نوارس مقيدة

القيد العشرين

خافن تجي وتعتذر تلگاني ماراضي
ام الأبنهه انعدم
بالعذر هم تقتنع
من يعتذر قاضي،؟

#نوارس_مقيدة

#نسرين_الأسدي

____

انصدموا كلهم وبيبي لزمت ايدي بسرعه : ولج شسويتي؟؟

شفت محمد عيونه ضلت تجدح نار.. وهو هذا الرايدته رايده اثبتلك متكدر تجبرني يا شيخ محمد

الشيخ :شنو هاي بويه.. شنهي هاي السالفه اذا عروستكم ما راضيه المن جبتوني.. ليش ما سألتوها اول.. شني معناها فهموني؟

نهضت وكلت : الي سمعته يا شيخ اني مموافقه

وطلعت من المظيف رحت لغرفتنه بسرعه

ابو صادق :اعذرنه شيخنه.. هاي البنيه يمكن مستحيه شويه لو شي

كام الشيخ :بويه انتم غير تتأكدون من راي البنيه يلا تعقدون شلون تردون تجبرونها .. هيج هو الحجي وانتم ولد اصول وتعرفون بهاي السوالف

محمد :حكك علينه شيخ.. امسحها بوجوهنه واحنه نعتذر منك.. جيتك عزيزه والصار احسبه علينه بس هاي البت..

ابو صادق : مستحيه شيخنه وصغيرة مو واعيه..

طلع محمد بسرعه..
وسحب ابو صادق فلوس من جيبه وانطه الشيخ
وكله :هاي بمكان تعبك وجيتك.. واذا شفنه شمالها البت نودي عليك

الشيخ : لا ابو صادق شلون اخذ منكم واحنه حته عقد ما عقدنه

ابو صادق :ميخالف شيخ هاي اعتبرها بمكان الفشله الصارت جدامك واحنه راح نخلي السايق يوصلك

امجد.. بويه امجد تعال

امجد : امر عمي ابو صادق

ابو صادق :اخذ الشيخ وصله لبيته بويه وصله للباب ها ما وصيك

سولاف :
كاعده وگلبي يلعب وحاسه متوترة كلش لآن ماعرف ردة فعل محمد شنو هسه.. بس بردت گلبي بي من رفضته

وما حس بي الا وهو جاي بكل سرعته ومتحامي وعصبيته نار

نهضت بسرعه ولزمت باب الغرفه حته اسده

بس خله ايده ودفعه.. عاط بيه : ولج شلون تتجرئين وتفشليني جدام الشيخ.. شلون هيج تسووين.. اخخخ.. اخخخ لو بس اكدر اكظج.. وحق علي اندمج على لسانج الطويل هذا.. يا... استغفر الله.. ولج انتي صدك وحده..

سولاف : لتحجي شي تندم عليه بعدين شيخ محمد اني بس نطيت جوابي.. المهر مو من شروطه موافقة الطرفيين
ليش تريد تحرمني من رئيي وتجبرني عل شي مرايدته
هاي هي النتيجة شيخ محمد.. لتعتقد تكدر تلزمني من الأيد التوجعني وتاخذني غصب بس حته تمشي كلمتك علي.. اني مو عبده عندك

تقرب علي وعيونه تجدح نار قبض ايده كدام وجهي وعاط : وعلي لو ما الحرام.. جان محد خلصج من ايدي اليوم يا بت ميثم.. جان ربيتج من جديد وخليتج تحسبين لحجيج الف حساب.. بس سهله وين ترحين مني.. انتي حياتج وموتج هنا وما راح اطلعين من هذا البيت الا على جثتي وراح تشوفين يهو محمد يا سولاف