نوارس مقيدة

القيد الرابع

‏أحبّ كل الوسائل التِي تقُودني إليكِ
مهما كانت صعبَة
أو مُستحيلة
تكفيني فِكرة أنّ بعد
كلّ هذِه الحواجز
هناكَ حُضنكِ
ينتظرنِي
بحميميّة بالِغة

#نوارس_مقيدة

#نسرين_الأسدي

_______

زمرد:

كاعدين بالمطبخ ويه الحجيه ونسولف بعذراء وسيف والجهال يلعبون نرجوسه حته يسكتونها

وجان الشيخ محمد توه راجع من المستشفى بس اطمن على اخبارنه ووصنا نخلي هدوم وغراض لعذراء لأن مبينه هي راح اطول هناك بالمستشفى

سمعنه صوت الباب وهو كام فتحه وشويه وسمعنه صوته صاح للحجيه تعاي تلگي خطارج
حسبالنه نسوان ديرتنه اجن نفس كل مرة بس من طلعنه وشفنه الخطار كل احنه ضلينه صافنين ومتعجبين

جانن بنات ثنين وحدة بعمري ووحدة بعمر عذراء وبدون عبي ولا شالات ولبسهن كلش ما يشبه لبسنه

الحجية: هلا يمة هلا وكل الهلا بالخطار.. اذا ما شالكم البيت نخليكم على روسنه.. دخلن يمة

محمد: يمة هذا الخطار موش خطارنه وبس هذني البنات بناتج.. بنات عمتي جواهر

كل احنه نصدمنه بل سمعانه وما صدكنه بعد كل هالسنين تطلع عمة جواهر بعدها عايشة وبناتها هيج كبار
انه من أول ما دخلت الهم سمعت عدهم عمة منطيها فصلية وعدها بنات بس بعد ما سمعنه بحرگت بيتهم كل احنه حسبالنه ماتت هي وبناتها

شفنه الحجيه رجعت بخطواتها ليورا ونزلت دموعها مصدومة وجسمها رجف من رجفة ايدها
خلت ايدها ع شفايفها لترجف وكالت بنبرة مختنكة: يمة جوهره.. بعدج عايشه وبنياتج جدامي هسه..

اجه الشيخ بسرعه وسندها وهي بعدها ما مصدكة عيونها .. والبنات خطيه ضلن على وكفتهن ومبينات خايفات

سولاف :

بعد ما صاح الشيخ الحجية ودخلنه طلعت مرة جبيرة تمشي على عكازة ووراها نسوان وبنات بعمرنه او شوي اصغر
هي جانت كلش مصدومة بشوفتنه وواضح ما متوقعينها كلهم.. سندها الشيخ قبل لا توكع وهي اشرت النه نتقرب منها

الحجيه بدموع : تعالن.. تعالن يمة.. تعالن حبيبات.. تعالن يا لغاليات بنات الغالية.. يمة جوهره.. ما مصدكة عيوني بنياتج گبالي.. تعالن خل اشمجن وشم ريحة امجن

بعد هو شوي ونزل عيونه وكال: لا تستحن بويه تعالن للحجيه هاي جدتجن

سمر جانت كلش خايفة ومرتبكة لزمت ايدها وتقربنه بخطوات بطيئة من الحجيه وهي حظنتنه وضلت تبوس بينه وتبجي
وتردد: اخ يمه جوهره.. سودة عليه يمه.. حرموني منج وحرموج منه.. يمه شسويتي بينه من حسبالنه متي يمه .. ابيج ما تحمل.. ما تحمل خبر موتج يمه.. ابيج مات وراج.. اخ يا جوهره يا بنيتي.. يالعزيزة شسويتي بينه.. اوف يمه بنيتي.. اخخ يابنيتنه يا عزيزتي ياجوهرتنه يارويحتنه اخخ يايمة ولك جبارر تعال ردت بتك وردن بناتها ..