كرونيك: مهمتي_دمرت_حياتي

33

✍مهمتي دمرت حياتي ✍

الجزء 33:
بعدما تم القضاء على الجماعة الارهابية وجماعة فؤاد، حكمو العساكر مجموعة من الرجال مازالو حيين ربطوهم ، جابوهم وحطوهم فالوسط ودارو بيهم، حتى جاء سي ابراهيم وأحمد و عبد الرؤوف.
وقفو قدا مهم، تقدم سي ابراهيم ناحية فؤاد نزل عندو وهدر.
سي ابراهيم: قبل خمسين عام كان بوك اكبر مني بصح كان خويا مش صاحبي تقاسمت معاه الحلو والمر، الفقر والجوع ولما حبيت بنت ودخلتها قلبي اضطروني نسافر للخدمة الوطنية خليتها امانة في رقبة بوك وصيتو يحطها في عينيه ما بين ما نرجع، بصح تصدق لي صار؟؟ ههههه بوك لي امنتو عليها لما رجعت فرحان بش نشوف حبيبتي لقيتها متزوجة منو وحاملة بيك، هي كانت مرغومة من والديها بصح هو كان خاين، وقتها كي واجهتو تعرف وش قالي؟ ههه قالي هي تاعي ذرك ونتا دز معاهم معندك ماتقضيلي.
وقتها نقمت عليه وكرهت كل حاجة خاصة بيه ماعدا امك، تعرف علاش!!لانو حب بريء ما كتبلوش يكمل، كنت منين نتلقاها تعتاذر مني وتبكي وتردد كلمة سامحني مش بيدي.
بصح تعرف بلي بعد سنين لما كبرنا وكل واحد فينا بنا عيلة سامحتو، صدقني سامحتو وتناسيت حتى اني كنت مرة على مرة نزوركم، بصح تعرف وش لي رجع خرب العلاقة بينا؟؟ خدمة بوك الكحلة هو مابقاش صاحبي لي تربيت معاه، لا ولا شخص ماكانش في قلبو رحمة كل الاعمال المشبوهة يديرهم، بعدت عليه لانو مايسرنيش نكون قريب لشخص كيفو، بدلت المدينة وخليت كل شي ورايا.
بعد وفاتو تألمت بصح قلت هكا احسن على الأقل البلاد تتهنى من مفسد كيفو، بصح نتا كنت للأسف وريثو فالخدايم الكحلة، كنا في كل مرة نلقيو عليك القبض تخرج منها براءة باستخدام نفوذك وبمساعدة بعض الرؤوس المفسدة فالبلاد، بصح صدقني هاذ المرة راك غارق لڨطوشتك بالجرم المشهود.
(وقف وخلاه، تقدم ناحية الشخص لي كان ملثم.)
سي ابراهيم: وهذا علاه وجهو مخبي، نحيو اللثام.
تقدم واحد من الرجال نحاهولو فور ما هز راسو قعدو داهشين وحالين فامهم.
احمد من الصدمة طاح على ركابيه وهو مش مصدق، سي ابراهيم الدم جمد في عروقو.
احمد: ف.. فا.. فارس!!!!!!!!!!
فارس ضحك باستهزاء : جدي، بابا الغالي علاه مستغربين!!! هذا هو الوحش لي ربيتو فيا علاه داهشين من نتيجة خدايمكم؟؟
سي ابراهيم تقدم ناحية احمد وقفو وقال: اعتاقلوهم كلهم لأنو المسؤولين لي هنا هوما لي رح يتكلفو بيهم، وهذا(اشار لفارس) سفروه لمكتبي مباشرة (في مدينتهم).
جر معاه احمد لي مزال تحت تأثير الصدمة ومشاو ركبوا في سياراتهم راجعين لمدينتهم.
#يتبع😊