كرونيك: مهمتي_دمرت_حياتي

31

✍مهمتي دمرت حياتي ✍

الجزء 31:
صباح يوم جديد، يوم مشمس.
فاقت بطلتنا تتكسل ناضت دارت روتينها الصباحي صلات لبست ثياب السبور ونزلت. بعد ساعة رجعت دوشت بدلت عليها حتى يلحقها مساج "" على الساعة 10نتلاقاك في مطعم المرة لي فاتت، مسألة حياة او موت وهذي رح تكون اخر مرة تشوفي فيها وجهي، عبد الرؤوف ""، قرات المساج وبدات تخمم تروح ولالا، واذا راحت و شافها خليل وش تقلو ساعتها وكفاه تفسرلو، بقات افكار تديها وافكار تجيبها حتى سمعت موبيلها يصوني : الو
عبد الرؤوف: صباح الخير، نعرف بلي مادامك مارديتيش على المساج معناها ماكيش جاية على هذي عيطتلك بليز ارواحي مسألة تهمك نتي شخصيا و نوعدك وعد رجال ماعندك من واش تخافي ما راح يصيرلك والو. وش قلتي؟
تسنيم بعد صمت ردت: اوك على العشرة نتلاقاو.
نزلت تسنيم فطرت مع العايلة من غير خليل لي بعدما طلع الصباح غلبو النعاس، طول مدة الفطور وهي تراقب في فؤاد وبالها مشغول، بعدما كملو كل واحد اتاجه لشغلو، طلعت تسنيم حضرت روحها وخرجت للموعد مع عبد الرؤوف. لما وصلت لقاتو يستنى فيها.
عبد الرؤوف: صباحو
تسنيم: صباح النور. معنديش وقت بزاف قول لي عندك.
عبد الرؤوف: هههه ديما مزروبة متخلينيش حتى نشبع من شوفتك.
ناضت تسنيم رح تغادر وهو يوقفها.
عبد الرؤوف: لا خلاص غير ضاحك معاك، ريحي رح نقلك على واش عيطتلك.
رجعت قعدت تسنيم.
عبد الرؤوف: شوفي تسنيم، انا راجل وعندي كرامة اكيد بعدما رفضتيني مش رح نبقى نقلق فيك، بصح مؤخرا عرفت حاجة خلاتني نضطر نقولهالك بما انك بنت الشخص لي عندو فضل عليا في اني نكون في المنصب لي راني فيه حاليا. عرفت حاجة على شخص يخصك هه يعني حتى لو نتي ماقلتيش انو يخصك فأنا كوني راجل عندو تجارب متأكد بلي يخصك.
عقدت تسنيم حواجبها بتساؤل: شكون؟؟
عبد الرؤوف: خليل
تسنيم: وش بيه خليل؟
عبد الرؤوف: شفتي؟!! من رعبتك عليه بعدما سمعتي اسمو زدتي اكدتيلي انو يهمك.
تسنيم: عبد الرؤوف بلا تفلسيف رجاءا، وقولي وش بيه خليل؟
عبد الرؤوف: خليل خبا عليك حاجة كان لازم نتي اول وحدة تعرفيها. بما انو مهتم بيك.
تسنيم: لي هي؟؟
عبد الرؤوف: خليل كان متزوج لمدة عامين ومن فترة طلق لسبب مجهول.
تسنيم تشوكات بقات الجملة غير تتعاود في مخها.
تسنيم: م.. ميمكنش.. اكيد مش صحيح
عبد الرؤوف: ههه لا صحيح و 100%، وبش تتأكدي جبتلك الدليل. ( جبد موبيلو و ورالها الصورة تع نهار عرسهم، وصورة اخرى مع بعضهم في جبل من الثلج كانو يتزلجو )
بقات تسنيم ساكتة وتفوت من صورة لاخرى وهي في حيرة من امرها.
بعدها حطت الموبيل هزت حوايجها و ناضت خرجت من غير اي كلمة.
ماشية فالطريق مصدومة تحلل وحدها يعني علاش خبى عليا؟ ولا يمكن ماجاتش فرصة بش يقلي؟ اه اكيد ماجاتش فرصة والا كان قالي. هو ديما يعاملني مليح اكيد كان رح يقلي، بصح لو صح كان عينو يقلي راه خلق فرصة بش يخبرني، اكيد ماكانش ناوي يقلي.
بقات ماشية وحدها وتهدر، من بعد اتاجهت لحديقة عمومية وبقات مدة جالسة.

بعدما فاق خليل بدا يسترجع احداث لبارح، وناض مفزوع كي تفكر تسنيم، زرب لبس ثيابو وخرج يجري لغرفتها، دق حد ما رد عليه، نزل تحت يسقسي عليها قالولو بلي خرجت معندهاش بزاف. هز موبيلو وبدا يعيطلها المرة الأولى والثانية والثالثة.
في الحديقة، كانت مقابلة موبيلها وتشوف مع اسمو وهو يعيط ويعاود بعد عدة اتصالات، و صراع بين عقلها لي يقلها اكيد خبا عليك وماكانش ناوي يقلك وبين قلبها لي يقلها اكيد عندو عذر وكان يحوس على الفرصة المناسبة. بعد مدة قررت انها ماتهزش عليه لانها مش رح تقدر تخبي الشي لي حاساتو ورح يلاحظو من خلال صوتها، لكنها رح تبعثلو مساج.
هزت موبيلها وكتبتلو انها بخير وهي فالجامعة تقرا متقدرش ترد عليه.
بعدما وصلو المساج ارتاح نسبيا، ومشا للاجونص يخدم خدمتو لانها مكدسة.
#يتبع😊