لم تكن امي(لبوة الاسد)

البارت الثلاثون

،، لم تكن أمي(لبوة الأسد)،،
_البارت الثلاثون _
~~~~
گون مافاتح رساله ولا قبلت بيوم ظرفك
گون أرد  ذاك الغريب الما يعرفك
~~~
هدى _طلع من الغرفة وركع الباب وراه واني بقيت بمكاني ابجي والطم على حظي النحس وحياتي الي مو قابلة تمشي عدل وياي شلون راح افهمة شلون راح انقنعة اني مو مثل مشاف وقره ونيتي مو هيج..
بجيت من كل كلبي مهيمن والله ميستاهل اسوي بي هيج مهيمن الي حواني الي طلعني من عذاب احلام و صبيحة نقذني من سواد عيشتي شكد جان معدنة نقي وزين وياي..
بديت احس بوجع ببطني حيل قوي وضهري هم لزمني اذكرت من ماما حياة علمتني بس تكمل الشغلة وياخذني مهيمن لازم اطب اسبح بمي حار حته يخف الألم عليه سحلت روحي للحمام جان بي بانيو فتحت بي المي الحار وكعدت بي..
سرعان ما رجعت دموعي تنزل واكثر من قبل صرت اذكر خطأي و تصرفي من بديت استخدم الفيس حته اوكع مازن بشر اعمالة بس انكلبت عليه الشغلة..
راسلته من حسابي اول شي عود اصادقة واسولف وياه وبعدين أبدي شوية شوية اسحب السانة وراها اخلي يعترف بسوالفة المكسره وبعدين اصور كلامة وافضحة كدام الكل..
بالبداية كل شي جان تمام حجة وياي مثل أي صديقة من صديقاته الي يسولف وياهن...
حجالي عن علاقاته ويه أشكال البنات ومفتخر بنفسة بعدين كلي جنت ناوي اكسر بنت خالي حته تنجبر تقبل بيه وازوجها بس مو حبا بيها لااا جنت بس اريد اكسر خشمها واذلها تحت رجلي لانو هانتني وذلتني اكثر من مره من رفضت قربي..
بس فلتت مني وتزوجت هسه كمت اهددها بأختها لانو اختها صايره قندره جوه رجلي..
طبعا اني اقره كلامة وكوه لازمه روحي عنه شكد نذل بس خفت على اختي شيريد يسوي بيها هذا لازم افضحة بأسرع وكت حته يعرفون هوه شنو ويربوا بس المشكلة محد يصدك بيه اذا احجي من دون دليل على كلامي مرتين حجيت وطلعوني مخبلة...
ردته يكمل اريد افهم شراح يسوي لهاجر او شنو بعقله بس صار ميجاوب على اسألتي وبعدين صار يكلي ليش مسولفيلي انتي هم عنج ليش بس اني ومن هل حجي..
حسيته راح يسحب روحة ويعوفني على النص خصوصا مازن واحد صايع متعجبة اي وحده فكرت انو اكسبه ولو بس فتره محدده حته ميمل مني وينجذب كتله..
"اني مزوجة بس ممرتاحة ويه زوجي اصلا حياتي قهر وياه"
سأل.. "صدك مزوجة خوش عبالي داسولف ويه زعطوطة طلعتي داهية هههه"
رديت.. "ليش تضحك حجيت نكتة ومادري..؟"
رد.. " لا مو هيج هسه مكتيلي ليش حياتج قهر الظاهر رجلج مو كفوو"
رديت.. "ماحبة اهلي جبروني عليه ودافكر انفصل عنة "
رد.. " يعني تشردين منه..؟؟  "
رديت..  "لااا شنو اشرد بس قصدي اطلب الطلاك ماريده "
رد.. " لعد مابينكم أطفال..؟ "
رديت.. " لاا.. هسه عوفك مني احجيلي عنك مكملتلي عن بنت خالك شراح تسوي.. ؟؟ "
رد.. " بعدين اكلج لانو حاليا عايفها.. "
هدى _مقبل يحجيلي شنو ناوي يسوي هذا الكلام الي حجاه واعترافة انو جان يتحارش بيه كله صورتة  وجانت اخر محادثة النه قبل بيوم من روحتي ويه مهيمن للنجف وجنت منتضرتة بس يكلي شديفكر يسوي حته بعدين افضحة...
