صار لي كم يوم عم أداوم طول النهار بالصيدلية ..،❤️
انشغلت الفترة الاخيرة مع النقابة.. دخلت صيدليات كثيرة .. وتواصلت مع زملاء ..
كل ما بتشوف أكتر كل ما بيكون نفسك تعمل اشياء كتيرة .. كنت شايفة الامور سنين كصاحبة صيدلية .. والهموم والمشاكل اللي بيعاني منها أصحاب الصيدليات .. إنما ..لما تتواصل مع باقي مجالات العمل الصيدلاني.. بتصير تحس أكتر...بالموظف اللي بيشتغل بصيدلية .. شو هي أحلامه وشو هي معاناته وبتعذره ...
بالصيدلي مندوب الدعاية اللي بيلف عالدكاترة وشو طبيعة عمله ..
بالصيدلي اللي بيعمل بالقطاع العام .. ونظام الحوافز والاضافي وووو..،
باللي بالتدريس والجامعات وشو قصصهم .. واللي بالمصانع وماحدا حاسس فيهم ..،
مجالات كتيرة .. الشيء المشترك بينهم انه نادراً تلاقي حدا مرتاح .. حدا مبسوط.. حد راضي بوضعه..
مؤلم انك تحس فيهم كلهم .. بيكون نفسك يكون معك عصا سحرية.. تعمل أبراكا دابراكا .. وتحل مشاكل الكل ..
بس احنا مش بالمدينة الفاضلة ولا معي عصا سحرية .. كل اللي معي إيماني بالله .. انه ما بيضيع تعب حد.. وإنه اللي بيكون مع الله .. الله عز وجل بيكون معه..
ايماني بقدرة الانسان على التغيير .. وانه بيقدر يطور نفسه ويحسن وضعه مش يستنى حد يعمل له كل شي.. يكمل إدارة أو تسويق.. ياخذ دورات تحسن وتطور عمله..
إيماني بحبي لمهنتي يتجدد بإستمرار كل ما أقعد بصيدليتي طووول النهار .. وتصير الدنيا عتمة وما أحس بالوقت كيف بيمضي.. وفجأة يرن علي زوجي يقول لي : وينك لهلأ ؟؟؟
مهنة الصيدلة كانت وما زالت بنظري أحلى مهنة بالعاااالم ... ورغم كل الصعاب اللي فيها .. مثلها مثل أي مهنة بالوضع الاقتصادي الصعب اللي بيمر علينا.. رح نضل واقفين على اجرينا .. ونضل نفكر كيف نزيد ارباحنا وكيف نقلل خسائرنا .. رح نضل نشتغل ونتوكل على الله .. والله سبحانه وتعالى اللي عليه الرزقة .. وهو اللي رح إن شاء الله .. يبارك لنا فيها ..
#يوميات_صيدلانية
