لم تكن امي(لبوة الاسد)

البارت الثامن عشر

،، رواية لم تكن أمي،،
_البارت الثامن عشر_
*********
همام _لأن كلماتي لم تعُد مهمة، لأن كل حركة افعلها تعود بعشر حركاتٍ ضدي !
لأنني ايقنت اخيراً إنك لست لي، لأن الحياة ضَحكت علينا، تسّلت بِنا،
لأنني لن اتخذ الخطوة الاولى مجدداً ابداً،
إنني أُعلن بكامِل قلبي، إنني اتخلى عنك،
وهذه المرة الى الأبد ...
إنني أتبرأ من كل كلمة كتبتها لك وانا في قمة سعادتي، أتبرأ من كل هذا الشعور الذي اكُنه لك بداخلي، لأنه سيبقى مدفوناً بالداخل، كما كان دائماً،
بعد ان كانت كلماتي تخُصك فقط، حتى ولو لم تقرأها،أقول الان، جَف حِبر قلبي، ولم تعد الحروف تُسعفني كما مضى،
وكما ترى، انا لا اعلم كيف أُنهي هذا النص، لا حرف يصف ما اشعر به حالياً..
....دخل مرتضى للمحل ولازم ايد بنية رفعت راسي للابنية واني اشوفها ااه حبيبتي ونفسي ماذا حل بك لاراكِ تمسكي بيد غيري..
أصعب لحضه مرة بعمري كله أصعب دقايق عشتها تمنيت بلحضتها صدك ميت وربي ياخذ أمانته ولا اشوفها بأيد غيري ومنو صاحبي؟؟
الي جان أقرب واحد الي ورفيق دربي تمنيت الي داشوفة حلم بس للاسف طلع واقع اشوفهم كبالي صدقاً ضاع الكلام مني عيني عليها شلون مدنكه راسها وابد مرفعته وهوه ضاغط على ايدها حيل لدرجة صايره حمره مبين جايه هنا غصب عنها..
ماعرف شلون لزمت اعصابي و بقيت هيج صامد و مكتفي اتفرج عليهم يمكن لانو بعدني ممستوعب الصدمة وكمية الاذى الي صابت كلبي..!!
مرتضى _بأبتسامة،،
شلونك حبيبي همام جنت قريب من محلك وكلت اجي اسلم عليك اني وخطيبتي..
همام _غمضت عيوني بقوه من كال خطيبتي شلون تصير النذالة بعد..
مرتضى _هاا شو ساكت اخاف متفاجئ غير انته محضرت الخطبه بس على العرس لازم تجي تره صدك ازعل عليك هل مره..
همام _متحملت اكثر كبل جريته من قميصة سحبته عليه وباوعت بعيونه،،
شلك بيها هاي عبالك الي كبالك غبي لو زوج ومافهم تلميحاتك بس حسافة والله على هاي الصدقة والخوه الخر الي جنه بيها..
مرتضى _هي وخر عني شبيك انته..
همام _باوعت على مريم الي القهر تارس وجها والدموع ماليه عيونها مردت كلبي والله رجعت باوعت عليه،،
وصل خطيبتك يلسبع للبيت وتعالي يم الجسر نتصافة واذا زلمة انته تعال وحدك..
مرتضى _اي اجي قابل خايف منك بس مو علمود شي بس علمود اعرف شبيك وياي..
همام _ابتسمت بأستهزاء،،
نص ساعة وأريدك كبالي واذا متجي اعرف شلون اجيبك اني وهسه تفضل بره..
مرتضى _هز راسه متوعد وطلع..
همام _بس طلعوا بسرعه كعدت على الكرسي حيلي انهد فتحت دكم قمصي مختنك النفس كوه اخذه شعور حقير، ألم روح وكلب ينزف..
شنو الي صار وشلون بظرف اقل الشهر صارت على ذمة غيري ادري حبي جان من طرف واحد لانو هيه ماعدها علاقة بيه بس والله جنت مستعد ادفع دم كلبي حته اخليها تحبني..
