كتير منشوف حالات مختلفة لما الزوجات بيطلبوا اشي من الصيدلية لكي يحضرها لهن أزواجهن..
عندك الزوج اللي بيصير يتذمر من طلبات زوجته وبيقول لك خلص اعطيني اللي عندك ومش مهم يعجبها أو لأ..
وعندك الزوج اللي بيتصل على زوجته وبيصير يعلي صوته ويحكي معها بطريقة لا تسر عدو ولا حبيب..ويتركنا ندعو لها بالثبات و.. الله يعينها عليه..
وعندك الزوج اللي في منتهى الاحترام.. بتعامله معنا وبتعامله مع زوجته.. وأبو خالد واحد من هذول.. كان يذكر طلبات زوجته واذا لم يتوفر ما ارادت وذكرنا له ما يتوفر من بدائل..يقول لحظة أشوف ام خالد شو رأيها...كان هو من اوائل زبائن الصيدلية ..و تعرفت عليها بعد ذلك .. من اكتر من ٢٠ عام هالحكي. وبقيت انا صديقة للعائلة .. كانت مثله تعامله بكل احترام وتقدير.. كان (سي السيد ) وكانت ( ملكة قلبه).. عاشا سوياً اكتر من ٥٥ عام.. كلمته ما بتنزل الارض.. وكلامها عالعين والراس.. الى ان توفاها الله من عام تقريبا.. اليوم ذهبت الى عزاء ابا خالد.. لم يستطع العيش بعدها .. رفيقة حياته على الحلوة والمرة ..فقد معنى الحياة شيئا فشيئاً.. كان هناك اختلاف في شخصياتهما ..ولكن الحياة الزوجية لكي تنجح وتستمر بدها تضحية وتنازلات من الطرفين..
كنت اليوم في عزائه.. وكانت هي ملاك يطوف بين المعزين.. الله يرحمك يا ابا خالد /اللواء قاسم باشا الفراية.. والله يرحمك يا ام خالد / فهيمة شعبان ..
#يوميات_صيدلانية
