نوارس مقيدة

القيد الثاني والثلاثين

#متابعاتنه الحلوات واخواتنه
ڪل عام وانتم بالف خير حبيباتي ربي يسعدكم ويحفظكم ويحققلكم امانيكم .. والتدرس منكم ياااارب النجاح والتوفيق .. والمنتضره امنية يارب تتحقق .. نحبجن نسرين &بدوشة ♥.

#نوارس_مقيدة
#نسرين_الاسدي
________

طلع محمد ودخلت هي
التفتت لعمتها وكالت : عمه اكدر احجي وياج

جواهر : اكيد عمه تعاي كعدي

رسل : انه جنت عابره وصدفه سمعت حجيكم انتي ومحمد

جواهر : عمه رسل مثل ما سولاف بنتي واريد سعادتها انتي هم بنت اخوي واكيد ماراح ارضى بسعادة بنتي على حسابج انتي

رسل : بس عمه الي سمعته من محمد هي تحبه

جواهر : سمعي عمه سولاف وسمر انه ربيتهن احسن تربية وهواي تعبت عليهن عمرهن كله ما متعرفات على اي رجال ولا حته مختلطات بيهم ومن اجنكم هنا
ولد خوالهن اول شباب بحياتهن يمكن هذا السبب الخلاهن يتعلقن بيهم
ادري انتي وعذراء هواي ضايجات منهن وماخذات عنهن فكرة مو حلوة بس والله بناتي مو هيج انه ما ربيتهن هيج .. وهسه راح اخذهن وابعدهن عنكم حته ما يجبلكم المشاكل

رسل : بس عمه انتي ماراح تكدرين تاخذين سولاف هسه.. هي مرت محمد ومحمد مستحيل يعوف شي يحبه

جواهر : لا عمه سولاف بعدها صغيرة وانه متأكده من راح نبعد تنسى محمد واحتمال جبير ازوجها واحد ثاني .. اطمني ولا تحسبين انتي

رسل : حته لو هي نسته بس محمد ماراح ينساها عمه.. هو مو صغير حته يحب وينسه بسرعه وانتي حته لو بعدتي سولاف عنه شني يعني ماراح ياخذ غيرها؟؟

جواهر : وشني المطلوب مني عمه

رسل : انه احب محمد هواي اكثر من روحي واهم شي عندي راحته هو حته لو هالشي معناها يعرس انه ماريده يتعب ويتعذب واذا هو يحبها ماراح احرمه منها

_____

عذراء

مرت الايام والبيت مخبوص من جهة تحضير العرس محمد بين مشترة الغرفه والغراض وعقد المحكمة الهم ..

واليوم بدو يحضرون للحنه مالت سولاف ومحمد والبيت كالعادة نخبص بالخطار .. انه رجلي ماكدر احركها هواي وحته نزلتي وصعدتي صعبات .. وسيف عساس اليوم يجي .. هواي اشيا۽ بداخلي اريده وماريده احبه واكرها .. ماعرف بس احس روحي صرت متناقضه اكثر منه ..

اجه روضي يركض وكال : عمه عمه اذه عمو ثيف وين نردسه؟

ابتسمتله : يمكن تلكاها جدامك راحت

مرتضى : لا عمه ماعيه بله وينها؟
دخلت من باب المطبخ وهيه تخطي وتجلب بالحايط .. وشافت مرتضى وضلت تناغي وتضحك ..

شلتها وروضي جدامي : يلا عمه تعاي بره عمو تعاي

ابتسمتلها فدوه شكد ينكرط من سوالفه .. طلعنه وسيف جان واكف يسولف ويضحك ..التفت شافني وابتسم ابتسامة جبيره وكال بحسره : وهلا يلمحد يصير بمجانه ..