روحت عالبيت اليوم متأخرة.. بالطريق فكرت شو من أحداث اليوم اكتب لكم عنه؟؟.. بعدين لقيت حالي عصّبت وتذكرت ملاحظه سمعتها من كتير ناس ، منهم بيقرأوا لي ومنهم سمعوا اني باكتب بشكل يومي.. والملاحظة هي : يا الله انت شو فاضيه عشان تكتبي!!!... انا آخر وحده أكون فاضيه .. !!! اليوم مثلا نزلت داومت عال١١الصبح شوي متاخره لانه بما اني رحت البنك امبارح .. فضلت اليوم أأمن الغداء للبيت قبل ما انزل لاني ما باعرف ظروفي .. وفعلا سحبتها لحد ما سكرت الصيدليه مع الموظف!!.. أهم اشي عندي بيكون انه ابو حكم مش متضايق! الحمد لله كان عنده شغلات يعملها وقال لي على راحتك .. اكتب لكم هلق بعد ما تعشيت والحمد لله وكان راح علي الغداء..!! ومن ال١١الصبح لل١١ المساء.. بس طلعت أوصل دواء لست ختياره بالعمارة اللي قدام الصيدليه ..آخر مره قطعت الشارع للصيدليه من أسبوع وقعت عالارض راحت عالمستشفى لانه عندها هشاشه عظام بشكل رهيب وهي نحيفه كتير!! ولما حكت بدها دوائها قلت لها انا مستعده أجيب لك اياه ولا تقطعي الشارع.. قال فاضيه أشغال قال! لو بأقدر كان أمرّ على أمي .. ولما أمر عليها بأقولها خلينا نشرب القهوه مع ستي (الشقه المقابله)عشان أشوفها كمان بنفس الوقت .. حماتي أشتاقلها وأوقات أشوفها الجمعه بعد ما اخلص شغل البيت.. علاقتي مع الشغالات انتهت ..سنه ١٩٩٩ كان آخر عهدي بهم .. أجيب وحده مره بالأسبوع وبيكون دوامي يومها مسائي . الأولاد صاروا بيساعدوا وبيحسوا معي وزوجي في منتهى التعاون وبلا شغالات بلا وجع راس.. الله يعطيني الصحه والعافيه وما يحويجني لهم .. نرجع للفكره الرئيسيه. هالكم كلمه اللي اكتبها ما ياخدوا من وقتي كتير.. ولما بدأت من ثلاث شهور كان هدفي الناس تحس بالنعمة اللي هي فيها لما احكيلها عن مآسي غيرها.. وعشان ما اضل احكي اشياء بتحزن باحط شويه أحداث بتضحك.. والناس اللي عم تشجعني أشكرها بقوه! لاني أتردد كتير اوقات وأقول اكيد زهقتوا..!
#يوميات_صيدلانيه
