كرونيك: مهمتي_دمرت_حياتي

18

✍مهمتي دمرت حياتي ✍

الجزء 18:
تسنيم كانت متخبية وراء باب قصديري فالمستودع مش بعيدة بزاف على فؤاد والشخص الملثم لي وراه، شافت كل شي وبدا الخوف يتسلل لقلبها.
تلفت فؤاد للشخص لي حاط عليه السلاح وكان رح يتقدم خطوة نحوه ،حتى تكلم الشخص مانعو انو يتحرك: متتحركش ابقى في بلاصتك، نظن مادامك كل مرة ونتا تبع فيا ومزلت ميأستش معناها متوحشني ههههه قلت خلي نبردلك قلبك ونجيك تنحي مني الوحش. تعرف بلي في كل مرة نبعثلك رسالة بموقع غالط نقول هالمرة مش رح يطيح فالفخ بصح نتا مش مخمم تنساحب وخليتني نحطك في بالي، ونتا اكثر واحد عارف بلي انا اذكى منك مليون مرة الشي لي مخليني كل مرة تدخل سلعة جديدة نديهالك بسهولة، لاني تربية هذوك لي راني ننتاقم منهم وتدريبك نتا😂، على كل نظن صار الوقت لي نتخلص منك سي فؤاد.
فؤاد : (ضحك ضحكة غل واستهزاء) تتخلص مني!! ههههه نتا اكثر واحد تعرف بلي فؤاد مايخافش من الموت، وتأكد انو...
قاطعو الشخص يضحك: هههههههههههههه تزيد حرف شهد على روحك . المهم مش رح نطول معاك، السلعة بعثتها للبلاصة وين رح نستفاد منها في تنفيذ العملية الجاية لي رح تكون مدمرة للغاليين على قلبي وقلبك مش هكا! 😂(طلق ضحكة قعد صداها يتردد في المستودع)
فؤاد: علاش غدرتني وسرقت السلعة ورح تتصرف فيها لمصلحتك؟ بعدما عاونتك تتخلص من اقرب الناس ليك ولي نفسهم آذاوك و اوهمتهم انك مت و بش تقدر تتصرف بحريتك ساعدتك انو تغير شخصيتك واسمك، علاش الغدر؟
الشخص: هههههههههه لازم تعرف حاجة يا فؤاد، عمرك ما توثق في حد حتى لو كان محتاجك تقدر تعاونو بصح une foisتطلع بيه يدور عليك طبعا كيما صارلك معايا هههههه تعرف علاش!!خاطرك واحد مايسواش مات باباك وخلاك في وسخو ونتا عاجبك الحال ماخليت حتى خدمة مشبوهة مادرتهاش. انا اذا انتقمت ف لأنو وصلت بيا للعظم ودمرولي حياتي بغيت ندير حاجة نخسرهم دراهمهم و نحيلهم راحة البال ،مش عارفين انو الشخص لي قاعد يفسدلهم في خدمتهم من تدريبهم ههههههههه.
على كل زوج كلمات رح نقولهملك بعد على طريقي احسنلك والا رح نبعثك للروضة هذا اخر تحذير.
مشا خارج من المستودع وخلا فؤاد يغلي وحدو تلفت يضرب ويكسر بعدها خرج ركب في طوموبيلو وديمارا.
تسنيم بقات واقفة وتحاول تربط فالاحداث يعني فؤاد هو لي مستورد الاسلحة باسم كلوديا ،وهذا لي كان يهدد فيه شريكو من بعد دار عليه. خممت تتصل ب باباها بش تخبرو لكنها فضلت انها كي تكون في بلاصة امنة وتحكي براحتها احسن، زربت في خطواتها خارجة من المستودع بعدها بدات تجري بش تخرج للطريق وتوقف طاكسي لانو المكان مهجور وبعيد على الطريق الرئيسي.
بقات تجري بش تزرب تلحق للطريق فجأة دارت رجلها ومالقات روحها غير وهي تدحرج على منحدر وطاحت في حفرة مغمى عليها.

#يتبع😊