The General Loves A Village Girl (Arc-2) (Complete)

Chapter - 40

Unicode

၁၀၃။ နှုတ်ဆက်ပါတယ်၊ သင့်မြတ်တဲ့အမေနဲ့ချွေးမဆက်ဆံရေးလေးရေ
_______________________

သူမရဲ့သားက ထပ်ပြီးဒဏ်ရာရထားတာကို သွမ့်သခင်မကြီးမြင်တဲ့အခါ သူမပူဆွေးမှုနဲ့ဒေါသတို့ကိုခံစားလိုက်ရ၏။ ဒေါသက နဉ်ရှုနဲ့အာ့ယာဆီဦးတည်သည်။

ဒါပေါ့၊ မင်းသမီးကျားဟွေ့ရဲ့အဆင့်အတန်းကြောင့် သွမ့်သခင်မကြီးက သူမရဲ့မင်းသမီးကျားဟွေ့အပေါ်ဒေါသကိုထုတ်ပြရဲစရာအကြောင်းမရှိပါပေ။ သို့ပေသိ အာ့ယာကတော့ တခြားကိစ္စဖြစ်၏။ သွမ့်သခင်မကြီးက ယဉ်ကျေးမနေတော့ဘဲ အာ့ယာဆီ ခက်ထန်တဲ့အကြည့်တစ်ချက်ပစ်လွှတ်လိုက်သည်။

သွမ့်သခင်မကြီးရဲ့အကြည့်ကို နဉ်ရှုမြင်တဲ့အခါ အခုနေမှာ သွမ့်သခင်မကြီးက အာ့ယာကိုတစ်နည်းနည်းနဲ့သတ်ချင်နေတယ်ဆိုတာကို သူမသံသယမရှိ‌တော့ပေ။ မူလဇာတ်ကြောင်းမှာရှိခဲ့တဲ့ သင့်မြတ်တဲ့အမေနဲ့ချွေးမဆက်ဆံရေးလေးကတော့သွားပြီပဲ။ နဉ်ရှုက သူမအတော်လေးကျေနပ်နေတယ်ဆိုတဲ့အမူအရာဖြစ်သွားသည်။

သွမ့်ရှင်းဟွေ့နဲ့အာ့ယာ၊ ပြီးတော့ သွမ့်သခင်မကြီးရဲ့ပျော်ရွှင်မှုကတောင်မှ မူလခန္ဓာရှင်ရဲ့ဘဝပေါ်မှာတည်ဆောက်ထားတာ။

နောက်ဆုံးမှာ မင်းသမီးတစ်ယောက်က ဒီလိုအဆုံးသတ်သွားရတယ်ဆိုတာကြီးက မယုံနိုင်စရာပဲလို့ နဉ်ရှုတွေးနေသေးသည်။

"မင်းသမီး၊ ဘာလို့ ဒီလိုလုပ်ရတာပါလဲ?"

သွမ့်ရှင်းဟွေ့ရဲ့မျက်နှာကဖြူဖျော့နေပြီး နဉ်ရှုကို ဒီမေးခွန်းထုတ်လာတဲ့သူ့အသံက တုန်ရီနေသည်။

သူမ ဘာလို့ဒီလိုလုပ်ရတာလဲ? နဉ်ရှုက သရော်သည်၊ ဒါက ငါ့ကိုပျော်စေလို့လေ! ဒဏ်ရာကိုအုပ်ကိုင်ထားရင်း မယုံနိုင်သလိုဖြစ်နေတဲ့သွမ့်ရှင်းဟွေ့ရဲ့အမူအရာကိုတွေ့တဲ့အခါ သူမက အေးဆေးစွာဆို၏။

"ဒီမင်းသမီးက ကြာပွတ်ကိုနည်းနည်းလေးယမ်းလိုက်ရုံပါ၊ ဒါတောင် မင်းက ကိုယ့်ကိုယ်ကို ဒီမင်းသမီးရဲ့ကြာပွတ်ဆီ တကယ်ကြီးဝင်တိုးတယ်။"

သိသာလွန်းတဲ့ပေါက်ကရစကားတွေကိုကြားတဲ့အခါ သွမ့်ရှင်းဟွေ့မှာသွေးအန်ချင်စိတ်ပေါက်လာရသည်။ သူက နဉ်ရှုကို ခက်ထန်တဲ့အကြည့်တွေနဲ့ကြည့်လာသည်။