هواي متزوجين معقولة ماكو شي،
اخاف ميصير عدج جهال..
كلامها خوفني حيل حجيت ويه فارس ضاج مني..
فارس _شنو هل حجي الي يسمعج يكول مزوجين من سنين وبعدين اني ماريد هسه جهال كملي سادس والله كريم..
فاطمة _ميخالف هسه قابل شكلت اني بس اريد اجيك وضعي..
فارس _سدي الموضوع من اساسة فاطمة..
فاطمة _زين حبيبي لخاطري بس افحص اخاف عدي التهابات لو لا يلا فدوه لا تكسر بخاطري حباب..
فارس _انتي ظلي سوي هيج حته بالاخير.
تعمين على روحج..
فاطمة _ههه هسه شكلت؟
فارس _هاهية بكيفج مادام حطيتيها ابالج اكدر اكلج لاا..
فاطمة _عاد ثاني يوم حجزنة يم دكتوره نسائية سوتلي فحوصات وجيكت وضعي.. كالت
_كل شي مابيج وضعج تمام اما سبب تأخر الحمل هذا رزق من الله انتي ماعدج مشاكل فبأي وكت يصير عدج حمل لا تخافين
فرحت بكلامها انو مابية شي على الاقل الي يحجي اعرف انطي جواب واني متأكده من روحي اجت ايام وراحت ايام واني وضعي هوه هوه..
بس المشكلة صرت كلش اتعب بين دوامي وبيتي وبيت اهل فارس يعني قبل مجانت عمتي تطلب مني شي بس هسه صارت تتحجج عليه من وره سالفة الحمل وكل شوية دازه عليه..
حبيبتي فطومة سوي الغده..
اذا بيج حيل نظفي الصالة..
غسلي ملابسي وية ملابسكم..
يمه مابية اغسل المواعين غسليها بمكاني..
الصراحة أخجل اردها لو اتجاهلها لانو طلباتها عادية ومن تطلب مني كله حبيبتي واذا عدج وكت وبيج حيل.. مره كتلها خلي هند تسوي اليوم العشة عدي امتحان مالحك كلبت وجهه عليه وزعلت..
انوب اجاني فارس يضحك راح لأهلة رجع ضايج يابة شبيك شكو يكلي..
فارس _فاطمة اني ماحب المشاكل وسوالف العمة والجنة يعني ارجع تعبان تتلكاني أمي عازلة روحها وضايجة يعني والله متسوه  اذا جانت على هيج شغلات يصير زعل..
فاطمة _فارس والله مسويت شي محلو بس كتلها خلي هند تسوي بدالي لانو تعبانة..
فارس _ميخالف حبيبي جاملي بالي تكدرين عليه اعتبريها حسبت امج من تشوفيها هيج لانو مره جبيره ماعليها عتب..
فاطمة _اني اعتبرها هيج وانته تدري بس هاي اول مره صارت هيج لانو تعبانة جنت..سبحني لحضنه
فارس _ادري بيج ما عليج قصور وللعلم حاجيتها كتلها متلحك غير عدها مدرسة و بيت فسكتت عنج..
فاطمة _مجاوبتة يعني شكو كبرت الموضوع ميسوه اصلا تكدر تحجي وياي شكو تكول لفارس بس هل يا ترى هاي اول واخر مره يصير هيج لو للايام الجاية الها غير رأي..؟؟
   ............" بعد مرور سنة" ................
همام_واكف بره وسط هوسات جماعتي كلهم فرحانين الي..
اخوان..
أصدقاء..
اهل..
وأقارب..
الا اني ماكو بداخلي شعور الفرح شصار وليش صار؟؟ شلون وصلت لهاي النقطة بالذات اني مجنت رايد هل شي من اساسة شلون راح اعيش اجذب على روحي لو على الناس ماعرف..
كل شي جان غلط بغلط والمتهم الأول والأخير هيه أمي ااخ يا أمي وصلتيني مرحلة صرت اكول معقولة انتي أمي!! كسرتيني مرتين والله..
شمعنة اني من بين كل ولدج سويتي بيه هيج وحطيتيني كدام الأمر الواقع ادري هيه العيشة صارت بالعكس لو شنو..
اجه والدي كلي امشي اصعد لعروسك صار لازم نزفك غمضت عيني والله حرام الي ديصير شنو ذنب الابنية شنو ذنبي اني وكعنة ثنينة تحت كلام مابي اي صحة وارجع واكول السبب كلة من امي..
