كرونيك: مهمتي_دمرت_حياتي

07

✍مهمتي دمرت حياتي ✍

البارت 7:
فاقت الصباح على الخمسة لأنها تعودت تفيق هاذ الوقت، بقات حوالي خمس دقائق في بلاصتها تخمم كيفاه تتصرف مع هاذ العايلة لي راهي وسطها، دخلت للدوش غسلت ومن بعد خرجت لبست لباس رياضة وهبطت للجردة تجري.
وصلت قدام بحيرة تفصل بين الجردة تع فيلا الجوهري وجيرانهم وقفت تشوف في انعكاس صورتها على الماء فجأة سمعت صوت ماشي ويقرب، تخبات وراء شجرة بقات تشوف في شخص كامل البنية خارج من البحيرة بشعرو مبلول و صدرو العريض شق الماء، بقات تخزر فيه حالة فمها حتى قرب للشجرة لي هي فيها وقعد على الارض وقتها قدرت تميزو شكون هو، خليل حفيد زهرة. تكا ظهرو على الارض وهز راسو للسماء الشمس هذاك وين تشرق وتبعث اولى خيوطها الذهبية الساحرة والنسمة النقية لي تبعث الروح في جسم الإنسان وتخليه يفوت نهار مليء بالنشاط لانو رئتيه تجدد فيهم الهواء والطاقة السلبية راحت. تبسم بعد مدة ونادالها: اخرجي تشوفي المنظر من هنا افضل.
دهشت وبقات تشوف مع جنابها معامن راه يهدر، ماسمعش صوتها هز راسو لوين متخبية وناداها: تسنيم ارواحي نعرف راكي هنا.
خرجت تسنيم من وراء الشجرة حشمانة، وقفت قدامو وقالت: صباح الخير
تبسم تبسيمة تسحر و رد عليها: صباح الانوار، اقعدي تشوفي ابداع الخالق. (قعدت قدامو وهزو راسهم في زوج يشوفو ف الشروق منظر يهبل)
خليل: هذا اجمل منظر يخليك تحسي بلي الحياة حلوة وتبداي نهارك نشيطة خاطرك خذيتي جرعة منشطات من الطاقة الايجابية لي تبعثها اولى نسمات الصباح فينا.
هو يحكي وهي مش معاه قاعدة تخزرلو مرة لعيونو لي منظرهم مع لون الشمس ولاو يسحرو يبانو كريستال ومرة لشفايفو وكفايه يحرك فيهم مرة لشعرو المبلول لي لونو اشبه بخيوط الشمس الذهبية وقالت بين شفايفها: بالنسبة ليا ماشفتش اجمل من هاذ المنظر سبحان المبدع.
دارلها لقاها تخزرلو وتتبسم تبسيمة بلهاء وتمتم وحدها هو سمعها بصح مابينش، تبسملها وقال: قلتي شي حاجة؟
تسنيم فاقت على روحها: هاء!! لالا ماقلت والو (بدلت نظرها للشمس) قلت صح عندك حق اجمل منظر.
بقاو مدة ساكتين ويتفرجو في انعكاس خيوط الشمس الذهبية على الماء واللمعان لي انعكس في عيونهم. تلفتلها وقالها؛: كنتي ديري في السبور؟
تسنيم: هيه نحب ندير سبور في الصباح خاطر يساعد عملية الأيض وينشط للقلب.
خليل: ودايما هكا تفيقي بكري؟ قصدي عموما الشباب يحبو نوم الصباح و غير الناس لي متقاعدين وكبار فالعمر لي يفيقو بكري،لأنهم اكثر اشخاص عارفين قيمة النهوض بكري ويقلك فيه بركة لانو ربي سبحانو يوزع الارزاق على الصباح على هذا العصافير دايما مبكرين.
تسنيم: امممممم نفهم من كلامك انك واحد من هاذ الناس الكبار و المتقاعدين ولي يعرفو قيمة الفيقة بكري! هههههههه
خليل: ههههههه قاعدة تتمهزاي بيا ههههههه، يا لالة منيش من الناس المتقاعدين بصح من الناس الكبار على الاقل بالنسبة ليك
تسنيم: اهاه.. يعني تحب تقول اني انا صغيرة وانت يا كبير تعرف قيمة الفيقة بكري!! ههه يا سيدي نحب نقلك انو منين كنت صغيرة وانا نوض بكري وندير سبور ونبدا نهاري نشيطة، يعني بالمختصر من وانا صغيرة كبيرة ههههههه
ضحك خليل حتى بانو ضروسو
خليل: صح عندك حق يا كبيرة من وانتي صغيرة ههههه ..احم هيا ندخلو يكونو قريب يفيقو.
تسنيم(تبسمت): هيا.
ناضو ماشيين دخلو للداخل وكل واحد فيهم راح لبيتو يدوش ويبدل بش يهبطو يفطرو مع الجماعة.

#يتبع😊 ماتنساوش تجمجمو كل جزء قريتوه