~ضياء الروجيد~ |مكتملة|

الجزء 45

أصيل حيد قاميجتو ..و بقا غير بسروالو..
روجدا:شنو كا دير ؟
أصيل:ما باغاش تعومي ؟
روجدا:في هاد اليل ؟كاين البرد
أصيل(جارها من يديها ناحية الأمواج):نجربو..
روجدا:نعوم بهاد الكسوة ؟
أصيل(بمكر):بغيتي تحيديها ما عنديش مشكل
روجدا:منحرف(بتردد) ما كا نعرفش نعوم..
أصيل:من امتا وليتي كا تخلقي الأعذار باش تجربي شي حاجة ؟استمتعي باللحظة..و ما تفكري في والو..
زيرات على يديه بحماس..و بداو كا يدخلو ببطئ..
روجدا:الى كان شي قرش و ما بانش لينا في هاد الظلام ؟
أصيل:ماشي مشكل..غادي غير تموتي..ياك كا يعجبك التميز ؟موت في البحر مميز..
و قبل ما تجاوبو..غفلها و دفعها بجهد حتى تخشات تحت الماء..بسرعة طلعات كا تشهق و هو كا يضحك..
روجدا:بااارد..
غطس و بدا كا يعوم..بعد عليها شوية خلاها واقفة كا تشوف فيه كا ترعد..
أصيل(أشار بيدو):قربي..
روجدا:عارف بلي ما كا نعرفش نعوم..كا تستقوى عليا..باغي تغرقني..
أصيل:تقدري توقفي..
روجدا:نتا قادر توقف..و ما تنساش فارق الطول بيناتنا..
أصيل:سنتيميترات قليلة(بنفاد صبر)وااا قربيي..
روجدا:هاني غادي نقرب..و لكن غير نحس برجلي ما بقاتش قايسة الرملة غادي نرجع..
بدات كا تقرب ببطئ.. بقا ليها شوية و تقرب ليه..و لكن بدات كا تحس بلي ما قادراش توقف..
روجدا: هذا هو الحد..
أصيل:مازال ما قربتي ليا..زعمي..
روجدا:نزعم ؟ واش باغيني نغرق..
أصيل:حيدي منك الخوف.. أنا حداك ما غاديش نخليك تغرقي..
روجدا:واش غادي تبقا تلوحني ديما للهلاك غير باش نتعلم..
أصيل(كا يستفز فيها):ما يسحابش ليا خوافة لهاد الدرجة..
روجدا(ما راضياش):ما خايفاش..
أصيل:نسيتي ملي نقزتي في بيسين و نتي ما كا تعرفيش تعومي ؟
روجدا:هداك بيسين و هذا بحر..البيسين تقدر تجبدني دغيا..البحر وااااسع و كا يجر..
أصيل(حابس الضحكة):ما بغيتيش تعلمي ؟
روجدا(الماء واصل لكتفيها و كا تحرك يديها وسط الماء مستمتعة):بغييت..
أصيل:حبسي من الأعذار..رخي راسك..و أنا ما غاديش نغرقك..صافي ؟(حركات راسها)داك النهار ملي مشينا للبحر بقيتي مقابلانا كيفاش كا نعومو عقلتي ؟
روجدا:اه..
أصيل:أنا غادي نعلمك كيفاش تعومي..
روجدا:و الى كانت نيتك هي تغرقني..باش تنتقم مني..
أصيل:شنو درتي ليا باش نتقم منك ؟
روجدا:كنت كا نعصبك و ما كا نسمعش لهضرتك..
أصيل:الى ما بغيتينيش نتاقم منك..سمعي لهضرتي دابا..

هي باغا تجرب و لكن خايفة تغرق..كا تخايل أنها تحت الماء و ما قادراش طلع و تبقا هكذاك حتى تموت..
طردات هاد الأفكار من راسها..متأكدة بلي أصيل ماغاديش يخليها تغرق و تايقة فيه..
أول حاجة دارت وقفات على رجل واحدة..و هزات رجل ثانية..بدات كا تحنى شوية..خشات راسها تحت الماء باش تعرف واش عندها السوفل..و أصيل مراقبها في صمت..قدرات تبقا 15 ثانية..أصيل كا يعلمها كيفاش تحرك يديها و رجليها..
رجعات اللور شوية و شافت فيه بثقة..
روجدا:غادي نحاول نعوم تحت الماء..و نوصل ليك..
أصيل:غادي نمد ليك يدي و شدي فيهم صافي ؟
حركات راسها..و تخشات تحت الماء..بدات كا تحرك يديها و رجليها كما وراها و شرح ليها..ثواني قليلة هزات راسها..شافت فيه لقات بلي سبحات مسافة قليلة..و ما وصلاتش ليه..
أصيل:مزيان كملي..هاد المرة ما توقفييش حتى توصلي عندي..
و مرة أخرى غطسات كا تحرك بقوة أكثر..حتى قدرات توصل ليه..تعلقات فيه لاوية رجليها مورا ضهرو..يد في عنقو و يد كا تمسح بيها عينيها و ترجع شعرها..
روجدا(فرحانة بإنجازها):I made it..
أصيل:قلت ليك تيقي فيا..باش حسيتي ؟
روجدا:إحساس زوين بزاف..ما عرفتش كيفاش نوصفو..و حسيت بجسمي مرخي..و الأمواج متحكمين في حركته..
أصيل:تعاودي ؟
روجدا:ااه..
أصيل:ما تخافيش..
رفعها عليه بشوية..و لاحها بجهد..و رجعات لمكانها الأول..و بسرعة وقفات على رجليها..
روجدا:غفلتيني..
أصيل(ضحك):ما وقع والو..