كرونيك: مهمتي_دمرت_حياتي

41

✍مهمتي دمرت حياتي✍

الجزء 41:
لما وصلو للفيلا تلاقاو صونيا رحبت بيهم وهي مستغربة من حالة ميرنا ومش فاهمة وش بيه وجها حزين وتعبان واصفر. خليل طلب من ميرنا تطلع لغرفتها ما بين ما يمهدلهم الموضوع ويحكيلهم الحقيقة لأنو لو تحكي ميرنا رح يعتبروها مذنبة، بصح كي يحكي هو حقيقة فؤاد وطبعا بمراعاة مشاعرهم ويبين بلي هو مؤيد ميرنا اكيد عتابهم رح يكون خفيف.
قاعدة زهرة صونيا ،سيدرة وكارمن مقابلين مع خليل لي مهبط راسو، بعد مدة هزو وبدا يتكلم: جدة نتي تعرفي انو جدي الله يرحمو كانت خدمتو مشبوهة وانو في اخر ايامو تاب ،بصح الشي لي متعرفيهش انو هو ماتابش غير كان يمثل عليك بش تبقى صورتو مليحة بعد موتو. وكان خلى وصيتو لفؤاد انو يكمل الشي لي بداه، ونتي تعرفي انو من فترة حكمتي عليه ادلة انو مازال فالطريق الفاسدة بصح هو حلفلك بلي تاب، وهو يا جدة ماتابش.
زهرة و دموعها على خدها: قلبي كان حاسسني واحساس الام عمرو يخيب، هئ هئ يا ربي
خليل: جدة ياك نتي طول عمرك مراة قوية وتقوليلنا لي دار حاجة مش مليحة لازمو يتعاقب عليها. صح؟
زهرة اكتفات تحرك راسها فوق وتحت بمعنى صح.
كمل خليل: لي ساعد العدالة تاخذ مجراها ويتكشفو اعمالو لي تسببو للبلاد بالضرر، شخص نعرفوه مليح وعايش وسطنا.
كارمن وجها صفار والخوف مالي قلبها. خليل محبش يحكي فالتفاصيل ويذكر كارمن لأنو يعرف بلي زهرة مش رح تسامحها وهي معندها حد من غيرهم.
صونيا: ش.. شكون يا ولدي؟
خليل: هاذ الشخص هي تسنيم ولي اسمها الحقيقي ميرنا.
فتحو فامهم من الصدمة مش مصدقين، ميرنا كانت واقفة في اعلى الدروج لي يطلو على الصالون وسمعت كل الحديث وهي دموعها شلال خايفة من مواجهتهم.
خليل: بلا ما تتصرفو تصرف تندمو عليه، ميرنا كانت مرغمة من طرف جدها سي ابراهيم و باباها، وهي جات هنا غير بش تكشف فؤاد. وحتى هي صارتلها صدمة كبيرة (وحكالهم على حكاية فارس خوها)
صونيا: يا ربي كل هاذ الشي صاير
خليل: احم المهم هي جات بش تحكي معاكم وتطلب السماح. (عيطلها بش تهبط)
هبطت ميرنا تقدمت وهي مترددة لعند زهرة طبست قاعدة على ركابيها وزهرة فوق الفوطوي، تكلمت ميرنا وعيونها معبية دموع: جدة.. نعرف صعيب لي سمعتي ونعرف مش رح تسامحيني، نتي فتحتيلي دارك ودخلتيني وسط عايلتك وحافظتي عليا كيما احفادك وانا في المقابل تجسست على ولدك وبسببي دخل للحبس، (قوات فالبكاء) بصح صدقيني والله العظيم يا جدة غير كنت مجبورة ومهددة صدقيني كنت كلما نكذب عليك قلبي يتفتت، سامحيني الله يخليك.
(وانهارت تبكي)
ناضت كارمن بعصبية تقدمت ناحية ميرنا حكمتها من شعرها: كلبة وتزيدي تحلي في فمك جيتي لاعبتها قطة لا تخبش لا تنبش تجسستي علينا ودخلتي بابا للحبس وجاية بلا حشمة تطلبي في السماح.
تقدم خليل فكها منها: كارمن الزمي حدودك واذا كان واحد لازمو يحشم هي نتي و باباك على فعايلكم خليني ساكت خير مش باغي نجبدك..
كارمن: الله لا تربحك
زهرة(وقفت) : كارمن خلاص، (تلفتت لميرنا) مش رح نقلك يعطيك الصحة على لي درتي، ومش رح نسبك ولا نظلمك لانو حتى نتي راكي تمري من فترة صعيبة. بصح مش رح نقدر ننسالك بسهولة انك كنتي تكذبي عليا ونتي تخزري في عينيا.
مشات طلعت لغرفتها وخلاتها تبكي، كارمن غادرت بعدما قالهالها خليل، تقدمت صونيا لميرنا وحضنتها( لانو طبيعة صونيا حنينة بزاف وغاضتها ميرنا).
#يتبع😊