~ضياء الروجيد~ |مكتملة|

الجزء 39

يوم"لم الشمل" و كما ذكرت مياسين انه اليوم لي كا يتجمع فيه التلاميذ لي كانوا كا يقراو في هاذ الثانوية بعد غياب و انقطاع طويل..
أكثرية البنات كا يعتابرو هاذ اليوم حفلة..حيت كا يجيو لابسين فساتين جميلة..بمختلف الأشكال.. كمياسين لي لبسات فستان أزرق طويل و ناسب الفورمة ديالها..
و بعض البنات(الأقلية) كا يلبسو لباس عادي مثلا سروال و تيشرت كروجدا..رغم محاولة إقناع مياسين إلا و أنها كانت مصممة تلبس عادي..و مياسين في الأخير خلاتها على خاطرها..
روجدا:ياك هادي ماشي حفلة؟علاش الفساتين؟
مياسين:نوعا ما حفلة
روجدا:حفلة في الصباح ؟
مياسين:ماشي دائما الحفلات في اليل..قولي ليا كيف جاني هاد الكسوة ؟
روجدا:ما بيهاش
مياسين:إذن زوينة
روجدا:ضروري رأي الآخر ؟ الى أصلا كانت عاجباك؟
مياسين:غير باش نزيد نتأكد
روجدا:و إلى قلت ليك خايبة.. و ما جاتش معاك..غادي تحيديها؟
مياسين:ممكن..و إلى سولت شخص آخر و حتى هو بنفس رأيك..100% غادي نبدلها
روجدا:غريب التفكير ديالك.. تيقي في نفسك..و الحاجة إلى كانت عاجباك..ما تقلبيش على آراء الناس..و تسمعي ليهم..
مياسين:غادي نحاول ندير بنصيحتك
روجدا(حركات كتفيها بعدم مبالاة):لمصلحتك..
أصيل:وصلنا..
قاطع حديثهم لي سمعو كامل هو و روسيل..و نزلوا من السيارة..

****

روجدا من الأول ما كانتش موافقة تجي لهاد التجمع.. لنفس السبب لي ذكرو روسيل..و هو أنهم ما عندهم حتى صلة بالموضوع.. و ما قراوش في هاد الثانوية..و لكن بعد محاولات الإقناع وافقو..
و ها هما دابا كا يواجهوا المشكل لي خافوا يطيحو فيه من الأول..مشكل التواصل.. و المشاركة في الحديث مع أشخاص غرباء..
5 مجموعات تقريبا من أشخاص واقفين..و مشكلين دائرة..في يديهم كأس عصير أو كحول..كا يهضرو و يضحكو.. و أصواتهم كا تسمع في الأرجاء.. و من بعيد..
المجموعة لي فيها أبطالنا..فيها بزاف ديال الأشخاص..و كلهم ثرثارين..كا يهضروا على الإنجازات لي حققو..الأهداف و الأحلام لي وصلوا ليهم..السيارات و المنازل لي شراو..الصالير ديالهم..
روجدا و أصيل عتابرو كلامهم تفاخر و تكبر..و غير كا يسمعو لإنجازاتهم لي ما غادي يستافدو منها والو.. و لي ما طلب منهم حتى واحد يهضر عليها أصلا..
مياسين و أصيل رغم أنهم حققو أهداف في حياتهم.. و كان بإمكانهم ينضمو للحديث..و لكن حتى هما بقاو غير ساكتين و كا يسمعو..ماشي تضامنا مع التوأم..و إنما حياتهم شخصية باغينها تبقا خاصة..
أصيل نوع العمل ديالو خاص يبقا سر.. و ما تبقى ما بغاش يقولو و يتباهى بيه..و مياسين نفس الشيئ..
و لذلك أصدقائهم لي كانوا كا يعرفوهم ردو البال لصمتهم.. و ردوا البال للتوأم لي جاوهم غرباء.. و بلي وجوههم غير مألوفة بالنسبة ليهم..
-أصيل و مياسين كيف دائما ساكتين..شاركوونااا..
-اه بصح ما قلتو والو..
-و ما عرفتوناش على أصدقائكم..عمرنا شفناهم في الثانوية..
مياسين(تنهدات):روجدا روسيل..أصدقائنا
-(كا يطلع و ينزل فيهم)اممم متشرفين..
روجدا قلبات عينيها بملل..و ما حملاتش النظرات..
-ايوا..كولشي هضر على الأعمال ديالو إلا نتوما..
أصيل:وصلنا للأهداف ديالنا و هذا هو الأهم
مياسين:داكشي لي تعبنا عليه حققناه..و الحمد الله مستقرين و فرحانين..
بأجوبتهم ما خلاوش ليهم المجال باش يزيدو يسولوهم و ياخدو معلومات منهم..لذلك رجعوا للحديث الأول ديالهم..
روجدا(بوشوشة..باش يسمعوها غير مياسين و روسيل و أصيل لي واقفين بجانب بعضهم):واقيلا هادي المجموعة الخاطئة..
أصيل(لاحظ بعض الشباب كا يشيرو ليه):أنا جاي..(و مشا ناحيتهم)