كرونيك: مهمتي_دمرت_حياتي

38

✍مهمتي دمرت حياتي ✍

الجزء 38:
دخلت داخل الغرفة وقفت في وسطها وبقات تمرر في نظرها على جدرانها، كانت كلها صورها وبوستاراتها في كل ديفيلي حضراتو في كل عرض قدماتو 2 في كل حفلة حضرتها حتى صور هي بذاتها معندهاش منهم، فيهم حتى صور من حياتها اليومية وهي غافلة،  بقات مدة تشوف فيهم وحدة وحدة، تلفتت جات ماشية وهي تتساطح مع شي حد. بعدت خطوتين لكنو رجع قربها منو وبقا ماسكها بين يديه من خصرها، تبسم وقال: كنت ناوي نخليها سر وما ندخلك ليها حتى تكون بيناتنا حاجة رسمية، بصح نتي فسختي المفاجأة.
سكت لما لمح دموعها وعيونها الحمر والمنفوخين من البكاء وعلامات الدهشة لي غالب عليهم الحزن في وجهها، عقد حواجبو وتكلم بنبرة قلق.
خليل: وش بيكي؟  شكون لي زاعجك؟  وش لي مبكيك؟
بعدت تسنيم خطوتين وراء، مسحت دموعها وتكلمت: مابيا والو، وش هذا لي نشوف فيه؟  يعني نتا من الاول عارفني شكون وقاعد تمثل عليا؟  يعني كيفك كيفهم، وانا لي كنت جاية عندك قلت نتا مفري الوحيد ونتا لي رح تنحي عليا، هه سع ظهرت نتا بوحدك لغز، وانا كي لبهلولة تناسيت انك خبيت عليا بلي كنت متزوج وجاية ليك نعترف بكل شي ونرتامي في حضنك تنحي عليا و تواسيني. انا لي غالطة.
جات ماشية وهو يرجعها عندو مزير عليها، خليل: معندك وين تروحي حتى نفريو هاذ المشاكل كلها، مسألة اني كنت مزوج كنت عارف انهم رح يقولولك شي نهار خاطر لي مش باغيينا نكونو مع بعض بزاف، على العموم (حكمها من كتافها ودورها جهة الحيط معنقها من ظهرها)  هاذ الصور لي تشوفي فيهم كانو ومزالو هوما متنفسي الوحيد، كون ما نشوفهمش كل يوم ونتمعن فيهم ما يفوتش نهاري وهوما لي حرروني من زواجي الاول.
(رجع دورها عندو)  شوفي انا اضطررت نتزوج من حفيدة صاحبة جدة بصح زواجنا مادامش بزاف لأنو ماكانش بيناتنا مشاعر، ونهار بالصدفة دخلت هنا وشافت صورك عرفت بلي قلبي محجوز ومكانش مجال انها تدخلوا، وقتها طلبت الطلاق وطلقنا بالتراضي وكل واحد فينا عايش حياتو.
تسنيم: وش حكاية هاذ الصور ومنين جاوك؟
خليل: ههههه قبل خمس سنين رحت لباريس بش نعقد اتفاقية مع فندق علاجال سياح كنت باغي نديهم ليها، وفي المطار تلاقيت صاحبي وعشيري لي عندي مدة كبيرة ما تلاقيتوش، عرضني نروح معاه يحضر عرض من تصميم امو، بغرض نونسو لأنو هو كان رايح بش ما يخسرش خاطر امو برك.
رحت معاه ولما بدا العرض شفت (مرر يدو على خدها)  اجمل ما رأت عيناي لساعتنا، مرأة سلبت عقلي وفتنتني، وكي سقسيت قالي انها اختو وتوأمو وقتها حسيت الدنيا ضحكتلي و تلاقيت بفتاة احلامي على catwalk.
تسنيم حلت فمها من الصدمة: م.. مش انت لي..
ضحك خليل: انا ههههه انا لي سلمت عليك وعلى امك بعد العرض مع فارس، توقعتك تتفكريني بصح نتي متفكرتينيش وعذرتك خاطر كنتي مع الستراس تع العرض. ويا لالة من وقتها وانا كل عروضك حضرتهم وحياتك تبعتها خطوة بخطوة.
تسنيم: وعلاه ماواجهتنيش؟ 
خليل: مكنتش نقدر خاطر كنت مسؤول عليك انو نحميك من شر خالي من دون ماتعرفي.
تسنيم: تحميني؟؟  وكفاه مسؤول عليا؟  شكون لي كلفك؟
خليل: توأمك لي هو كي خويا
تسنيم: فارس؟؟؟  اااا.... حبس حبس يعني نتا كنت عمبالك بلي فارس حي ما ماتش وتعرف بلي انا دخلت لداركم بش نتجسس وتعرف حقيقتي كلها،و... نهار عيطتلي ميرنا كانت غلطة لأنك تعرفني!!!! ههه(وهي راجعة خطوات وراء)  مش مصدقة صح صح، يعني الشخص الوحيد لي خطر على بالي انو رح يواسيني في كربتي بعدما تخدعت وعرفت انو توأمي عايش، طلع عمبالو بكل الحقيقة ومتشارك معاه ومخبي عليا ههه لا الصراحة برافو 👏👏طلعت ممثل ابرع مني.
خليل: تسنيم انا...
ماخلاتوش يكمل وصرخت : مييييرنا انا ميرنا علاه مزلت تمثل ياك المسرحية خلصت.. تعرف!.. كلكم كيف بعض وانا لي كنت خايفة من رد فعلك بعدما تعرف حقيقتي خايفة مشاعرك تجاهي تتغير ونخسر اهتمامك.
مابقيتش باغية نشوفكم.
خرجت تجري وهو وراها يعيط خرج من لاجونص مقدرش يلحقها ويخلي لاجونص محلولة رجع ما بين ماغلقها، تلفت لقاها هزت طاكسي ومشات.
#يتبع😊