لم تكن امي(لبوة الاسد)

البارت الحادي عشر

،، رواية لم تكن أمي،،
_البارت الحادي عشر _
.........................
آنـي ماردتّك تضيع وتعتگ
بـ عيني رساله وتنتهي
ردتَك ولايه لِـ غرُبتي منين
مَر بيك الضباب وتيهّتني
..........................
فاطمة_كملت دوامي وحجيت ويه صديقتي نروح للمكتبة نشتري شغلات عاد هيه مكالت لا يطربن على الفرفره..
عدلت حجابي بالحمامات حطيت كحل ومرطب شفه يي لون وردي ومسحت وجهي بالباودر لازم اطلع حلوه على الاقل بس كدام فارس..
تمشينة للمحل واني بداخلي طايره من الفرح لانو حشوفة وصلنه..
اول مطبينه للمكتبة صار بوجهي فارس ديرتب بالدفاتر بقيت اباع عليه و مبتسمه هوه هم بس رفع راسه شافني ابتسم بس لحضات اختفت هل ابتسامته وخزرني مدري ليش..
غلست شمسويه قابل شفته اشرلي براسة اجي يمه رحت وكفت قريب منه شفته طلع من المجر فدشي متوسط حجمه و مغلف همسلي
فارس _اخذي وطلعي بسرعه رجعي للبيت وحسابج بعدين..
فاطمة _باوعت عليه بطرف عيني شمسويه هسه اني هاي فوكاها..
اخذتها درت وجهي عنه داطلع جان انصدم من الي كبالي نشف الدم بعروكي وانخلست..
هذا صديق اخوتي بالسوك عززه هوه شايفني كم مره من نشتري منه توترت حيل عزه يربي اخاف شافني واني احجي ويه فارس لا لا شيشوف هوه اصلا داير وجهه اكيد مشافني..
مدري شلون لميت روحي وطلعت مثل الحرامية ومدنكة راسي صرت احجي ويه روحي ماتوقع شافني وحتلو يشوفني مراح يعرفني هوه بس مرتين يمكن رايحين اله وهيج راح يحفظ شكلي..
خررب شنو هل هبطه الي اكلتها اليوم وفوكاها الاستاذ فارس متحلفلي على مدري شنو هاي فوك مجيت يمه بقيت احجي عليه وادردم..
اول مرجعت للبيت صارت كبالي لبنى حجيت بكلبي لا هلا ولا مرحبا اليوم كلساع واحد يطلع كدامي اشوفها تباع عليه من جوه الجوه..
مهتميت الها صعدت كبل لغرفتي فتحت المغلف طلع بي ورده حمره اشتميتها طبيعيه وياها نساتل من الي احبهم وبطاقة كاتب بيها..
وتبقين سراً وعشاً صغيراً إذا ما تعبتُ أعود إليه
فـ ألقاكِ أمناً إذا عَاد خوفي يُعانق قلبي ويحنوّ عليه .
اقره كلماتة والابتسامة ماليه وجهي اخذت تلفوني ودكيت على فارس اول مجاوب حجيت..
_شكرا شكرا والله متت على الكلام والحلويات والورده لو تعرف شكد احب الورد
_تدللين مسويت شي..
_شبيك اشو تحجي وياي بثكل
_سلامتج مابية
_هاي شكوو فارس اشو على ساعة تكلب انته؟
_خليني ساكت اخاف احجي وميعجبج كلامي وهنوب تزعلين..
_لا احجي خل افهم؟
_حجه بنتر،،
انتي شكو لابسه تنوره حصر وقميص لازك على جسمج والاضرب جاره عينج كحل شنو السالفة وين رايحه مدكوليلي و الاحلى هذا وذاك واكفين وراج و يتفرجون عليج
_هاا تره علمودك هيج لبست وحطيت مو زين تشوفني حلوه
_منوو كلج اني ااريد تلبسين هييج علمودي لج انتي مشفتي شلون جسمج كله مفصل بهل لبسس تكولين اشوفج حلوه ليش اني يا يوم شايفج مو حلووه وحتلو تردين تخلين هذني الشغلات خليهن بس اليه موو للشارع..