بس ملحكت اسوي شي مهيمن قره اخير كلام النة هذا وكب نار عبالة صدك كلامي الي حاجيتة ويه مازن .. متت من البجي لانو عرفت بروحي احبة لمهيمن وماريد يعوفني والله جنت ناوية اسولف اله كل شي بس ملحكت كل شي صار بسرعة وهوه مسمعني..
مسحت دموعي وكمت سبحت لازم اوضحلة كل شي واخلي يعرف نيتي الأصل شنو هوه ماخذ فكره مليون بالمية غلط عليه هسه اكيد بس يسمعني يسامحني اي اكيد اكيد هوه يحبني مستحيل يكرهني..
بقيت البس واني اردد بهاي الكلمات احاول اقنع روحي انو كل شي راح يصلح ويصير تمام.. اول مطلعت سمعت بره صوت عياط وتكسير رجفت بخوف..رحت يمه شفته كاعده بالكاع وحاط ايده على راسة يفرك بي و مكسر جهازي وجهازه وكالب المكان ممخلي شي بي صاحي..
باوع عليه وخزرني حجيت بخوف لانو الي داشوفة كدامي مو مهيمن لاا هذا أسد ومو اي أسد أسد مجروح وكلبة دينزف من محبوبة..
"ش.. شب..شبيك؟؟"
مهيمن _وبكل عين صلفة تسألين؟ ابن عمتج الشفية استاذ مازن خابرني يكلي مرتك اني شابع منها قبلك هههه..
لج يكلي انته مزوج وحده اااااني شااابع منهااا ولامسها قبلللك مو اله اناام وياااها بس مسوي غيرهن ويااهااا لججج تدرين يكلي روح اسأل مرتك ويه كم واحد غيري متراسلة وتكلة ماريد رجلي اريد اطلك منه لجج يكلي روح تأكد منها بنية لو لاعبة من وراك..
هدى _غطيت وجهي وصرت أشهك..والله والله جذذب مو هيج والله العظيم وداعتك عددي أسد هذا اكبر جذاب اسمع مني وخلي افهمك..
مهيمن _شفهم هدى هاا شفهم...
هدى _محد اذاني غير نضراته المكسوره وخيبة الامل الي انرسمت على وجهه..
أسد معقولة صدكتة معقولة اني ممكن اسوي هيج هاا؟ اني هدى تربايت ايدك شلون تصدك واحد جذاب مثله أسد..
مهيمن _واني هم كتلج قبل يابة هدى تره اني  نفسة الرجال الي جنتي تحبي وتحتمين بي بس شصار هاا سولفيلي شصار؟؟
هدى _نزلت راسي.. اترجاك
مهيمن _بله اسألج سؤال ما اجيت بعينج او مجنت مكفيج بربج اني بحياتج شنو موقعي بالضبط مجرد طرطور يمشي تحت رحمة هدى..
هدى _والله جنت بس اريد افضحة لك اني اتقزز منه واحبك الك..
مهيمن _ههه تحبيني الي موو..
هدى _تقدم عليه كل ضني راح يضربني غطيت وجهي بأيدي وخرها وسحبني عليه.... هاي شدسوي
مهيمن _اخذ حقي اني رضيتي او لاا ليش ابقى شي بنفسي وغيري شبعان منه..
هدى _لاا أسد لاا مااريد عووفني..
