نوارس مقيدة

القيد الخامس والثلاثون

تࢪد المـن؟
نسيتك والـ؏ـوض بـ الله
ڪبـاالي لو طحت ماكلك اسم الله .

#نوارس مقيدة.
#نسرين الاسدي

___________

11 ـ 11 ـ 2017 .

عذراء
الدنيا بارده وهاي نرجسة البرعه كلساع طلعت بالمطر .. دخلتها جوه وهيه تدردم

: ابا لاح ابااااا

عذراء : انجبي شوي ويجي .. تعاي يم بيبي

ضلت تبجي وتصيح وراه : ابااااا اباا

دخلت للصالة اي دفو واخيرا ..

ام محمد : شبيج وياها يما

عذراء : شسوي لسيف عودها عليه وين مايطلع خذاها وياه .. شوفي هسه تريد تروح وياه وهوا عنده شغل

ام محمد : تعي حبابه تعي ليش تبجين هلعيون الكزاز لحلوات ..

نرجسة : ابا لاح .. بف اما

تفلت علي الحيوانه خزرتها : نرجسة شهلتصرفات طاح حضج ..

لبدت بحضن امي وتباوعلي وتتبسم الحقيرة عود ماتكضيني ..

عذراء : خوش بعد ماحبج احب رهوفه

نرجسة : لف كخ

خذيت رهف من حظن زمرد وبستها : رهوفه الورده الحلوه .. فداوي شهلضحكه العسل

عكدت النونه وبرطمت .. ههه اعرفها تغار بس حيل وياها صايرة قليلة ادب ولسانها شطوله انه اعلمها ..

دخل جعفر يزحف ويبجي .. كامتله زمرد وشالته وهوا بس يبجي : شبيك حبيبي يهو وياك وين تعورت

دخل مرتضى وكال : يولي ليش شايلته

زمرد بخزره : انجب ولك ليش وياه

مرتضى : مو احونه ليش تحبي

زمرد : روضي شكتلك انه يمه؟ كتلك جعفوري اخييكم الصغير وحاله حال رهف تحبونه ليش هيج وياه

مرتضى : مو احووووي ولا احبه

اجت رسل وشالته وكالت : جوجو عمري شبيك تبجي .. شتريد حلويه؟ لو اشغلك تلفزيون ..

مسحت دموعه وخذته وطلعت .. جعفر من اشوفه ينكسر كلبي عليه .. صحته ابد مو تمام وضعيف حيل وحته زحف دارت سنته يلا زحف ورهف اصغر منه بس صلوات زحفت قبله .. وهوا بعده لان ولادته مبكرة وعنده مضاعفات كلش هواي .. خذوه وراجعو بي ونطوه فيتامينات هواي .. وفوك هذا كله روضي مايحبه ابد محد يعرف شسبب ..يلا يمكن جهال يكبرون ويتغيرون ..

بهاي السنة ربته رسل على ايدها .. تلبيس، تغيير، مشتره ملابس، اخذ للطبيب، سهر وياه بليل.. كله هيه .. تموت عليه وتعزه بمعزة الهوا عدها .. خطية يمكن تعويض من رب العالمين الها بعد كل هاي السنوات..

دخلت سولاف وهيه تتأفأف .. كالت بضوجة : خاله وين محمد

ام محمد : يمه توكل على شغلة