_خلص كافي لا تعيط عليه مو صوجك والله صوجي اني افكر بيك واكول هسه يفرح بس شو توليتني رزايل خوش والله ادري وحد عن الشباب انته طلعت معقد
_معقد؟ فاطمة انتي عبالج الي يدور ستر صار هسه معقد بنظرج خو اطلعج مفرعه واشدلي كرون شنو رأيج..
فاطمة _داجاوبة ماحس غير انفتحت باب غرفتي وطبت جفت لبنى توترت اني و كبل سديت الخط ويه فارس..
نترت بيها،، انتي شبيج متعرفين شي بالذوق ولا الأدب طابه مثل الهمج للغرفه
لبنى _وانتي شدعواج هيج فزيتي وصدك ويامن جنتي تحجين هيج بحيث بس طبيت انخلستي..
فاطمة_شعليج؟ اني ادخل بيج بله حته هسه انتي مدخله بيه عليج بروحج وبس
لبنى _لتخافين مكاتلة روحي على مكالماتج جيت اكلج خالة تصيحج تجين تتغدين
فاطمة _اي جاية وراج هسه..
بس طلعت بسرعه طلعت التلفون عبالي اشوف رزالة منه لانو سديته بوجهه بس المفاجأه جانت مداز ولا حرف..
اكيد زعل مني هسه مو زين اعدل روحي كدامة اووف..
نزلت اتغده بس مادري ليش احس لبنى عينها وراية شنو اسوي تباوع عليه ضوجتني حيل حاشره نفسها بكل جبيره وصغيره..
غسلت المواعين وعزلت المطبخ سويت جاي وأخذت كوبي فوك كالعادة حته أبدى ادرس بس وصلت لغرفتي وفتحتها صارت كبالي لبنى وهيه طفرت من مكانها بس شافتني!!
حجيت،، هاي شدسوين انتي هناا؟
ردت،، شبيج حبي جيت اخذ الشال الجوزي من عدج لانو رايحه لأهلي ودارهم لبس وكذا..
رفعت حاجبي،، والشالات تلكيهن على الجرباية لبنى؟؟
تقدمت الها بطليهن لسوالفج هذني ورجاءاً اذا تردين شي بعد تعالي طلبي مني واني انطي الج ماكو داعي داخلة هيج مثل الحرامية
ردت،، وهسه ليش ضجتي هلكد تره احنه مثل الخوات الي يسمعج يكول غرفتج بيها خزينة الدولة.
رديت،، بيها مبيها اني كتلج بعد وهاج هذا الشال واذا تردين اخذي الج ماريده..
أخذته وطلعت اني انداريت على جهازي جنت حاطته على الشحن بس غالقتة ادري بيها هاي خبيثة وكل شي يطلع منها..
فتحته خابرت على فارس مرد دزيتله رسائل انتضرته ماكو
وره دقايق دزلي رسالة كاتب بيها..
،،عندي شغل هسه بعدين نحجي،،
عفته بعدين ارجع احاجي لانو الظاهر بالغت هل مره بسوالفي وقلة ثقتي بروحي عبالي من البس هيج واحط مكياج راح يفرح ويمدحني بس شو صار العكس..
٠٠٠٠٠٠٠
مهيمن _دخلي منطول شغلة دقايق ونخلص شغلتنة..
هدى _بس كمل حجايته اني صفنت عليه وجسمي رجف شنو قصده دقايق وتكمل شغلتنه معقوله يريد يأذيني
مهيمن _هدى وين صفنتي مدخلين مراح اكلج تره..
هدى _احم اي هسه بس ليش بالغرفة نكعد بره مو احسن
مهيمن _لا هنا احسن ناخذ راحتنا اكثر..
هدى _احتق وجهي ترددت ادخل بس بعد اصراره مكدرت اكول لاا..
