"ကျွန်မ မှာတာ ဒါမှမဟုတ်တာ"
အရမ်းဇီဇာကြောင်လွန်းသည့်အတွက် အလုပ်တွင်လည်း လူကြောက်၊ လူမုန်းများလှသည့် သစ္စာ Company ပိုင်ရှင်ပျိုမြင့်မြတ်ချယ်။
"မဟုတ်ဘူးမမ၊ ဆိုင်မှာ မမပြောတာနဲ့အနီးကပ်ဆုံးတူတာ ဒါပဲရှိလို့ ညီမ ဝယ်လာလိုက်တာပါ"
"တထေရာတည်း တူတာကို လိုချင်တာလေ ..ဆင်တူလိုချင်တယ်လို့ ကျွန်မ မပြောလိုက်ဘူး ၊ အလုပ်ကို အလုပ်နဲ့တူအောင်လုပ်ပါ အများကြီးတွေပြောရတော့ ကျွန်မ ကို လူမုန်းများတယ်"
လူမုန်းများတယ်ဟုသာ သူမနှုတ်မှထွက်ပေမဲ့ သူမ ထိုအရာများအတွက် ဂရုမစိုက်ချေ။
ပျိုမြင့်မြတ်ချယ် ၏ ပုံစံမှာ အရပ်ရှည်ရှည် ကိုယ်လုံးတောင့်တောင့် ဖြစ်ပြီး တစ်နည်း ပြောရရင် မြန်မာဆန်သည့်ကိုယ်လုံး ရှိသည်။ မိခင်ဖြစ်သူ သဘင်လောက၏ ဘုရင်မ တစ်ပါး ဟု တင်စားရသည့် ချိုချို ၏ လေ့ကျင့်ပေးမှုများအောက်တွင် ကြီးပြင်းလာသည့်အတွက် ကိုယ်လုံးကိုယ်ပေါက် အချိုးကျလှ၏။
သူမ မရှိခင် ဝန်ထမ်းများရှိရာနေရာမှာ ပြုံးပျော်ရွှင်ကာ စကားပြောသံ၊ရယ်သံများနှင့် လွှမ်းခြုံနေသော်လည်း နေ့လည်နေ့ခင်း နေ့လယ်စာ စားရန် အပြင်သို့ ထွက်လာချိန် တွင် ရှေ့တွင် လွှမ်းခြုံခဲ့သော ရယ်သံများ ပျောက်ကွယ်သွားပြီး တိတ်ဆိတ်သွားတော့သည်။
ပျိုမြင့်မြတ်ချယ် လို့ ကြားလိုက်သည့်နှင့်အမျှ နောက်ဆုံးပေါ် ဖုန်း၊ နောက်ဆုံး ပစ္စည်း များကိုသာ ပြေးမြင်ကြသည်မှာ အမှန်ပင်။ တစ်နေ့တစ်မျိုးမရိုးရတဲ့ မြန်မာဆန်ဆန် ဝတ်စားဆင်ယင်မှုများနှင့်အတူ ဟိတ်ဟန်ရှိလှသည့် ထိုအမျိုးသမီးကို ဘယ်အမျိုးသားများမှ ချဥ်းကပ်ခြင်းမျိုးမပြုလုပ်ရဲပေ။ကတ္တီပါ ဖိနပ်ပါးကို သာ ဝတ်ဆင်တဲ့ ထိုအမျိုးသမီး ၊ အနားသို့ ကပ်လိုက်လျှင်လည်း ပန်းပေါင်းစုံရနံ့မှ ထုံသင်းမွှေးလှသည်။ မည်သူ၏ အားကိုးမှ မယူသည့် ြဖစ်သည့် ထို အမျိုးသမီး မှာ ကားလည်း ကိုယ်တိုင်မောင်း၏။
သူမ ၏ ကားမှာ landcruiser 2018 ဖြစ်ကာ မှန်များမှ အစ အကုန်အမည်းရောင်ဖြစ်သည်။ နေ့လယ် စာထွက်စားရန် ကားအနားသို့ အသွား သူမကားရှေ့တွင် ပိတ်ရပ်ထားသည့် ကားကြောင့် လွန်စွာ ဒေါသပုန်ထလာတော့သည်။
