كرونيك: مهمتي_دمرت_حياتي

24

✍مهمتي دمرت حياتي ✍

الجزء 24:
بعد مرور يومين 🌖
بعدما خرجت تسنيم من الجامعة ركبت طاكسي رايحة لمطعم تتغدى لانها بغات تريح شوي وحدها، تريح بالها وتخمم في الحريرة لي راهي فيها.
خلصت الطاكسي جات ماشية للمطعم، ماحست غير بيد جرتها من يدها، كي دارت لقاتو عبد الرؤوف.
عبد الرؤوف : مرحبا الزين سمحيلي اذا خلعتك بصح من الصباح وانا نستنى فيك قدام الجامعة.
تسنيم باندهاش : نتا!! وش جيت دير؟ وعلاش تستنى فيا؟؟ بعثك جدي كشما تقلي؟؟
عبد الرؤوف ضحك وحك راسو: ههه صراحة لا، واحد ماعلابالو بلي جيت هنا. انا جيت خاطرني توحشت نشوفك ولازمنا نوضحو بزاف امور.
تسنيم: عبد الرؤوف امشي ما كاين بيناتنا ما يتوضح.
جات ماشية رجع جبدها والمرة هاذي جات بين يديه و قريبة ليه بزاف: لا كاين بزاف نوضحوه، واذا ما بغيتينيش نهزك قدام الناس ونديك بش نهدر معاك بالسيف، لازمك تمشي معايا ندخلو، ياك كنتي جاية تتغداي! خلينا نتغداو مع بعض ونحكيو.
شافت تسنيم يمين وشمال اكيد لو رفضت رح يعملها، مالا قالت ماعندي ما نخسر اذا تغديت معاه وفرد مرة خلي نقطعلو الامل في الشي لي راه في بالو.
مشات تسنيم داخلة وهو وراها. دخلو قعدو على الطاولة جاهم السيرفور : مرحبا بيكم. حطلهم ال menu ومشا.
طلبو وش بغاو وبعد وقت قصير جات طلبيتهم وقعدو يتغداو في صمت.
بعدما كملو الغداء، مسحت تسنيم فمها حطت يديها على الطاولة: اهيه تغديت! بصحتك، خلينا ندخلو فالموضوع لي جايني لهاذ المدينة على جالو وباغي توضحو، ومن فضلك باختصار.
شاف معاها عبد الرؤوف ضحك وهز كاس ماء شرب منو وتلفت عندها : احم الله يسلمك، ومادامك باغية الاختصار، رح ندخل مباشرة، ميرنا ان...
تسنيم: اشششششش (تكلمت بصوت منخفض) وشمن ميرنا تاعك انا هنا تسنيم تسنيييم
ضحك عبد الرؤوف: هههه اوك يا لالة تسنيم، المهم انا من اول مرة شفتك عييت نحيك من بالي ديما نخمم فيك، فالاول حاولت نتقرب منك بش على الاقل نخفف عليك الحزن لي كنت نشوفو في عينيك، بصح نتي ماكنتيش تعطيني فرصة وكل ما نقرب خطوة نتي تبعدي. حاليا نظن بلي راكي ماشية مليح فالمهمة لي مكلفينك بيها وعن قريب رح تخلصي وتتهناي منها وقتها نقدرو نكونو مع بعض. اعطيني فرصة
تسنيم: اوووف شوف عبد الرؤوف، نتا شخص ما شفت منك غير الخير بصح كل شي يجي بالسيف الا الحب بالكيف، وانا يا ولد الناس مش باغية نظلمك معايا ولا نظلم روحي، زوج كلمات رح نقولهملك ونتمنى تتفهم هاذ الشي، نحيني من بالك لا انا ليك لا نتا ليا لا حاليا ولا مستقبلا.
(ناضت) وذرك اسمحلي لازم نروح عندي مايدار، اتهلى في روحك.
مشات وخلاتو متبعها بعينيه وشخص اخر قاعد مقابلهم منين كانو برا ،عينيه وعدسات تيليفونو عليهم و مبتاسم بشر.

#يتبع😊
جام لكل جزء قريتوه بليز، خاطر كاين اجزاء الجامات فيهم اكبر من الباقي