فتت للغرفة واني خطوه ليكدام وخطوه ليوره هوه سد الباب وراية جانت الغرفة عبارة عن غرفة نوم ونص تخم قنفات كعدت على القنفة افرك بأيدي واني انتضر الجاي..
مهيمن _شبيج متوتره طلعتي تخافين..
هدى _هاا لا مخايفة
مهيمن _نزعي عباتج
هدى _شنووو!!
مهيمن _هاي شبيج المن متقيده بيها وهنا ماكو احد غيرنه لهذا داكلج نزعيها
هدى _لا لا هيج مرتاحه اني
مهيمن _براحتج بس اهدي شوية ماكو شي وخلي نسولف مثل الحبابين..
هدى _اممم
مهيمن _اي ست هدى ليش حاولتي تنتحرين ممكن اجابة؟
هدى _ااا راح اكون صريحة وياك بس توعدني مسويلي شي مو زين؟؟
مهيمن _شتعرفين عليه مأذيج بيوم احجي خل نفهم
هدى _ غمضت عيني،،
شوف يعني ماعرف شلون اكولها الك بس بس اني احب اخوك همام ف...
وعيت من صفنتي من حجه..
مهيمن _الوو شبيج اليوم كلساع ساكته متحجين وين صفنتي انوب..
هدى _بلعت ريكي اشو هذا صار عصبي اخاف احجيها من صدك وانكتل عزه..
مهيمن _هدى!!
بديت اعصب من وضعج تره متنطقين
هدى _م.. مادري
مهيمن _رفع حاجبه،، متدرين؟
زين اغير السؤال زواجي منج هوه السبب
هدى _لا مو هوه السبب الرئيسي
مهيمن _بس اكدر أجزم من كلامج هوه سبب من الأسباب
هدى _باوعت عليه،،
اني كتلك من البداية مقابلة وبابا جبرني
مهيمن _وهسه شنو استفاديتي من سويتي هيج انغصبتي اكثر وصررتي مرررتي
هدى _ايي وشسويلك هسه اني ماريد وماحب الزواج كله من أساسة
مهيمن _بس انتي تحبيني نسيتي هدى اني منو وشنو اعنيلج
هدى _ضحكت بأستهزاء،،
اني احبك؟
مهيمن _لعد اني
هدى _غلطان مهيمن
مهيمن _هاا كتيلي غلطان لعد منو جانت متقبل تنام اله بحضني
هدى _بس جنت طفلة من اسوي هيج وانته بمثابة اخوية
مهيمن _هدى تره قبل بس ٣ سنوات يلا كمتي متنامين بحضني وين اختفه تعلقج بيه
هدى _انته مكاعد تفهمني والله ولا راح تفهمني..
مهيمن _زين شرحيلي يابة خلي افهم..
هدى _اني احبك گ..اخ، گ..صديق وسند اليه يحميني جان من الكل ويدافع عني حته كبال ابوية مو زوج ابد ما اتمنى تصير زوج اليه ولا حتى بالاحلام..
مهيمن _انتي لو بس تشيلين هاي الفكره من بالج راح تتقبلين الموضوع ويصير عادي بس انتي مناوي تتقبلي شسويلج
هدى _بس انته غلط الي دسوي مو جنت تحبها لجواهر وعينك متشوف غيرها شلوون تقبلها على نفسك تاخذ غيرها
مهيمن _طبعا بديتي تتجاوزين واني لازم روحي عنج بالشافعات..
أما بخصوص جواهر بعمري محبيتها ولا دخلت بكلبي كل خطبتي الها جانت عن طريق أمي
هدى _بس خطيه جواهر هيه تحبك
مهيمن _بابا شلزكتي انتي بخر.. جواهر هيه هاي جانت تركض وره فلوسي والسمعة والكشخة بعمرها محبتني اليه حبت فلوسي و بس..
هدى _سكتت عنه لانو صار عصبي كلش خفت منه وعود مكيفة احجيله الي بكلبي حته يصير ذبحي على القبلة سكتت و هوه هم ظل ساكت ويباع عليه اشيل راسي وارجع انزلة وهوه بعده يباع عليه يعني قبل جنت ولا أخجل منه..