ادري بيها تحبني وفقيره وماعليها اي غلط لو حجاية بس الكلب مو الها وعمره ميصير لاحد هل كلب سد بابه من زمان وشمر مفتاحة هل كلب نسة شلون يحب..
صعدت واني مو راغب هل شي ولا رايده اصلا كل ما اقترب اكثر اتمنى ارجع الف خطوه ليوره راح ادمر نفسي وادمر الابنية وياي صارت أمي كبالي طالعة من الغرفة..
اجت رادت تباركلي حطيت ايدي كدامها بمعنى اوكفي وحجيت.. ماريد قربج مني ولا اي شي يجيبلي الاذية اكثر خلاص لهنا وكافي نفذتي الي بعقلج وارتاحيتي موو..
جنان _يمه هاي مصلحتك و..
همام _رجاءاً ماريد اسمع كلامج المتكرر حفظته تره.. تجاوزتها صرت يم الباب فتحتها...صارت كبالي مدنكة..
غدير _كاعده بالغرفة ودكات كلبي طبول اخذ شهيق و زفير حته اهدي نفسي واقلل من التوتر الي احس بي سمعتهم كاعد يهوسون وصوتهم قريب معناها راح يزفوا..
صرت افرك بأيدي حيل واطلب من كلبي يهده شوية وصار هدوء حسيت بالباب انفتحت ودخل بعدين سدها  ونطاها قفل..
همام _ظليت صافن عليها هيه شذنبها قابل لازم اسوي المطلوب وانطيها حقها حالها حال اي بنية صارت مرتي بعد ومحسوبة عليه..
غدير _بقيت فتره هيج ماكو لا صوت ولا حس شنو السالفة هوه طب لو لا انوب استحي ارفع راسي.. يمكن مرت اكثر من خمس دقايق وراها صارت حركة بالغرفة انرفعت الطرحة من عليه..
همام _روحي بدلي او غسلي بكيفج اني حبدل واصلي..
غدير _محجيت شي نفذت الي كال عليه بدلت بس البدلة تعبتني يلا انفتحت سبحت وطلعت شفته ديصلي اني هم فرشت صليت..
كملت هسه وين اروح شو اباوع عليه كام وكعد على الجرباية ومدنك راسة والله عيب اروحلة بنفسي بقيت بمكاني لحد محسيت عليه لزم ايدي وكومني كعدني بصفة..
اباوع عليه احسه متوتر  اكثر مني اني احبه وهوه يحبني ليش يتصرف اليوم بغرابة شنو هاي يربي معقولة كل العرسان هيج لو بس اني شوية وصار يتقرب مني او بالاصح يحاول يسوي المطلوب وصل لشفايفي حته يبوسني بس دفعني عنه وحجة..
همام_ مكاعد اكدر اكمل ..!!
غدير _ش.. شنو؟
همام _صفنت عليها شفت الخوف والخجل، الرهبة والقلق بعيونها اني شداسوي يربي راح اصخم الدنيا هيج..
غدير _كلامة صدمني كل ظني عده فد مشكلة بشي خفت عليه ومفكرت اصلا بروحي بقيت انتضر منه جواب فجئة رجع تقرب مني..
بداها بقبلاتة السريعة انتقالاً وهوه يؤخر ملابسي وختمها بهذاك الوجع كل شي ملحكت افهم مجرد فض السالفة وخر من فوكاي..
همام _غدير كومي سبحي بمي حار..
غدير _من بين اوجاعي ردت بس يدور وجهه عني الخجل موتني واني كدامة بهل هيئة حجيت.. ممكن بس تدور وجهك حباب..
همام _اي اي اخذي راحتج راح اطلع اذا تحبين اصيحلج عمتج..
غدير _لا ماريد..
همام _باوعت عليها الي سوينة صح لو غلط ياربي احس روحي كسرتها يمكن لو عايفها احسن ماعرف طلعت بره وصعدت للسطح واني اسب بروحي وانعلها..
انقهرت عليها والله زين بغض النظر عن كل شي حياتي وياها شلون راح تمشي؟؟
ليش تكسر خاطري چي مشتريك
وآنه ﻷجلك روحي ماحاچيها؟؟
گتلك امسح عيني غرگت بالدموع
ماگلتلك حط اصبعك بيها!!
يتتتتتتتتتتبع........