الأفكار اذتني حيل مشفت روحي غير رايح يم الجسر وأريد اخذ جوابي من صديقي الزود..
فتره عشر دقايق وشفته اجه بسرعه وكفت كباله وكتله..
همام _خلصن البنات موو؟
مرتضى _انته شبيك شتقصد..
همام _لهنا و وصلت حدها كبل ضربته بوكس ابطنه رجع على اثرها ليوره..
مرتضى _خرب بيك تخبلت انته ااه بطني...
همام _ههه لك انته تعرف شنو الوجع وشلون يصير وتحجي ب ااه...
جاااوب يعني خلصن البنات وحطيت عينك على مريم لك متدري بيه رايد اخطبها هااا..
مرتضى _واني شعرفني بيك قابل رايدها اشتم كفه ايدي شكو بعد هل تمسلت مالك..
همام _ليش من جنت تشتغل عدي وهيه اجتنه مو اااانته بنفسك كتيلي مبينه هذاك وياااك حبيتها ولك صاااحبي انته والله شبقيت للعدو شلون الك نفس تسوي هيج وبكل عين صلفة جايبها وجاي تتباها بأنجازك يمي..
مرتضى _ كافي تتجاوز اني هم سألتك تحبها لو لا وانته كتلي لاا وهسه بعد صارت حرمتي كلامك بيها ميرهم تره..
همام _زين والله طلعت تعرف بالاصول بس كلي شغله وحده شلون اخوها اقتنع بيك بهاي السرعة وانته كلك على بعضك متسوه فلس..
مرتضى _احترم نفسك همام هواي داسكت الك.. واذا على اخوها هوه يشتغل عد ابوية ومن حاجاه وافق بسرعه
همام _ههه والله ثنينكم مو زلم شكرا الك يا صاحبي على غدرك بيه و شكرا لانو ستقويت على عائلة حالها على كدها اضطرت تقبل بيك بعمري محسيت بالقرف كد هسه من اشتريتوا الابنية بفلوسكم وجايبها يمي تراويني غدرك على الأصول
مرتضى _لا تكبر الموضوع غدر ومدري شنو هيه اصلا السالفة ماتستاهل عصبيتك هلكد كل واحد وقسمتة قحط بنات هسه..
همام _هسه اراويك الكافي شلون تصير،،
مرتضى _شنوو..
همام _بحركه سريعه هجمت عليه دك ضرب مين الي يوجعك حركه كلبي خلتني ادمي وهوه شكد ما رد الضرب اليه بس متوجعت مثل وجع طعنته اليه من اخذ محبوبتي من عدي وعده الموضوع بشربه ماي..
تعرضت لابشع انواع الخيانة مستحيل بيوم اكدر انسة دكته الناقصة اخذ مني بت كلبي اخذ مني تعبي اخذ مني الي حلمت وحلمت نعيش سوية جوه نفس السكف الي حاربت اهلي حته احصلها..
اجو شباب ماعرف مين طلعوا جروني منه بالكوه واني لو بيدي اطلع بروحه بهل دقيقة شفت سيارة الشرطة اجت علينة هذولة منو جابهم صارت عيني عليه تفلت بوجها..
همام _ تدري شنو ماراح ادعي عليك بالشر لانو الابنية مالها ذنب تصير ضحية خباثة انسان مريض مثلك وخليها ابالك من اليوم طلعت الابنية من نفسي حته لا دكول حاط عينه على حلالي ههههه حلالك..
الشرطي_هي كافي تخربط بالحجي شنو شارب انته امشي ويانه للمركز..
همام _شمسوي قابل حته تاخذوني وياكم هسه..
الشرطي _سلامتك كل شي ممسوي بس متهجم على الولد وعلى شوية تموته زين منه انطانه خبر بالشي الي راح تسوي قبل مايجيك..
همام _باوعت على مرتضى وابتسمت،،
رجال نشمي وكفوو منك والله..