وعلى كولتة انام حضنه بس هسه عبالك صار غريب عليه مو نفسة مهيمن ابن عمتي ماعرف شنو الي تغير... شفته كام وتقدم يمي رأسا كمت من مكاني..
مهيمن _هدى لا تسوين هاي السوالف وياي احسلج اني مو حيوان كبالج واركض وره شهواتي..
فرك وجهه حيل،،
انطيني ايدج او اكلج اكيد راح ترجعين تخترعين مني..
مد ايده على جيبة وطلع منها حلقة ذهب..
_ملحكت اشتري غيرها بعدين عود نطلع تشتري الذهب هاج لبسيها خلي نرجع يم خالي ورانة طريق..
هدى _اخذتها من ايده باوعت عليها عريضه بحيث تبين هذيج وياها حلقة هاي لبستها على كد اصبعي طلعت..
مهيمن _ابتسم،،
الف عافية حلوه بأيدج
هدى _شكرا لعد وانته متلبس حلقة..
مدري ليش حجيت هيج من ثولي اكيد هسه عبالة قصدي غير شي..
شفته باوع عليه مبتسم ورفع ايده بوجهي
.مهيمن _يأشر على أصبعه،،
لعد هاي شنو منتبهتي عليها..
هدى _كمت احجي على روحي خوش هسه من فشلج ادري شكو تسألين شعليج بيه اذا لبس او لا..
مهيمن _يلا امشي نطلع كافي تتصفنين..
هدى _مهيمن بس سؤال قبل منروح اريد اعرف جوابه منك
مهيمن _اي تفضلي اسمعج..
هدى _انته تعرف بيه اصمم صارلي فتره واتعلم من أمي حياة وندزهن لمحل معميل أمي
مهيمن _وبعدين؟
هدى _شنو وبعدين تره من هسه اكلك ما اتنازل عن هاي الشغله كل شي اخذتوا مني على الاقل عوفلي التصميم استمر بي..
مهيمن _تره اني مو ضد انو تتعلمين لو يصير عدج هدف وحلم بالحياة بالعكس اتمنى تتطورين اكثر واذا تردين اخليج بدوره تعليم بكيفج يعني بين قوسين هذا الموضوع ميحتاج تسأليني بي لانو مستحيل اصير عقبة كدام طموحج وهسه اذا ماعدج بعد شي خلي نطلع
هدى _هزيت راسي بعلامة اي..
طلعنه سويه نتمشى بهدوء حسيت بأيده لامست ايدي ردت اسحبها خزرني عاد كعدت وسكتت..
صار يحرك ايده على الحلقة مدري احسه فرحان بيها اكثر مني تذكرت طفولتي من جان يلزمني من ايدي عبالك نفس الموقف انعاد بس بطريقة مختلفة
رجعنة يم بابا وامي حياة جانوا مكملين اكل بقينة بس احنه مماكلين اخذنه سفري لانو ورانة طريق رجعه..
صعدت بالسيارة وانطاني مهيمن جيس الاكل فتحته جان بي لفه صاج وقوطيه ببسي يدري بي ما أكل اله الببسي موجود ويه الاكل..
تحسرت بداخلي مقهوره خسرت صديق وأخ مثل مهيمن يعرفني اكثر من نفسي بسبب اهلي مادري على منو اعتب لو منو الوم بس الي اعرفة الفأس بعد وكع بالرأس وبعد صرت صدك زوجتة مابيها رجعة
مهيمن _خالي ان شاء الله باجر معزومين انته وخالتي حياة والسيد على الغدة يمنه لانو تعرف احنه كل شي مسوينه بس عقد وهاهيه
ضياء _اي ابني صحيح ان شاء الله نجي..
بس هدى شنو حتظل يم عمتها حياة فشلة من السيد
حياة _ليش فشلة بالعكس هوه فرحان بيها وميكول شي
ضياء _حتلو يظل غريب وميصير خلي ترجع للبيت
هدى _بابا فدوه ماريد ارجع لهذاك البيت بعد بقيني يم أمي حياة عفية..
