اذا شعرت انك تفقد كل شيء ... فتذكر ان الاشجار تفقد اوراقها كل عام ولا تزال شامخة وتنتظر اياما افضل قادمة .
Hana.kr
_______
شهد
في احلامها الوردية كانت غارقة .... ابتسامة تزين ثغرها من حلمها الجميل
فالطرف الآخر شخص واقف يتأملها بعدها بحركة سريعة ضحك بخبث وطلع فوقها
شهد مافهمت والو غير عظامها لي تكسرو وما ولات تحس بحتى ضلع فتحت عينيها وتلقى عبد يضويلها بالتلفون فعينيها
كشغل زدمو عليها الFBI ولات تعيط وتبعد فالشخص هذاك عليها وولات تستنجد بعماد: عمااااااد
الشخص لي كان فوقها بعدلها الضو تاع التلفون من وجهها وضحك وقعد قاعد فوقها : صباح الخير طفلتي
كي عرفت شكون : اااه يا رخيسة نوووضييي من فوقي كسرتيني ..... عمااااااد
شافت فيها بخبث: جاتك من الله تعيطي لعماد
شهد : من وين جبتي هذي الهدة تاع اليهود تنوضيني هكاك ... ولوكان حبستيلي قلبي ولوكان متت
ضحكت : تعلمت من عند خوك
شافت فيها بنص عين وعيطت: سوووهاااا ا بقرة نوضي من فوقي سينون نعوقك نتي بوليدك .. نوضيي
لحق مخلوع للفوق من عياطها ... تعيطلو ليه وكأنها تستنجد
كي دخل لقى سهى فوق شهد تضحك
راح بالزرب رفد سهى من فوقها : وشراكي ديري ا المكلوبة
سهى سقمت حوايجها ووقفت باستقامة تبسمت ببراءة وشافت فيه تسبل فعينيها : كنت نوض فييها
عماد : تنوضيها ولا تطلعي فوقها تخرجيلها مصارنها
شهد بحقد ناضت حاطة يدها على ظهرها وسطها قسمتهولها : من وقتاش تنوضني هي ... ديجا وش جابك فنص الليل
سهى : جيت نصبح عليك بوجهي باش تخدمي مليح ليوم .. وزيد رانا فالصبح يا لالة وشمن ليل
شهد طلعت يديها للسما تدعي: اللهم ما تحسبليش هذي البداية فنهاري وخليه يكمل على خير
سهى : معليش ا الرخس _دارت عند خوها لي كان يشوف فيها بنص عين ضحكت_ متخزرش فيا هكاك ياك ما قتلتهاش
شهد : والله لوكان نشكي بيك لمنظمة حقوق الانسان يربوك
سهى: انا ثان نشكي بخوك
شهد : المهم المهم وش جيتي ديري هنا ؟ خير يا طير وش صرا
سهى : جبتلك الحوايج بعثتهملك شوق باش تلبسو كيفكيف وزيد باش نتهلى فيك علابالي عماد ماراهش قايم بيك
شهد راحت تحبي فوق السرير : وين راهم الحوايج ؟
مدتهملها وشافتهم .... شهد بحماس : حااالة هايلين
عماد خبط سهى لراسها : وش شايفتني باش مارانيش قايم بيها
سهى حطت يدها على راسها: شوف قدمن ولات شوية وتخفى هذي يسموك راك قايم بيها ؟
عماد باستهزاء: سقسيها على لاطاي _بدل صوتو_ فخونساز وكوغيان
ضحكت سهى من الصوت لي دارو
شهد خزرت فالحوايج وكي سمعتهم طلعت راسها بملامح مسكينة شافت فيهم: ما عنداك نقولو ديرلي حاجة ما يديرهاليش .. نقولو حابة ناكل يقولي روحي تقراي ماشي وقت الماكلة ... ما يخلينيش نفطر ونتغدى ونتعشى كلما نهبط ناكل معاهم يعاود يرجعني للشمبرة غير مين ذاك خالتي كريمة ولا عمو عادل يجيبولي الماكلة بالتخبية _وقفت فوق البونك وشدت السروال_ شوفي السروال قدمن جاني
شاف فيها برفعة حاجب : والله ؟ ولات هكا
شهد مشات فوق البونك حكمت يد سهى وقالت باستعطاف : قوليلو لفيصل يجي يديني خوك متوحش ميعرفش يتعامل مع الجنس اللطيف لي كيما انا
عماد بملامح ما تتقراش: متوحش ؟
شهد : اييه وشرير .. وو ... وو ... ومتحشمش ثان
عماد تنهد : منحشمش ؟؟
شهد دارت براسها ايه
عماد : خلات عليك
وراح يطرح موراها وهي كي شافتو جاي شهقت كي كان راح يحكمها رمات عليه سهى لي كانت قدامها جات بين يديه سوطات من فوق البونك وجرية للسالدوبان غلقت الباب على خمسطاش وبدات تعيط ملداخل : سووهااا شفتي خوك كيفاش متوحش _دارت صوت يبكي_ قولي لفيصل يجي يديني سيغيو
سهى : قريب عوقتيني يا الرخيسة ولوكان طحت
شهد رجعت صوتها الطبيعي : رميتك لخوك باين راح يحكمك _بدلت صوتها ورجعاتو صوت باكي_ قوليلو لفيصل يجيي اهييييييييء
سهى: نقولو ؟
شهد بنفس النبرة الباكية المتصنعة: اييه عيطيلو
عماد بنبرة جدية: نعيطلو انا بلا ما تعيطلو هي ؟ نقولو يجي يديك
شهد بسرعة كي حساتو يهدر سيريو: لالا ما تقولوش كنت نمزح
عماد وسهى ضحكو ضحكو حتى الدمعة وسالت
سهى: اهاا يا المصروعة _ضحكت_ تبقاي عندو
شهد كي فاقت لروحها عضت على شفتها وهمست: واااا تبهديل
عماد كي عرف بلي راح تذوب لداخل ضحك وحبس الضحكة: هايا صغيرونتي وجدي روحك باش نوصلك ما ديريش روطار
ماردتش وغسلت وجهها تنحي منو الحرارة لي طلعتلها
سهى ضحكت: راني وجدتلك الفطور لتحت ... كولي مليح
شهد : مااااا ناااكلش الله يبهدلك
سهى ضحكت كثر: خلاص راح نروح ... ابقاي عند عماد
خبطت عماد لذراعو طلعت حواجبها بخبث وهمست : هذا اليوم لازم تشريلي حاجة كي كنت سبة فهذا الاعتراف
تبسم وطلع حواجبو كيمة هي : البارح قالتلهالي وزادت اكدتها اليوم
بسطت ملامحها وضحكت : وااه تطورات
شهد لصقت وجهها فالباب تاع الصالدوبان: رااانيي نسمع فيكم
سهى : خلاص راني رحت _ضحكت_اصلا ما يدوملك غير عماد
خرجت وهبطت الدروج وابتسامة عريضة تزين وجهها _تقاس بجهاز بيلومتر هاها_
راحت راجعة لدارها
أنت تقرأ
رواية: ﴿ أوراق غيرت لونها -لماذا تنتحر الأوراق عندما تشعر بالاصفرار ﴾
Adventure: لست أظن الطرقات تعرفني، حتى الصوت الذي كان يتردد داخل رأسي محاولاً تذكيري بخيباتي شعر بالتعب، ولشدة يأسه غادرني وأختفى ... كان عليك أن تأتي قبل أن تموت الكلمات في فمي، قبل أن يُغلق قلبي أبوابه، قبل أن أُعيد يداي إلى جيبي بدلًا من أن تُعانق الفراغ...
