مش غايبة عن بالي..
مع انها مرت عالصيدلية من كام يوم..
وصفتها مكتوب فيها مهدئ اعصاب ودواء اكتئاب..
مترددة تاخذ الدواء أو لأ..
مضطربة كتير كانت..
بالعادة ما أسأل المريض عن أسباب اكتئابه..
في منهم بأكون أعرفهم وبأعرف اسباب اكتئابهم..
وفي منهم اللي بأشوفهم لأول مرة مثل هذه السيدة اللي بالاربعينات من عمرها .. فما بأحب احرجهم وبيقتصر تواصلي معهم بالاجابة على أي تساؤل بخصوص الدواء..
وجودنا لحالنا بالصيدلية ساعد انها تحكي اللي بقلبها.. ما لقيتها غير صارت تحكي وتحكي وتحكي..
واضح انها فعلا كاينة كابتة بقلبها كتير .. مع كم دمعة نزلوا مسحتهم عالسريع..
حاسة حالها عاملة عملة خطيرة اذا بتاخذ دواء علاج للاكتئاب .. اتضح انه امها وأبوها مصابين بالسرطان.. الام ما بتعرف عن الاب .. والاب ما بيعرف عن الأم.. الأم ما بتعرف انه عندها سرطان قولون ومنتشر ..بس الاب اضطروا يقولوا له عن سرطان الرئة اللي عنده..
العلاج بمركز الأمل للسرطان .. للاثنين ..،قالوا للأم انه دكتورها هناك عيادته.. عشان هيك مضطرين يروحوا هناك.. الام ما بتعرف انه الاب بيتعالج ..
نرجع لمريضتنا.. اعصابها تعبت ..يمكن الام بتعرف عن حالها ومش عم تبين لهم .. يمكن الاب بيعرف عن الام وكمان عامل حاله ما بيعرف..
هي وأختها عم يتناوبوا على بيت اهلهم ويادوبهم يشوفوا اولادهم ..
وبعدين مستحية انها مضطرة تاخذ دواء يهدي اعصابها؟؟؟ مترددة بدواء الاكتئاب؟؟؟...
فضفضت ..ارتاحت وقالت لي : انا بالعادة ما اخذ عالناس بهالسرعة.. قلت لها لازم تاخذي الادوية بهذه المرحلة وتضلك قوية وصامدة.. لأنه اللي حواليك عم يستمدوا القوة والصبر منك ....
اخذت ادويتها.. وطلعت ..
الله يصبرها ويلطف بأهلها ..
اللهم عافينا مما ابتليت به كثير من عبادك..
سبحانك ما شكرناك حق شكرك
#استعن_بالله_استمد_الطاقة_الايمانية
#يوميات_صيدلانية
