نوارس مقيدة

القيد الرابع والعشرون

بـثـيـنـه تڪول :
خطبوني غصب ولغيرك انزفيت
وحفرو كبري لمن عقدو القران..
جبروني وصرخت احضرني يلعباس
انه وحيده وعڰلهم ترست الديوان..
طشو مستقلبي من طشو الجكليت
وركبة ونص كعد كل جرح نايم جان..
حته بالمايشور علڰ شديت
طب لأي حضرة تلڰه اسمك عله البيبان..💔

#نوارس مقيدة
#نسرين الاسدي

_______

رسل : ولجج هديوه ولعباس لا ماسكتي اطيح حضج شنهاي التهايم عله بناتي

هديوه : لو متهمة لو مجذبة جا دافعت عله روحها جنينه ليش ساكته؟

الحجية : شوفي انتي نطيناج مجال هواي وكمتي تلعبين بكيفج اذا ماسكتي نشمرج عله اهلج وانعل ابوج لابو ليابج النه

هديوه : ههههه شمالجن حاركات دمجن سئلن بتجن سئلنها شجانت تسوي وياه بنص الليل؟

رسل : ولج جنينة صدك هذا لحجي لتكوله؟؟

هبة : يمه جذب احنه البارحه كله ندرس بغرفتنه ماطلعت جنات..

جنان : اي ما طلعت وانتي ست هديوه اذا تكولين انا طالعه انتي شدراج وشجنتي تسوين بنص الليل يم الباب لخلفي مال البستان؟ يلا كولي شجنتي تسوين وجاية ذبين تهايم عليه؟

هديوه : هيييي مو تفرينها علي وحك العباس انه شفتج هناك وهاي مو اول مره من كبل لا تروح بثينة انتن جنتن تروحن هناك بليل ويهو ليجي يمجن امجدد

حليمة : ولجن كضلي هاي الفوصه خل اطلع حركة كلبي بيها .. عوزنه مشاكل وانتي تضلين تلعين وتسفطين

هديوه : هذا الصدك والعباس وداعت ابني لبعده ماصاير .. صدكتني؟

زمرد : الكل ضل ساكت بس جنان مسيطرة لان ماعدها دليل عليها وكلها تدري بهديوه حيه ومحد يصدكها ..

هديوه : اذا ماصدكتني انه اكل لعمي الشيخ وهوا يربيها اذا ماعرفو محمد ورسل يربونها..

رسل : بت الجلب احنه ماعرفنهه نربي بناتنهه احجي عدل لا اطيح حظج..

ام صادق : يلا كافييي ولن عله شغلجن وانتي هديوه انه اعلمج اله احطج بحلك صويدق وخلي يطلع البراعة والوكاحه لجبتيها من بيت اهلج من خشمج..

هبة : عوجت هديوه حلكها وراحت وامي خزررت جنان واشرت الها تروح وراها.. انه اعرف هيه وصلت رسالة بثينة لامجد بس هم ماتكدر تفضحها .. صعدت وراهن ودخلت للغرفه..

رسل بصياح : تجاوبيني شنوو جنتي تسوين بليل وياه لا وعلي اكل لابوج عليج

جنان : يعني صدكتيها يما

رسل : ايي وليشش تجذب عليج من دون البنات ماجذبت عله اختج ماجذبت عله سولاف وسمرر هااا ليش انتي بالذاات..

جنان : لان جلبة

رسل : عوفج منها وجاوبيني .. شنو لبينج وبين امجد احجيي