مجاوبني..
باوعت على مهيمن برجاء حجه
مهيمن _خليها عمي هيه فتره زمان ارتب اموري وأخذي عدي بعد وللصدك اني هم ماقبل ترجع هناك بعد كل شي صار صعب اخليها ترجع يم هذولاك الجماعة...
ضياء_مادري والله اشوف كعدتها هناك مراهمه
حياة _لا راهمة لا تخليها ابالك بنتي وجاية لبيت امها
ضياء_هز راسة،،بكيفكم
هدى _فرحت همزين مراح يخلوني ارجع لهذاك البيت خليت راسي على كتف أمي وغمضت عيني بنعاس وجريتها نومه لحد موصلنه لبابل..
٠٠٠٠٠٠٠
همام_كاعد بالغرفة وافكر ب مريم اريد احجي وياها خصوصاً بعد معقد مهيمن وراح يزوج بعد فتره فتحلي الطريق وسهل عليه هواي أمور حته اخلص من سوالف امي شلون تزوج قبل اخوك ومن هل حجي..
اريد اخصم الموضوع واعرف رأيها قبل ما اخطى اي خطوه رسمية كون تحبني مثل ما اني احبها او بس تتقبلني بحياتها والباقي سهل..
اكو بنات الي ننعجب بشكلهن وأكو تعجبنه أخلاقهن وسترهن..
بس الاقوى الي تدخل لكلبنه بكيفها وتكعد بي مريم شغلت كل بالي ومن بعد مسألت عليها وعرفتها اكثر حبيتها ضعف إعجابي بيها..
مشتاق اشوفها عن قريب والمح نضرات عيونها وخجلها يابوية واصل مرحله اني..
قررت اروحلها للمعهد باجر اخاف تطلع تحب احد وياها لو شي خليني
من البداية اعرف ولا بعدين اتفاشل عاد والله صدك ثاني يوم عفت المحل بيد العامل الجديد يفتحه واني الضهر ارجع..
لبست بنطون جوزي وقميص اسود عدلت شعري واكيد العطر ما نسيته هوه والساعة..
طلعت للمعهد دخلت عادي لانو من سألوني كلتهم جاي على اختي ومن هل حجي تمشيت ادور عليها بله هسه اني وين الكاها بين الف طالب وطالبه واني حته قسمها ماعرفه والاضرب اخاف تطلع ممداومة اليوم..
شفت مسطبات رحت كعدت عليهم دنكت راسي افكر يعني هوه الواحد هيج يجفت غير يلكاله طريقة يندلها يلا يجي ظلت فكره تجيني وفكره توديني لحد مذكرت..
غيث!! اي والله غيث يدرس هناا بقسم التصميم خرب شلون فاتتني هاي السالفة.. غيث صاحبي بالسوك وخالتي حياة معميلة يمه يدرس ويشتغل خوش ولد شاغول..
طلعت جهازي ورأساً دكيت عليه حجيت وياه كتله اني بالمعهد فلان مكان تعالي عاد الولد مكال شي اجه بدقايق يمي..
غيث _هاا ابو الشباب منورنه اليوم شعجب
همام _هلا غيوث والله بعد صارت محتاجك بسالفة مدري شلون احجيها الك والله
غيث_تفضل عضيد والي اكدرله اساعدك بي
همام _متقصر حبيبي باع اكو بنية تدرس هناا بس ماعرف قسمها وافتريت شكد بالاقسام مشفتها ولا لمحتها بربك انته اكيد تندل كل شبر بالمعهد متعرف البنات وين يلتمن
غيث_حك راسه زين ممكن اعرف منو هاي الي كاعد ادور عليها وملكيتها
همام _يمعود اني شحجي وانته شتحجي.. هيج أبنية عدي شغلة وياها هسه شكلت..
غيث _ههه امشي وياي ولو مامتأكد تلكاها هناك او لا بس نجرب حظنه..
همام _اي يلا..
