نوارس مقيدة

القيد الثلاثون

صفق جيداً لـمن علـمك القسوة ثم اصفعه ليعࢪف انكَ تعلمـت .

#نوارس مقيدة
# نسرين الاسدي

__________

عذراء

ضليت على وكفتي .. وابد مافاجئني تصرف سمر لان اعرفها تحبه وتريده .. بس الفاجئني روحي .. انه لجنت بكل مره المحهم سوا اضوج واختنك واحس الغيره خانكتني .. هلمرا غير.. احس روحي مامهتمة ولا جنه الكدامي نفسه سيف رجلي .. الي جنت بيوم اعاركه واغار واضوج ..

ضلت صافنه بي وتتبسم .. تمشت الهم وكلت : النضرات ماتسوي شي.. جيبيله العلاج..

رفع سيف عيونه الي واستغفر بصوت ناصي .. وسمر كامت بسرعه وكالت : ع.. عذراء فهمتينه غلط

عذراء : ليش شنو شفتڪم بوضع موحلو وفهمتكم غلط؟ جاي اكلج نطي العلاج لان الصفنات والنضرات ماتطيب

سيف : لا غلطانة اكو نضرات من الشخص الصح تطيب اكثر من الف علاج..

بلعت ريگي وعفتهم ومشيت .. خليت راسي ع المخدة وانه احاول انام بس ماكدرت وين يلا غفيت..

________

زمرد

ذيج الليلة بيتو هديوه بالمستشفى وطلعوها ثاني يوم بس الفرخ ماطلعو كالو تعبان رح يخلونه بالخدج ..

وهيه اول ماطبت تبجي ماسكتت ..
الحجية : وج يما كافي شمالج تبجين مايصح

هديوه : جا ترضونها تكتل ابني تغار مني

ام صادق : شوفي خليني محترمتج كبل مايصير ابنج هوا ابنه وابن اخوها لرسل ماتفكر تكتله عوفي هل خرط

هديوه : كلجن كاعدات وشفتنها شون تعاركني

ام محمد : اي يما بس هنه جانن يغسلن تشتم ايدها انتي تعبرين وتزلكين

ام هديوه : جا هيه مامرجية منكم تدافعون الها وبتي توكفون ضدها

حليمة : شوفي ولج محد واكف وي وحده وصاير ضد وحده .. بتج ماتمشي عدل شنسويلها

سكتت هديوه وخلص الليل صادق ينزل ويصعد ماركد محد يعرف شبي ..

ام صادق : يما شوفي انه لكيت عوذ مدحسه بكنتور صخيمه هديوه وخذيتهن للعلوية كتلها اذا عمل بطلي

الحجية : لا حول ولا قوة الا بالله عرفتها انه بس كلت مامتاكدين

ام صادق : يمه مربطة لولد تربط الله يساعدة ماتخبل

الحجية : ليش هسه هوا عاڰل؟

ام صادق : المهم نكشفت بعد مانأمن بيها .. ورح تضل بس علمود الفرخ ..

الحجية : الله كريم يمه .. شوفي مدامها نفسه خن ننزلها جوه واريدجن انتي والبنات تطلعن هدوم صويدق كلهن تنكعنهن بماي وملح ورشي عليهن خل .. والغرفه تجلفنها جلف فاهمه