الشرطي _يلا امشينه كافي لغوه شباب مستهتره
همام _اخذوني وياهم بسيارة الشرطة بقيت ساكت فجأه صار عدي بروده أعصاب مو طبيعية وصلنه للمركز وهناك بدوا يسألوني ليش سويت هيج وشنو الي بينه كتلهم خلاف وسوء فهم بس الظاهر ماقتنعوا..
صاروا هنوب يستترجوني ويجاوزون بالحجي عليه حته اثور عليهم بس همه ميدرون اني حاليا عبارة عن كتله من البرود من شافوا ماكو مني اي استجابة عافوني وطلعوا..
المكان الي حبسوني بي حيل وصخ والاضرب ريحته طالعة اله شوية واذب من راسي اريد جهه بيها حظ اكعد بيها ماكو بقيت واكف لحد ما رجلي خدرت واضطريت اكعد على القذاره..
ساعه واكثر اني هنا مثل الحيوان محد اجه على الأقل بس ينطيني مي حلكي يابس بس جيب ابو الغيره..
بعد ساعتين اجه شرطي عليه طلعني والعار يدفع بيه دفع احسهم متقصدين يردوني بس اسويلي غلطة حته تنحسب ضدي..
وصلت لغرفه الضابط صار كبالي مهيمن مادري شلون دره بيه اجه..
مهيمن _همام انته شمسوي ولك تخبلت انته متعارك ويه ولد ومدمي شبيك..
همام _باوعت عليه،،
اذا تكدر طلعني واذا متكدر خليني ارجع للمكان الي اجيت منه..
مهيمن _خوية فهمني شكو حته اعرف اصرف واطلعك من المكان القذر الي كاعد بي..
همام _تدري هذا المكان القذر طلع انظف من هواي ناس بحياتي..
مهيمن _لا اله الا الله...
همام _صار يحجي ويه الضابط ومادري شنو نص ساعه وطلعني بكفالة طبعا الفلوس كل شي تسوي رجعنه للبيت وطول الطريق اني ساكت مهيمن حجه عليه راد حاول أفهمه شكو بس محصل الجواب..
وصلنه للبيت نزلت بتعب واني احس روحي مطايقها اول مفتت صارت أمي كبالي..
جنان _انته ووين جنت راح تموتني بيوم والله تختفي على ساعه ومن نسأل وندور نعرف بيك بالمركز ومتضارب ويه العالم شبيك همام منو لاعب بعقلك هيج..
محمد _زلمة شطولك شعرضك وبعدك تصرف مثل المراهقين شبقيت للزعط مدكلي فشلتنه بسوالفك هاي..
ابو محمد _اني اريد افهم شبيج متسودن علينه هل ايام ولا عبالك همام الي نعرفه..
همام _باوعت عليهم وحجيت،، خلصتوا؟
محمد _لاا وفوكاها معاجبه الأخ ويصنف..
همام _من رخصتكم صاعد ارتاح بغرفتي..
جنان _شبيك هماام مدكلي حتسودن من وراك من كاتل روحك على الأرملة وكتلك يابه قابلين ميخالف شتريد بعدد..
همام _شررررريد بعددد مووو هااي الأرملة الي تحجين عنها رااحت منيي بخ صفكت ايد بأيد...
ان شاء الله ارتاحيتي ست جنان وخلصتي منها كله من وراج ٣ أشهر اااني اكلج يااابه حاابها رايدهااا قفلتي يابه شلون جنان تتنازل لوما تماطلج وعناادج جان مرراحت مننيي..
بس بقيتي اجرين طول بعرض وكل يوم طالعه بسالفه شكل اصلا اذا ابقه عليج تدرين يصير عدها أطفال وانتي بعدج مناويه ترحين الهم....
محسيت غير اجاني راجدي من ابوية سكتني على اثره..