تقرب مني بلمساته القوية المؤذية كأنوا يريد يأذيني مثل ما اذيتة بس والله حته اذيتة مجانت مثلي من شاف دموعي خفف من لمساتة وتقرب مني بهدوء كمل وكام عني..
شكد استحقرت روحي بهل لحضات من صرت بين ايدي هوه وين واني وين حته من يريد يأذيني ميكدر واني جرحته فجأه نطت عيونة وتقدم خنكني من ركبتي حسيت مو بوعية ابد..
مهيمن _انتي مو بنية منو لازمج قبلي هااا..
هدى _دفعت ايده بصدمة..
شكاعد تخربط انته شبيك أسد مو كل شي كبالك صار ومحد لامسني غيرك..
مهيمن _شنو دليلج انطيني دليل يأكدلي انج بنية ومحد لامسج قبلي؟
هدى _وكعت من طولي رافعة راسي اله احس جسمي انشل شل من كلامة..
صدك تحجي تشك بية تشك بهدى لبوتك وبنتك وتريد دليل على برائتها..
دارير احجي مكدرت صارت بس صوت شهكاتي تنسمع.. تسحبت رحت للغرفة لميت الفرشة اخذتها اله..
هاك شوف مو تريد دليل على برائتي هذا هوه كدامك.. أخذه مني بعدين شمره عليه ولا اهتم لكلامي ومتحركت شعره منة راح للغرفة مدري شسوه بعدين طلع مبدل وشايل سلاحة بيده عافني وطلع من البيت بعد مقفل البيبان عليه..
غطيت ورجهي بكفوك ايدية ياربي شراح يسوي هذا وفوكاها اخذ سلاحة وعافني هناا وحدي الخوف تملكني صارت نغزات بكلبي والنفس صرت صعب أخذه..
صارت الدنيا نص ليل واني كاعده وحدي جسمي كله صخن واحسة متكسر لفلفت روحي بالبطانية وبعدني ارجف البيت الكهرباء انطفت على ساعة ومرجعت بعد واني منا عدي فوبية من الظلمة واسمع أصوات بره مال نباح الكلاب تخبلت  بالي عد مهيمن و ميتة خوف من هذا المكان..
خوف..
رعب..
ظلام..
ألم..
هذني كلهن حسيت بيهن بالإضافة لوجع روحي وجسدي للفجر اني حالتي حالة طلع الضوه تمددت وغفيت بسرعة من التعب بعد فتره فزيت على صوت مهيمن يصيح عليه..
مهيمن _ كوومي بسرعة حضري غراضج عشر دقايق واريدج كبالي مزروعة حته نرجع للبيت..
هدى _باوعت عليه بقلق جان شكلة غريب ايده كلها مجروحة وبيها دم راح يم الكنتور ذب قميصة انصدمت بشكل ضهره كله علامات ضرب ومبينة جديده خفت اسألة هاي شنو ومن شنو اجت.. فجأه اجه عليه وجرني من شعري
مهيمن _ااني شحجيت مو داكلج فضينة دننجب ونرجع للصخام..
هدى _لزمت ايده الي كامش بيها شعري.. اي كايمة بس فدوه عوف شعري.. عافني بنفور
لملمت أجزاء روحي المتبقية حضرت غراضي ونزلت وراه طول الطريق اني ابجي وامسح بدموعي عيوني عليه اريد بس نضره منه بس كلمة وصلنه لبابل نزل قبلي هوه..
نزلت وراه واني امشي بصعوبة سلمت على عمتي وغدير ولحكته فوك عسى ولعل ينطيني فرصة احجيلة لو يموتني هم ماسكت واخلي يبقة مصدك كلام مازن ضدي..
شفتة مو بالغرفة باوعت بالحمام ديسبح دقايق وطلع دخل للغرفة وطلع الجنطة مال دوامة وصار يخلي بيها ملابسة يتصرف بطريقة وكأني ماموجوده بالغرفة..
