~ضياء الروجيد~ |مكتملة|

الجزء 16

داخل المتحف..واقفين بجوج كا يشوفوا في اللوحات..و روسيل مستغرب من المكان لكونه أول مرة ليه يتواجد هنا..كا يشوف ناس كا تمعن في لوحات..و ناس كا تصور..و البعض باين على ملامحهم إحساسهم بالملل كأنهم جايين غير بزز..حول أنظاره لمياسين لي كا تشوف في اللوحة بابتسامة..ساهية فيها..هي كا تشوف في اللوحة و هو مراقبها..حتى مرت ثواني و دارت شافت فيه
مياسين:كا يجيني الإلهام من هاد اللوحات سواء باش نرسم أولا باش نجرب و نعيش شي حاجة..هاد اللوحات كا يكون دائما وراءهم قصة أو هدف أو إلهام للناس باش يديرو شي حاجة..
روسيل:بغيتي ديري حتى نتي معرض لرسوماتك ؟
مياسين:اه..و لكن حتى نطور راسي أكثر في الرسم..كا نحس راسي مازال مبتدئة
روسيل:رسوماتك ماشي ديالي مستوى مبتدئة..بالعكس
مياسين:كا يعجبوك رسوماتي ؟
روسيل:اه و بزااف..
مياسين:هادي أحسن مجاملة ممكن نسمعها..مجاملة على شي حاجة كا نحماق نديرها..

و تمشاو للوحة أخرى..مياسين تمعنات فيها لثواني
مياسين:شنو فهمتي من هاذ اللوحة ؟
روسيل(كا يفكر):اممم أول حاجة أثارت انتباهي شكلهم و شكل ملابسهم إذن الفكرة مستوحاة من زمن قديم..و هذا(أشار لرجل)لابس ملابس ملكية..و دايرين بيه بزااف ديال النساء..غالبا الزوجات ديالو حيت كل واحدة هازة طفل..وشادين في يديها أطفال آخرين..و هو كا يبان على ملامحه التعب..و هن كا يبانوا معصبات و بحال كل واحدة باغا تقتل الأخرى..باش تبقا معاه غير هو بوحدو..
مياسين:في هاذ العصر..كان الرجل و خاصة إذا كان ملك أو بصفة عامة غني..كا يتزوج بزااف ديال النساااء..حيت ف ديك الوقت كانوا ما كا يشبعوش..امرأة واحدة غير كافية..و طبعا ماشي كولشي و لكن الأغلبية..و المرأة ما كا تقول والو و ما تقدرش ترفض..
أصيل:باقي هاذ المشكل في هاذ العصر الحالي؟
مياسين:تعدد الزوجات حاليا..كا يكون على حسب الظروف..التفكير..و لكن بعدا الامرأة كا تهضر على حقوقها و تقدر ترفض و القضاء كا ينصف لصالحها..مهم على حسب..و هادشي ما كانش شحال هادي..
أصيل:كملي فكرتك على اللوحة
مياسين:عدد نساء كثير و منهم جاريات..كا ينتج عليهم أطفال..عدد كبير منهم..كما كا تشوف في هاذ اللوحة كا يبين بلي هما أكثر ضرر..ممكن الأب ديالهم ما كا يعطيش الوقت لكل واحد فيهم..ممكن يكون تمييز بيناتهم..
روسيل:على الأقل ما غاديش يكون عندهم مشاكل مادية بما أن الأب ديالهم غني..
مياسين:و غادي يكون مشكل حتى في تولي الحكم

و هكذا كملو نقاشهم على كل لوحة..مياسين كا تعطي رأيها و فكرتها..و كا تسول روسيل..و أفكارهم كانت متقاربة..قليل فين كا يتناقضوا أو كا يتعارضوا.. و لكن كل واحد كا يحتارم رأي الآخر..
مياسين:كل واحد عندو طريقة كا يعبر بيها على أفكاره و آرائه..مثلا الكتابة..الرسم..الغناء..و بزااف..و لكن كا نظن الرسم وسيلة فعالة..حيت كا ترسم داكشي لي كا تفكر فيه..و حتى الفكرة كا تجسدها..كا ترسمها بطريقة دقيقة لي تخلي الناس يفهمو..
روسيل:كا تقولي هكذا..حيت هادي هوايتك و كا تبغيها..فمثلا كاتب حتى هو غادي يقول نفس الكلام..و بأن الكتابة طريقة سهلة باش توصل أفكارك
مياسين:عندك الحق..و نتا شنو هوايتك ؟
روسيل:ما عنديش
مياسين(بصدمة):هااا !! ما يمكنش..ضروري تكون عندك شي حاجة كا تبغي ديرها..
روسيل:كاينين بزااف د الحوايج كا يعجبني نديرهم و لكن ما كا نعتابرهمش هواية..و بما أنني كنت في الفضاء ف ما كانتش عندي الفرصة نكتاشف هوايتي
مياسين(مازال ما متيقاش):فهمت..و لكن غير فكر مزيان..مثلا شي حاجة بغيتي تجربها و تكون هوايتك..
روسيل(كا يفكر):والديا كان كا يعجبهم التصوير..و ملي شفت الصور لي التقطوا..عجبوني و كنت كا نفكر نجرب
مياسين:اوووه..هادي هوايتك الجديدة
روسيل:و لكن ما عنديش كاميرة..
مياسين:بدا تصور بالتيليفون..جرب فيه هو الأول..
حرك راسو بالإيجاب
مياسين:من الأحسن أول حاجة تصورها تكون مميزة عندك..
روسيل:علاش ؟
مياسين:غير قلتها و صافي(بإحراج)الى ما بغيتيش ماشي ضروري..المهم هو تصور
روسيل:أول حاجة غادي نصورها غادي تكون مميزة عندي
عجبها الحال حيت كا يوافق على طلباتها البسيطة..و شاد ليها الخاطر..