ابو محمد _لك حيوان احترم الي كبالك جان استحيت على طولك ترفع صوتك على امك لخاطر مره هاي امك تدري شنو أمك
همام_اي صحيح أمي الي مفكرت بسعادتي و فضلت بس راحتها شريد اكثر بعد...
جنان _اموت روحي وترتاح الله ياخذني هيج طلعتني بله احساس وكل قهرك من ورايه
همام _لا يابة لا قهر ولا شي بس حبيت ابشركم خلصتوا من سالفتي الي كلكم جنتوا واكفين بوجهي عليها ولا تفكرون بيه بعد كل شي ماكو مجرد تلاغيت ويه خطيب حبيبتي النذل وصفيت حسابي وياه..
من رخصتكم وياريت بعد محد بيكم يشيل همي خوش صعدت فوك طبيت للحمام فتحت الدوش عليه اني بملابسي صار المي ينزل عليه واني افكر مادري تصرفاتي هل فتره صح لو غلط..
بس والله مو بيدي احس كلبي محترك على الأخير منا غدر صاحبي اليه ومنا أمي الي جانت سبب بأنوا اخسر روحي واول حب دخل بكلبي ومنا مريم اخ يامريم لج والله روحي جانت بيج..
بس خلاص مادام صرتي بأسم غيري طلعتي من نفسي شلون افكر بيج بعد وانتي على ذمه رجال حرام عليه الظاهر قسمتج جانت ويه صاحبي وكل هاي المعوقات جانت إشارة انو مراح ننجمع..
ههه اضحك على روحي والله بهذا الحجي فركت وجهي حيل كمت احس راسي حيطك من وجعه ربي شنو الذنب الي سويته حته اتعاقب هيج والله ردتها بالحلال وحته علاقة مسويت وياها..
ليش اخذتها مني ونطيتها لغيري.. طلعت من الحمام واني كلي مي بدلت شلون مجان وتمددت بس غمضت عيني صارت صورتها كبالي من جانت هيه ومرتضى النذل بالمحل زين شنو ذنبها هيه جابت عمرها قهر بأذيه تاليها تكمل بيها وتصير على ذمه واحد مثل هذا..
كله من وره اخوها العاربقيت اتكلب منا واجي منا واني عيوني ما اخذت النوم راسي راح يموتني اخذت طبك حبايتين براسيتول عسى ولعل راسي يهدء شوية وبطني صارت نار..
لانو اخذتها على معده فارغة كبل ركضت للحمام واستفرغت كل شي بمعدتي حيلي انهد والله صارلي يومين محاط لكمه بحلكي والي يدخل لمعدتي احسه سم..
بالكوه غسلت وسندت روحي شفت فاطمة حاطه على الميز أشكال الاكل بس روحي ابد متقبلته ماكدر اتقبل شي منهم خصوصا بهاي الفتره احس كل شي صار من وره عنادهم..
اخذت سويج سيارتي ونزلت جوه صاروا كلهم كبالي..
جنان _هاا يمه محتاج شي
ابو محمد _شلون صرت همام..
همام _تجاوزت كل اسألتهم وكلامهم وطلعت بره بالرغم شكد اذيتهم بالكلام بس بعدهم يخافون عليه ويسألون عن صحتي اخ شيصير لو من اول مجيتكم قابلين مجنت هسه اني مرتاح وانتوا هم..
مشيت بالسيارة وصرت كدام بيت مريم وجعني كلبي حييل اخ مريم صدك جذب لكل شي حطيت احتمالات بس مال يصير هيج ابد مجنت متوقع ممكن ترجعيلي يروحي وتنورين حياتي من جديد..
غمضت عيوني متحسر.. ضليت افتر افتر بالسيارة لحد مشفت روحي واكف يم محل مال شرب نفسي دنت عليه وأريد بس ارتاح واخمد نار كلبي
نزلت اشتريت بطل ورجعت للسيارة مشيت وراها شفت حديقة نزلت بيها لانو بس اريد مكان بي هوى اريد اتنفس فتحت البطل وقربته من حلكي اول مشتمينه لعبت روحي من ريحته وشمرته بالكاع انكسر..