رحت وكفت يمه لزمت ايده خزرني و دفعني عنة رجعت لزمتة وبكل قوتي حجيت..
اذا انته عنيد فأني اعند منك لا تحجي شي حقك ومحد يكدر يلومك بس بداعت عمتي عدك اسمعني..
أسد مازن والله جذاب هوه من جنت بيت عمتي كام يتحارش بيه بالكلام ومرات ب... سكتت بس كلت لازم كل شي يعرف هيه خربانة خربانة..
واللمس احياناً مرتين مهيمن حجيت الهم وكتلهم هذا يتحارش بيه هذا يزعجني بس محد صدكني تخيل حته أمي حياة كذبتني بوكتها شتووقع مني اسوي بهيج حالة هاا حتلو ابقى احجي مراح تصدكوني اني بعد ما ازوجنة مكمت بعد اهتم اله كلت طزز شيكدر بعد يسوي قابل بس والله هوه هددني بيوم عرسنة راح يعاقبني بأختي هاجر والله خفت عليها لانو جانت تتواصل وياها تصدك بي وتكلي احبة..
رحت جبت القرءان من فوك الميز حطيت ايدي عليه وحلفت.. وحق كلام الله مهيمن من تواصلت وياه جنت بس اريد اسحب لسانة حته انطيكم دليل عليه وينفضح وهذا الكلام الي قريته جان مال بارحة والله والله جنت ناوية اراويك كل شي بساعتها وحته مصوره اعترافاتة كلها بس انته كسرت التلفون..
مهيمن _انتي تدرين رجال غيري يحط طلقة براسج  بعد كل شي سمعة وشافة؟
هدى _معقولة مدصدكني مهيمن..لزمني من زندي حيل
مهيمن _اذا تكولين مهيمن بعد اكسرج خوش وهسه ولي من خلقتي..
هدى _دفعني بالكاع اخذ جنطته مال دوام وطلع ركضت وراه اريد اوكفة ماريد يعوفني ماريد يطلع وهوه زعلان وماخذ بخاطره عليه بس ملحكت عليه بسرعة شخط السيارة وراح كعدت بالحديقة على ركبي وابجي..
غدير _ولج شبيج شصابج هدى كومي يمعوده لا تسمج عمة وشيخلصج بعد..
هدى _غدير أريده عفية كوليلة اني مو سيئة لهل درجة والله مو سيئة اني احبة لا يعوفني وحدي..
غدير _اشش نصي حسج امشي جوه نسولف يلا فدوه لعينج.. بالكوه اخذتها جوه اشوفها فحطانة من البجي وتمشي بالكوه ياربي شصاير وياها هاي..
اخذتها بسرعة للغرفة لا تحس عليها عمة لو ام المصايب لبنى وبعد شيفكنه نيمتها بفراشها نايمة وهيه تشهك من البجي قهرتني عليها والله..بقت هيج للمغرب وجان نسمع صياح جوه كامت هدى مخترعة ونزلنة اني وياها..
هدى _جنت بين النايم والكاعده لانو كل فكري عد مهيمن فزيت على صوت عالي جوه بسرعة كمت بعدني على نص الدرج صاحت بيه عمتي..
جنان _اااي شرفت الخاتون شرفت ام الولد والعلاقات بشري ويه جم صايع صادقتي لج جنت اسمع من صبيحة عدج علاقة ويه واحد مصدكتها كلت شلون بت أخوية تسوي هيج بس والله طلعتي قوية مزوجة وبعدج تلعبين بكيفج..
هدى _عمة شلون تصدكين هيج حجي عليه والله...
جنان _تفوو عليج يا گ...  عبالج دافتري عليج هوه غير العشيره كلها صارت تحجي بيج ااااخ بقت سمعة بقت صخام وين انطي وجهي عن العالم بعد..
