أسماني ابي ريحانه

28

صباح الخير جميعا 💐 ورداتي

رجعت وياكم بلحلقه ال28 من اسماني ابي ريحانه

بقلم اختكم دموع البحر ..🦋🦋🦋

نبتدي باسم الله 💕💕💕

🥀🥀🥀🥀

ما جنت اتوقع بيوم راح اوكف هيج وكفه وراح تكون رده فعلي مثل ماهيه هسه ...

احساس الالم بكلبي كولش قوي وصولاً لجميع اجزاء جسمي رجفه خوف ورعب وحزن اشتاحتني ...
بنتي بدت تنطي ايعازات بأن هيه متضايقه ويايه حست بأحساسي والامي ..
نظراتي تثبتت عليه مستغربه الي داتشوفه مستحيل ...اصلا ولا هو ....
درت نظرتي لاسو الي واكفه بصفي ورجعت عيني لعمه اميمه الي دموعها مجاي تبطل رجعت خطوه للخلف عالنه انسحابي من هل مواجهه استوقفتني ايد اسو ونظرات الترجي بعيونها ...
اخذت نفس وسميت وفتحت الباب على كييييف دخلت بدون صوت عيوني تتنقل بين الغرفه والاجهزه الموصوله بجسمه صوت الاجهزه نرفزني خلاني اتنفس سريع حس بوجود احد فتح عينه بتعب وثكل ورجع غمضهن شويه وفتحهن بحركه بطيئه من ايده وخر جهاز الاوكسجين من وجها وابتسم باوعلي ورجع غمض

كال بصوت تعبان كوه ينسمع : عبالي متت ...

تقربت بهدوء وكلت : اسم الله ليش هيج تحجي ؟؟

امجد : شميت عطرج عبالي عطر الجنه

ما جاوبته بس دموعي تحجي حالتي شنو شصاير بيه وين ذاك الي يمشي بغرور ويهد الكاع من يدوس عليها هسه عباره عن هيكل عظمي وعليه شبه جلد ومعاني وجه عباره عن تعب ومرض وهم

امجد : جنت ...متأكد ...راح تجين .. يحجي كلمه كلمه وبتعب

ريحانه : وليش متأكد هلكد ؟؟؟

امجد : اعرف ...ريحانه ...كلبها ...طيب ...ما تشيل حقد

ريحانه : عوفك مني ..اجيت اشوفك واروح

باوع لبطني ورجع عينه على وجهي : بنتج ...كون تطلع ...تشبهج

مسحت دمعتي وكلت : لا ..ما اريدها تشبهني

امجد : ليش ؟؟؟

ريحانه : ما اريدها تضوك الي ضكته ..

غمض عينه وسكت عبالي نام بقيت اباوع لملامحه التعبانه والضايعه فتح عينه صارت بعيني نظرات ما فهمت شنو الي جنه نحجي بيها احجي عتب يحجي حب احجي قسوته يحجي طيبتي هوايه كلام جان بينا كل واحد يحجي الي يحسه

كال : ريحانه ...

كلت : هممم ...

امجد : تسامحيني ...؟؟؟

باوعتله بحزن وكلت : على شنو ..؟؟؟!!.جنت قاصده يعني ماكو شي بينا علمود اسامحك هيج جان قصدي

امجد : هواي مو...!!!

ريحانه : شنو ...؟؟؟

امجد : اغلاطي ...وياج ...