شداتسوي همام شداتسوي عبالك اذا سويت هيج راح ترتاح بالعكس هيج حتبقه بالظلمة الي انته بيها الف الحمد لله ماشربت منه جان غضبت ربك..
صارت الساعة يمكن بال ٣ الصبح راسي تعب من السطره ميلت جسمي كلش نعست شفت مسطبه بالحديقة تمددت عليها وغمضت عيوني مستسلم للنعاس..
محسيت على روحي غير على ثاني يوم الصبح من حسيت الشمس صارت بعيوني كمت افرك بوجهي اول شي استغربت المكان الي اني بي بعدين اذكرت البارحة..
ذبيت حسره شكبرها طالعة من نص كلبي يعني كل شي صار وراح يصير حقيقي ومو خيال غمضت عيوني طالب القوة من ربي كمت احس ابطني تتكطع من وره الجوع..
تمشيت شويه شفت محل أسواق اشتريت منه كيك وعصير اكلتهم بس هم بعدني جوعان وفلوس بعد مشايل رجعت للسيارة وعلى حظي الحلو مشيت مسافة والسيارة وكفت اباوع خلص بانزينها..
استغفرت ربي شلون ويه هذا اليوم الي من بدايتة مشؤوم اضطريت ارجع للبيت مشي والشمس ما شاء الله بالعراق ابد متصمط الوحد من ١٠ لل١ يلا وصلت للبيت طبعا بعد ما اكلت تبن من هذا المعدل..
بس فتحت الباب ولكيت الأمة العربية واكفتلي بعدني مناطق حرف ماشوف غير هجم عليه مهيمن وضربني بوكس بوجهي على اثره خله خشمي ينزف دم..
مهيمن _حيوان وكلب انته تدري بروحك لو لا لك احنه اهنا ميتين خوف عليك وانته تفتر بكيفك وساد جهازك تخبلت انته اكيد..
همام _شتريد مني لخاطر الأنبياء شتريد عود تحسسوني انتوا هيج حابيني وكل بالكم عدي خوش رحمه الله والديكم بس فكوني هسه..
جنان_كامت تبجي،،
لك يمه شجاك مدكلي ليش صرت هيج عدواني ويانه والله اذا يرضيك هسه البس عباتي واروح لأهل الابنية ومافتح حلكي بس لا تسوي هيج بروحك..
همام _انتي الظاهر مفهمتي كلامي مال البارحة الابنية راحت انخطبت شلون افهمكم بعد مادري
شفتهم يردون بعد يحجون واني واصله لخشمي والحجي وياي حاليا بله اي نتيجه لهذا صعدت لغرفتي بدلت ملابسي وأخذت فلوس نزلت صار كبالي مهيمن..
مهيمن _وووين..؟؟
همام _للمحل مهيمن للمحل..
مهيمن _تلفونك بقى مفتوح همام ماريد ارجع الكاك بالمركز..
همام _تدلل..
رحت للمحل بتكسي و نطيت فلوس للعامل دليته مكان سيارتي حته يروح يجيبها الي.. طلعت جبت لفتين من المحل الي بصفي لانو بديت اجوع حيل..
لليل واني كضيتها اشتغل مخليت شي مسويته بس في سبيل مافكر بشي اهلي يخابرون عليه كل شوية عبالك كدامهم طفل والله يا الله..
تأخر الوكت ومظل غيري بالمحل كل ماريد ارجع للبيت اكو شي يمنعني يكلي ابقه راحتك هنا وصدك راحتي جانت بالابتعاد عن بيتي خصوصا واني بعدني نار..
حسيت على شخص دخل المحل باوعت هذا مهيمن مدري شجابه هسه..
مهيمن _مراح ادكول لاخوك تفضل شي..
همام _اصلا انته طبيت شكلك بعد..