هدى_صدمة بعد صدمة الظاهر مازن العار ممقصر بتسويد عيشتي مثل ما وعد.. محسيت غير على راجدي على اثره وكعت بالكاع..باوعت هذا محمد الي ضربني
محمد _وصخة وتربية شوارع واني اكول شبي أخوية انهزم من البيت الظاهر فشلان وين يضم وجهه من الناس بعد سواية مرتة اتعجب مبقيج عدلة لهسه..
هدى _تقدم راد يرجع يضربني دفعة همام...
همام _موو من حقك تمدد ايدك على كره اخوك لك هاي هم سواية زلم شلون تسووي هيج عدها رجال يحاسبها موو انته..
محمد _اذا رجلها زووج وخراع خضره شتتوقع مرتة تصير..
ابو محمد _بسككك عااد كاافي سكتوو كلكم هذا الموضوع هسه ينسد ومن يرجع مهيمن عود نسولف بي هوه زوجها ومنكدر نسوي شي من يمنه وبعدين هدى بنيتنة ومترباية حسب الأصول لاحد يحجي عليها بالشين قبل ما نتأكد خوش..
جنان _شتحجي انته لك داكلك..
ابو محمد _اني شحجيت راح اتخبل عليكم بهل دقيقة والله..
هدى _ظلوا ناس تحجي عليه وناس ادافع عني.. سحبت روحي منهم رحت المطبخ كعدت على الميز لازمة راسي شسويت بنفسي اني يا الله ليش حطيت نفسي بهيج مصية
بهل أثناء دخل محسن للمطبخ مدري شيسوي بعدين جر كرسي وكعد كبالي..
محسن _انتي شكد غبية هدى صدك مشايف بغبائج..
هدى _لييش منوو يمك هسه انته..
محسن _طلعتي تدورين ولد واني هناا بالبيت جان كتيلي واني اريحج بطريقتي احسن من اخوية صدكي..
هدى _ يا ساقط شنو هل حجي لك مرت اخوك اني تف عليك وعلى تربيتك السكط يا سكط اذا ماكول لمهيمن عليك حته يربوك..
محسن _ متكدرين لانو اولا محد راح يصدكج وثاني ماعدي يدل على صحة كلامج.. وحتلو حجيتي اكلهم جذب وهيه الي اجتني راح يصدكوني تدرين ليش لانو كلهم يعرفون بيج ادورين ولد هههه
هدى _حسبي الله ونعم الوكيل بيكم..عفته وركضت لغرفتي صرت اضرب روحي راجديات شحصلتي هسه هدى هاا شحصلتي بس طيحان الحظ من بعد نومة بكاء طويل نمت من دون ماحس بنفسي..
وره فترة ماعرف شكد حسيت على واحد نايم وصاير فوكاية عبالي مهيمن كتلة.. اجيت مهيمن..
محسن _اي اجيت..
هدى _اشتميت هذا مو عطر مهيمن ولا حته صوتة باوعت.. تخبلت واني اشوف هذا محسن مو مهيمن ردت اعيط سد حلكي بأيده...
محسن _اشش اذا ما تهدين اجرم بيج وماطلع منا الا واني مسوي مصيبة ومأذيج لهذا سكتي احسلج..
هدى _حاولت اهدي بروحي واسيطر على سرعة انفاسي اني نايم بداية السرير مديت ايدي على الميز البصفي حاطة سجينة بماعون الفواكة سحبتها منه وضربته بيها بسرعة وخر من فوكي وشرد قبل ما عيط..
ركضت وراه قفلت الباب كرفست روحي بالكاع وكمت ارجف من الخوف مهيمن جان اماني بس راح خسرت اماني والكل صار بس يريد فرصة حته ينهش بلحمي  وينك مهيمن فدوه ارجع الله يخليك ارجعلي شلون تعوفني وحدي... من الرجفة الي لزمتني مكدرت بعد اوكف على رجلي زحفت للسرير وتمددت بقيت اقره آيات قرءانية لحد مغفيت..
