~ضياء الروجيد~ |مكتملة|

الجزء 20

أصيل:شنو بغيتيني نعتبرك؟
كا تكره هاد اللعبة..ملي كا طرح سؤال و كا يجاوبها بسؤال..
روجدا:واش غادي تبقا دائما تجاوبني بسؤال ؟
أصيل:شنو هو السبب الرئيسي؟
روجدا:قلت ليك الأسباب..و ما بغيتش نكون مدينة ليك
أصيل:نتوما خدامين معانا إذن كاين تبادل المصالح
روجدا:إذن كا تعتبر بقائنا مجرد مصلحة ؟
هو كا يحاول يلقا طريقة يقنعها بالبقاء و لكن هي كا تخلي الخطة ديالو تفشل
أصيل:كا يبان ليا بلي نتي مصرة على القرار ديالك ؟(بهدوء)فين غادي تمشي ؟
روجدا:ما عرفتش..
أصيل:ملي تعرفي فين غادي تمشي نهضرو
روجدا:واو ساعدتيني بزاف..دائما كلامك كا يدفعني للأمام
أصيل:شنو بغيتيني ندير ؟ على الأقل حاولت
روجدا:واش بالنسبة ليك أنا كا نبالغ في هضرتي و موقفي ؟كون كنتي في مكاني شنو كنتي غادي دير ؟
أصيل:ماشي نفس الوضع أ روجدا..نتوما كنتو في الفضاء و أول مرة تكونوا هنا..فكولشي مازال جديد عليكم..واخة دازت أشهر و لكن ما يمكنش في هاذ الظرفية تكونوا تعلمتوا تعيشو بوحدكم..خاصكم مازال وقت..
روجدا:شحال تقريبا هاد الوقت ؟
أصيل:ما عرفتش..
روجدا:عندي فكرة أخرى..غادي نقلب على عائلة والدينا..على الأقل الى بقينا معاهم ما غاديش نحسو براسنا مثقلين عليهم..حيت كا نتاميو ليهم و عندنا نفس الدم..
أصيل:عائلتك ضروري غادي تعرفي عليهم.و لكن را ما غاديش تلقايهم كاملين مجموعين في مكان واحد..كل واحد و فين ساكن كل واحد عندو عائلته خاصة بيه..
روجدا:جدتي كاينة بوحدها
أصيل:باش عرفتيها
روجدا:الفيديوات ديال والدينا
أصيل: و عارفة هاد جداتك فين كاينة ؟
روجدا:أيدي غادي يكون عارف..

*******

جالسين مجموعين كل واحد كا يفكر و ساهي..مياسين بعد ما فاقت من السهوة ديالها بسبب التفكير في كلام روسيل و كلمة"الرحيل" كا دور في بالها..هزات راسها و اكتشفت انه ماشي بوحدها لي كانت في هاذ الدوامة..روجدا و روسيل نفس الشيئ..و أصيل كا يشوف في روجدا..الشيئ لي خلاها تستغرب..و قررت تقطع هاذ الصمت..
مياسين:كل واحد فينا كا يفكر..و السؤال المهم واش كا نفكرو في نفس الحاجة ؟
كلهم شافوا فيها..و الواضح أنههم كا يفكرو في نفس الموضوع..و لكن كل واحد و كيفاش واخد الموضوع..مياسين بغات تبدل الجو المكهرب
مياسين:لاحظت بلي كل واحد منا تغير..من لحظة مجيئ روجدا و روسيل
روجدا:شنو زعما ؟ تغيير سلبي ؟؟
مياسين:لا ماشي هادشي لي قصدت..أصيل ما بقاش سكوتي بزااف و حدودي..من قبل كان الخدمة المكتب غرفته..دابا العكس ولا كا يجلس معانا..شحال من مرة شفتو كا يبتاسم
روسيل(انضم ليها):روجدا ما بقاتش عنيدة و متهورة كما قبل..هي باقا بنفس الخصال و لكن بنسبة قليلة..و ولات كا تسمع الهضرة..شحال من مرة تصدمت من سهولة إقناعها(و شاف ناحية أصيل)
روجدا:روسيل وليت كا نشوفوا كا يضحك و يبتاسم بزااف.. من قبل كان دائما كا يخمم و يفكر بزاااف و يبقا غير يتنهد..
كلهم سكتو و شافوا ناحية أصيل..كا يتسناوه يهضر..حس بلي كل الأنظار عليه
أصيل:مياسين ولات كا تحمس بزااف و كا تفكر للناس واخا ماشي قراب ليها