مثلها مثل كل الأمهات اللي تعبوا وشقيوا عشان يعلّموا ويكبّروا أولادهم..
مثل كل الأمهات اللي حرموا حالهم عشان أولادهم يلبسوا أحسن لُبس ويأكلوا أحسن أكل..
من الأمهات اللي باعوا ذهبهم قطعة قطعة.. عشان حفل تخريج ولد .. أو جاهة لبنت ..
أهلها أبداً ما أحسوا في يوم من الأيام انه بنتهم أو عيلتها ناقصهم إشي.. عندها كرامة ..عمرها ما اشتكت ولا حد عرف أسرار بيتها..
وقفت مع زوجها في كل مراحل حياتهم سوا.. حتى فارقها بعد مرض عضال..
بأحبها وبأحب القعدة معها ..في السبعينات من العمر.. سيدة مجتمع من الطراز الرفيع.. على فنجان القهوة اليوم (اللي أصرت تعمله بإيديها رغم وجود الشغالة)..سألتها:
-كيف حال أولادك؟؟..
-أولادي مشغولين.. كل واحد في حاله..
-مشغولين؟؟ ما بيمروا عليك؟؟
-الأولاد مشغولين مع زوجاتهم والبنات مع أزواجهم واولادهم.. بيتصلوا بيسألوا علي.. بأقولهم الحمد لله مش ناقصني إشي..
-أمممم .. يعني باختصار مش مدخلينك في حياتهم!!.. كيف بتشتري أغراض البيت مثلا؟؟
-البركة بكريم!!
-(فكرت كريم واحد من اولادها أو احفادها)..
-كريم التكسي!! بيوصلني وبيستناني وبيرجعني.. كل مشاويري.. الله يرضى عليهم الشباب!!!
-بنتك اللي ساكنة جنبك ليش ما تمر تاخذك؟
-بتروح لحالها ما بتفكر تقول لي تعالي تبضعي معي!!
-وكيف ومتى بتشوفيهم؟؟
-بأشتاق لهم بأقوم بأطبخ وبأعزمهم كلهم عندي كل جمعتين.. اذا كانوا فاضين او مش رايحين عند دار حماهم..
-انت شو رأيك ؟ ليش هم هيك مشغولين عنك ؟
-انا مش زعلانة منهم بس أوقات بأقول أنا الحق علي.. عودتهم يفكروا بحالهم وما علمتهم يفكروا فيّ.. يمكن دللتهم زيادة عن اللزوم.. حبايبي الله يرضى عليهم...
خلصت الزيارة بس روحت مقهورة..
الأهل مش بحاجة لفلوس بس ..
بحاجة لحب واهتمام..
بحاجة لرفقة وطلة وزيارة ولو خمس دقايق..
بحاجة انه ندخلهم بحياتنا مش نخلي حياتنا تشغلنا عنهم ..
بحاجة لإحساس انهم لسه مطلوبين .. لسه مفيدين.. لسه مهمين..وما منقدر نستغني عنهم.. بيتهم أحلى بيت وأكلهم أزكى أكل ورفقتهم أروع رفقة..
أوعكم تصدقوا لما يقولوا لكم : الحمد لله مش ناقصنا اشي.. ناقصهم انتو !! افرضوا حالكم عليهم (بالعقل).. اعطوهم خيار يجوا معكم أو لأ.. ما تفترضوا انهم ما بيحبوا ييجوا.. ما تفقدوهم وهم لسه عايشين على وجه الارض..
#من_قصص_الحياة
#يوميات_صيدلانية