ثاني يوم بقيت بغرفتي ولا نزلت جوه نفسيتي صارت متتقبل بعد اشوف احد ولا اتناقش ويه بشر للعصر طبت جفت عليه عمتي جانت شايلة بيدها ملابسي شارتهم اني على الحبل..
جنان_هااج اخذي ملابس الگ... تنكسني اني و ولدي وغصب عني متحملة وجودج ويانة بالبيت بس خلي يرجع مهيمن اشوف يا××× تبقيج كبالها...
هدى _ماكدر ألومها لو احجي عليها اني بكل الاحوال ابقة مذنبة ان حجيت او جاوبت مراح يتغير شي.. بقيت يومين واني عايشن بس على الي باقي عدي بالثلاجة من أكل وشرب باليوم الثالث جنت بالحمام داغسل طلعت صار كدامي عمو دنكت دا روح وكفني..
ابو محمد _اوكفي عمو تعالي وياي للحولي عدي حجايتين وياج..
هدى _هزيت راسي من دون ماجاوبة..
ابو محمد _اول شي بابا ليش متنزلين جوه وليش حارمة روحج من الاكل يعني قابل من تسوين هيج راح تنحل المشكلة لو ينمحي الي صار..
هدى _دنكت راسي.. عمو مو هيج بس مالي نفس بالمشاكل والحجي تعبانة والله..
ابو محمد _حقج بوية بس هم ما يصير الي تسوي.. اني تره مو راضي على الي سويتي بس شوفي محد معصوم من الغلط هاي واحد ثنين انتي صغيره وما لكيتي الي ينصحج ويدليج وين الصح وين الغلط..
هدى _عمو والله مقاصده اني مو مثل مكاعد يحجون عليه
ابو محمد _ادري واعرف انتي شنو بنيتي مو مال هيج سوالف وان شاء الله عن قريب الكل هم يعرف هل شي.. خليها ابالج انتي بمقام بنيتي فاطمة ومعزتج من معزتها.. ماكو بشر ما يغلط بس الي يوكع بالغلط مرتين غبي صح لو لا..
هدى _اي صح..
ابو محمد _خوش لعد صيري حبابة ولا زعليني منج بعد يلا اني حطلع اجيبلج شغلات حلوه من بره حته تاكلين زين
هدى _كمت بست ايده وراسة.. الله يحفظك النه عموو..
ابو محمد _الله يجبر بخاطرج بنيتي..
هدى _راح عمو واني نزلت بهدوء وراه مجان اكو احد كعدت اكل شوية بالمطبخ خلصت جان تندك الباب مال شارع قوي نزل من فوك همام راح يفتحها جان تطلع هاي احلام!!
شافتني كبالها لو تخبلت من دون سابق إنذار جرتني من ايدي و سحبتني وراها صاح بيها همام..
همام _شنو السالفة ام سليم وين ماخذه الابنية؟؟
احلام _معليك اني وبنتي نتصافة اطلع منها انته..
همام _هوه شنو انتي وياها هاي مرت اخوي ومحسوبة علينه ومادام زوجها ماكو متطلع منا الا بموافقتة..
احلام _واذا اكلك امك هيه داكة عليه حته اجي اخذها..
همام _شنوو مستحيل هل حجي..
جنان _لا صح اني خابرتها خلي أهلها يصير عدهم علم ماريدها بعد ابيتي..
هدى _ماريد اروح الله يخليج عمة لا سوين هيج بية.. ضليت احجي واطلب منهم يساعدوني ويبقوني يمهم بس للاسف محد استجاب لطلبي ظل همام يتعارك ويه عمة وحده.. اخذتني احلام وياها حته اواجة بي مصيري المجهولة..!!
‏كيف أقول أنني متعبه بـ طريقة تُخفف كل هذا الثقل من على صدري وتبعد هذا الألم الكبير عن روحي ، كيف؟ فـ أنا عاجزه تمامًا..يتبع