نوارس مقيدة

القيد الثاني

الشَوغة الـ بصوتي سوالف شَرد اگلك ضَاع كَلشي وضَيعتني وكونك تحِبني صَدك چا دوَرتني .

#نوارس _ مقيدة

#نسرين_الاسدي

___________

عذراء

: عزاا طفلج مابي نبض

كتلها وشفايفي يرجفن : شقصدج مابي نبض؟؟

عوجت حلكها : يعني ميت

عذراء : موت لفج بيش طالبته مابي شي تجذبين عليه

صاحت بيه وطكتني على رجلي : انجبي ولج جاي العب وياج وتحاجيني هيج يلا ولي ولي من كدامي ..عوزي الزعاطيط فوك راسي

نزلت دموعي وعدلت هدومي وطلعت شفت عمتي شايلة نرجسة وسيف واكف يمها مالكيت روحي غير رحت يمه واشتكيلة .. باوعتله وانه مبرطمة ودموعي بعيوني : سيف

تفاجئ من شكلي بسرعه كال : شبيج ولج ليش البجي

ام محمد : شخيرج يمه شكالتلج الدكتورة؟

خليت راسي ضد صدر سيف وكتله بشهيك : تكـ..ول مات تكول ابني ميت بس هيه جذابة انه ليلية احس بي يحوس ولله

كضني من وجهي ومسح دموعي وكال :اش بويه كافي لا تبجين يمكن مخربطة تعالي نروح لغيرها انعل ابو ليجيلها بعد ..

كضني من ايدي ومشينة .. بعيدا عن كلشي حبيت حنيته واهتمامه بيه الدرج من نريد ننزلة ينزلني بايه بايه .. سيف كلش حنين وياي ويعاملني انه ونرجسة معاملة وحده .. بس مرات واذا رجع لخبالة لا ايدة والراشدي ...

وصلنة لدكتورة ثانية وهم انتضرنة شويه ودخلت وياي عمتي وكالتلها : دكتورة فدوه لكلبج تونه رحنه لوحده ومردت كلوبنه تكللها ابنج ميت اسم الله ماطمنينه الله يطمنج

: ان شاءلله حجية .. تمددي ماما

تمدت وانه مغمضه عيوني .. فتحتهن من سمعتها كالت : ماشا۽لله صحته تمام التمام ومو بس هوا حته اخيته وياه

عذراء : بس اخته شعليها؟

: هههه لا ماما داقصد اخته وياه ..انتي ممسوية سونار قبل؟

عذراء : لا هاي اول مره

: تمام ماما الف الحمدلله صحتهم تمام وانتي حامل بتؤم بنية وولد مثل الورد ..بس تعبانين ديري بالج على نفسج وخففي الفرة واذا تصعدين درج هم عوفي لان رحمج ضعيف واحتمال كلش جبير يصير عندج ولادة بالشهر السابع

نزلت دموعي : صدك دكتورة انه حامل بتوم ..

ام محمد : الف الحمدلله ربي والشكر الله يبشرج بالخير دكتورة الله يخليج ويحفضج ..

: تسلمين امي ولو هذا واجبي .. بس انتو ديرو بالكم عليها تره صغيرة ومتتحمل .. بس تدخل بالسابع خل تراجع