كرونيك: مهمتي_دمرت_حياتي

04

✍مهمتي دمرت حياتي✍

الجزء 4:
مرو يومين ملي رجعت لدارها لكن ما كان حتى جديد حول المهمة مابعثولها والو من غير مساجات واتصالات عبد الرؤوف المتواصلة لي يعرض فيها خدماتو وانها وقت ماحتاجتو رح يكون بجنبها.
كانت تنظف فالدار كي سمعت جرس الباب، فتحت لقاتها عجوزة كبيرة مهترئة صبحت عليها وقالتلها: بنتي سمحيلي قلقتك في هذا الوقت بصح كنت ماشية وغلبت بغيت نريح وزيد عطشت ريقي نشف وطريقي مزالت طويلة اذا ماعندكش مشكل ندخل نريح وجيبيلي كاس ماء الله يرويك من ماء زمزم.
ميرنا: مرحبا بيك الحاجة تفضلي مكان حتى مشكل.
دخلتها قعدت في الصالون وميرنا كانت رايحة تجيبلها تشرب وهي تسمعها تقلها: قالولك حطي عقلك في راسك وديري المطلوب منك بالضبط ماتلعبيش بالنار.
دارت ميرنا باهتة مافهمت والو علاش تحكي العجوزة، سقساتها: الحاجة وش راكي تقولي مافهمت والو!!!.
بتاسمتلها العجوزة وقاتلها :ازربي جيبيلي نشرب راه نشف ريقي.
مشات ميرنا مستغربة والف سؤال يدور في بالها دخلت للكوزينة تجيب الماء، كي خرجت للصالون مالقات حتى واحد راحت تجري للباب تشوف لقاتو مفتوح طلت برا مالقات حتى واحد، غلقت بابها ودخلت للداخل جات راجعة للكوزينة ترجع الكاس وهي تشوف ظرف كبير محطوط فوق الطابلة، راحت فتحاتو لقات مجموعة من الصور تحت كل صورة اسم الشخص لي فيها ومعاهم رسالة فتحتها لقات معلومات على عايلة المرجاني عايلة معروفة وعريقة تسكن في مدينة اخرى بعيدة على مدينتهم،والشي لي ادهشها هو الشي لي مكتوب وراء الورقة لي كان يقول بلي المرحوم سي فاتح المرجاني لي هو كبير عايلة المرجاني كان صديق قديم لسي ابراهيم لي هو جدها وهي رح تدخل لوسط هاذ العايلة بصفتها حفيدة سي ابراهيم لي باغية تكمل قرايتها في المدينة لي ساكنين فيها عايلة المرجاني وبحكم هي صغيرة ماصلحتلهمش يخليوها تعيش وحدها في مدينة كبيرة فكان احسن حل انو تروح لعايلة صديقة لعايلتها. كانت مع هاذ الورقة رسالة اخرى من سي ابراهيم موجهة ل زهرة لي هي ارملة فاتح المرجاني ، يشرح فيها خوفو على حفيدتو من انو يخليها وحدها في مدينة كبيرة خصوصا انو سبق لعايلتو خسرت حفيد لي هو توأم ميرنا وانو رح يكون مطمن عليها بين يدين عايلة المرجاني. هاذ الرسالة كان ممنوع على ميرنا انو تفتحها بل تمدها مباشرة فور وصولها ليد زهرة.
بقات داهشة والاسئلة لي في راسها كثرت وتراكمت ومالقاتش اجوبة لذلك قررت تكمل تمشي على الخط لي راسمينو جدها وبوها حتى تعرف وش من وراهم.. هزت الصور لي مع الرسائل وتشوف فيهم،؛ كاينة صورة زهرة مراة كبيرة في العمر لكن باينة كانت زينة وهي صغيرة خاطر مزالو ملامحها ملاح وباينين. فؤاد ولد زهرة لكبير لقات اسمو مسطر بالاحمر ومكتوب بلي هذا بالذات لازم تراقبو مليح وتعرف عليه كل صغيرة وكبيرة وتخبر بوها وجدها بكل حاجة مثيرة للانتباه من جهتو. بعدها صورة امراة لي هي بنت زهرة واخت فؤاد.
خبات الصور والرسائل ورجعت هزت تلفونها بعدما سمعت بلي وصلها مساج من رقم مجهول مفاده بلي رح تبدا المهمة بعد يومين رح يجي شيفور يوصلها لمدينة عايلة المرجاني، وبلي لازمها تتصرف كبنت بعمر 20سنة ورح يكون اسمها تسنيم ولازم تكون فطنة في كل شي ولازمها تغير من شكلها ولون شعرها وستايلها بش تبان اصغر، تفاديا انو يكون اي احد من العايلة شافها من قبل في عروضها لي كانت تقدمهم.

حطت تليفونها ودخلت تعمل دوش بش تسترخي وتنظم افكارها. بعدما خرجت من الدوش لبست ثيابها وتوجهت لاقرب صالون تجميل، دخلت حطولها كاتالوڨ بصبغات الشعر اختارت لون ذهبي بش يبينها اصغر سنا ومنها نيولوك فرد وقت.