كرونيك: مهمتي_دمرت_حياتي

08

✍مهمتي دمرت حياتي✍

البارت 8:
قاعدين على طاولة الفطور، يفطرو ويحكو ناشطين غير هي قاعدة تشوف من واحد لواحد تحاول تقرا افكار كل واحد و شخصيتو بش تعرف كفاه تتصرف. لاحظت صونيا ام خليل شرودها تبسمت وتكلمت : تسنيم ليوم نشالله لازم نخرجوك تتعرفي على المدينة وتشوفيها.
تسنيم ضحكت: ههه اوك نشالله.
زهرة: مالا كملو فطوركم ونخرجو في نزهة، فااطمة (الخدامة) بنتي حضريلنا حوايج النزهة مع شوي شهيوات ناخذوهم معانا.
فاطمة: حاضر مدام.
حضرت تسنيم نفسها ونزلت لقاتهم كل واحد راكب في سيارتو ماعدا خليل لي متكي على سيارتو ويستنا فيها مع شافها تبسم وفتحلها الباب بش تقعد بجنبو، ركبت تسنيم معاه وهو طريق كامل ساهي فيها وفي تصرفاتها، هي تعمل في سلفي وتضحك ومنسجمة مع الغناية لي حاطها تع سعد المجرد Casablanca، فجأة تلفتت لقاتو يشوف معاها شوفة تذوب ويتبسم، شافت فيه بحيرة وهو فاق مع روحو رجع يشوف مع الطريق. هي دارت تبربش في تلفونها وتخمم في نظرتو محستش غير وهي تتبسم، شافت معاه وقاتلو: خليل هيا نعملو سيلفي مع بعض 😊
خليل: ههههههه اوك هيا ،بصح اكيد مش رح نجي مليح فلافوطو وانا قدامي قمر جمالو طاغي 😉
حشمت تسنيم وهبطت راسها، ضحك على تصرفاتها وهز موبيلها من بين يديها وعملو بزاف صور مع بعضهم.
دارو نهار كامل و زارو المناطق المشهورة بيها المنطقة تعشاو في مطعم تقليدي و رجعو للدار دخلو كل واحد لبيتو . اما كارمن فبقات تغزل وحدها تمشي وتجي في بيتها من القلقة والغيرة من نظرات وتعامل خليل مع تسنيم كفاه لاهي بيها ومهتم بكل حاجة تخصها وهي لي من وقت رجع من روسيا للجزائر وهي تحاول تلفت انتباهو وتحظى باهتمامو لكن لا نتيجة هو مش مهتم ابدا و تسنيم لي من فترة قصيرة قدرت تاخذ كل اهتمامو، بقات تخمم وش دير وخذات قرار بلي مش رح تستسلم قدام وحدة فصعونة لازم خليل يكون ليها ويهتم بيها هي.
مرت ايام وسي ابراهيم بعث اوراق للجامعة مزورة بإسم تسنيم من بينهم بطاقة التعريف الوطنية بش تقدر تقرا بدون مشاكل وتكون التمثيلية ناجحة بدون اي شك، تسجلت تسنيم فالجامعة وكل اهل الدار مهتمين بيها ويعاملوها مليح واهمهم زهرة وخليل واحد اهتمامو نابع عن محبة والثاني اعجاب وتعلق ويمكن يولي حاجة اخرى، وهاذ الشي زاعج كارمن بشكل كبير لأنو زهرة متعاملش كارمن مليح لانها بنت مستهترة وطايشة مش قد المسؤولية دماغها فارغ وكل همها الشوبينغ والمظاهر والسفر والماكياج.
بالنسبة للجاسوسة تاعنا لحد الآن مش فاهمة علاه بعثوها لهاذ الدار لأنها ما لاحظت عليهم حتى شي غريب او يدخل الشكوك ومالقات حتى شي مشتبه فيه، مزالت تنتظر غير تتلاقى بفؤاد لي مسافر بش تشوف تصرفاتو وتحاول تلقى حاجة تساعدها بش تخلص مهمتها في أسرع وقت، لأنو كل ما اهل الدار يعاملوها مليح كل ما هي تكره روحها وتحس بلي راهي تخون فيهم وفي ثقتهم.

#يتبع😊