دموعها في عيونها .. قالت لي : إسألي لي اللي بيقرأوا لك شو مطلوب مني أعمل؟؟ كم ممكن أستحمل ؟؟؟.. انا طبعا عارفة قصتها .. معاناتها مستمرة من سنين .. من أربعين سنة.. زوج بخيل .. لا بيصرف عالبيت ولا بيصرف على اولاده .. الضرب عنده زي مرحبا .. طول عمري باعرفها هالست وبأعرف انها صابرة.. زوجها كان معه فلوس .. معاه عن جد ! في مليون دينار بالموضوع !! ولو تعرفوا كيف ضحكوا عليه وصار عالحديده؟؟ انا بصراحه لو ما هي اللي قالت لي تفاصيل دقيقه كان ما صدقت!! مخه ضرب فجأه ! حد قال له عن منجم ذهب بمكان ما ..وصار يروح عند المشعوذين والسحره !! ضيّع المليون !! اولاده الاثنين كانوا يشتغلوا ويدرسوا .. يصرفوا على امهم وعالبيت .. وحتى الام اشتغلت مده بمحل ألبسه ترجع بنصاص الليالي!! .. لولا هالست وصمودها كان الاولاد ضاعوا .. تحملت اللي ما بتتحمله جبال علشان تخلي بيتها إسمه (بيت) .. كان ينام بره البيت ولما ما يضل معه فلوس يدق عليهم الباب .. يرجعوا يفتحوا له .. مهما كان بيضل ابو الاولاد ..،هالست لولا إيمانها ..،ما كان فتحت له باب .اللي شافته مش قليل .. تخلل ذلك مخافر وبهادل وفضايح .. وسترت على حالها وعلى بيتها ... لو بأقول لكم الرجال صار مشرد ما رح تصدقوا.. ختيار هلق ومريض رجع لهم ..الام بتفكر بالجنه على صبرها .. بس الاولاد قالوا لها ..،لا أبونا ولا منعرفه .. صعب وضعهم ومش قادره ما أعذرهم .. ضيّع مستقبلهم بالبخل تبعه .. وضيّع فلوسه عالحكي الفاضي والفضايح..مهما كان بيضل أبوهم .. الست كتير بتمر علي عالصيدليه خصوصا لما يفيض فيها الكيل .. بتقول لي لإيمتى بدي استحمل ؟؟ بأصبّر فيها وبأقول لها انت بتعملي بأصلك .. مهما كان بيضل زوجك وبصبرك عليه إلك الجنه ان شاء الله .. بتقطع قلبي كل ما اشوفها ... بأحس بالمثل : ابواب مغلّقه وهموم مفرّقه ..والكلمه الطيبه صدقه ..شو عندكم تحكوا لها ؟؟
