كرونيك: مهمتي_دمرت_حياتي

35

✍مهمتي دمرت حياتي ✍

الجزء 35:
في مكتب سي ابراهيم، قاعدين هو وأحمد حتى نطق سي ابراهيم: لازم ميرنا تعرف الحقيقة وماتبقاش عايشة في كذبة، و مادام كملت المهمة رح نخليوها تعيش حياتها بعيد على كل هالشي، وراني منسيتش الشي لي درتو نتا لأم ولادك و ولادك، على هذي نتا لازمك تخطيها وتخليها تكمل حياتها بعيد على مشاكلك وحاول تعوضها غير على هاذ الشهور لي عاشتهم بعيدة بسبابنا.

في الفيلا.
فاقت تسنيم تتكسل، ناضت دارت روتينها صلات لبست ثيابها، حتى سمعت موبيلها يصوني، هزاتو لقاتو باباها.
تسنيم: الو بابا
احمد: صباح الخير بنتي
تسنيم: صباح النور ،وش لبارح؟؟ كلش بخير؟معلومات فادتكم؟
احمد: بخير بنتي بخير، درنا لي لازمو يدار. احم المهم بنتي حضري روحك الشيفور راه في طريقو ليك رح تجي هنا كاينة حاجة لازم تعرفيها.
تسنيم: غير الخير بابا فجعتني؟
احمد: ماتخافيش ماكانش حاجة مش مليحة، غير محتاجينك
تسنيم: واهل الفيلا وش نقلهم.
احمد: منعرف دبري راسك
وقطع عليها، حضرت حوايجها لي رح تديهم ونزلت تحت فطرت معاهم وبعد الفطور قعدت فالصالة مع صونيا وزهرة والباقي كل واحد راح لخدمتو، طبعا لحد الان مسمعوش بفؤاد.
تسنيم: جدة انا توحشت دارنا بزاف وقلت لبابا يبعثلي الشيفور نروح ونرجع.
زهرة: ولو انك رح تفرغي علينا الفيلا، بصح هذا حقك بنتي، ولو غير خبرتيني كنت طلبت من شيفور الفيلا يوصلك بلا ما تقلقي باباك.
تسنيم: لا جدة مش مشكل بلا ما نتعب الشيفور تع الفيلا... المهم مالا يكون قرب يوصل نطلع نحضر روحي.

طلعت تسنيم حضرت روحها ونزلت كان الشيفور وصل. لما ركبت بعثت مساج لخليل خبراتو بلي مسافرة، طول الطريق وهي سارحة تخمم في الشي لي رح تحكيه مع باباها، كل الاحتمالات خطرت على بالها الا الحقيقة لي رح تعرفها.

بعد ساعات، وصلت لمدينتها والشيفور توجه بيها لمقر عمل جدها وباباها ،طلب منها تتاجه لغرفة الاجتماعات في الطابق الاخير كيما خبرو أحمد. طلعت فلاسنسور وتوجهت للغرفة وقفت قدامها شحااال وهي تشوف معاها وتتذكر اخر مرة كانت هنا وكفاه كانت حالتها كي خرجت منها. بعد مدة تنهدت دقت ودخلت بعدما سمعت اذن الدخول.

#يتبع😊