كرونيك: مهمتي_دمرت_حياتي

30

✍مهمتي دمرت حياتي✍

الجزء 30:
قاعدين متقابلين في كافي وسط المدينة.
كارمن: صدقني ولا كأنو شاف الصور يعامل فيها كيما قبل واحسن.
عبد الرؤوف: نتي متأكدة بلي شافهم؟ بالاك غلطتي في الرقم ومابعثتيهمش للواتساب تاعو؟؟
كارمن: تتمسخر بيا!! كفاش نغلط في حاجة كيما هك، مستحيل.
عبد الرؤوف حك لحيتو : معناها كاينة إن فالموضوع.
كارمن: اسمعني نتا لازمك تتحرك، انا راني اعوام من وقت مرتو الاولى وانا نحاول بصح مفيش فايدة، تبعد وحدة تجي اخرى. وهدفنا واحد نتا تستفاد وانا نستفاد.
عبد الرؤوف: صار هو كان متزوج؟؟
كارمن: هيه كان متزوج وحدة اسمها آلاء حفيدة صديقة جدة، بصح بعد عامين طلقو ولسبب غير معروف، لحد الآن واحد مايعرفو من غيرهم في زوج، وهي اصلا من وقت طلقت راحت تعيش حياتها وماداتهاش فيه.
عبد الرؤوف: مممممم مليح، و تسنيم تعرف بهالشي؟؟ يعني تعرف بلي كان متزوج من قبل؟
كارمن: لا ما نظنش، (هزت كتافها) اصلا حتى لو تعرف وش رح يغير وهو كل اهتمامو حاليا ليها يخاف عليها اكثر من عيونو.
عبد الرؤوف تبسم ابتسامة على جنب وقال: لا رح يتغيرو بزااااف حوايج.
كارمن شافت معاه بتساؤل : وش لي ناوي عليه؟
عبد الرؤوف وهو يشوف لبعيد: رح تعرفي عن قريب. المهم حاليا بغيت منك خدمة صغيرة اخيرة بعدها رح يصير لي باغيينو في زوج نتي خليل ليك وانا تسنيم ليا، وبعدها لا تعرفيني لا نعرفك.
كارمن: اكيد..قول المهم هو يصير هاذ الشي.
عبد الرؤوف: احم.. شوفي بغيتك تحوسيلي على اي صورة لخليل مع مرتو هذي آلاء ولا كفاه اسمها وتبعثيهالي في اسرع وقت منا للعشية تكون عندي.
كارمن: اوك ساهلة، اصلا انا حضرت لعرسهم وعندي صور معاهم في زوج، نروح نبعثهملك.
عبد الرؤوف ناض وهز نواظرو دارهم : مليح، هيا سلام.

بعدما سمح الطبيب لسيدرة تخرج من الكلينيك، رجعو للفيلا بعد منتصف الليل، اول حاجة دارها خليل هي تفقد تسنيم، دخل لغرفتها بالشوي كانت راقدة، بقا دقائق يتمعن فيها بعدها تأكد من النوافذ والبالكون وخرج ساد من وراه الباب. ليلة كاملة النوم مازارش عيونو كل شوي يروح يتفقدها حتى طلع الصباح.
#يتبع😊