~ضياء الروجيد~ |مكتملة|

الجزء 36

الكلام لي قالتو يولاند شغل تفكير روجدا..الموضوع لي كانت كا تحاول تفاداه..واجهاتها بيه في وقت غير مناسب..
عارفة بلي روسيل معجب بمياسين..و ممكن تكون مشاعر قوية و كبيرة..رغم أنه ما قال ليها والو..ما صارحهاش..و عارفة أيضا سبب لزومه بالصمت..
وكل ديك الأفكار و الأسئلة لي هربات منها..ها هي الآن كا طاردها مع سيناريوات مختلفة و سيئة..
ملي كانوا في الفضاء روسيل كان متشوق لدرجة كبيرة أنه يكون علاقات اجتماعية و يكون عائلة خاصة به..و هي كانت دائما كا تستهزئ على كلامه لأن ذلك الحلم كان كا يبان بعيد و مستحيل..و لكن ملي رجعو و ملي تعرفو على أصيل و مياسين كولشي تبدل بدرجة كبيرة و غير متوقعة..
كا تحس بالتناقض في أفكارها..من جهة هي ماشي ضد يلقا فتاة أحلامه و يبني معاها حياتو..و من جهة أخرى كا تحس بالأنانية..باغا يبقاو بجوج للأبد بدون تدخل أي شخص بيناتهم..فقط بجوج بيهم..
و لكن ماشي هي لي غادي تقرر مستقبله أو قدره..أي حاجة مكتابة ليه غادي توقع..رغما عنها و رغم عن أي شخص آخر..
خايفة يقلل الاهتمام ناحيتها..و يقل الكلام..ما تقدرش تعيش بعيدة عليه لمدة طويلة..غادي تحس بفراغ أو يمكن تصبح على شكل فراغ بمشاعر منعدمة..هو بالنسبة ليها خوها التوأم ديالها نصفها الآخر صديقها عائلتها و العديد من الأدوار..

و هاد التفكير الزايد خلاها تمرض جسديا و نفسيا..
كا تحس بالعياء..صداع في الرأس..و المعدة ديالها و الشهية مقطوعة..
يومين و هي غير في الفراش كا تنوض غير للضرورة و بزز..حالها خالع روسيل و أصيل..و شاغل بال مياسين و يولاند و ايثان..
روسيل:باش كا تحسي دابا ؟ باقي كا يضرك راسك ؟
روجدا:شوية..
روسيل:حالك ما عاجبنيش..خلينا نديوك للصبيطار..مال راسك قاصح
روجدا:ماشي أول مرة نمرض..ما تنساش ملي كنا كا نمرضو كنا نصبرو
روسيل:دابا الظروف تبدلات أ روجدا
روجدا:عندك الحق تبدلات و ما زال غادي تبدل
روسيل:شنو كا تقصدي بكلامك ؟
روجدا:والو..غير كا نفكر راسي بلي ماشي أي حاجة كا نتوقعها هي لي غادي تكون..و حتى حاجة ما كا طول..
روسيل كا يشوف فيها باستغراب..ما فهم والو بالنسبة ليه كلامها على شكل لغز..
بدات كا تكحب و بسرعة مد ليها الماء..عاونها حتى جلسات و كا يرجع شعرها مورا ودنيها ما فاهمش مالها..شربات و رجعات تكات..كا تبان مزنكة..
روجدا:واش غادي نلقاك ديما حدايا ؟ غادي تبقا تهتم بيا و تكون في جنبي دائما ؟
روسيل:روجدا شنو نوع هاد الأسئلة ؟ راكي عارفة
روجدا:لا ما عارفاش..قول ليا
روسيل(متعجب):بطبيعة الحال غادي تلقايني دائما جنبك و عمرنا نتفارقو..
روجدا(بقلة صبر):شنو بينك و بين مياسين؟
شاف فيها بصدمة من سؤالها..كان عارف بلي غادي يجي النهار لي غادي تسولو فيه..و لكن ما كانش متوقع في هاد اللحظة..و باقي ما موجد الكلام لي غادي يقول باش يقنعها و ما تقلقش..

يالاه بغا يهضر حتى تسمع دقان في الباب و دخلات يولاند هازة بلاطو
يولاند(بابتسامة):وجدت ليك هاد الحساء غادي ينفعك
روجدا(بتعب):ما كانش عليك تعذبي راسك..
يولاند:ما كاين حتى عذاب..
روجدا تقادات في الجلسة كا تحل عينيها بزز و كا تحس براسها مرخية..يولاند جلسات بجانبها..و هزات المعلقة باغا تعطيها بيديها..روجدا تصدمات في الاول من الفعل..و دغيا حلات فمها ماسكة المعلقة باش ما تحرجهاش..
روسيل قرر ينساحب بعد ما عتقت يولاند الموقف..و بعد باش يفكر أكثر..
روجدا كملات الحساء كامل و شكرات يولاند لي عاملتها كأنها بنتها..و بالفعل روجدا تذوقت الحنان من يديها و من اهتمامها..
يولاند(قاست ليها جبهتها):الحمد الله ما فيكش السخانة..
روجدا:اه..غير راسي كا يحرقني..
يولاند:شربتي الدواء؟
روجدا:لا باقي..
يولاند(بعتاب):و شنو كا تسناي؟
عطات ليها الدواء و حتى تأكدات أنها شرباتو عاد خرجات باش تخليها ترتاح..
مخلياها مخربقة في مشاعرها و أفكارها..