نوارس مقيدة

تكمله البارت الخامس والثلاثون

ساقو بسرعه وبنص الطريق شافو سيارة واكفه .. عرفوها لسيف .. نزلو ركض وراح محمد لسيف الي حاضن عذراء والدم تارسهم ثنيناتهم ..

والجهال راحلهم صادق وهمه مفرفحين من البجي خلاهم بالسيارة ورجع موديهم للبيت ..

محمد : كووم سيف كوم خناخذها للمستشفى

سيف بغصه وعيون مدمعه : م..محمد عذراء ماماتت موو كلي بروح ابوك

محمد : ماماتت كوم كووم ..

ابو صادق : كوم بويه خنتوكل امشي ..

سيف رجليه ماتعينه ماكدر يوكف بالكوه .. لف ابو صادق. عبايتها وشالها مخليها ورا بالسيارة مالتهم .. وراح سيف صاعد يمها وهمه صعدو جدام وساقو بسرعه متوجهين للمستشفى ..

سولاف : وصل صادق للبيت ونزل الجهال .. ركضناله كلنه وكل وحده تسئل شنو شنو

صادق : شدرانيي السيارة الجامات مفلشه وعذراء غاركة بالدم .. انه جبت الجهال ورح اروح وراهم .. طلع وصاح لامجد راح وياه..

ام محمد : سوده بوجهيي مايوم ترتاحين يعذيرة جبح حضج يايمه ..

الحجية : هاي البت مامكتوبلها الراحة لا اعتراض لحكمك ربي..

خذينه الجهال بالكوه سكتنه ادم ونام .. ونرجسة كلساع تفز وتكول : اما دم اما دم .. بعد كلبي فطنه وتنتبه للشي ليصير كدامها .. ياربي شافي عذراء ونجيها من الي هيه بي..

_______

محمد : كوم سيف واذكر ربك ان شاءلله مابيها شي خليك قوي بعد اخييك

بلع ريگه وجاوب : محمد دمها بيدي .. ايدها من بين ايديه طاحت وانه اباوعلها.   منين تجيلي القوه .. وروح ابوي حسيت روحي طلعت ..

صادق : انعل الشيطان سيف ان شاءلله ماكو شي ..

سيف : ان شاءلله .. ماتعوفني عذراء .. ماتعوفني وتروح.. نموت سوه ونعيش سوه..

طلع الدكتور وراحوله بسرعه
الدكتور : المريضة خسرت دم هواي.. هسه الحمدلله طلعنه الرصاصه وهية اجت بزندها ومتعمقة هواي.. بس هسه الحمدلله استخرجناها .. بس رح ندورلها دم وان شاءلله تصير زينة.

سيف : الفف الحمدلله والشكر الك ياربي الف الحمدلله ..

تشكر محمد من الدكتور وضل يراقب حالة اخوه وشلون الغصه خانكتة وعيونه مليانه دموع ترفض النزول .. والحب الحب الجبير لشايله لعذرائة .. ومتاكد لو تمر سنين رح يزيد حب اخوه الها ماينقص .. ومحد يكدر يمحي هذا الحب .. لا الكره ولا البعد ولا القساوة ولا شي..

انتضرو لثاني يوم العصر يلا سمحولهم يطلعونها .. طلعوها وسيف يمشيها خطوه خطوه يخاف عليها من الهوا ليمر.. ركبو بالسيارة وره وراح محمد يجيب الدوه..

حضن سيف عذراء لصدره وكال بغصه : ليش هيج تعذبيني عذرائي وحك علي تمنيت الموت ولا شوفج هيج جدامي