في تعقيب على الخاص من ثلاث صديقات (الشيء المشترك بينهم انهم مطلقات) عن البوست السابق (قوية وقد حالها)..
قالت الاولى :
(انا قوية لاني بقوم بدور ام واب
انا قوية لاني مضطرة اروح بنص الليل مواصلات لما بداوم مسائي لاني بوفر ثمن اجرة التكسي لاحتياجات اسرتي
انا قوية لاني وانا مروحة بمر عالسوق اجيب خضره وجاج و زيت ورز لحالي ما في حد يساعدني
باخد مغادرة عشان ادفع فواتير الكهرباء والمياه
انا قوية غصبن عني
بس مش معناها اني بكب بلاي عالناس ولا بفتعل مشاكل
مش معنى اني قوية انه هاد عذر للناس يتحاشوا يطلبوا وحدة من بناتي..!!! )
وقالت الثانية:
(قوية بسبب الخذلان، بسبب الصدمات ، بسبب انه ما في سند، بسبب انه ما لقيت حد يفكر لمصلحتي مثل ما انا بأفكر، بسبب انه ما في احتواء، ما في حد يكملني..
انا انجبرت اكون قوية، مش انا هيك بدي.. فش انثى ما بتتمنى تكون ساندة كتفها ع رجل)..
وقالت الثالثة:
(ربنا خلقني حنونة بزيادة بعيلة جافة بزيادة.. كبرت وكبرت التحديات والأوقات الي بحتاج فيها دعم ما بلاقيه فبيختل توازني وبتعب.. أوقات كنت أقول اني مريضة كونه المرض الجسدي عنا بستحق التعاطف أكتر..
كنت مفكرة هاي هي القوة.. انه نتحمل
لحد ما صرت أم وصار ابني محتاجني مو بس قوية وقد حالي.. صار محتاج يشوفني مبسوطة.. بضحك وبلعب مشان نفسيتي بتنعكس عليه فورا.. وقتها تعلمت القوة اللي عن جد!
انه تمرق الأزمات وأعمل حالي انها مو موجودة.. صار أماني ..والحضن الي بيوسعني مع انه زغيييير.. حبني حب كافي لأول مرة بحياتي.. بالنيابة عن الدنيا كلها..
اظن انه هذا الحب غير المشروط هو اللي بحتاجه أي إنسان ليكون قوي عن جد.. قوي من جوة.. مو بس انه ما يضل يتذمر.. لأ يحس انه عنده اشي يزغّر المشاكل بعينه.. يقويه ويلطّف الدنيا عقلبه..
وهلأ طول ما ابني بخير أظن ما في اشي بيقدر يكسرني مرة تانية..)
#رسائل_من_القلب❤️
#كوني_أنت🌹
