كرونيك: مهمتي_دمرت_حياتي

39

✍مهمتي دمرت حياتي ✍

الجزء 39:
حطتها الطاكسي قدام فندق صغير، دخلت حجزت غرفة وطلعت رقدت مباشرة و دموعها على خدها.
صباح يوم جديد، فتحت عينيها على اشعة الشمس الداخلة من النافذة، بقات متسطحة مدة وهي تشوف مع السقف وعقلها يحاول يستوعب هالصدمات لي وراء بعض. بعدها ناضت دخلت دوشت وخرجت صلات صلاتها لبست ثيابها ونزلت تفطر.
بعد الفطور هزت طاكسي مباشرة واتاجهت لمدينتها، ناوية تقابل توأمها وتلومو، تسبو تعاتبو وترمي روحها في حضنو تنحي الوحش.
خليل كان في مركز التحقيق في مدينتهم،قاعد يستنى في محامي العائلة يجي بش ياخذ الاذن ويقابل فؤاد، بعد مدة تم داخل المحامي وبعد عناء وانتظار طويل، دخلو عندو بعدما ما خلص التحقيق.
دخل خليل يلقى فؤاد قاعد في غرفة الزيارة يستنى.
خليل وقف ودار يديه في جيابو : عجباتك نتيجة اعمالك؟
فؤاد: اسمعني خليل، نتا مش رح تحاسبني ماتنساش راني خالك ومعندكش اي حق تحكي معايا بهاذ الطريقة، انا قابلتك بش نوصيك اولا على كارمن، اوقف معاها وماتخليهمش يحبسوها انا حاولت مانجبدش اسمها بصح المحامي خبرني بلي رح يلقيو القبض على امها كلوديا فور دخولها للجزائر، لانها كانت متعاونة معايا والاكيد مادام كارمن هي لي كانت وسيط بيننا رح يحبسوها، ولدي نترجاك ماتسمحش بهالشي مش باغي اغلاطنا حنا تغرقها حتى هي، ونتا تعرف حياتها كفاه هي محتاجة سند ومحتاجة لي يدعمها ويحن عليها، ماتخليهاش وحدها نعرفك راجل وقد المسؤولية.
خليل ضحك بالجنب باستهزاء:هه لو كانت تهمك من الاول مادخلهاش لوسخك وتستغل عقلها لي يوزن 2 غرامات.
فؤاد هبط راسو : المهم خليل لي صار صار ، ذرك نوصيك حتى على امي اتهلا فيها خبرها اني بخير مرأة كبيرة ومش قد الصدمات حاول تخبرها شوي بشوي. وتهلا في امك واختك راك راجل العايلة.
خرج خليل من عند فؤاد وهو يغلي بالاعصاب، ركب في سيارتو يسوق ويتفكر في هدرة فؤاد على فارس بعدما حكالو كل شيء، وقتها فهم حالة ميرنا كي جاتو تبكي وتقلو كيفك كيفهم وانا جيتك تنحي عليا وطلعت مخبي عليا حتى نتا. كره روحو وقتها يعني وكأنو هي ناقصها صدمات وتعب نفسي زاد على مابيها الشي لي اكتاشفاتو. اكسيليرا خارج من المدينة.
عند ميرنا.
وصلت لمركز التحقيق، اتاجهت لمكتب باباها دخلت بعدما دقت. أحمد بمجرد ما شافها وقف وبقا يتفحص في وجها يحاول يقرا افكارها ولي تخمم فيه. كانت لابسة شوميز فوقها فاست كلاسيك كحلة، سروال كحل وطالون فالانتينو كحل وتحتو احمر مع بوشيت شانيل ، منظرها يوحي الى انها ناقمة على الوضعية لي راهم فيها والحالة لي وصلولها.
ميرنا: صباح الخير.
أحمد: صباح النور بنتي، وش راكي؟
ميرنا: كيفاه رح نكون! اكيد مش توووب. المهم انا جيت بش نقابلو.
أحمد تنهد: أصلا هو كان طلب منا يقابلك. ارواحي معايا.
نزلو تحت وين محبوس ودخلت عندو، هز راسو بعدما سمع صوت طالون يمشي ويقرب، شاف معاها مدة حتى غرغرو عيونو اما هي مانزلت حتى دمعت، خرج أحمد وخلاهم وحدهم، وقف فارس تقدم عندها وهو متردد حاير من رد فعلها.
#يتبع😊