صباح الخير جميعا 💐 ورداتي
رجعت وياكم بلحلقه ال23 من اسماني ابي ريحانه
بقلم اختكم دموع البحر ..🦋🦋🦋
نبتدي باسم الله 💕💕💕
وستأتيني فرحتاً تنسيني كل ما مررت به💫💫💔
كلت بهدوء وكأني خلصت كل طاقتي : تعبت ماما تعبت يوميه سالفه طالعه الي من جنت صغيره لهسه ما مرتاحه لا حظيت بأب ولا بأم ولا باخ يسندوني بهيج وقت ...لو ما انتي موجوده ...من صغري واني محاربه من افراح وجواد كبرت كلت الحمد لله خلصت منهم ...حبيت امجد وكلت راح اعيش مثل باقي البنات وبدون مقدمات كسر گلبي لملمت الي باقي منه ونسيت ....وكلت ميخالف مو جديده توني اشم هوء الله وعشت ودخلت الكليه طلعتلي سالفه سجاد اخذت مني ايام انام برعب واكعد برعب ...وكلت ميخالف وخلصت منها بمعجزه ...ورجعت وكفت على حيلي حاربني الي اسمه عمي وعيشني ايام بدموع وضيم عفته ما هتميت ...رجع الي نسيته وفتح جروحي من جديد وها هلمره هو يحبني وهم كسرني وعديت وميخالف ....نحبيت وحبيت وكلت خلي افرح بس كافي دموع حاربني عمي من جديد تزوجت وكلت خلصت بعد ماكو شي يضوجني ولا يبجيني شفت روحي بدوامه ايهم بين ماضيه وشغله وحالته وشنو يصير بيه ...وهم ميخالف قابله ...اجتني صابرين بعد سنيننننننننن سنينن ناسيتني توها ذكرتني ...باوعت لماما وكلت : والله ايااااااام ما اكدر انام تعبت ماما تعبت ...هم يشمرني على هم وضيم على ضيم ومن مصيبه لمصيبه بعدني ما متقبله الوضع الي اني بيه وسالفه صابرين ...اجه الي جان بيوم حب عمري وجنت اتمنى كلمه منه وهدم الي بقى مني كوليلي شنو اسوي ماما ..فدوه شسوي بعد مالي طاقه لكلشي
حضنت راسي بحضنها وكالت : ااااااوف يا بنيتي كسرتي كلبي فوك كسرته ...بس كافي وخلي عينج بعين الله هو يكف كيدهم منج
غمضت عيوني بحضنها وكلت : ما عندي غيره هو وكيلي وهو كفيلي ...
تمسد على شعري وكالت : نخبصنا وما سألتج رجلج يجيج لو تباتين هنا
كلت : ما ادري ما خابرته هسه اكوم اخابره
اول ما وكفت دارت بيه الغرفه سندتني ماما وهيه تكول : الله ..الله ..اكعدي ماما دختي لو شنو
كعدت وكلت : شويه دخت
سميه : من الي صار والبجي وما اكلتي هوايه بلعشه صار عندج هبوط
هزيت راسي ب اي وكلت : هو هم هيج
انطتني ماما التلفون واتصلت على ايهم دك دك دك واجاني صوته تعبان : هلو حبيبتي اعذريني ما اتصلت عليج
كلت : الله يساعدك ...لا مصار شي شونك شخبارك
ايهم : ويساعدج حبيبتي .زين الحمد لله شبيه صوتج
كلت : ما بي شي لا يضل بالك انته وين اجيتو بعدكم
ايهم : توني دخلت ها اها وشمرت روحي علجربايه ما بيه حيل اكوم اسبح والله
أنت تقرأ
أسماني ابي ريحانه
ChickLitيتيمتاً انا تركتني الحياة بأب رحل بريعان شبابه وام عاشت لاجل نفسها تاركه خلفها طفله صغيره بين يدي كبار السن وفتاة في مقتبل العمر تعيش شبابها ام تربي طفلهً وتنفي نفسها انا تلك اليتيمه انا تلك الطفله انا تلك التي تركتها امها لتعيش عمرها ولم...
