نوارس مقيدة

القيد الثالث

"بين ثنايا قسوة هذه الأيام، تدرك معنى أن يغمرَكَ اللطفُ، ويحيطَكَ الأُنسُ، ويكتنفَكَ الحب وأهلُه."

#نوارس_مقيدة

#نسرين_الأسدي

_________

سولاف :

بقينه اني وسمر نركض بدون شعور ومانعرف شكد الوقت الي ركضنه بي
لحد ما وصلنه للكراج وشفت السيارات رايحة جاية
وكفنه واحنه نلهث ورجلينه متعينه من التعب غير ارياكنه الناشفة من الخوف

سمر بدموع: سولاف احنه وين راح نروح؟!
ومامه شنو راح يصيرلها هسه؟!

بجيت وياها بس حاولت اصير قوية كدامها: حبيبتي مامه ماراح يصير بيها شيء واحنه بس نوصل لبيت خالو.. اندليهم البيت وهمة يجون ويجيبونها.. بس احنه لازم نروح الهم

بقينه واكفين.. ونسمع السواق كل واحد بيهم يصيح لمحافظة
فترينه بين السيارات واحنة ندور واحد يكول بصرة
شوية وسمعنه صوت صاح: بصرا.. بصرا

لزمت ايد سمر وركضت للسيارة وصعدنه.. انتظرنه دقائق لحد ما قبطت وصعد هو وبدئ يسوق .. وصاح واحد : صلو على محمد وال محمد

رددنه كلنه بصوت واحد خله كلبي يبرد شوي : اللهم صل على محمد وال محمد

مشت السيارة واحنه عيونه عالطريق وبالنه كله يم مامه .. ياربي فدوة لسمك احميها.. وخليها تجي ويانه .. و ياربي كون ميثم مات..

تحركت السيارة بينه ودفعنه الكروة الي مامه مخليتها النه
والطريق كلش بعيد ما اعرف شكم ساعة ضلينه بس نغفى من التعب ونكعد ومن يوكف بمحطة وينزلون الناس احنه نبقى بالسيارة ومننزل

صار الفجر ووكفت السيارة وبدت الناس تنزل.. كامت سمر
ولزمت ايدها: اوكفي سمر يمكن بعدنه ما واصلين

سمعتني وحدة جانت كاعده كدامنه وكالتلي: لا حبيبه وصلنه هذا الكراج شبيج يمة شنو أول مرة تجين للبصرا؟!

هزيتلها راسي وكمت ويه سمر

نزلت الناس كلها وكلمن راح لجهة ويه عائلته والبعض اخذوا سيارات تكسي لبيتوهم واحنه بقينه واكفين داخل السيارة

كال السايق: شنو خالي اليوم مالجن نية تنزلن؟!

كتله: عمو فدوة حباب.. اخذنه لهذا العنوان.. لأن ما نندل والله

: شبيج يابه انه حدي هنانه للكراج ترديني هسه ادورلج عناوين.. نزلن بوية انه وراي وادم رايد اجيبهم لا تكطعن رزقي

نزلنه وهو حرك السيارة ومشه.. واحنه بقينه واكفات بالكراج محتارات ما نعرف وين نروح وشلون نوصل

سمعت السواق كلمن يصيح لمنطقة.. بس ولا وحد منهم كال اسم منطقة خوالي
لزمت ايد سمر بقوة ومشيت بين السيارات احاول الكه شخص يدليني ويوصلني الهم