مشينه مسافة وراها وكفنه بمكان صاير ظهر المعهد بي حديقة ومسطبات وكم طالبة كاعدات بي
غيث _شوف اهنا اغلب البنات يكعد وهوه مكان منعزل بعض الشيء فمثل منكول ياخذن راحتهن بي واغلب لمات البنات تصير هنا..
همام _تمام زاحمتك وياي
غيث _مسويت شي تدلل شلونها ست حياة صار فتره ماكو
همام _اي مو ملتهيه ويه زوجها وبيتها هل أيام اكلك مماخذ راحتي بوجودك عادي تروح شويه وتجي
غيث_اياا طايح الحظ هاي فوكاها ديلا نشوف نهايتها وياك شنوو.. انتضرك يم البوابة عود
همام _خوش..
رح غيث واني دورت بعيوني على مريم عدي حساس موجوده بس وينها بقيت واكف على جهه وره فتره البنات قل عددهن بقت بس كم بنية ومفترقات يعني مو نفس المكان
كاعدات تمشيت من يمهن..
والله الا شوية واكطع الامل ما الكاها بس اخير شي لفتني بنية ناطيتني ضهرها لابسة عباية راس وكاعده تكلب بالملازم شكيت بيها هيه لو مو هية اني اذكر مجانت تلبس عباية وهاي الابنية لابسة عباية هسه غير تباع من هاي الجهه مو ركبتي انكسرت والله..
واخيرا إندارت بالصدفة صارت عينها بعيوني اني من فرحتي بقيت فاك حلكي وفرحان بس هاي شو خزرتني خرب يمكن فهمتني خطأ..
واني الخ  معرفت شنو اسوي رحت صرت قريب منها حجيت بتردد..
همام_السلام عليكم..
سمعتها حجت بصوت اشبهه بالهمس ردت،،
مريم _وعليكم السلام..
همام _احم بس ممكن اخذ من وكتج دقايق؟
مريم_لاا
سكتت وهيه اخذت أغراضها وطلعت من المعهد يلا ميخالف المهم شفتها واندليت مكانها وتأكدت هنا هيه تدرس الايام الجاية هواي اصلا عجبني ثكلها حييل شفايتلي تصير مريتي...
٠٠٠٠٠٠٠٠٠
هدى _رحنه اني وامي حياة لبيت عمتي جنان السيد اعتذر انو يجي جان عده شغل اني لبست فستان طويل رصاصي بطلب من أمي انو احلى من البنطرون..
اجه اخذنه مهيمن لبيتهن وبعدين اجه بابا وحده هوه واخواني الي فهمته مهيمن كايل اله ميريدهم يجون عمتي واحلام ضايج منهم بعده..
عاد اني فرحت ليش الجذب ما اتمنى حته المحهن بابا شويه رجع يحجي وياي احسن من قبل اني كابلت فاطمة وكعدت صديقه طفولتي وقريبه عليه حيل حته اكثر من خواتي بس جنه منلتقي فقط بالمناسبات وهسه سبحان الله راح نصير بنفس البيت..
اشوف مهيمن عين يسولف ويه بابا وعين عليه ماعرف شكو يباع وهوه نضراته صايره تخوفني مدري ليش من يباع عليه احس اكو شي غلط كل شي تغير بينه لا هوه نفسه ولا اني نفسي من جنت ميانه حيل وياه فرشنه سفره الغده..
اشرلي اجي اكعد يمه طبعا من اجينه لهسه اني حرف محجيت وياها وهوه يستحي يحجي وياي كبال اهلة..
غلست عليه ورحت كعدت بصف فاطمة شفته خزرني اني هم خزرته من جنت صغيره بس يخزرني اني هم اردها الها وهوه يضحك عليه..
شفته ابتسم اكيد تذكر طفولتي شفت ماما حياة عيونها علينه دنكت راسي مستحيه هسه اكيد فهمت غير شي بعدني ممخلية لكمة بحلكي اندكت باب الشارع..
راح محسن فتحها جان اشوف صارن كبالي احلام وصبيحة!!
يتبع...