مهيمن _همام خيي، سندي، حزام ضهري لا تسوي بروحك وبينة هيج اني فهمت الي صار وادري كلش زين بوجعك ولوعة كلبك اصلا محد يلومك بس خفها على نفسك شوية انته زلمة مو هيج ياخوي..
همام _محد متأذي تره غيري ومحد راح يحس بوجعي غيري لانو محد جربة بيكم والله لا يضوكه لاحد..
مهيمن _همام كافي مو هيج اعتبرها قسمة وما صارت وبعد ميصير هذا تفكيرك ادعي للابنية بالسعادة والراحة ويكون زوجها ابن اوادم..
همام _مهيمن تأكد اني مستحيل اكون حاط عيني عليها لحد هاي اللحضة مادام صارت على ذمة غيري بس كلي..
النسيان شلون..
المواقف شلون..
الغدر شلون..
الذكريات شلون بيها هاا..
مهيمن _تهون والله تهون اني ادري بيك رجال من ضهر رجال ومراح يهدك احد..
همام _ان شاء الله..
مهيمن _متكوم نرجع للبيت تره والله امك حالها من حالك تدري كاطعة الاكل على كطعك وعينها على باب الشارع بس تنتضر جيتك لا تعاقب أمج على شي الله قاسمة الكم..
همام _هزيت راسي،،
يلا امشي نرجع اني تعبت كلش..
رجعنه للبيت سوية وهم بس طبيت صارت كل العيون عليه مبين جانوا ينتضروني مدري على منو انقهر على حالي لو على حال اهلي داصعد فوك سمعت ابوية حجه..
ابو محمد _همام تعالي بوية اكعد ويانة شوية..
همام _رجعت كعدت بينهم بس ليش احس روحي غريب بنص اهلي ماعرف..
ابو محمد _ولو يمكن الموضوع مو وكتة بس شيخ عشيرة الولد الي طلبوا فاطمة قبل يومين رجع دك عليه وراد مني الجواب تفاشلت ويه الزلمه صار لازم ننطي جوابنة للناس تره..
مهيمن _يابة من رخصتك بس اني بعدني على كلمتي وما مقتنع بالجماعة..
ابو محمد _بس اني راضي وسألت اختك جان جوابها انو بكيفي اني هاي معناها هيه هم راضية اخوتك هم راضين نكلك انطينة جواب مقنع عن رفضك متنطي شلون بله..؟
محمد _والله مادري شبيك مهيمن احسك ادور مقامات وتريد واحد بالقوات لو ضابط مثلك..
مهيمن _شكاعد تحجي انته اكيد لا هذا الشي ميطلع مني بس كتلك ما مرتاح ما مقتنع وبس..
همام _اقاطعك ولو دتحجي مهيمن اني من رأي انطوها للولد لانو مبين متمسك بيها وهاويها كلش لا تكسرون بالولد وتصير لغيره لانو هذا الشي ابشع شعور ممكن البشر يمر بي واذا الولد ماعليه اي غلط خلي تتوكل بقسمتها ولا نكسر بخت احد..
الهدوء عم المكان اكيد عرفوا قصدي شنو بس محجيت شي غلط اني ترخصت منهم وصعدت فوك بعد ما عرفت انو صار قرارهم بالموافقة..
مرت الايام واني بارد وصلب مكمل حياتي اروح للشغل وارجع روتيني المعتاد بس مبتعد عن اهلي وقليل اختلط بيهم عرفت من خلال حجيهم راح يسون خطبة بسيطة لفاطمة وبعد عرس مهيمن تزوج هيه فرحت الهم وحسيتها تستاهل هذا الولد لانو صدك شاريها..
اجه نهاية الأسبوع جنت كاعد بالمحل اخوط بأستكان الجاي وكل شوية ماخذلي صفنه سمعت صوت سلام..
غيث _السلام عليكم..
همام _وعليكم السلام..
غيث _شلونك بذات..
همام _برحمه الله..
غيث _همام كافي افردها للخلقة عاد تره لعبت نفسي من شكلك المعكد..
همام _غيث من الاخير عدك شي تحجي احجي معدك ابقه ساكت مالي واهس خفه دمك..
غيث _مو صوجك والله تحسر،،
همام ادري راح تتفاجى بالي راح اكولة بس هاك هاي امانة الك..
همام _باوعت ظرف،، هذا شنو ومن منو؟
غيث _من اخت مدري صديقة بنت المعهد الي تحبها جتني للمحل وكلتلي انته مو صديق فلان كتلها اي كالت وصل هاي الأمانة اله وحلفتني الف حلاف ما فتحه..
همام _فتحت عيوني بصدمة واخذت الظرف بسرعة..
صدك تحجي هذا من مريم معقولة ياربي ردت افتحه بس خفت ماعرف ليش خفت من محتواه بعدين فتحته جانت رسالة و الحجل الي اشتريته الها غمضت عيوني وبعديت اقره..
"السلام عليكم اخ همام اني مريم الابنية الي جنت تجيها للمعهد وتنتضرها بي حته تشوفها ماعرف مين أبدي حديثي وياك بس ضميري حيل ديأنبني تجاهك..
اني اعتذر اي اعتذر وكلش هم لانو طفيت الفرحة واللمعة الي جانت بعيونك صدكني كل شي صار بقرار من اهلي واني كتلك من البداية حياتي كلها بقرار من اهلي..
انته انسان خلوق الله شاهد مشفت منك اي سوء بس سبحان الي مكتبني من قسمتك حبيت اوضحلك موقفي لانو ادري بيك شكد جنت تتعب من ورأية ان شاء الله ربي يرزقك ببنت الحلال الي تسعدك "
دمعتي نزلت وكلبي احترك نار شهل عذاب يا الله كلبي انقبض حيل تذكرت من مرتضى كال نهاية الأسبوع عرسنة كبل التفتت على غيث..
همام _غيث اليوم عرسهم موو!!
غيث _هاا يمكن مادري..
همام _يعني اليوم ليش كاعد كدامي لازم نحضر عرس صاحبنة..
غيث _همام بطل خبالك..
همام _هاي شبيك ليش خايف تره احنه ننحسب مثل إخوتة شايفلك اخو ميحضر عرس اخو اني رايح للبيت ابدل تجي وياي لو لا..
غيث _طبعا اجي شمدريني شنو راح تضخم انته..
همام _لا تخاف ماسوي شي..
رجعت للبيت بدلت لبست قاط وتعطرت واخذ سلاحي وياي دك عليه غيث كلي اجيت اطلعلي نزلت صار بوجهي محمد أخوية..
محمد _خير ان شاء الله كاشخ وين رايح..
همام _احضر عرس محبوبتي..
محمد _هاا..
همام _عفته وطلعت لغيث احس روحي فرحان عكس الشي الي المفروض احس بي يمكن لانو جانت امنيتي اشوفها ببدلت العرس واليوم راح تتحقق..
وصلنه لبيت مريم وبقينه بالسيارة ننتضر الزفة
نص ساعه واجت الزفة ونزل منها مرتضى بهذاك القاط والكشخة والكل يهوسله ويركص...
طب جوه اخ راح يشوفها اي والله راح يشوفها وهيه بأحلى طلاتها اليوم راح ينيمها بحضنه اليوم راح يشم عطرها وراح يهمس يم اذانها ويلعب بشعرها والله جنت اتمنى كل هذني أمنية..
غيث _يلا همام كافي بعد خلي نرجع..
همام _شنرجع بعدني مزفيتهم..
غيث _لك على شنو ناوي لا تخبلني..
همام _كل الخير لا تخاف نزلت من السيارة وصرت يم الزفة والهوسة منتبهت على بشر بقت عيني على باب البيت لحد مطلعوا سوية...
"تدرين جنت اتمناج أمنية تاليها صرتي بحضن غيري"
يتبع..💔